Noo-deh:⧾ 4

On kpa :Piteh'-: 'dekorn: :Jororn'-: 'do :Jueh'-nyor⧾-a' zabe: :zi-nyor⧾ ybei'

1:Yeh :Piteh'-: 'dekorn: :Jororn'-: on 'si-a 'o nyor⧾ bo :wlu 'da, :yee' Nyorsoa-a' 'slaa: :za-nyor⧾-: or-a' 'sla-a' :poli'si-a' nyor :klaba'-: 'dekorn: :Sayusi'i-nyor⧾-: mo-: yi 'o on bo. 2:Yee' on 'kpa-' 'chehn. Deh no-eh, :mor on :taa :Yusu'-a' 'meh :sorn-' dhih-' za, :yee' eh torne nyor⧾ deh :ka 'meheh'-nyor⧾-a mu-a :sorn :neheh'. 3'De on kpon-uh, on po-uh :kasue 'di. :Yee' ti zi-' on 'ye-uh' 'de zabe: :zi-gbu 'zorn kpa. Eh-: no-eh, 'de on 'pehn 'de :kasue 'di, 'de zorn zen. 4Jorwor: nyor⧾ :dhulu' :on 'worn-a tubo-wlu:⧾ :dao' on po-a, on po-ih' dhih 'jeh. Nyor⧾-kpalu:⧾ :on po-ih-a dhih 'jeh-' :naa, :mor on bele: bo, :yee' on 'beh-dih: on 'ye 'wlu :mm' no.

5:Yee' :yeh zorn zen-a, :yee' :Jueh'-nyor⧾-a' nyor⧾ wlu 'ken :korn-nyor⧾-: 'bluhba: :korn-nyor⧾-: 'dekorn: nyor⧾ 'tele' :torne-nyor⧾-: mo-: 'kpa :dha :due' 'do :Julu'slehn. 6:Yee' 'do :wor 'Aneh: :or no-a Nyorsoa-a' 'slaa: :za-nyor⧾-a' nyor :klaba'-: :Kai'fa-: :Jororn'-: 'Ehleza'na-: 'dekorn: Nyorsoa-a' 'slaa: :za-nyor⧾-a' nyor :klaba'-a'a: 'cheh-buh-a' nyor⧾-kpalu:⧾ :noo'-: on :ne. 7:Yee' :yeh an-a' klehkpeh, on 'kpa-a :dha :due', :yee' on no-eh', 'de :Piteh'-: 'dekorn: :Jororn'-: on :nyna dih 'do on ybei', 'de on dhele-uh dih, on 'dae:, Deh 'i-deh-kpih: a no, 'de mor :or :korn 'nyne 'di, a 'puh-dih: :kloror-yu: :daa :eh?

8:Yee' :Piteh' :or 'yi-dih:-a Gban 'i :ne :Zulu dih, or :wlu-' 'de on bo, or 'dae:, A :mor nyor⧾ wlu 'ken :korn-nyor⧾-: 'dekorn: 'bluhba: :korn-nyor⧾-:. 9:Mor eh 'dhu a 'chleh :a 'i 'zean', 'do deh 'jeh :a no-a 'do :kloror-yu: :dao' bo, 'dekorn: :ka or no-a 'puh-a'-: 10:yee' a-a' klehkpeh, a :korn a 'ye-eh' yubo:, 'de mor nyor⧾-a' klehkpeh :on :ne-a dha 'Ezlea-bluhba ken, on :korn on 'ye-eh' yubo: :ke, :ka 'yu :daa :or :nyna-a dih dha a ybei', 'de :or 'puh-a klehkpeh klehkpeh, :Yusu' 'Klae :or 'ti-a 'Nazla :dee', 'de or-a' 'nyne 'di :oo', 'do :wor or 'puh-dih:. :Yusu' a :kor-dih:-a 'o tu 'i, 'de Nyorsoa :za-a: 'de nma-dih-deh 'di, or-: 'o :or 'puh-dih-or. 11:Yusu' no

tu, a :mor 'gbu :po-nyor:⧾, a po-a dih :dee'.

Tu-a' 'jeh :dao', mo-: no 'gbu-a' :zi-tu :naa.

12:Yusu' :due', or-: 'ble 'kpih, :or 'ye nyor⧾ zelie: 'do deh⧾-zon⧾-a' 'kpih 'zorn. Or-a' 'nyne :due', me-: :ne dha yao 'zorn, me-: 'beh-dih: :en 'ye nyor⧾ zelie:.

13:Yee' :yeh on 'ye-a :Piteh'-: 'dekorn: :Jororn'-: on se-a :fano :gwlii' :ne, :yee' zabe: :zi-nyor:⧾ :dao', eh :florn-dih-uh-: worn, deh no-eh, on yubo-eh 'i, :ka nyor⧾ 'sororn' :dao', on se-a 'chlee-deh yubo:, 'de mor on se-a deh-' 'dhu-eh:. :Yee' on yubo-eh-: 'i :ka on :na-a :Yusu' bo :naa: :zai'. 14Jorwor: :ka on 'ye-a 'yu :or 'puh-a, 'de or :nyna-a dih 'do :Piteh'-: 'dekorn: :Jororn'-: 'bhun, :yee' deh on 'ye-a' :za, eh se :ne. 15'De on zela-uh :gwluhuh' on 'ye 'de zabe: :zi-gbu-a' :chuu 'di 'wluh. :Yeh on 'wluh-a 'de, :yee' :Jueh'-nyor⧾-a' zabe: :zi-nyor:⧾ :dao', on 'kpa dhih polo-eh-: ken 'de an-a' 'jeh 'nyne-', on 'dae:, 16:Kaa :a mu nyor⧾ :daa, an-a' dhih :no :eh? Nyor⧾-a' klehkpeh :on 'ti-a dha :Julu'slehn, on yubo-eh' :ka eh 'dhu-a on mor-' on no-a nyor⧾ 'di dih 'ma-dih-deh: :klaba' :dao'. 'De mor :a se eh-a' dhih-' dhobo-eh 'beh-dih: :ke. 17Jorwor: :mor eh 'dhu :a se 'bhorn nyor⧾ :dhulu' 'ye dhih :daa 'worn, 'de en-' 'nyne :sor gweh 'bluhba 'dlu, :yee' a 'nyi :a 'dhu nyor⧾ :daa 'slen, on :ne 'de nyor bo :wlu, 'de :Yusu'-a' 'nyne 'di :dele' ka.

18:Yeh on gweh-a dhih polo-eh 'i, :yee' on 'da-uh' :dele' ka, on 'ye pa. :Yeh on pa-a, :yee' on dhe-uh' 'tele' 'i, on 'dae:, A-a' 'da-:-' :Yusu'-a' 'nyne, 'de mor a-a' :no-' :Yusu'-a' 'nyne, a-a' :torne:-' nyor⧾ deh :dele' ka. 19:Yeh on 'da :ao', :yee' :Piteh'-: 'dekorn: :Jororn'-: on :wlu-' 'de on bo, on 'dae:, A-a' 'jeh 'yor-eh:, a polo-eh 'do a :gwlii', eh 'sleh-: 'i 'do Nyorsoa ybei', :a 'ye 'o a-a' 'tele' dih dhe, eh 'ye 'o Nyorsoa-a' neh-' :zi :e? 20:A :mor :mloror', :a se 'beh-dih: :a 'ye deh⧾ :a 'ye-a-: 'dekorn: deh⧾ :a 'worn-a-: en-' :za-a' 'bor. 21:Yeh :Piteh'-: 'dekorn: :Jororn'-: on 'da :ao', :yee' nyor⧾ :dao', on 'da an mu-uh deh 'bhun :no, 'de on 'tali-uh dih, on mu. :Ka on 'ye-a an-a' 'kle 'ye-eh 'dlu :po-eh no, on se-eh yubo:. Deh no-eh, nyor⧾-a' klehkpeh, an po Nyorsoa-a' 'nyne ya, 'do deh :eh :no-eh bo. 22'De mor 'yu on no-a nyor⧾ 'di dih 'ma-dih-deh, 'de :or 'puh-a, or-a' zon⧾ zi :kwlaa :nyieh-: dih.

:Yusu'-a' dhih 'jeh-' :po-nyor⧾-a wlu 'de Nyorsoa bo

23:Yeh on 'tali:-a :Piteh'-: 'dekorn: :Jororn'-: dih, :yee' 'do :dha :due' 'jeh :dao', on mu 'de on 'bei' dhih 'jeh-' :po-nyor⧾ bo de. 'De on :za deh⧾-a' klehkpeh Nyorsoa-a' 'slaa: :za-nyor:⧾ :klaba'⧾-: 'dekorn: 'bluhba: :korn-nyor⧾-: on :za-a 'weh 'de on bo. 24:Yee' :yeh on 'bei' 'worn-a dhih :daa, :yee' an-a' klehkpeh bele: wlu bo, an wlu 'de Nyorsoa bo, on 'dae:, :Gwlor :baa' Nyorsoa, :mor 'o :or no yao-: 'bluhba-: yobo'-: 'dekorn: deh⧾-a' klehkpeh :en :ne-a 'de en 'di-:. 25:An-a' Gban 'i :ne :Zulu:, mo-: po-eh 'de :an-a'a: 'bhoi-yu: :Debe' 'worn, :or no-a :a :bai'-a' :baa', 'de or za-eh', or 'dae:,

:Eh :korn dhih, 'de nyor⧾ :on :se-a :Jueh'-nyor:⧾, 'de on 'kpa 'chehn-' 'gabaa :eh?

