Genesis 12
12
CAB. XII
1Nish va’n Chiarn er ghra rish Abram. Immee royd ass dty heer hene, as veih dty chynney, as veih thie dty ayrey, gys y cheer jeeagh-ym dhyt. 2As jeed’s neem’s ashoon mooar, as nee’m oo y vannaghey, as nee’m dty ennym ooasle, as bee oo son bannaght. 3As nee’m adsyn y vannaghey, ta dy dty vannaghey, as ver-ym mollaght ersyn ta guee mollaght ort’s: as aynyd’s vees ooilley ashoonee yn ooir er nyn mannaghey. 4Myr shen dimmee Abram roish, myr va’n Chiarn er loayrt rish; as hie Lot mârish: as va Abram three-feed bleïn as queig-jeig dy eash, tra hie eh magh ass Haran. 5As ghow Abram Sarai e ven, as Lot mac e vraarey, as ooilley yn chooid v’ad er jymsaghey, as y chloan v’eh er gheddyn ayns Haran: as hrog ad orroo dy gholl gys cheer Chanaan, as gys cheer Chanaan haink ad.
6As ren Abram troailt trooid y cheer gys Sichem, gys cheer rea Moreh. As va’n Canaanite ec y traa shen ayns y cheer. 7As ren y Chiarn eh hene y hoilshaghey da Abram, as dooyrt eh, Da dty luight’s ver-yms yn cheer shoh: as ayns shen hrog eh altar da’n Chiarn, ren eh hene y hoilshaghey da. 8As scugh eh veih shen gys slieau shiar jeh Beth-el, as hoie eh e chabbane, lesh Beth-el er y sheear, as Hai er y shiar, as ayns shen hrog eh altar gys y Chiarn, as ren eh geamagh er ennym y Chiarn. 9As ghow Abram e yurnah, goll er e hoshiaght my-yiass.
10As va genney ayns y cheer; as hie Abram sheese gys Egypt, dy chummal ayns shen: son va’n genney dewil ayns y cheer. 11As haink eh gy-kione, myr v’eh tayrn er-gerrey da Egypt, dy dooyrt eh rish Sarai e ven, Cur-my-ner nish, ta fys aym dy vel oo ben aalin dy yeeaghyn ort. 12Shen-y-fa, hig eh gy-kione, tra ver ny Egyptianee my-ner oo, dy jir ad, Shoh yn ven echey: as ver ad mish gy-baase, agh sauee ad uss bio, 13Abbyr, ta mee guee ort, dy nee oo my huyr: dy vod eh ve mie mârym er dty ghraih’s, as bee my vioys er ny hauail er y choontey ayd’s. 14As haink eh gy-kione, tra va Abram er jeet gys Egypt, hug ny Egyptianee my-ner yn ven dy row ee feer aalin. 15Honnick princeyn Pharaoh ee myrgeddin, as voyll ad ee kiongoyrt rish Pharaoh: as va’n ven goit stiagh gys thie Pharaoh. 16As hug eh dellal mie da Abram er y choontey eck’s: as va echey kirree, as dew, as assylyn fyrryn, as fir-vooinjerey, as inneenyn-veyl, as assylyn bwoirryn, as camelyn. 17As ren y Chiarn seaghney Pharaoh as e hie lesh doghanyn dewilley, er coontey Sarai ben Abram. 18As deïe Pharaoh er Abram as dooyrt eh, Cre shoh t’ou er n’yannoo rhym? cre’n-fa nagh dinsh oo dou dy nee dty ven v’ee? 19Cre’n-fa dooyrt oo, My huyr ee? myr shen oddin ver n’ghoaill ee son my ven hene: nish er-y-fa shen, cur-my-ner dty ven, gow ee, as fow royd. 20As hug Pharaoh currym da ny fir-oik echey mychione Abram: as hug ad ersooyl eh hene as e ven, as ooilley ny va echey.
Currently Selected:
Genesis 12: BIB1819
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1819, 2019