Aˇ dahˬ 27
27
Yaˬkoˆ-ahˇ Iˇtsaˆ dawˬ ngehˬ gʼeh nehˬ-euˬ
1Iˇtsaˆ mawˬ dui dui laˇ-awˇ myaˆ nuiˆ maˬ mawˇ nya-ehˇ pyeuꞈ laˇ ngeh, aˬ yawꞈ-euˬ aˬ li aˬ yuiꞈ gʼaˬ pyeuꞈ-eu Iˇsawˇ-ahˇ bi kuˇ laˬ-iˇ-awˇ, “Aˬ li-oˇ” lehˇ aˬ yawꞈ kuˇ ngeh, “Ngaˇ heu gaˇ jawˇ ma da-oˇ” lehˇ, Iˇsawˇ oˬ toˬ nehˬ-euˬ meh.
2Iˇtsaˆ ehˇ-eu, “Ngaˇ mawˬ dui dui laˇ-awˇ, ziˇ jiˇ yamˬ keuˆ le-euˬ nawˇ siˬ nya meh. 3Nawˬ-euˬ kaˆ hawˇ-eu kaˆ myaˬ yuˇ-awˇ bawˇ tsahˬ-ahˇ shaˬ jiˇ beuˆ sehꞈ laˬ-iˇ-awˬ. 4Kʼoeˇ naˇ, ngaˇ dzaˬ mawꞈ-eu dzaˇ yaw kuiˇ kuiˇ-ehˇ jahˇ-awˇ ciˬ ha laˇ-awˬ. Dzaˇ kʼoeˇ ngaˇ dzaˬ-awˇ, ngaˇ maˬ shiˇ mi naˆ-ehˇ nawˬ-ahˇ dawˬ ngehˬ gʼeh nehˬ yaꞈ nyaˇ.”
5Iˇsawˇ-ahˇ Iˇtsaˆ kʼoeˇ loꞈ-ehˇ ehˇ nehˬ luꞈ gaˇ, Leˬbehˇkaꞈ naˇ haˬ luꞈ-eu meh. 6Kʼoeˇ miˇ neh Iˇsawˇ bawˇ cah cah-iˇ-eu lehˇ doˆ-iˇ dzeuˇ ngeh, Yaˬkoˆ-ahˇ Leˬbehˇkaꞈ heu loꞈ-ehˇ ehˇ nehˬ-euˬ meh. “Uˬ soe Iˇsawˇ-ahˇ nawˬ da heu loꞈ-ehˇ ehˇ nehˬ luꞈ-eu ngaˇ ya gaˬ-euˬ ma. 7‘Shaˬ jiˇ beuˆ sehꞈ laˬ-iˇ-awˇ, dzaˇ yaw kuiˇ tiˬ kʼmˬ jahˇ laꞈ sheˇ. Dzaˇ kʼoeˇ ngaˇ dzaˬ gʼaˬ ngeh, ngaˇ maˬ shiˇ mi naˆ-ehˇ Sahˬpaˬ Miˬyehˇ-euˬ mehˬ shi nawˬ-ahˇ dawˬ ngehˬ gʼeh-awˇ, guiˬ lahˬ biꞈ nehˬ yaꞈ nyaˇ’ lehˇ ehˇ nehˬ luꞈ-eu ngaˇ ya gaˬ-euˬ ma.” 8Yaˬkoˆ-ahˇ Leˬbehˇkaꞈ paˇ ehˇ nehˬ-eu, “Aˬ li-oˇ, ngaˇ nawˬ-ahˇ mehˬ nehˬ laꞈ-eu loꞈ-ehˇ yaw muiˬ paˬ-ehˇ naˇ haˬ-awˇ mˇ-awˬ. 9Ciꞈ myehꞈ ciꞈ maꞈ jawˇ gaˇ iˇ-awˇ, tsuˇ dui dui-eu ciꞈ myehꞈ ciꞈ kʼaˇ zaˬ tiˬ mawˇ nyehꞈ mi laˬ-iˇ-awˬ. Nawˬ da dzaˬ mawꞈ dui dui-eu dzaˇ ngaˇ jahˇ nehˬ ma. 10Dzaˇ kʼoeˇ nawˬ da jawˇ gaˇ nawˇ yuˇ gʼeh-awˇ bi dzaˬ naˇ, aˬ yawꞈ maˬ shiˇ mi naˆ-ehˇ nawˬ-ahˇ dawˬ ngehˬ gʼeh nehˬ yaꞈ tehꞈ-a.”
11Ehˇ kʼawꞈ aˬ yawꞈ-euˬ aˬ ma-ahˇ Yaˬkoˆ ehˇ nehˬ-eu, “Iˇsawˇ gʼaˬ gʼawˇ mawˇ mawˇ lah-ehˇ caꞈ hm tsoꞈ-awˇ, ngaˇ caꞈ hm maˬ tsoꞈ-ehˇ juˇ tsui ni gʼeh-eu nawˇ siˬ nya meh. 12Iˇ no ngaˬ da ngaˬ-ahˇ sawˆ haw-awˇ, ngaˇ jaˬ myawꞈ myawꞈ laˇ-euˬ nga lehˇ siˬ duˬ naˇ, aˬ joˆ-ehˇ jahˇ nmˇ. Guiˬ lahˬ maˬ za-eu uˬ taꞈ, yaˬ kʼehˇ yaˬ nehˬ laꞈ gaˇ ya daˬ tehꞈ-a.”
13Aˬ yawꞈ-euˬ aˬ ma paˇ ehˇ-eu, “Ngaˬ li-oˇ, nawˬ-ahˇ yaˬ kʼehˇ yaˬ-eu jeˬ keuˆ le naˇ, ngaˬ-euˬ kʼoeˇ taˆ keuˆ le luꞈ-uˇ. Yaw kawˇ-ehˇ iˇ-awˇ, ciꞈ myehꞈ nyehꞈ mi laˬ-iˇ-awˬ.” 14Kʼoeˇ naˇ, Yaˬkoˆ ciꞈ myehꞈ nyehꞈ mi laˬ-iˇ-awˇ, aˬ ma gʼaˬ aˬ yawꞈ aˬ da dzaˬ kuiˇ nya-eu dzaˇ jahˇ nehˬ-euˬ meh. 15Leˬbehˇkaꞈ-aˬ, iˇ kahˇ laꞈ kʼoeˇ jaˆ-eu Iˇsawˇ-euˬ mehˬ tsoeˬ yaw muiˬ deuˬ yuˇ-awˇ, Yaˬkoˆ-ahˇ bi dm-euˬ meh. 16Ciꞈ myehꞈ baˆ kʼoˆ kʼawꞈ aˬ yawꞈ yuˇ-awˇ, aˬ yawꞈ aˬ li-euˬ laꞈ du hawˇ-eu kawˬ lahˇ-ahˇ lahˇ cuꞈ nehˬ-euˬ meh. 17Kuiˇ dui dui-eu dzaˇ kʼoeˇ hawˇ-eu, aˬ yawꞈ neh jahˇ-euˬ kaˬ muˇ deuˬ aˬ yawꞈ-euˬ aˬ li-ahˇ aˬ yawꞈ biꞈ-awˇ, bi ciˬ ha leˇ-euˬ meh.
18Kʼoeˇ naˇ, Yaˬkoˆ aˬ yawꞈ aˬ da jawˇ gaˇ le-awˇ, “Aˬ da-oˇ” lehˇ kuˇ-euˬ meh. Kʼoeˇ ngeh, Iˇtsaˆ oˬ toˬ-awˇ, “Aˬ li-oˇ, nawˇ aˬ suˇ gʼaˬ te” lehˇ naˇ haˬ-euˬ meh.
19Yaˬkoˆ ehˇ-eu, “Ngaˇ-aˬ, nawˬ li aˬ yuiꞈ gʼaˬ ma. Nawˬ neh kʼaˇ ehˇ nehˬ laꞈ-euˬ loꞈ-ehˇ, ngaˇ lehˬ hmˬ laˆ dah gʼaˬ taˬ-euˬ ma. Nuiˇ-awˇ, ngaˬ neh hehˇ laꞈ-euˬ shaˬ jiˇ dzaˬ-awˇ, ngaˬ-ahˇ dawˬ ngehˬ gʼeh nehˬ laꞈ-awˬ.” 20Iˇtsaˆ ehˇ-eu, “Aˇ yamˬ tiˬ kʼehˇ laˇ kʼehˬ laꞈ kʼoeˇ tehꞈ-ehˇ shaˇ poˆ laˬ-iˇ-eu aˬ joˆ-ehˇ kawˇ teˬ.” Yaˬkoˆ ehˇ-eu, “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ ngaˬ-ahˇ caw ba nehˬ laꞈ-euˬ miˇ neh meh.”
21Iˇtsaˆ ehˇ-eu, “Ngaˬ-euˬ dawˬ peh jiˆ tuˆ laˇ sheˇ. Iˇsawˇ ngeuˇ miˇ-a loˇ lehˇ ngaˇ nawˬ-ahˇ tiˬ poˆ sawˆ haw la.” 22Kʼoeˇ naˇ, aˬ yawꞈ-euˬ aˬ da dawˬ peh Yaˬkoˆ jiˆ tuˆ leˇ ngeh, aˬ yawꞈ-euˬ aˬ da aˬ yawꞈ-ahˇ sawˆ haw-awˇ, “Nawˬ-euˬ teˇ saˇ-ahˇ naˇ haˬ naˇ, Yaˬkoˆ-euˬ teˇ saˇ-ahˇ duˇ leˇ nya. Ehˇ kʼawꞈ, nawˬ-euˬ aˬ laꞈ law nmˇ-aˬ, Iˇsawˇ-euˬ aˬ laꞈ miˇ-a” lehˇ ehˇ nehˬ-euˬ meh. 23Yaˬkoˆ-euˬ aˬ laꞈ-ahˇ aˬ yawꞈ sawˆ haw ngeh, Iˇsawˇ-euˬ aˬ laꞈ loꞈ-ehˇ caꞈ hm shuˬ byehˬ ni tsoꞈ-eu miˇ neh, Yaˬkoˆ nga lehˇ aˬ yawꞈ maˬ siˬ nya-a. Kʼoeˇ miˇ neh, Yaˬkoˆ-ahˇ dawˬ ngehˬ gʼeh nehˬ-eu lehˇ aˬ yawꞈ lehˬ hmˬ-euˬ meh. 24Ehˇ kʼawꞈ, “Nawˇ aˬ diˇ aˬ maˇ Iˇsawˇ ma loˇ” lehˇ aˬ yawꞈ tiˬ poˆ paˇ naˇ haˬ duˬ-euˬ meh. Yaˬkoˆ gʼeh, “Ngeuˇ ma” lehˇ paˇ ehˇ kʼoꞈ nehˬ-euˬ meh.
25Kʼoeˇ naˇ, “Shaˬ jiˇ hehˇ laꞈ-awˬ. Dzaˬ gʼaˬ dawˇ gʼaˬ naˇ, ngaˇ nawˬ-ahˇ dawˬ ngehˬ gʼeh nehˬ ma” lehˇ, Iˇtsaˆ ehˇ-eu meh. Kʼoeˇ ngeh, shaˬ jiˇ kʼoeˇ hawˇ-eu aˬ gaꞈ dzaˇ uiˇ ui cuiˆ, aˬ yawꞈ-euˬ aˬ da-ahˇ Yaˬkoˆ ciˬ nehˬ-euˬ meh. 26“Dawˬ peh jiˆ laˇ-awˇ, ngaˬ-ahˇ mehˬ cuˇ cuˇ laˇ sheˇ” lehˇ, Yaˬkoˆ-ahˇ Iˇtsaˆ ehˇ nehˬ-euˬ meh. 27Yaˬkoˆ dawˬ peh jiˆ tuˆ leˇ-awˇ, Iˇtsaˆ-ahˇ mehˬ cuˇ cuˇ nehˬ-eu lehˇ mˇ jeh ngeh, aˬ yawꞈ dm luꞈ-eu mehˬ tsoeˬ-ahˇ Iˇtsaˆ laˆ haw-euˬ meh. Kʼoeˇ naˇ, Yaˬkoˆ-ahˇ Iˇtsaˆ heu loꞈ-ehˇ dawˬ ngehˬ gʼeh nehˬ-euˬ meh. “Yaw zawˇ-ehˇ saw-eu ngaˬ li-euˬ yaw saꞈ-aˬ, Sahˬpaˬ Miˬyehˇ neh guiˬ lahˬ biꞈ nehˬ-euˬ deh yaˇ tiˬ kawˬ-euˬ yaw saꞈ-ahˇ duˇ miˇ-a. 28Mˬ kʼoeˇ taˆ neh Miˬyehˇ ceuˬ bi ga le-awˇ, nawˬ-euˬ deh yaˇ miˇ tsaˬ miˇ muiˬ muiˬ dui dui laˇ luꞈ-uˇ. Miˬyehˇ nawˬ-ahˇ dzaˬ la gʼo cehˇ hawˇ-eu aˬ gaꞈ dzaˇ uiˇ tiˬ byah tiˬ loꞈ biꞈ luꞈ-uˇ. 29Tsawˇ jeuˬ dawˬ tawˆ luꞈ nawˬ-euˬ zaˬ kʼaˆ ya geuꞈ-awˇ, tsawˇ haˬ dawˬ tawˆ luꞈ nawˬ-euˬ mehˬ shi pawˬ tsuiꞈ pawˬ dmˬ dmˬ luꞈ-uˇ. Nawˬ-euˬ aˇ jeuˬ aˇ ca dawˬ tawˆ luꞈ kʼoeˇ taˆ nawˇ ya uˆ lahˇ-awˇ, nawˬ ma o neh kʼaˇ jeuˬ kʼaˇ o le-euˬ tsawˇ haˬ dawˬ tawˆ luꞈ, nawˬ-euˬ mehˬ shi pawˬ tsuiꞈ pawˬ dmˬ dmˬ luꞈ-uˇ. Nawˬ-ahˇ yaˬ kʼehˇ yaˬ-eu tsawˇ haˬ deuˬ, yaˬ kʼehˇ yaˬ nehˬ gaˇ paˇ ya daˬ-awˇ, nawˬ-ahˇ guiˬ lahˬ biꞈ-eu tsawˇ haˬ deuˬ guiˬ lahˬ za luꞈ-uˇ.”
Dawˬ ngehˬ gʼeh nehˬ laꞈ lehˇ Iˇtsaˆ-ahˇ Iˇsawˇ shaˇ-euˬ
30Yaˬkoˆ-ahˇ Iˇtsaˆ dawˬ ngehˬ gʼeh nehˬ gʼaˬ-awˇ, Yaˬkoˆ iˇ doˆ-euˬ nehˬ-ehˇ, Iˇsawˇ bawˇ cah cah-iˇ-euˬ gʼoꞈ keuˆ laˇ-euˬ meh. 31Iˇsawˇ gʼaˬ kʼawꞈ, kuiˇ dui dui-eu dzaˇ jahˇ-awˇ, aˬ yawꞈ-euˬ aˬ da jawˇ gaˇ ciˬ ha laˇ-euˬ meh. “Aˬ da-oˇ, ngaˬ-ahˇ dawˬ ngehˬ gʼeh nehˬ laꞈ-eu gʼaˇ duˬ nuiˇ-awˇ, ngaˬ neh nawˬ-euˬ gʼaˇ duˬ yuˇ laꞈ-euˬ shaˬ jiˇ dzaˬ-awˬ” lehˇ, aˬ yawꞈ-euˬ aˬ da-ahˇ aˬ yawꞈ ehˇ nehˬ-euˬ meh.
32“Nawˇ aˬ suˇ gʼaˬ te” lehˇ Iˇtsaˆ naˇ haˬ ngeh, “Ngaˇ nawˬ li aˬ yuiꞈ gʼaˬ ma” lehˇ Iˇsawˇ ehˇ kʼoꞈ nehˬ-euˬ meh.
33Kʼoeˇ ngeh, Iˇtsaˆ tsawˬ guˆ-iˇ-awˇ, yaw dzuˬ dzuˬ-eu laꞈ kʼoeˇ ehˇ-eu, “Toˆ-ehˇ maˇ-iˬ, uˬ soe shaˬ jiˇ sehꞈ-awˇ ngaˬ-ahˇ dzaˇ jahˇ ha laˇ-euˬ kʼoeˇ gʼaˬ aˬ suˇ gʼaˬ-a. Nymˬ-mˇ nawˇ uˇ laˇ ngeh, shaˬ jiˇ kʼoeˇ ngaˇ dzaˬ gʼaˬ-euˬ tiˬ dehˬ tehꞈ te siˬ. Aˬ yawꞈ-ahˇ ngaˇ dawˬ ngehˬ gʼeh nehˬ gʼaˬ dzeuˇ-euˬ ma. Aˬ yawꞈ-aˬ, mˬ maˬ maˬ byaˆ zaˇ ziˇ guiˬ lahˬ za-euˬ tsawˇ haˬ pyeuꞈ laˇ gʼaˬ-euˬ meh” lehˇ, Iˇsawˇ-ahˇ ehˇ nehˬ-euˬ meh.
