Aˇ dahˬ 28

1Kʼoeˇ naˇ, Yaˬkoˆ-ahˇ Iˇtsaˆ kuˇ-awˇ, heu loꞈ-ehˇ ehˇ nehˬ-euˬ meh. “Kaˬnaˬ miˇ kʼahˬ laꞈ kʼoeˇ jawˇ-eu zaˬ miˬ aˬ buˇ deuˬ-ahˇ nawˇ taˬ sheuˬ dahˬ dzaˬ. 2Maˬsoˬpoˬtaˬmiˇ miˇ kʼahˬ-ahˇ, nawˬ bawˇ Beˬtuˬlaˇ jawˇ gaˇ le-awˇ, nawˬ gʼoe Laˬbaˬ-euˬ aˬ buˇ-ahˇ sheuˬ leˇ-awˬ. 3Nawˇ tsawˇ jeuˬ gʼawˬ mya jeuˬ-euˬ aˬ da yaw dzahˇ pyeuꞈ laˇ ni, miˬ zaˬ sheuˬ-awˇ nymˇ dahˬ dahˬ dzaˬ gaˇ Baoˬ huiˬ-eu Miˬyehˇ guiˬ lahˬ biꞈ-awˇ, zaˬ myaˬ laˇ luꞈ-uˇ. 4Aˬbyaˬhaˬ-ahˇ aˬ yawꞈ guiˬ lahˬ biꞈ nehˬ-euˬ loꞈ-ehˇ, nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ kʼawꞈ, aˬ yawꞈ guiˬ lahˬ biꞈ nehˬ laꞈ luꞈ-uˇ. Aˬbyaˬhaˬ-ahˇ Miˬyehˇ neh biꞈ-euˬ miˇ kʼahˬ pyeuꞈ-eu, nymˬ-mˇ nawˇ jawˇ luꞈ-eu miˇ kʼahˬ heu kʼahˬ, nawˬ-euˬ miˇ kʼahˬ pyeuꞈ laˇ luꞈ-uˇ.” 5Kʼoeˇ naˇ, Maˬsoˬpoˬtaˬmiˇ miˇ kʼahˬ-ahˇ, Aˬlamˬ tsawˇ jeuˬ Beˬtuˬlaˇ-euˬ aˬ li Laˬbaˬ jawˇ gaˇ, Yaˬkoˆ-ahˇ Iˇtsaˆ bi le-euˬ meh. Laˬbaˬ-aˬ, Yaˬkoˆ-euˬ aˬ gʼoe meh.

Iˇsawˇ miˬ zaˬ tiˬ gʼaˬ paˇ sheuˬ-euˬ

6Iˇtsaˆ neh Yaˬkoˆ-ahˇ dawˬ ngehˬ gʼeh nehˬ-awˇ, Maˬsoˬpoˬtaˬmiˇ miˇ kʼahˬ-ahˇ miˬ zaˬ bi sheuˬ leˇ-euˬ gaˇ kawˆ, Iˇsawˇ ya siˬ-euˬ meh. Yaˬkoˆ-ahˇ Iˇtsaˆ dawˬ ngehˬ gʼeh nehˬ ngeh, “Kaˬnaˬ miˇ kʼahˬ-ahˇ jawˇ-eu zaˬ miˬ aˬ buˇ deuˬ-ahˇ taˬ sheuˬ” lehˇ ehˇ nehˬ-euˬ gaˇ kawˆ kʼawꞈ, aˬ yawꞈ ya siˬ-euˬ meh. 7Kʼoeˇ uˬ taꞈ, aˬ ma aˬ da-euˬ ehˇ dawˬ-ahˇ Yaˬkoˆ naˇ haˬ-awˇ, Maˬsoˬpoˬtaˬmiˇ miˇ kʼahˬ-ahˇ miˬ zaˬ poˆ leˇ-euˬ gaˇ kawˆ kʼawꞈ, aˬ yawꞈ paˇ ya siˬ-euˬ meh. 8Kʼoeˇ miˇ neh, Kaˬnaˬ miˇ kʼahˬ-ahˇ jawˇ-eu zaˬ miˬ aˬ buˇ deuˬ-ahˇ sheuˬ gaˇ aˬ yawꞈ aˬ da nui ma maˬ tsaˬ-eu gaˇ kawˆ, Iˇsawˇ ya siˬ duˬ-euˬ meh. 9Kʼoeˇ ngeh jawˇ, Aˬbyaˬhaˬ-euˬ aˬ li Iˇshaˬmeˬlaˇ jawˇ gaˇ aˬ yawꞈ iˇ-awˇ, Iˇshaˬmeˬlaˇ-euˬ aˬ buˇ pyeuꞈ-eu Neˬbaˬyoˇ-euˬ dmˇ ma Maˬhaˬlaˇ-ahˇ sheuˬ-euˬ meh.

