Sirak 8
8
Ngena Runding ti Manah
1Anang ngelaban orang ke bekuasa, ngambika nuan enda dikuasa sida. 2Anang belaya enggau orang kaya, ngambika sida enda naka ulih ngelaban nuan. Mayuh orang udah rusak laban mas, lalu bala raja nyau enda lurus laban nya. 3Anang bekelikuh enggau orang ke pejaku, laban pengawa nya baka ke nabakka kayu ngagai api. 4Anang betundi enggau orang ke enda beradat, ngambika sida enda bejai aki ini nuan. 5Anang mantah orang ke benung berubah ari dosa. Ingat semua kitai orang ke bepenyalah. 6Anang ngumbai orang tuai nadai guna, laban sekeda kitai mega deka tuai jemah ila. 7Anang gaga ati meda orang siku nya parai; ingat meh semua kitai parai ila.
8Anang enda pedulika utai ti disebut orang ke bepenemu. Pelajarka jaku sida nya, ngambika nuan nyadi orang ke pandai lalu ulih gawaka orang ke bekuasa. 9Peratika jaku orang ke tuai, laban sida nya belajar ari aki ini sida. Nuan belajar ari sida jalai nyaut ba maya ti ngena.
10Anang ngidupka pengingin orang ke bedosa, ila nuan sama kena rampit. 11Anang begulai enggau orang ke sumbung, ila sida mutarka jaku nuan kena ngelaban nuan. 12Anang nyale utai ngagai orang ke lebih bekuasa ari nuan, enti nuan nyale utai ngagai iya, utai nya kira lenyau aja. 13Anang nyadi jamin utang orang bukai enti penyampau iya lebih ari ti ulih bayar nuan. Enti udah tekeranjur, nuan patut besedia mayar iya. 14Anang nawa akim laban iya tetap menang ketegal penuduk iya. 15Anang begulai bejalai enggau orang ke berani kempang sengapa, laban iya semina ngenusah nuan aja. Iya deka ngereja utai nundaka peneka ati iya, lalu nuan deka mati ketegal pemeli iya.
16Anang belaya enggau orang ke rengkal, lalu anang bejalai kediri enggau iya ngagai endur ti sunyi. Orang ke baka nya rindu kasar enggau orang laban nyawa nadai reti ba iya, lalu iya berani munuh nuan ba endur ti nadai orang. 17Anang minta penemu ari orang ke beli, laban iya deka nusi utai nya. 18Anang sekali-kali ngereja utai ti dipelalai ba mua orang ke enda dikelala nuan, laban nuan enda nemu utai ti deka diperitaka iya. 19Anang sekali-kali madah ngagai sebarang orang utai dalam ati nuan, lalu anang ngadang diri nerima pemanah ari sida.
Currently Selected:
Sirak 8: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia