Sirak 9
9
Orang Indu
1Anang ninding bini nuan, laban enti nuan baka nya nuan ngajar iya ngereja penyai ngenusah nuan. 2Anang nyerahka diri ngagai orang indu enggaika iya nguasa nuan. 3Nyauhka diri ari indu ke gila orang laki enggaika nuan kena panjuk iya. 4Anang begulai enggau indu penanyi enggaika nuan kena sintak pujuk sida. 5Anang merening orang indu dara biak enggau pengingin ti kamah, enggaika seduai kena ukum ketegal nya. 6Anang nyerahka diri ngagai indu sundal, enggaika nuan abis reta. 7Anang rayau-rayau sebelah pasar, tauka bejalai ngagai endur ti sunyi. 8Enti nuan tepedaka indu ke bajik, merening ke bukai. Anang lekat laban pemajik indu ke ukai bini nuan, laban utai nya ngasuh pengingin idup baka api. Mayuh orang udah tesat laban pemajik orang indu. 9Anang duduk begulai enggau bini orang, lalu anang berami ngirup wain enggau iya laban nuan deka lekat ba iya, lalu alah laban pengingin sampaika nuan rusak.
Kaul enggau Orang Bukai
10Anang ngelengkaka pangan lama laban nuan enda bulih pangan bukai sebaka enggau iya. Pangan baka wain: makin lama makin nyamai. 11Anang chemburu enti orang ke bedosa nya mujur, laban nuan enda nemu nama pengerusak ti deka nuntung iya. 12Anang rinduka utai ti ngasuh orang ke jai senang, laban sida enda ulih lepas ari ukum sampaika sida mati. 13Anang semak orang ke bekuasa ke deka munuh nuan, nya baru nuan enda takutka diri dibunuh. Tang enti nuan enda tau enda begulai enggau sida, anang ngereja penyalah ngambi sida enda munuh nuan. Ingat meh nuan endang seruran dalam penusah lalu seruran mudah diintai sida.
14Nuan enggau naka ulih patut nemu orang ke berimbai pendiau enggau nuan, lalu minta lalau orang ke pintar. 15Berandau meh enggau orang ke pandai, lalu nuan patut mai sida berandau pasal adat Allah Taala ke Pemadu Tinggi. 16Anang enda ngiga orang ke lurus nyadi pangan amat nuan, lalu awakka penangi nuan ke Tuhan nyadika temegah ati nuan.
Orang ke Bekuasa
17Utai ti manah dipuji laban orang landik ngaga iya, lalu tuai rayat ke pintar dipuji laban pengelandik iya bejaku. 18Orang ke tekelalu udu bejaku diketakutka orang, lalu orang ke udu bejaku ngapa enda dikarinduka orang ke diau enggau sida.
Currently Selected:
Sirak 9: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia