Genesis 11
11
CAB. XI
1As va’n seihll ooilley jeh’n un chengey, as jeh’n un ghlare. 2As haink eh gy-kione, myr ghow ad nyn yurnah lesh y shiar, dy daink ad gys cheer rea ayns thalloo Shinar; as ayns shen ren ad cummal. 3As dooyrt ad ry-cheilley, Tar-jee, lhig dooin breekyn y yannoo, as slane lostey ad: As va breekyn oc ayns ynnyd claghyn, as va pick-hallooin oc son mortar. 4As dooyrt ad, Tar-jee, lhig dooin ard-valley as toor y hroggal, e vullagh nee roshtyn gys niau; as lhig dooin ynnyd-vaghee shickyr y yannoo dooin hene, nagh bee mayd skeaylt veih-my-cheilley er slane eaghtyr y thallooin. 5As haink y Chiarn neose dy chur-my-ner yn ard-valley, as y toor va cloan gheiney dy hroggal. 6As dooyrt y Chiarn, Cur-my-ner ta’n pobble myr unnane, as ta’n un ghlare oc ooilley: as shoh t’ad er ghoaill orroo dy yannoo; as nish cha bee nhee erbee er ny lhiettal voue, t’ad er n’ghoaill ayns laue dy yannoo. 7Tar-jee, lhig dooin goll sheese, as ayns shen coyrt shaghrynys er y ghlare oc, nagh vod yn derrey yeh toiggal glare yn jeh elley. 8Er shoh ren y Chiarn skeayley ad magh veih shen harrish slane eaghtyr y thallooin; as scuirr ad veih troggal yn ard-valley. 9Shen-y-fa te enmyssit Babel, er-yn-oyr dy nee ayns shen hug y Chiarn shaghrynys er glare ooilley yn seihll: as veih shen ren y Chiarn ad y skeayley harrish slane eaghtyr y thallooin.
10Ad shoh va sheelogheyn Shem: va Shem keead bleïn dy eash, as hooar eh Arphaxad daa vleïn lurg y thooilley. 11As va Shem bio lurg ruggyr Arphaxad queig cheead bleïn, as hooar eh mec as inneenyn. 12As va Arphaxad bio queig bleeaney jeig as feed, as hooar eh Salah. 13As va Arphaxad bio lurg Salah ve ruggit, kiare cheead bleïn as three; as va echey mec as inneenyn. 14As tra va Salah jeih bleeaney as feed dy eash, hooar eh Eber. 15As va Salah bio lurg Eber ve ruggit kiare cheead bleïn as three; as va echey mec as inneenyn. 16As tra va Eber kiare bleeaney jeig as feed dy eash hooar eh Peleg. 17As va Eber bio lurg ruggyr Peleg kiare cheead bleïn as jeih as feed: As va echey mec as inneenyn. 18As tra va Peleg jeih bleeaney as feed dy eash, hooar eh Reu. 19As va Peleg bio lurg Reu ve ruggit daa cheead bleïn as nuy; as va echey mec as inneenyn. 20As tra va Reu da vleïn jeig as feed dy eash, hooar eh Serug. 21As va Reu bio lurg Serug ve ruggit daa cheead bleïn as shiaght, as hooar eh mec as inneenyn. 22As tra va Serug jeih bleeaney as feed dy eash, hooar eh Nahor. 23As va Serug bio lurg Nahor ve ruggit daa cheead bleïn; as va echey mec as inneenyn. 24As tra va Nahor nuy bleeaney as feed dy eash, hooar eh Terah. 25As va Nahor bio lurg Terah ve ruggit queig-feed as nuy bleeaney jeig; as va echey mec as inneenyn. 26As tra va Terah three-feed bleïn as jeih, hooar eh Abram, Nahor, as Haran.
27Nish ad shoh sheelogheyn Terah: hooar Terah Abram, Nahor, as Haran: As hooar Haran Lot. 28As hooar Haran baase roish e ayr Terah, ayns y cheer ruggyr eh, ayns Ur ny Chaldeanee. 29As ghow Abram as Nahor dagh fer jeu ben: va ben Abram enmyssit Sarai: as ben Nahor, Milcah, inneen Haran, ayr Milcah, as ayr Iscah. 30As va Sarai gennish; cha row (foast) sluight eck. 31As ghow Terah Abram e vac, as Lot mac Haran, yn oe echey, as Sarai e inneen ’sy leigh, ben e vac Abram; as hie ad magh veih Ur jeh ny Chaldeanee, dy gholl gys cheer Chanaan; as haink ad gys Haran, as ren ad cummal ayns shen. 32As va eash Terah daa cheead bleïn as queig, as hooar Terah baase ayns Haran.
Currently Selected:
Genesis 11: BIB1819
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1819, 2019