Yaˬkoˆ 4

Miˇ tsaˬ zaˬ-ahˇ cawˬ taˬ cawˬ

1Naw maꞈ yaw kaˬ iˬ dehˬ iˬ ceh myaˬ-eu jeˬ aˬ gaˇ neh doˆ le-euˬ ta. Naw maꞈ-euˬ gʼawˇ mawˇ laꞈ kʼoeˇ aˬ myah luꞈ ceh luꞈ-eu jeˬ pyeuꞈ-eu byawˬ gʼa mo gʼa-eu nui kʼahˇ-ahˇ neh doˆ le-euˬ meh. 2Naw maꞈ nui kʼahˇ jaˆ-eu jeˬ-ahˇ naw maꞈ maˬ za nya-eu miˇ neh aˬ cawˬ-ahˇ sehꞈ-eu meh. Naw maꞈ mawꞈ dui dui-eu jeˬ-ahˇ maˬza nya-eu miˇ neh iˬ dehˬ iˬ ceh doˆ laˇ-eu meh. Naw maꞈ Miˬyehˇ-ahˇ maˬ shaˇ-eu miˇ neh yawˬ haˬ geuꞈ mawꞈ-eu jeˬ-ahˇ maˬ za nya-a. 3Naw maꞈ paˇ shaˇ-euˬ kʼawꞈ, nui ma taˬ-euˬ maˬ tsaˬ-eu miˇ neh maˬ shaˇ za nya-a. Shiˬ shaˬ jiˇ-euˬ nui kʼahˇ geuꞈ-eu gʼaˇ duˬ naw maꞈ shaˇ-eu meh. 4Miˬyehˇ-ahˇ saˇ jaˇ maˬ ziꞈ-eu tsawˇ haˬ deuˬ-oˇ, miˇ tsaˬ heu-ahˇ cawˬ cawˬ taꞈ-eu jeˬ-aˬ, Miˬyehˇ-ahˇ muiˇ-eu jeˬ pyeuꞈ-eu meh lehˇ naw maꞈ maˬ siˬ nya te loˇ. Miˇ tsaˬ heu-ahˇ cawˬ kʼaˇ cawˬ taꞈ mawꞈ-eu tsawˇ haˬ-aˬ, Miˬyehˇ-ahˇ muiˇ-eu tsawˇ haˬ pyeuꞈ laˇ ni mˇ gaˇ duˇ-eu meh. 5“Miˬyehˇ neh aˬ dui-euˬ laꞈ kʼoeˇ dawˆ ahˇ nehˬ laꞈ-euˬ nui ma-aˬ, guˆ laˇ paˬ-ehˇ gʼeh-eu nui kʼahˇ tiˬ byah ni ahˇ-eu meh” lehˇ ehˇ-eu Jaˇliꞈ dawˬ kawˬ kʼoeˇ, aˬ diˇ aˬ maˇ maˬ ngeuˇ-a lehˇ taˬ noeˬ. 6Ehˇ kʼawꞈ, Miˬyehˇ neh biꞈ laꞈ-euˬ guiˬ lahˬ yaw dzahˇ-aˬ, kʼoeˇ naˆ maˬ tseˇ naꞈ dzehˬ-eu meh. “Nui ma huiˬ-eu mahˇ-eu tsawˇ haˬ-ahˇ Miˬyehˇ muiˇ-awˇ, nui nahˬ nui yu ahˇ-eu tsawˇ haˬ-ahˇ guiˬ lahˬ biꞈ-eu meh” lehˇ, Jaˇliꞈ laꞈ kʼoeˇ ehˇ taˬ-euˬ meh.

7Kʼoeˇ miˇ neh, Miˬyehˇ-euˬ ehˇ dawˬ geuꞈ-awˬ. Nehꞈ sahˬ paˬ-ahˇ muiˇ-awˬ. Aˬ yawꞈ naw maꞈ jawˇ gaˇ neh cehˆ doˆ tehꞈ-a. 8Miˬyehˇ-euˬ dawˬ peh jiˆ laˇ-awˬ. Naw maꞈ-euˬ dawˬ peh Miˬyehˇ jiˆ le tehꞈ-a. Iˬ baˇ zaˬ deuˬ-oˇ, naw maꞈ-euˬ aˬ laꞈ dzuiꞈ shawˇ-awˬ. Nui ma nyiˬ jeˬ noeˬ-eu tsawˇ haˬ deuˬ-oˇ, naw maꞈ-euˬ nui ma shawˇ-awˬ. 9Noeˬ shaˬ dui dui-awˇ ngoeˇ dui dui-awˬ. Naw maꞈ uiˇ-euˬ jeˬ-ahˇ ngoeˇ-eu jeˬ bi pyeuꞈ-iˇ-awˇ, laˬ kʼaˬ cehˇ-euˬ jeˬ-ahˇ noeˬ shaˬ-eu jeˬ bi pyeuꞈ-iˇ-awˬ. 10Sahˬpaˬ Miˬyehˇ-euˬ mehˬ shi nui ma nahˬ yu ni taˬ-awˬ. Aˬ yawꞈ naw maꞈ-ahˇ ciˬ huiˬ ciˬ mahˇ nehˬ laꞈ tehꞈ-a.

Ka li zaˬ cawˬ cawˬ yaw lehˬ taˬ poˆ

11Aˬ yuiꞈ aˬ nyiˇ Ka li zaˬ deuˬ-oˇ, tiˬ gʼaˬ tiˇ gʼaˬ ja bu ja doeˇ-eu jeˬ taˬ mˇ. Ka li zaˬ cawˬ cawˬ ja doeˇ-awˇ yaw lehˬ poˆ-eu tsawˇ haˬ-aˬ, Zahˇ dawˬ kʼoꞈ dawˬ-ahˇ ja doeˇ-awˇ yaw lehˬ poˆ gaˇ duˇ-eu meh. Naw maꞈ Zahˇ dawˬ kʼoꞈ dawˬ-ahˇ yaw lehˬ poˆ naˇ, Zahˇ dawˬ kʼoꞈ dawˬ-ahˇ naˇ haˬ geuꞈ-eu tsawˇ haˬ maˬ paˇ ngeuˇ-ehˇ, Zahˇ dawˬ kʼoꞈ dawˬ-ahˇ yaˇ kʼaˬ daˇ-eu tsawˇ haˬ pyeuꞈ-eu meh. 12Miˬyehˇ tiˬ gʼaˬ tehꞈ-ehˇ zahˇ dawˬ kʼoꞈ dawˬ biꞈ nya-awˇ yaˇ kʼaˬ daˇ nya-eu gʼaˬ pyeuꞈ-eu meh. Ka kʼoꞈ-eu maˬ ehˇ, laˆ luꞈ laˆ seˇ-eu maˬ ehˇ, aˬ yawꞈ tiˬ gʼaˬ tehꞈ-ehˇ mˇ nya-eu meh. Ka li zaˬ cawˬ cawˬ yaw lehˬ poˆ paˬ-ehˇ naw maꞈ aˬ joˆ-ehˇ gʼeh-eu tsawˇ haˬ ma lehˇ yawˬ haˇ yawˬ ha noeˬ luꞈ te.

Ni shawˬ gaˇ kawˆ kʼahˬ sehˇ taˬ jehˆ

13“Iˬ nah maˬ ngeuˇ naˇ ni shawˬ meuˬ tiˬ meuˬ-ahˇ iˇ-awˇ, tiˬ kʼoꞈ byah ni jeˬ gaꞈ gaꞈ-awˇ pyuˇ gʼawˬ mya ni poˆ za ma” lehˇ ehˇ-eu tsawˇ haˬ deuˬ-oˇ, ngaˇ ehˇ gaˇ naˇ haˬ sheˇ. 14Ni shawˬ nah nawˇ yaw dehꞈ dehꞈ-eu aˬ joˆ-ehˇ pyeuꞈ laˇ-eu gaˇ kawˆ nawˇ siˬ nya te loˇ. Naw maꞈ-aˬ, tiˬ kʼehˇ kʼehˬ tehꞈ-ehˇ ya mawˇ-awˇ byoˆ-iˇ-eu iˇ cuꞈ saꞈ kʼoeˬ-ahˇ duˇ-eu meh. 15“Miˬyehˇ nui ma tsaˬ-awˇ aˬ dui yaw dehꞈ ya dehꞈ naˇ, heu loꞈ-ehˇ mˇ ma, kʼoeˇ Loꞈ-ehˇ mˇ ma” lehˇ, naw maꞈ ehˇ-eu tsaˬ meh. 16Ehˇ kʼawꞈ, nymˬ-mˇ naw maꞈ nui ma huiˬ-awˇ kʼahˬ sehˇ jehˆ-eu meh. Teu loꞈ-ehˇ kʼahˬ sehˇ kʼaˇ jehˆ-eu dawˬ tawˆ luꞈ yaw lehˬ meh.

17Kʼoeˇ miˇ neh, yawˬ ha mˇ paˬ-ehˇ gʼeh-eu jeˬ-ahˇ siˬ nya-awˇ maˬ mˇ-eu tsawˇ haˬ-aˬ, iˬ baˇ ahˇ-eu meh.

Currently Selected:

Yaˬkoˆ 4: AHK

Highlight

Copy