Sirak 7
7
Mayuh Bengkah Lalau
1Enti nuan enda ngaga penyai, nadai penyai ninggang nuan. 2Anang ngaga penyalah, nya baru penyalah jauh ari nuan. 3Anang naburka benih ti enda lurus, ila nuan empu deka ngetau tujuh kali lipat buah iya.
4Anang minta pangkat tinggi ari Tuhan tauka penuduk besai ari rajah. 5Anang ngaga diri badas di mua Tuhan sereta anang ngaga diri pintar di mua rajah. 6Anang ingin deka nyadi akim, ila nuan enda chukup kering ngelaban utai ti enda lurus. Enti nuan ngelakka diri dikena orang ke bekuasa, nama nuan ti dikumbai lurus deka rusak. 7Anang ngereja penyai ngagai rayat mayuh, lalu anang ngemalu diri di mua orang mayuh.
8Anang ngaga dosa ti sebaka dua kali. Laban sekali aja pen nuan ngaga dosa, nya udah meh nuan diukum.
9Anang berunding, “Allah Taala ke Pemadu Tinggi deka ingatka pemeri aku ti mayuh amat diberi ngagai Iya, lalu Iya nerima pemeri aku nya.”
10Anang leju besembiang, lalu anang muai peluang meri sedekah ngagai orang miskin.
11Anang ketawaka orang ke tusah, laban Iya ke Pemadu Bekuasa ngasuh orang ke tusah dikemaruhka, lalu ngangkatka iya baru.
12Anang ngaga cherita bula pasal kaban belayan tauka pangan nuan. 13Anang sekali-kali bula, laban pemula nya endang enda mai pemadas.
14Anang bejaku begah-begah ba mua orang tuai lebuh baum, lalu anang ngulang jaku lebuh besembiang. 15Anang nulak kereja kebun tauka kereja kasar, Allah Taala ke Pemadu Tinggi meri kereja nya ke kitai.
16Anang begulai enggau raban orang ke bedosa, ingat meh ukum Tuhan tetap deka jampat datai.
17Ngemaruhka diri empu amat-amat, laban orang ke jai deka diukum ngena api enggau ulat.
Kaul enggau Pangan sereta Diri Sebilik
18Anang mudi pangan nuan ketegal duit, tauka mudi pangan amat nuan ketegal mas.
19Anang muai peluang jadi enggau indu ke manah sereta pintar, laban iya lebih berega ari mas.
20Anang jai enggau kuli ke ngereja pengawa iya enggau manah, tauka orang gaji ke rajin bekereja ke nuan. 21Kasihka kuli ke pintar, lalu anang tekelalu nyekat iya.
22Tupi meh jelu nuan enggau manah, lalu ibun meh jelu nya enti meri penguntung ke nuan.
23Enti nuan bisi anak, ajar meh sida ngambi ngasi sereta mereti kenyau ari mit.
24Enti nuan bisi anak indu, jaga meh iya ngambi tetap tuchi. Anang tekelalu nitihka peneka iya. 25Enti nuan ngasuh iya belaki, nuan udah tembu ngereja pengawa ti beguna amat. Tang asuh iya jadi enggau lelaki ke mereti.
26Enti nuan bisi bini ke manah, anang nyarak iya. Tang nuan anang nyerahka diri ngagai orang ke enda dikerinduka nuan. 27Bebasaka apai nuan enggau pengabis ati nuan, lalu anang enda ingatka pemerinsa indai nuan lebuh iya beranakka nuan. 28Ingat, nuan anak sida. Baka ni jalai nuan deka malas semua budi sida?
Bala Imam
29Nuan anang enda nangika Tuhan enggau pengabis ati sereta bebasaka bala imam Iya. 30Rinduka Tuhan Pengaga nuan enggau pengabis pengering nuan, lalu anang enda pedulika orang ke ngereja pengawa Iya. 31Kemesaika Tuhan sereta bebasaka bala imam Iya. Beri ngagai sida utai ti diasuh kereja nuan baka asil tanah ari ketau keterubah, piring kena ngampun dosa, pah jelu persembilian, sereta semua persembilian enggau pemeri bukai ti ditetapka.
Orang Miskin enggau Orang Tusah
32Tulung meh orang ke miskin, nya baru nuan deka nerima mayuh berekat Tuhan. 33Nuan anang enda manah ati enggau semua mensia, lalu anang enda ingatka orang ke udah mati. 34Anang enda sinu enggau orang ke tusah, lalu sama ngulit enggau orang ke ngulit. 35Anang kakang ngabas orang ke sakit, laban ketegal kereja manah nya nuan deka bulih pengasih. 36Dalam semua utai ti dikereja nuan, anang enda ingatka diri deka parai ila, nya alai seagi-agi nuan ingatka utai tu, nuan enggai ngaga dosa.
Currently Selected:
Sirak 7: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia