Aˇ dahˬ 29

Laˬbaˬ-euˬ nymˇ-ahˇ Yaˬkoˆ le keuˆ-euˬ

1Kʼoeˇ naˇ, nahˇ ma doˆ kʼehˬ paw Yaˬkoˆ paˇ iˇ gʼeh-euˬ meh. 2Deh ga-ahˇ jaˆ-eu lah duˬ tiˬ duˬ dawˬ peh aˬ yawꞈ iˇ keuˆ-awˇ, lah duˬ kʼoeˇ duˬ dawˬ peh yawˇ yawˇ maꞈ smˇ maꞈ yawꞈ luꞈ gaˇ aˬ yawꞈ ya mawˇ-euˬ meh. Lah duˬ kʼoeˇ duˬ-aˬ, yawˇ kʼoeˇ deuˬ-ahˇ iˇ cuꞈ bi dawˇ duˬ pyeuꞈ-awˇ, lah duˬ mehˬ kʼehˬ-ahˇ kʼaˬ lo lo ma ngawˬ tsoeˬ taˬ-euˬ meh. 3Yawˇ yawˇ maꞈ deuˬ kʼoeˇ gaˇ kʼaˇ oe uiˬ jiˇ ngeh, yawˇ bo-eu deuˬ ga uiˬ-awˇ kʼaˬ lo kʼoeˇ siˬ ngawˬ dzeh gʼaˬ miˇ tsa tehꞈ-ehˇ, yawˇ deuˬ-ahˇ iˇ cuꞈ bi dawˇ nya-eu meh. Iˇ cuꞈ bi dawˇ gʼaˬ naˇ, kʼaˬ lo kʼoeˇ siˬ tiˬ poˆ paˇ ya ngawˬ tsoeˬ yaꞈ-eu meh.

4“Mawˬ cawˬ-oˇ , naw maꞈ aˬ gaˇ jawˇ te” lehˇ, yawˇ bo-eu deuˬ-ahˇ Yaˬkoˆ naˇ haˬ ngeh, “Nga maꞈ Haˬlaˬ meuˬ-ahˇ jawˇ-eu ma” lehˇ aˬ yawꞈ maꞈ ehˇ-eu meh.

5“Laˬbaˬ-ahˇ naw maꞈ siˬ nya ma loˇ” lehˇ aˬ yawꞈ paˇ naˇ haˬ-iˬ ngeh, “Siˬ nya ma” lehˇ aˬ yawꞈ maꞈ paˇ ehˇ kʼoꞈ nehˬ-euˬ meh.

6“Aˬ yawꞈ jawˇ saˇ doˆ meh loˇ” lehˇ naˇ haˬ ngeh, “Jawˇ saˇ doˆ meh” lehˇ aˬ yawꞈ maꞈ ehˇ-eu meh. “Haw-awˬ. Kʼoeˇ gaˇ yawˇ yawˇ maꞈ teh-awˇ oe luꞈ-eu kʼoeˇ gʼaˬ, aˬ yawꞈ-euˬ aˬ buˇ Laˬkeˬlaˇ meh” lehˇ, Yaˬkoˆ-ahˇ aˬ yawꞈ maꞈ ehˇ nehˬ-euˬ meh.

7“Nahˇ ma gʼawˬ mahˇ ni jaˆ nga siˬ tawˇ. Yawˇ teh kʼoꞈ-eu aˇ yamˬ maˬ tsaˬ laˇ ngaˬ siˬ. Iˇ cuˬ bi dawˇ gʼaˬ-awˇ paˇ bo-awˬ tawˇ” lehˇ, aˬ yawꞈ maꞈ-ahˇ Yaˬkoˆ ehˇ nehˬ-euˬ meh.

8Aˬ yawꞈ maꞈ ehˇ-eu, “Yawˇ yawˇ maꞈ dawˬ tawˆ luꞈ heu gaˇ teh keuˆ leꞈ jiˇ-awˇ, yawˇ bo-eu deuˬ ga uiˬ-awˇ kʼaˬ lo heu siˬ ngawˬ dzeh gʼaˬ miˇ tsa maˬ ngeuˇ naˇ, yawˇ heu deuˬ-ahˇ iˇ cuꞈ maˬ bi dawˇ nya-a siˬ.”

9Aˬ yawꞈ maꞈ-ahˇ Yaˬkoˆ dawˬ ngehˬ cawˬ luꞈ ngeh, Laˬkeˬlaˇ yawˇ yawˇ maꞈ tiˬ maꞈ teh-awˇ oe keuˆ-euˬ meh. 10Yaˬkoˆ-aˬ, aˬ yawꞈ aˬ gʼoe-euˬ aˬ buˇ Laˬkeˬlaˇ aˬ yawꞈ aˬ gʼoe-euˬ yawˇ yawˇ maꞈ teh-awˇ oe luꞈ gaˇ ya mawˇ ngeh, lah duˬ-ahˇ ngawˬ tsoeˬ taˬ-euˬ kʼaˬ lo kʼoeˇ siˬ ngawˬ dzeh nehˬ-awˇ, yawˇ kʼoeˇ maꞈ-ahˇ iˇ cuꞈ bi dawˇ-euˬ meh. 11Kʼoeˇ naˇ, Laˬkeˬlaˇ-ahˇ mehˬ cuˇ cuˇ nehˬ gʼaˬ-awˇ, laˬ kʼaˬ cehˇ dui dui-eu miˇ neh, guˇ guˇ-ehˇ ngoeˇ-euˬ meh. 12“Ngaˇ-aˬ, Leˬbehˇkaꞈ-euˬ aˬ li pyeuˬ-awˇ, nawˬ da-euˬ aˇ jeuˬ aˇ ca ma” lehˇ, Laˬkeˬlaˇ-ahˇ aˬ yawꞈ ehˇ nehˬ-euˬ meh. Kʼoeˇ naˇ, Laˬkeˬlaˇ cehˆ gʼoꞈ leꞈ-awˇ, gaˇ kawˆ kʼoeˇ aˬ yawꞈ-euˬ aˬ da-ahˇ dzawˇ nehˬ leˇ-euˬ meh. 13Laˬbaˬ-aˬ, aˬ yawꞈ-euˬ zaˬ oeˇ oe keuˆ-euˬ gaˇ kawˆ ya gaˬ ngeh, cehˆ gʼeh-awˇ ha laˬ-iˇ-euˬ meh. Yaˬkoˆ-ahˇ aˬ yawꞈ byaˇ cuꞈ-awˇ, mehˬ cuˇ cuˇ nehˬ gʼaˬ-awˇ , iˇ kahˇ-ahˇ sheuˬ kʼoꞈ laꞈ-euˬ meh. Kʼoeˇ naˇ, kʼaˇ pyeuꞈ laˇ-euˬ gaˇ kawˆ dawˬ tawˆ luꞈ, Laˬbaˬ-ahˇ Yaˬkoˆ dzawˇ nehˬ-euˬ meh, 14Kʼoeˇ ngeh, “Nawˇ-aˬ, aˬ diˇ aˬ maˇ ngaˬ-euˬ shiˬ shaˬ pyeuꞈ-eu nga” lehˇ, Yaˬkoˆ-ahˇ Laˬbaˬ ehˇ nehˬ-euˬ meh.

