Noo-deh:⧾ 5

Deh 'Anenaya'-: 'dekorn: :Sofaya'-: on no-a

1:Yee' 'yu an 'da-dih-a 'Anenaya'-: 'dekorn: or-a'a: 'nynor :Sofaya'-: mo-: plo an-a'a: 'bluhba⧾-a' 'kplo :due'. 2:Yee' 'Anenaya' dhe or-a' 'wlii: :nee' dih, 'do or-a' 'jeh bo. Or-a'a: 'nynor yubo: eh-a' deh-: 'i. 'De or kpa :yih :sie:-a 'o :Yusu'-a'a: dboo-nyor⧾. 3:Yeh or kpa-a 'wlii-a' kpor :dao', :yee' :Piteh' dhele-or-: dih, or 'da, 'Anenaya', :eh :korn dhih 'de :on :za 'ku 'yli-eh dih, 'de on :korn :an-a' :porluh wlu 'ken, 'de :on 'tmo sih 'de Gban 'i :ne :Zulu bo :eh? 'De 'bluhba-a' 'kplo :on plo-a, :on dhe or-a' 'wlii: :nee' dih 'do :an-a' 'jeh bo :eh? 4Ti :on 'see-a 'bluhba-a' 'kplo :dao' plo, :yee' or se 'de :on bo :korn :e? :Ae' :yeh :on plo-or, or-a' 'wlii se 'de :on bo :korn ke? :Yee' :eh :korn dhih, 'de :on po 'o deh :daa :eh :ne :ao', 'do :on :porluh ken :eh? Sih :on 'tmo-a, eh :se 'de :gwlor-nyor⧾ bo, :on :se-ih' 'tmo-dih:. Jorwor: 'de Nyorsoa bo :oo', :on 'tmo-dih-ih. 5:Yee' :yeh 'Anenaya' 'worn-a deh :daa :Piteh' :za-a-', :yee' or 'ga-: dih, 'de or 'meh. :Yee' nyor⧾-a' klehkpeh :on 'worn-a deh :daa :eh :no-eh, :fano 'kpa 'de on 'di 'weh 'gabaa. 6:Yee' :yeh or 'meh-a, :yee' 'nynuu: :gbolo'⧾, mo-: 'yle, :on bhian-dih: or-a' 'ku deh⧾ kle-' dih, 'de on kpa-uh 'o 'zorn, on nma-dih-uh dih.

7:Yee' :yeh 'yluh-buh⧾ taan 'beh-dih: en 'ye-a 'o ken dih :zi-dih:, :yee' 'Anenaya'-a'a: 'nynor pa 'de 'gbu :Piteh' :ne-a 'di 'weh :ke. Jorwor: or se deh :eh :no-eh yubo:. 8'De :Piteh' dhele-or dih, or 'dae:, Zela: 'on :gwluhuh', 'bluhba-a' 'kplo a plo-a, 'wlii-a' klehkpeh a 'ye-a, me-: 'o :en :dhe dih :e?

'De or 'da, Keen', 'wlii: :a 'ye-a, en-' klehkpeh :oo'.

9'De :Piteh' 'da, :Eh :korn dhih 'de mor-: 'dekorn: :an-a'a: yibeor-: a 'worn-dih-eh ken dih, 'de a 'dhen :Gwlor :baa' :eh? :Gbee'e:. Nyor⧾-kpalu:⧾ :on nma-dih:-a :an-a'a: yibeor dih, on :ne 'o 'gbu worn 'i 'weh 'gboror:. An mu 'de :on 'zorn :kpa :kana :ke. 10:Yeh :Piteh' jla-a, :yee' 'do :dha :due' :dao', or 'ga-: dih 'do :Piteh' ybei', 'de or 'meh. :Yee' :yeh 'nynuu: :gbolo'⧾ :dao', on pa-a 'de 'gbu 'di :neheh', 'de on 'ye-a 'nynor :or 'meh-a, :yee' on 'si-dih: or-a' 'ku-: 'zorn, 'de on nma-dih-uh dih 'do or-a'a: yibeor-a' nma-dih-deh 'bhun. 11:Yee' 'chore-nyor⧾-a' klehkpeh-: 'dekorn: nyor⧾-a' klehkpeh :on 'worn-a dhih :daa-: on 'kpa-' :fano: 'gabaa.