:Eh :korn dhih, 'de nyor⧾-a 'dhu dhih on :se-a' deh 'i 'ye-: i :eh?

26'Keen-boi' :on :ne-a dha 'bluhba ken, an po an-a' 'jeh 'kpa, on 'ye vorn 'da mu.

'De nyor⧾ wlu 'ken :korn-nyor⧾ 'kpa :dha :due' :ke,

on 'ye :Gwlor :baa'-: 'dekorn: or-a' 'taan'-yu-: bo vorn.

27Keen' 'jeh ka. 'Keen :Hehlo'-: 'Pantior: Pale'-: nyor⧾ :on :se-a :Jueh'-nyor⧾-: 'dekorn: :Jueh'-nyor⧾-: mo-: 'kpa :dha :due' dha :gwlor :klaba' :daa 'di, 'de on 'dhu dhih 'do :Yusu' bo, :or no-a :an-a' gban 'i :ne-bhoi-yu: :on 'tan-a. 28:Yee' on no deh⧾-a' klehkpeh :an 'bhorn-a :en 'ye-a' :no-eh: :dee' see 'weh, 'do :on :porluh ken-: 'dekorn: 'de :an-a' 'kpih 'di-:. 29:Yee' :kana :naa, :Gwlor :baa', pobo: deh an za-' ya-: e, on no-a, an mu :a deh 'bhun :no. Jorwor: 'nyi :a :mor :or 'dhu-a :an-a' 'bhoi-nynuu 'kpih, :a 'ye :an-a' tubo-wlu⧾ po, 'de :gwluhuh' :ku ka 'di. 30'Nyi :an-a' 'kpih :a-uh, :a 'ye nyor⧾-a' puhba-deh⧾ 'puh-dih:. :Yee' 'nyi nyor⧾ 'di dih 'ma-dih-deh⧾-: 'dekorn: nyor⧾ 'i :to-dih-deh⧾-: :no-eh:, 'de :an-a' gban 'i :ne-bhoi-yu-a' 'nyne 'di, :or 'dhu-a :Yusu'-'.

31:Yee' :yeh on gweh-a 'de Nyorsoa bo :wlu-eh 'i, :yee' 'do :dha on 'kpa-dih:-a :dha :due', 'do-a zi-a 'i. 'De an-a' klehkpeh 'yi-dih: Gban 'i :ne :Zulu-' dih, an po or-a' tubo-wlu⧾, 'de :gwluhuh' :ku ka 'di.

:Yusu'-a' dhih 'jeh-' :po-nyor⧾-a kpuhba deh⧾ dih

32:Yeh eh no :ao', :yee' :Yusu'-a' dhih 'jeh-' :po-nyor⧾-a' klehkpeh, on 'ble :porluh :due'-: 'dekorn: 'dlu 'di dih :na-dih-deh :due'-:. An-a' nyor-a' no, 'On :due', 'mor :korn 'an-a: :kororn-deh⧾. An-a' klehkpeh, an kpuhba deh⧾ dih. 33:Yee' 'de 'kpih :klaba'⧾ 'di, :Yusu'-a'a: dboo-nyor⧾-a zela-eh ken dih 'weh :chio'lo:, :ka Nyorsoa no-a 'de :Gwlor :baa' :Yusu' 'de nma-dih-deh 'di :za-eh. 'De Nyorsoa po dhih 'jeh-' :po-nyor⧾-a' klehkpeh mla :dhulu' bo. 34Eh se nyor :korn, :or 'ye-a' 'de nyor⧾ :dao' 'nyne-' :ne, :or 'ye :ao', or se deh :korn. Deh no-eh, 'do kpor :due' :due' 'di, nyor⧾ :on 'ble-a gle⧾-: 'dekorn: 'gbu⧾-: an plo-ih'. :Mor on plo-ih, :yee' an ya 'de en-' 'wlii: on :plo-dih:-a 'weh. 35'De an 'nyi-ih :Yusu'-a'a: dboo-nyor⧾. 'De an gble dih nyor⧾ 'yi dih, :on :korn-a son⧾ :gweh-a.

36:Yee' 'do ti :dao' bo, 'Joseh: :or 'dhu-a 'Livae-yu-', 'de :or 'wluh-a 'Sapor-bluhba ken, :or :Yusu'-a'a: dboo-nyor⧾ 'dhu-dih:-a :Bana'ba-nyne, :eh :bleh-dih:-a 'i, 'Yu :or po-a 'de nyor⧾-a' 'kpih, 37or-: plo or-a'a: gle :due', 'de or :ya 'de eh-a' 'wlii, or 'nyi-ih :Yusu'-a'a: dboo-nyor⧾.

Currently Selected:

Noo-deh:⧾ 4: TCHKR

Highlight

Copy