Genesis 13

CAB. XIII

1As jimmee Abram magh ass Egypt, eh hene, as e ven, as ooilley ny va echey, as Lot mârish, lesh y jiass. 2As va Abram feer verchagh ayns maase, ayns argid, as ayns airh. 3As hie eh er e yurnah veih yn jiass, eer gys Beth-el, gys yn ynnyd raad va e chabbane ec y toshiaght, eddyr Beth-el as Hai. 4Gys yn ynnyd raad v’eh er droggal altar ec y toshiaght: as ayns shen ren Abram geamagh er ennym y Chiarn.

5As va myrgeddin ec Lot, hie marish Abram, shioltaneyn, as shellooyn, as cabbaneyn. 6As cha row yn cheer mooar dy liooar dy nyn rere, daue dy chummal cooidjagh; son va mooarane cooid oc, myr shen nagh voddagh ad cummal dy cheilley. 7As va streeu eddyr bochillyn Abram as bochillyn Lot: as va’n Canaanite as y Perizzite cummal ayns y cheer ec y traa cheddin. 8As dooyrt Abram rish Lot, Ny lhig da streeu erbee ta mee guee ort, ve eddyr mish as uss, as eddyr ny bochillyn aym’s as ny bochillyn ayd’s, son braaraghyn shin. 9Nagh vel y slane cheer kiongoyrt rhyt? jean oo hene y scarrey, ta mee guee ort, voym’s: my nee uss goll gys y laue chiare, eisht hem’s lesh y laue yesh; er-nonney my hed uss gys y laue yesh, eisht hem’s lesh y laue chiare. 10As hrog Lot seose e hooillyn: as hug eh my-ner ooilley strah Yordan, dy row ushtey dy mie ayn dy chooilley raad, roish my stroie yn Chiarn Sodom as Gomorrah, eer myr garey yn Chiarn, goll-rish cheer Egypt myr t’ou cheet lesh Zoar. 11Eisht ren Lot reih da hene ooilley strah Yordan: as ren Lot troailt lesh y shiar: as ren ad scughey yn derrey yeh veih yn jeh elley. 12Ren Abram cummal ayns cheer Chanaan, as ren Lot cummal ayns ard-valjyn yn strah, as hoie eh e chabbane lesh Sodom. 13Agh va deiney Sodom feer vee-chrauee, as erskyn-towse peccoil, kiongoyrt rish y Chiarn.

14As dooyrt y Chiarn rish Abram, lurg da Lot v’er ny scarrey veih; Trog nish seose dty hooillyn, as jeeagh veih yn ynnyd t’ou ayn, my-hwoaie, as my-yiass, as lesh y shiar, as lesh y sheear. 15Son ooilley yn cheer t’ou dy akin, dhyt’s ver-ym eh, as da dty luight son dy bragh. 16As neem’s yn sluight ayd’s [ayns earroo] myr joan ny hooirey: myr shen my oddys dooinney coontey joan ny hooirey, eisht vees dty luight’s myrgeddin er nyn earroo. 17Trog ort, shooyl trooid y cheer, er y lhiurid, as er y lheead echey; son dhyt’s ver-yms eh. 18Eisht ren Abram e chabbane y scughey, as haink eh, as ren eh cummal ayns cheer rea Mamre, ta ayns Hebron, As ayns shen hrog eh altar gys y Chiarn.

Currently Selected:

Genesis 13: BIB1819

Highlight

Copy