34Dawˬ kʼoeˇ dawˬ-ahˇ Iˇsawˇ ya gaˬ ngeh, nui ma naˇ dui dui-eu laꞈ kʼoeˇ yaw kʼaˆ-ehˇ guˇ guˇ-ehˇ ngoeˇ-awˇ, “Aˬ da-oˇ, ngaˬ-ahˇ kʼawꞈ dawˬ ngehˬ gʼeh nehˬ laꞈ-awˬ.”
35“Nawˬ-euˬ aˬ nyiˇ ngaˬ-ahˇ jaˬ myawꞈ myawꞈ laˇ-awˇ, nawˇ za paˬ-ehˇ gʼeh-eu guiˬ lahˬ dawˬ tawˆ luꞈ yuˇ gʼeh jiˇ-euˬ meh” lehˇ, Iˇsawˇ-ahˇ Iˇtsaˆ ehˇ kʼoꞈ nehˬ-euˬ meh.
36Iˇsawˇ ehˇ-eu, “Aˬ yawꞈ ngaˬ-ahˇ tsawˇ gahˇ gahˇ dzaˬ-eu heu poˆ nyiˬ poˆ byah laˇ-euˬ meh. Aˬ yawꞈ-ahˇ Yaˬkoˆ#27.36 ‘Yaˬkoˆ’ lehˇ ehˇ-eu dawˬ tsuiꞈ-aˬ, ‘tsawˇ gahˇ gahˇ dzaˬ-eu’ lehˇ ehˇ mawꞈ-eu meh. lehˇ myahˇ nehˬ-euˬ tsaˬ dui dui meh. Yaw beh tiˬ poˆ, ngaˇ za paˬ-ehˇ gʼeh-eu aˬ li aˬ yuiꞈ gʼaˬ-euˬ aˇ yaˬ-ahˇ aˬ yawꞈ mehˇ shuiˇ shuiˇ doˆ geuꞈ gʼaˬ-awˇ, nymˬ-mˇ poˆ jawˇ-aˬ, ngaˇ za paˬ-ehˇ gʼeh-eu guiˬ lahˬ kʼawꞈ paˇ yuˇ geuꞈ gʼeh-euˬ ngaˇ. Ngaˬ-ahˇ dawˬ ngehˬ gʼeh nehˬ laꞈ-eu gʼaˇ duˬ guiˬ lahˬ maˬ paˇ jaˆ mehˬ loˇ.”
37Iˇtsaˆ ehˇ-eu, “Ngaˇ aˬ yawꞈ-ahˇ nawˬ-euˬ kʼoeˇ taˆ uˆ lahˇ-eu baoˬ biꞈ gʼaˬ-awˇ, aˬ yawꞈ-euˬ aˬ yuiꞈ aˬ nyiˇ aˇ jeuˬ aˇ ca dawˬ tawˆ luꞈ kʼawꞈ aˬ yawꞈ-euˬ zaˬ kʼaˆ pyeuꞈ laˇ ni, aˬ yawꞈ-ahˇ dawˬ ngehˬ gʼeh nehˬ gʼaˬ-euˬ ma. Nawˬ-ahˇ ngaˇ tiˬ jeˬ-iˬ ngehˬ maˬ paˇ gʼeh nehˬ nya miˇ-a li-oˇ.”
38“Aˬ da-oˇ, dawˬ ngehˬ gʼeh nehˬ-eu jeˬ-ahˇ nawˇ tiˬ poˆ tehꞈ-ehˇ mˇ nya te loˇ. Ngaˬ-ahˇ kʼawꞈ dawˬ ngehˬ gʼeh nehˬ laꞈ-awˬ” lehˇ Iˇsawˇ paˇ ehˇ-awˇ ngoeˇ-euˬ meh.
39Kʼoeˇ ngeh, Iˇsawˇ-ahˇ Iˇtsaˆ heu loꞈ-ehˇ ehˇ nehˬ-euˬ meh. “Mˬ kʼoeˇ taˆ nawˬ-euˬ gʼaˇ duˬ ceuˬ maˬ paˇ jaˆ-eu loꞈ-ehˇ, miˇ tsaˬ kʼoeˇ taˆ kʼawꞈ, miˇ tsaˬ miˇ muiˬ muiˬ-eu deh yaˇ nawˬ-euˬ gʼaˇ duˬ maˬ paˇ jaˆ meh. 40Nawˇ-aˬ, mi cehˇ-ahˇ gʼoe-awˇ yaw dehꞈ ya dehꞈ tehꞈ-a. Nawˇ nawˬ-euˬ aˬ nyiˇ-euˬ zaˬ kʼaˆ ya geuꞈ tehꞈ-a. Ehˇ kʼawꞈ, nawˇ aˬ yawꞈ-ahˇ puiˬ-awˇ, aˬ yawꞈ uˆ lahˇ-eu uˬ moˆ ya buˬ-iˇ-eu aˇ nah aˇ yamˬ jaˆ tehꞈ-a.”
41Iˇtsaˆ neh Yaˬkoˆ-ahˇ dawˬ ngehˬ gʼeh nehˬ-euˬ miˇ neh, Yaˬkoˆ-ahˇ Iˇsawˇ muiˇ-eu meh. Iˇsawˇ-euˬ nui ma laꞈ kʼoeˇ, “Ngaˬ da ziˇ jiˇ-eu dawˬ peh peh laˇ-euˬ meh. Haw taˬ lawˬ. Zaˬ heu gʼaˬ-ahˇ ngaˇ sehꞈ ma” lehˇ noeˬ luꞈ-eu meh.
42Ehˇ kʼawꞈ, Yaˬkoˆ-ahˇ Iˇsawˇ sehꞈ-eu lehˇ lehˬ hmˬ luꞈ-eu gaˇ kawˆ Leˬbehˇkaꞈ ya gaˬ ngeh, Yaˬkoˆ-ahˇ kuˇ-awˇ, heu loꞈ-ehˇ ehˇ nehˬ-euˬ meh. “Ngaˇ ehˇ gaˇ naˇ haˬ sheˇ. Nawˬ-euˬ aˇ doˆ nawˬ-ahˇ sehꞈ-eu lehˇ lehˬ hmˬ luꞈ meh. 43Ngaˬ li-oˇ, ngaˇ kʼaˇ ehˇ-eu loꞈ-ehˇ nymˬ-mˇ jahˇ-awˬ. Haˬlaˬ meuˬ-ahˇ ngaˬ-euˬ aˬ mahˇ aˬ da Laˬbaˬ jawˇ gaˇ yaw kawˇ-ehˇ cehˆ leˇ-awˬ. 44Nawˬ-euˬ aˇ doˆ nui ma pehˇ-eu maˬ byoˆ-iˇ kʼoeˇ keuˆ ni, kʼoeˇ gaˇ tiˬ kʼehˬ jawˇ tawˬ leˇ-awˬ. 45Nawˬ neh kʼaˇ jahˇ nehˬ-euˬ jeˬ dawˬ tawˆ luꞈ-ahˇ nawˬ-euˬ aˇ doˆ ngehˇ byoˆ jiˇ ngeh, aˬ cawˬ-ahˇ ngaˇ kʼehˇ gʼeh laꞈ-awˇ, nawˬ-ahˇ bi sheuˬ kʼoꞈ laˬ laˇ ma. Ngaˬ li nyiˬ li luꞈ-ahˇ, tiˬ nah laꞈ kʼoeˇ tehꞈ-ehˇ ngaˇ aˬ joˆ-ehˇ bi sm-iˇ peuˬ nmˇ.”
Iˇtsaˆ neh Yaˬkoˆ-ahˇ Laˬbaˬ jawˇ gaˇ bi le-euˬ
46Iˇtsaˆ-ahˇ Leˬbehˇkaꞈ ehˇ nehˬ-eu, “Aˬ cawˬ tsawˇ jeuˬ pyeuꞈ-eu Iˇsawˇ-euˬ miˬ zaˬ deuˬ baˬ da neh ngaˇ nui ma cawˆ dui dui nya. Yaˬkoˆ gʼaˬ kʼawꞈ, Heˬtaˆ tsawˇ jeuˬ-ahˇ paˇ sheuˬ lawˬ naˇ, ngaˇ shiˇ-eu maˬ ngeuˇ naˇ maˬ paˇ dzeˇ miˇ-a.”
Currently Selected:
Aˇ dahˬ 27: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