Beˬdeˬlaˇ lehˇ kuˇ-euˬ jawˇ duˬ-ahˇ Yaˬkoˆ yuꞈ maˆ maˆ-euˬ

10Yaˬkoˆ-aˬ, Beˬlaˇsheˬba-ahˇ neh doˆ-iˇ-awˇ, Haˬlaˬ meuˬ paw iˇ gʼeh-euˬ meh. 11Nahˇ ma ga ahˇ ngeh, muiˬ-eu shawˇ-eu jawˇ duˬ tiˬ tsahˇ-ahˇ iˇ keuˆ-awˇ naˬ-euˬ meh. Kʼoeˇ ngeh, kʼaˬ lo tiˬ siˬ-ahˇ uˬ gʼmˬ gʼmˬ-awˇ, kʼoeˇ gaˇ yuꞈ kʼaˆ-euˬ meh. 12Yuꞈ maˆ maˆ-eu laꞈ kʼoeˇ, mˬ hawˇ-eu miˇ-ahˇ tsoꞈ tawꞈ taˬ-euˬ dawˬ dzm dzm ma tiˬ dzm-ahˇ aˬ yawꞈ ya mawˇ-euˬ meh. Mˬ taˆ gʼaˬ kʼehˇ deuˬ dawˬ dzm kʼoeˇ dzm kʼoeˇ taˆ, mˬ hawˇ-eu miˇ yaw kaˬ-ahˇ yaˇ gaˇ gaˇ tawꞈ luꞈ-eu meh. 13Sahˬpaˬ Miˬyehˇ aˬ yawꞈ dawˬ peh yawꞈ-awˇ ehˇ-eu, “Ngaˇ-aˬ, Aˬbyaˬhaˬ hawˇ-eu Iˇtsaˆ-euˬ Miˬyehˇ pyeuꞈ-eu Sahˬpaˬ Miˬyehˇ ma. Nawˇ yuꞈ luꞈ-eu miˇ tsaˬ heu tsahˇ, nawˇ hawˇ-eu nawˬ-euˬ zaˬ deuˬ-ahˇ ngaˇ biꞈ ma. 14Nawˬ-euˬ zaˬ nawˬ-euˬ uˆ deuˬ, miˇ tsaˬ kʼoeˇ taˆ jaˆ-eu kʼaˬ lehˇ loꞈ-ehˇ myaˬ dui dui laˇ tehꞈ-a. Miˇ tsaˬ heu yawˬ paw yawˬ na luꞈ aˬ yawꞈ maꞈ jawˇ byah jiˇ tehꞈ-a. Nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ gʼoe-awˇ tsawˇ jeuˬ dawˬ tawˆ luꞈ-ahˇ ngaˇ guiˬ lahˬ biꞈ nehˬ ma. 15Haw taˬ-awˬ, ngaˇ nawˬ nehˬ-ehˇ jawˇ-awˇ, nawˇ kʼaˇ iˇ kʼaˇ laˇ gaˇ nawˬ-ahˇ ngaˇ haw piˇ-eu laꞈ kʼoeˇ, miˇ kʼahˬ heu kʼahˬ-ahˇ, nawˬ-ahˇ paˇ bi gʼoꞈ keuˆ laˇ ma. Nawˬ-ahˇ ngaˇ saˇ jaˇ dzaˬ taˬ-euˬ dawˬ heu deuˬ maˬ mˇ byah jiˇ kʼoeˇ keuˆ ni, ngaˇ nawˬ-ahˇ maˬ byehˇ dzeh.”

16Yaˬkoˆ uˬ noeˬ noeˬ laˇ ngeh, “Sahˬpaˬ Miˬyehˇ heu gaˇ jawˇ law hawˇ nga. Aˬ yawꞈ heu gaˇ jawˇ meh lehˇ ngaˇ maˬ siˬ nya-aˬ” lehˇ, yawˬ haˇ yawˬ ha ehˇ-euˬ meh. 17Kʼoeˇ ngeh, aˬ yawꞈ guˆ laˇ-awˇ, “Jawˇ duˬ heu tsahˇ-aˬ, guˆ dui dui laˇ paˬ-ehˇ gʼeh-eu jawˇ duˬ tiˬ tsahˇ law hawˇ nga. Heu-aˬ, Miˬyehˇ-euˬ nymˇ pyeuꞈ-awˇ, mˬ kʼoeˇ taˆ daˆ leˇ-eu laˇ gʼoˆ pyeuꞈ-eu nga” lehˇ paˇ ehˇ-eu meh.

18Yawˬ nah yawˬ uˬ shawˬ yaw naꞈ-ehˇ Yaˬkoˆ tuˇ-awˇ, aˬ yawꞈ neh uˬ gʼmˬ gʼmˬ-awˇ yuꞈ-euˬ kʼaˬ lo kʼoeˇ siˬ yuˇ-awˇ, noeˬ keuˆ-eu gʼaˇ duˬ miˇ tsaˬ-ahˇ ka tuˇ-euˬ meh. Kʼoeˇ naˇ, kʼaˬ lo kʼoeˇ siˬ kʼoeˇ taˆ tsiˇ shehˆ daˆ-awˇ, Miˬyehˇ-ahˇ damˬ nehˬ-euˬ meh. 19Jawˇ duˬ kʼoeˇ tsahˇ-ahˇ, Beˬdeˬlaˇ#28.19 ‘Beˬdeˬlaˇ’ lehˇ ehˇ-eu dawˬ tsuiꞈ-aˬ, ‘Miˬyehˇ-euˬ nymˇ’ lehˇ ehˇ mawꞈ-eu meh. lehˇ aˬ yawꞈ myahˇ nehˬ-euˬ meh. Jawˇ duˬ kʼoeˇ tsahˇ-ahˇ, yaw beh Luˇzaˆ meuˬ lehˇ kuˇ-euˬ meh. 20Kʼoeˇ naˇ, Sahˬpaˬ Miˬyehˇ-ahˇ Yaˬkoˆ heu loꞈ-ehˇ saˇ jaˇ dzaˬ-euˬ meh. “Ngaˇ iˇ luꞈ-eu gaˇ ma heu kahˇ mehˬ shi, nawˇ ngaˬ-ahˇ haw piˇ-awˇ, loˬ-eu dzaˬ dzaˬ dawˇ dawˇ hawˇ-eu dm gʼaˬ dm lmˇ biꞈ laꞈ-eu uˬ taꞈ, 21ngaˇ tiˬ jeˬ-iˬ maˬ ca laˇ ni ngaˬ da-euˬ nymˇ-ahˇ gʼoꞈ keuˆ-iˇ nya naˇ, nawˇ ngaˬ-euˬ Miˬyehˇ pyeuꞈ tehꞈ-a. 22Noeˬ keuˆ-eu gʼaˇ duˬ ngaˬ neh kʼaˬ lo ka tuˇ taˬ-euˬ jawˇ duˬ heu tsahˇ-ahˇ, ngaˇ nawˬ-ahˇ uˬ duˬ tahˬ-awˇ, nawˬ neh ngaˬ-ahˇ kʼaˇ biꞈ laꞈ-euˬ jeˬ dawˬ tawˆ luꞈ laꞈ kʼoeˇ, tseˇ bymˇ tiˬ bymˇ nawˬ-ahˇ paˇ damˬ kʼoꞈ nehˬ ma.”

Currently Selected:

Aˇ dahˬ 28: AHK

Highlight

Copy