:Yusu'-a'a: dboo-nyor⧾ no nyor⧾ 'di dih 'ma-dih-deh:⧾ :dhulu'

12:Yee' :Yusu'-a'a: dboo-nyor⧾ no nyor⧾ 'i :to-dih-deh⧾-: 'dekorn: nyor⧾ 'di dih 'ma-dih-deh⧾-: 'de :gwlor-nyor⧾ 'nyne-'. :Yee' :Yusu'-a' dhih 'jeh-' :po-nyor⧾-a' klehkpeh, an 'kpa :dha :due' 'do ti-a' klehkpeh bo, 'do :dha an 'da-dih-a :Salomor'-a' :forn-dih: 'da. 13Jorwor: nyor⧾ 'sluh⧾ :on 'ye-a' 'di dih ku, :on 'ye-a' 'de on 'nyne-' 'kpa, on se :ne. Keen' :mloror' nyor⧾-a 'ye-uh' deh 'gabaa. 14:Yee' :yeh eh mu-a 'dlu bo :muu:, :yee' nyor⧾-kpalu⧾-: 'dekorn: 'nynor⧾-kpao'⧾-: mo-: po :Gwlor :baa'-a' dhih dhih 'jeh-', 'de an-a' :dha :dhulu' 'kpa 'o on ken. 15:Yee' 'do deh :dao' :Yusu'-a'a: dboo-nyor⧾ no-a bo, eh-: no-eh, 'de nyor⧾-a kpa puhba-nyor⧾ 'de 'kpa :gwie 'i, 'de an 'pehn-dih-uh dih 'do ken 'pehn-deh ken-: 'dekorn: 'do :sleheh'⧾ ken-:. Deh :korn-a dhih an no-a deh⧾ :dao', eh-: 'dhu, an 'bhorn :mor :Piteh' :taa zi, or-a' :yeh beh :or se-uh dih 'tuh, 'de or-a' 'gbu :gwlii' :zulu 'ye 'o, on ken :yi-dih: 'klein', 'de on 'ye 'puh. 16:Yee' nyor⧾ :dhulu', mo-: 'wluh :gwlor⧾ :eh :ne-a :Julu'slehn 'de dih 'di, 'de an ya 'de puhba-nyor⧾-: 'dekorn: nyor⧾ :yuh 'kwla 'ye-dih-deh⧾ :ne-a 'o 'de-: 'do :Yusu'-a'a: dboo-nyor⧾ bo, 'de an-a' klehkpeh 'puh.

On 'ye-dih: :Yusu'-a'a: dboo-nyor⧾ 'kle

17:Yeh deh⧾-a' klehkpeh :dao', en mu-a 'dlu bo, :yee' Nyorsoa-a' 'slaa: :za-nyor⧾-a' nyor :klaba'-: 'dekorn: nyor⧾ :an na-or bo-: :on no-a :Sayusi'i-nyor⧾-a' kpor, :gwlehehn'-: no-uh, 'do :Yusu'-a'a: dboo-nyor⧾-a' deh bo. 18'De on kpon-uh, on po-uh 'de :kasue 'di. 19Jorwor: dholo-', :yee' :Gwlor :baa'-a' 'enjor :due' yi-: 'de, 'de or :za 'o :kasue-gbu-a' :kpaa', 'de or 'si-dih-uh 'zorn. 20'De or 'da, A mu 'de Nyorsoa-a' 'sla ybei', a 'ye dih :nyna 'do :gwlor-nyor⧾ ybei', a 'ye-uh :gwluhuh' zela: 'do 'kmo :ne-eh: :dele' :daa, eh-a' klehkpeh-a' dhih bo. 21:Yeh zorn zen-a, :yee' :Yusu'-a'a: dboo-nyor:⧾ :dao', on dhe 'o 'enjor: :dao', or-a' 'tele'-: dih, 'de on mu 'o Nyorsoa-a' 'sla ybei', 'de on 'kpa nyor⧾ deh :torne-eh ken.

:Yeh an no :ao', :yee' Nyorsoa-a' 'slaa: :za-nyor⧾-a' nyor :klaba'-: 'dekorn: nyor⧾ :an na-or bo-: on 'da :Jueh'-nyor⧾-a' zabe: :zi-nyor:⧾ :klaba'⧾-: 'dekorn: an-a' 'bluhba: :korn-nyor⧾-a' klehkpeh-: 'weh, on 'ye dhih polo:. 'De on dbo nyor⧾ on 'ye 'de :kasue-gbu 'di mu, on 'ye 'de :Yusu'-a'a: dboo-nyor:⧾ :on :ne-a 'de :ya. 22Jorwor: :yeh nyor⧾ on dbo-a, on 'si-a dih 'do :kasue-gbu bo, 'de on pobo:-a 'de on 'di, :yee' :Yusu'-a'a: dboo-nyor:⧾ :dao', on se 'de :ne. 'De on mu deka, on po-uh kuna', on 'da, 23:Yeh :a :yeh-dih:-a :kasue-gbu ken, :yee' on 'gba-eh: worn 'i 'weh deh 'jeh, 'de :a 'ye nyor⧾ :an 'dhu-uh-a 'yli-eh bo, on :nyna dih 'do an-a' :kpaa' worn 'i. Jorwor: :yeh :a kan-dih:-a 'o 'gbu worn 'i, :yee' :a :se-' nyor 'ye 'de mor. 24:Yeh Nyorsoa-a' 'sla-a' :poli'si-a' nyor :klaba'-: 'dekorn: Nyorsoa-a' 'slaa: :za-nyor:⧾ :klaba'⧾-: on 'worn-a dhih :daa, :yee' an 'chihleh-eh-: 'i, 'do deh :eh :no-eh 'do :Yusu'-a'a: dboo-nyor⧾ bo. 25'De 'yu :due' yi 'o on bo, or zela-uh :gwluhuh', or 'dae:, A :gbee'e:. Nyor⧾ a po-a 'de :kasue 'di, mo-: :ne 'de Nyorsoa-a' 'sla ybei', :an torne nyor⧾ deh 'de mor. 26:Yee' 'do :dha :due' :dao', :poli'si-a' nyor :klaba' :dao', or kpa or-a'a: :poli'si 'weh, 'de on :ya 'de :Yusu'-a'a: dboo-nyor:⧾ :dao'. Jorwor: on :se-uh' 'kpih :kpa-dih:. Deh no-eh, an ple :fano:, nyor⧾ :ne-uh' sobu'⧾ dih :tba-dih:.

27:Yee' on :pa-dih-uh', 'de on no-eh, on :nyna dih 'do zabe: :zi-nyor⧾ ybei'. 'De Nyorsoa-a' 'slaa: :za-nyor⧾-a' nyor :klaba' 'chleh-uh, 28or 'dae:, :A :se-' a 'tele' 'i dhe, :eh :mor nyor-a' :no-' :Yusu'-a' 'nyne, :an-a' :torne:-' nyor⧾ deh :dele' ka :e? Jorwor: a :gbee'e:. A pobo: deh a no-a ya-: e. A :gweh-dih: a-a' nyor⧾ deh :torne-eh dha :Julu'slehn 'dlu 'weh. 'De a 'bhorn a 'ye or-a' nyomor 'do :a 'dlu po.

29:Yeh or 'da :ao', :yee' :Piteh'-: 'dekorn: or 'bei' dboo-nyor⧾-: on 'da, :A :korn :a 'ye 'o Nyorsoa-a' 'tele' dih dhe :gbor :gbor, :eh :zi 'o :gwlor-nyor-a' neh-'. 30:Yee' an kpa an-a' wlu 'dlu bo :chio'lo:, on 'dae:, :Yusu' a :kor-dih:-a 'o tu 'i, 'de a 'dba-a, Nyorsoa :or :korn-a :weheh' :a :bai'-a' :bai'-a za-a, or za-or 'de nma-dih-deh 'di 'weh. 31:Yeh Nyorsoa za-or 'de nma-dih-deh 'di, :yee' or 'duo-or ya-', 'de or dhe-or dih 'de or-a' :dila-son bo, 'de or no-or :a-a' nyor⧾ :na-dih-nyor-: 'dekorn: nyor⧾ 'puh-dih-nyor-:. Or no deh :daa 'weh, 'de 'Ezlea-nyor⧾ 'ye an-a' deh⧾-zon:⧾ :no-eh dih 'tali:, 'de on 'ye 'de Nyorsoa bo 'bili:, 'de or 'ye an-a' deh⧾-zon⧾-a' dhih bo 'ma-dih:. 32:A :mor no deh⧾ :daa, en-' dhih bo zela-nyor⧾, 'dekorn: Gban 'i :ne :Zulu: or 'nyi-a nyor⧾ :yuh :an dhe-a 'o or-a' 'tele' dih-: :ke.