Laˬkeˬlaˇ hawˇ-eu Leˇaˬ-ahˇ sheuˬ-eu gʼaˇ duˬ Yaˬkoˆ Laˬbaˬ-euˬ gaˇ mˇ-euˬ

15“Nawˇ ngaˬ-euˬ aˬ yuiꞈ aˬ nyiˇ miˇ neh, ngaˬ-euˬ gaˇ yawꞈ ngehꞈ-ehˇ mˇ nehˬ ma lehˇ noeˬ-eu maˬ tsaˬ-a. Teu miˇ neh, gʼaˬ gaˇ aˬ poeˬ aˇ myaˆ ni shaˇ te lehˇ ehˇ-awˬ” lehˇ, Yaˬkoˆ-ahˇ Laˬbaˬ ehˇ nehˬ-euˬ meh. 16Laˬbaˬ aˬ buˇ nyiˬ buˇ jawˇ-eu meh. Aˬ yuiꞈ gʼaˬ-ahˇ Leˇaˬ lehˇ myahˇ-awˇ, aˬ nyiˇ gʼaˬ-ahˇ Laˬkeˬlaˇ lehˇ myahˇ-euˬ meh. 17Leˇaˬ gʼaˬ myaˆ nuiˆ aˇ gʼehˇ muiˬ-eu meh. Laˬkeˬlaˇ gʼaˬ gʼawˇ mawˇ aˇ sehˇ tsaˬ dui dui-awˇ, muiˬ dui dui-eu miˬ daꞈ tiˬ gʼaˬ pyeuꞈ-eu meh.

18Laˬkeˬlaˇ gʼaˬ-ahˇ Yaˬkoˆ gaˬ-awˇ, mawꞈ dui dui leˇ-eu meh. Kʼoeˇ miˇ neh, “Nawˬ buˇ Laˬkeˬlaˇ ngaˬ-ahˇ bi mˇ dzaˬ laˇ naˇ, shiꞈ kʼoꞈ keuˆ ni nawˬ-euˬ gaˇ ngaˇ mˇ nehˬ ma” lehˇ Laˬbaˬ-ahˇ Yaˬkoˆ ehˇ nehˬ-euˬ meh. 19Laˬbaˬ ehˇ-eu, “Aˬ cawˬ-ahˇ bi mˇ dzaˬ-iˇ-eu naˆ maˬ tseˇ, nawˬ-ahˇ bi mˇ dzaˬ le ma. Nawˇ ngaˬ nehˬ-ehˇ jawˇ-awˬ.” 20Yaˬkoˆ-aˬ, Laˬkeˬlaˇ-ahˇ ya sheuˬ-eu gʼaˇ duˬ, shiꞈ kʼoꞈ keuˆ ni Laˬbaˬ-euˬ gaˇ mˇ nehˬ-euˬ meh. Laˬkeˬlaˇ-ahˇ aˬ yawꞈ gaˬ dui dui-eu miˇ neh, aˇ yamˬ kʼoeˇ myah ni ga-iˇ-euˬ kʼawꞈ, tiˬ kʼehˇ laˇ kʼehˬ tehꞈ nya lehˇ aˬ yawꞈ noeˬ-euˬ meh.

21Kʼoeˇ naˇ, “Aˇ yamˬ byah laˇ gʼaˬ-euˬ miˇ neh, nawˬ buˇ nga nyaꞈ-ahˇ oeˇ mˇ baˇ nehˬ laꞈ-awˬ” lehˇ, Laˬbaˬ-ahˇ Yaˬkoˆ ehˇ nehˬ-euˬ meh. 22Kʼoeˇ ngeh, Laˬbaˬ dzaˬ byawˇ lehˬ hmˬ-awˇ, tsawˇ haˬ dawˬ tawˆ luꞈ-ahˇ kuˇ gaˬ-euˬ meh, 23Ehˇ kʼawꞈ, Laˬbaˬ-aˬ, Laˬkeˬlaˇ-euˬ dah zaˇ, Leˇaˬ-ahˇ kʼoeˇ ngeh miˇ Yaˬkoˆ jawˇ gaˇ bi iˇ-awˇ, Yaˬkoˆ hawˇ-eu Leˇaˬ aˬ nyaꞈ yuꞈ taꞈ-euˬ meh. 24Laˬbaˬ-aˬ, aˬ yawꞈ-euˬ aˬ buˇ Leˇaˬ-ahˇ bi bo saˆ-eu gʼaˇ duˬ,aˬ yawꞈ-euˬ zaˬ miˬ zaˬ zaˬ kʼaˆ Ziˇlaˬpaˬ biꞈ caw nehˬ-eu meh. 25Yawˬ shawˬ yawˬ uˬ bya bya laˇ ngeh hawˇ-eu, aˬ yawꞈ-ahˇ mˇ dzaˬ laˇ-euˬ gʼaˬ Leˇaˬ pyeuꞈ gaˇ Yaˬkoˆ ya siˬ duˬ-euˬ meh. Kʼoeˇ ngeh, Laˬbaˬ jawˇ gaˇ aˬ yawꞈ iˇ-awˇ, “Aˬ jeˬ miˇ neh nawˇ ngaˬ-ahˇ teu loꞈ-ehˇ jahˇ nehˬ laꞈ te. Laˬkeˬlaˇ-ahˇ ya sheuˬ ni ngaˇ nawˬ-ahˇ gaˇ mˇ nehˬ-euˬ maˬ ngeuˇ-a loˇ. Aˬ jeˬ miˇ neh ngaˬ-ahˇ heu loꞈ-ehˇ mehˇ shuiˇ shuiˇ te” lehˇ ehˇ nehˬ-euˬ meh.

26Kʼoeˇ ngeh, Yaˬkoˆ-ahˇ Laˬbaˬ ehˇ nehˬ-eu, “Miˇ kʼahˬ heu kʼahˬ laꞈ kʼoeˇ aˬ yuiꞈ gʼaˬ smˇ miˇ maˬ iˇ mi naˆ-ehˇ aˬ nyiˇ gʼaˬ bi iˇ-eu zahˇ maˬ jaˆ-a. 27Oeˇ mˇ baˇ-eu zahˇ jahˇ gʼaˬ jiˇ-awˇ, dzaˬ byawˇ lawˇ-eu aˇ yamˬ heu shiꞈ nah buˬ-iˇ ngeh keuˆ ni dawˬ tawˬ siˬ. Nawˇ ngaˬ-ahˇ dzaiˇ shiꞈ kʼoꞈ gaˇ paˇ mˇ nehˬ laꞈ naˇ, Laˬkeˬlaˇ nawˬ-ahˇ bi mˇ dzaˬ laˇ ma.”

28Kʼoeˇ ngeh, Laˬbaˬ kʼaˇ ehˇ-euˬ loꞈ-ehˇ geuꞈ-eu gʼaˇ duˬ Yaˬkoˆ noeˬ jiˇ-euˬ meh. Jiˇ cehˇ gʼeh gʼaˬ-awˇ, Laˬkeˬlaˇ Yaˬkoˆ-ahˇ bi mˇ dzaˬ-iˇ-euˬ meh. 29Laˬbaˬ-aˬ, Laˬkeˬlaˇ-ahˇ bi bo saˆ-eu gʼaˇ duˬ aˬ yawꞈ-euˬ zaˬ kʼaˆ Biˇlaˬhaˇ biꞈ caw nehˬ-euˬ meh. 30Laˬkeˬlaˇ nehˬ-ehˇ Yaˬkoˆ yuꞈ taꞈ-awˇ, Leˇaˬ-ahˇ naˆ maˬ tseˇ Laˬkeˬlaˇ-ahˇ aˬ yawꞈ gaˬ-euˬ meh. Kʼoeˇ naˇ, shiꞈ kʼoꞈ keuˆ ni, Laˬbaˬ-euˬ gaˇ aˬ yawꞈ paˇ mˇ nehˬ-euˬ meh.

Yaˬkoˆ-euˬ zaˬ deuˬ

31Leˇaˬ-ahˇ naˆ maˬ tseˇ, Laˬkeˬlaˇ-ahˇ Yaˬkoˆ gaˬ gaˇ Sahˬpaˬ Miˬyehˇ mawˇ ngeh, Leˇaˬ-ahˇ zaˬ bi jawˇ le-euˬ meh. Ehˇ kʼawꞈ, Laˬkeˬlaˇ gʼaˬ-ahˇ aˬ yawꞈ zaˬ maˬ bi jawˇ le-a. 32Kʼoeˇ naˇ, Leˇaˬ aˬ nyiˇ pi leˇ-awˇ, aˬ li tiˬ li ciˬ-euˬ meh. Kʼoeˇ ngeh, “Ngaˇ shaˬ zahˬ mˇ gaˇ Sahˬpaˬ Miˬyehˇ haw mawˇ le-euˬ loꞈ-ehˇ, aˬ kaˇ naˇ, ngaˬ-euˬ kʼaˬ dzeˇ zaˬ ngaˬ-ahˇ gaˬ luꞈ-uˇ” lehˇ Leˇaˬ ehˇ-awˇ, aˬ li kʼoeˇ li-ahˇ Luˇbeˬ#29.32 ‘Luˇbeˬ’ lehˇ ehˇ-eu dawˬ tsuiꞈ-aˬ, ‘aˬ li tiˬ gʼaˬ mawˇ le-euˬ’ lehˇ ehˇ mawꞈ-eu meh. lehˇ myahˇ nehˬ-euˬ meh. 33Kʼoeˇ naˇ, Leˇaˬ aˬ nyiˇ paˇ pi leˇ-awˇ, aˬ li tiˬ li paˇ ciˬ-euˬ meh. Kʼoeˇ ngeh, “Ngaˬ-euˬ kʼaˬ dzeˇ zaˬ ngaˬ-ahˇ maˬ gaˬ-eu gaˇ kawˆ, Sahˬpaˬ Miˬyehˇ ya siˬ-euˬ miˇ neh, aˬ li heu li paˇ biꞈ laꞈ-euˬ nga” lehˇ Leˇaˬ ehˇ-awˇ, aˬ li kʼoeˇ li-ahˇ Suˇmoˬ#29.33 ‘Suˇmoˬ’ lehˇ ehˇ-eu dawˬ tsuiꞈ-aˬ, ‘naˬ bawˇ gaˬ leˇ-euˬ’ lehˇ ehˇ mawꞈ-eu meh. lehˇ myahˇ nehˬ-euˬ meh. 34Aˬ yawꞈ aˬ nyiˇ tiˬ poˆ paˇ pi leˇ-awˇ, aˬ li tiˬ li paˇ ciˬ-euˬ meh. “Nymˬ-mˇ poˆ jawˇ-aˬ, aˬ yawꞈ gʼaˇ duˬ aˬ li smˬ li ngaˇ ciˬ-euˬ miˇ neh, dzeuˇ laˇ ngeh naˆ maˬ tseˇ, ngaˬ-euˬ kʼaˬ dzeˇ zaˬ ngaˬ-ahˇ nui ma taꞈ tehꞈ-a” lehˇ aˬ yawꞈ ehˇ-awˇ, aˬ li kʼoeˇ li-ahˇ Leˬbiˇ#29.34 ‘Leˬbiˇ’ lehˇ ehˇ-eu dawˬ tsuiꞈ-aˬ, ‘gahˇ dzahˬ-eu’ lehˇ ehˇ mawꞈ-eu meh. lehˇ myahˇ nehˬ-euˬ meh. 35Kʼoeˇ naˇ, aˬ yawꞈ aˬ nyiˇ paˇ pi leˇ-awˇ, aˬ li tiˬ li paˇ ciˬ-euˬ meh. “Heu poˆ-aˬ, Sahˬpaˬ Miˬyehˇ-euˬ guiˬ lahˬ-ahˇ ngaˇ ja ceuˬ ma” lehˇ aˬ yawꞈ ehˇ-awˇ, aˬ li kʼoeˇ li-ahˇ Yuˇdaˆ#29.35 ‘Yuˇdaˆ’ lehˇ ehˇ-eu dawˬ tsuiꞈ-aˬ, ‘ja ceuˬ-eu’ lehˇ ehˇ mawꞈ-eu meh. lehˇ myahˇ nehˬ-euˬ meh. Yuˇdaˆ dehꞈ le gʼaˬ ngeh jawˇ, aˬ yawꞈ zaˬ maˬ paˇ jawˇ le ni pyeuꞈ-iˇ-euˬ meh.

Currently Selected:

Aˇ dahˬ 29: AHK

Highlight

Copy