33:Yeh zabe: :zi-nyor:⧾ :dao', on 'worn-a deh⧾ on :za-a-', :yee' 'chehn 'yi-dih-uh-: dih 'gabaa, 'de an 'bhorn on 'ye-uh' 'dba. 34Jorwor: an-a' nyor :due', :or 'dhu-a :Falasi'i-yu-', an 'da-dih-a :Game'la, :or no-a nyor⧾ 'tele' :torne-nyor⧾-a' nyor :due', nyor⧾-a' klehkpeh, an 'dhu-a 'o 'gabaa, or-: :nyna dih 'do zabe: :zi-nyor⧾ ybei', 'de or 'nyi 'tele', on 'ye 'o dboo-nyor:⧾ :dao' 'zorn kpa 'do ti-kpor-bei 'di. 35:Yeh on kpa-uh-a 'o 'zorn, 'de or :wlu 'de or 'bei' zabe: :zi-nyor⧾ bo, or 'dae:, A :mor 'Ezlea-nyor:⧾. A no 'neh 'neh, 'do deh a polo-a, a 'ye-a no 'do nyor⧾ :daa 'bhun. 36Deh no-eh, 'do ti-kpor-bei: :en zi-a 'di, :yee' nyor-kpalu :due' an 'da-dih-a :Teyu'la, :or 'da-dih-a or-a' 'jeh nyor :klaba', or-: 'yle, :yee' nyor⧾-kpalu:⧾ :on 'beh-dih:-a :on 'ye-a nyor⧾-a' :kehehn' :nyieh no, mo-: zi 'o or klei'. Jorwor: nyor⧾ 'dba-or'. :Yee' or-a'a: nyor⧾-a' klehkpeh, an-a' 'slih 'meh-', 'de on :gba dih. 37:Yee' :yeh eh 'wluh-a 'o :neheh', :yee' nyor-kpalu :due' an 'da-dih-a :Juda', :or 'wluh-a :Galali'i-bluhba ken, or-: 'yle, 'do ti an zlo-dih-a nyor⧾ 'i, 'de or no-eh, 'de nyor⧾ :dhulu' zi 'o or klei', on 'ye 'gomla worn :bla-dih:. Jorwor: nyor⧾ 'dba-or' :ke. 'De nyor⧾-a' klehkpeh :on zi-a 'o or klei', on :gba dih :ke. 38:Yee' eh-a' dhih :naa, 'an 'dhu a 'slen, a 'ye :Yusu'-a'a: dboo-nyor:⧾ :daa dih 'tali:, on 'ye mu. Deh no-eh, deh⧾ an 'dhu-a on 'ye-a' no-: 'dekorn: deh⧾ an no-a-: :mor en 'wluh 'o an-a' 'jeh 'yor-eh-a' :porluh⧾ ken, :yee' en mu worn :gweh. 39Jorwor: :mor en 'wluh 'de Nyorsoa bo, :yee' a se en-' 'borboa' 'i :po-eh 'beh-dih:, a :ne-eh' no :noo:, 'de a :ne-' Nyorsoa-a' bo :vorn-nyor⧾ no.

:Yee' zabe: :zi-nyor:⧾ :dao', on 'worn-dih: deh :Game'la :za-a-' 'weh. 40'De on 'da :Yusu'-a'a: dboo-nyor⧾ 'de zabe: :zi-gbu 'zorn :neheh', 'de on bla-uh, on dhe-uh 'tele' 'i, on :ne-' :Yusu'-a' 'nyne 'da :neheh' :dele' ka, :mor on :taa Nyorsoa-a' tubo-wlu⧾ po. 'De on 'tali-uh dih, on 'ye mu. 41:Yee' dboo-nyor:⧾ :dao', :yeh on 'tali-uh-a dih, 'de on 'wluh-a 'de zabe: :zi-gbu 'zorn, :yee' an no 'mona:. Deh no-eh, Nyorsoa 'duo-uh' 'weh, on 'ye deh ken 'kpa-nyor⧾ no, on 'ye yaa'e 'kpa :Yusu'-a' dhih. 42:Yee' :eh 'wluh-a 'o ti on za-uh-a 'de :kasue 'di, zorn 'o zorn, on :se-' nyor⧾ deh :torne-eh 'bor :chio'lo:, 'do Nyorsoa-a' 'sla ybei'-: 'dekorn: 'de nyor⧾ 'bli 'gbu⧾ 'di dih-:. 'De mor on :se-' tubo-wlu:⧾ 'jeh-a' po-a' 'bor :ke, :ka :Yusu' 'dhu-a Nyorsoa-a' 'taan'-yu-'.

Currently Selected:

Noo-deh:⧾ 5: TCHKR

Highlight

Copy