Noo-deh:⧾ 3

:Piteh' 'puh-dih: :kloror-nyor :due'

1:Yee' eh :korn 'we-eh :due', 'de :Piteh'-: 'dekorn: :Jororn'-: an mu 'de Nyorsoa-a' 'sla bo, 'gwie-yluh-gbao', :ka ti-a ne-a 'de nyor⧾-a mu-a 'de Nyorsoa bo :wlu 'da. 2:Yeh an mu-a, :yee' 'yu :due' :or 'wluh-dih:-a :klor-a', or-: nyor⧾-a kpa 'o gba-dih-gba-a' :kpaa' 'worn 'i, an 'da-dih-a 'Yi dih :nmor :kpaa'. An kpa-or 'o 'weh 'do 'we-a' klehkpeh 'di, or 'ye nyor⧾ :an pa-a, 'wlii :zlor-dih:. 3:Yeh or 'ye-a :Piteh'-: 'dekorn: :Jororn'-: an yi-a pa 'da, :yee' or zlor-uh 'wlii:. 4'De :Piteh'-: 'dekorn: :Jororn'-: on pobo-or ya. :Yee' :Piteh' :wlu-' 'de or bo, or 'dae:, Pobo: :a ya. 5:Yeh :Piteh' 'da :ao', :yee' or pobo-uh-: ya, or :mor :mloror' or 'da or mu deh 'ye-: :dee' 'de on 'kwa. 6'De :Piteh' 'da :neheh', 'On se 'sebla-: 'dekorn: 'goo-: 'ble, 'on 'ye :on 'nyi. Jorwor: deh 'on 'ble-a, eh-: 'an mu :on 'nyi-:. 'De :Yusu' 'Klae :or 'wluh-a 'Nazla-gwlor 'di-a' 'nyne 'di, Mu yai', :on 'ye :na. 7:Yeh or :za-a deh :daa-', :yee' or kpon or-a' :dila-son-: dih, 'de or 'duo-or ya-'. :Yee' 'do :dha :due' :dao', or-a' buh⧾-: 'dekorn: or-a' buh⧾-a' 'yi 'dhu-dih-da-: en 'ye 'kpih 'weh. 8:Yeh or-a' 'tiei 'ye-a 'kpih, :yee' or :sorn-' 'weh, 'de or :nyna dih :vai:, or na dih. :Yee' or :ne on mor-: on pa 'de gba-dih-gba :dao' 'di. 'De or na dih, or 'bhlun yaa'e, or po Nyorsoa-a' 'nyne ya. 9:Yeh or no :ao', 'de :gwlor-nyor⧾-a' klehkpeh :on :ne-a 'o, on 'ye-or, 'de or na-a, 'de or po-a Nyorsoa-a' 'nyne ya, 10:yee' on yubo-or-: 'i, :ka eh 'dhu-a 'yu :or :dhe-a 'o gba-dih-gba-a' :kpaa' 'worn 'i, an 'da-dih-a 'Yi dih :nmor :kpaa' dih, 'de :or zlor-a :dee'. :Yee' deh :eh :no-eh 'do or bo, eh 'ma-dih: an-a' :porluh⧾-a' klehkpeh 'weh, 'de on :florn worn.

Nyorsoa-a' tubo-wlu:⧾ :Piteh' po-a 'do Nyorsoa-a' 'sla ybei'

11:Yee' 'yu :dao', :or 'puh-a, or kpon :Piteh'-: 'dekorn: :Jororn'-: dih 'weh :chio'lo:. :Yeh nyor⧾-a' klehkpeh, on 'ye-uh'-a, :yee' eh :florn-dih-uh-: worn, 'de on kpa ple-a' 'de on bo, 'do Nyorsoa-a' 'sla-a' :dha an 'da-dih-a :Salomor'-a' :forn-dih: 'da. 12:Yeh :Piteh' 'ye-a nyor⧾ :dao', :yee' or :wlu-' 'de on bo, or 'dae:, A :mor 'on 'bli 'Ezlea-nyor:⧾. :Eh :korn dhih 'de deh :daa, eh 'ma-dih: 'de a 'di dih, 'de eh :florn-dih:-a worn :eh? 'De mor :eh :korn dhih a pobo :a ya deh :dao' :eh? :Mor a :taa 'ye, :yee' a 'da 'de :a-a' 'jeh-a' 'kpih 'di-: 'dekorn: :a-a' Nyorsoa-a' :weheh' :za-eh 'de 'yi 'sleh ka 'di-: eh-: no-eh, 'de 'yu :daa, or :sorn-', or na :e? 13:A :bai'-a' :bai' 'Eble'hehn-: Ase'-: 'dekorn: 'Jekor-: an-a' Nyorsoa, or-: 'nyi or-a' 'bhoi-yu: :Yusu' dhih-a' 'i 'beh-a'. Jorwor: a :mor za-or 'kwla or 'ye 'meh. 'De a dhobo: or-a' dhih-' 'do Pale' ybei', ti Pale'-a 'bhorn-a or 'ye-or dih 'tali:, or 'ye-a' mu. 14:Yor :or :ne-a gban 'i, 'de :or 'sleh-a 'i, or-: :korn dhih a dhobo:-'. :Yee' :yor :or 'dhu-a :nyor⧾ 'dba-nyor-', or-: :korn dhih a dhele: Pale' dih, or 'ye dih 'tali-eh: 'do a bo, or 'ye mu. 15A :mor no-eh 'de nyor :or :korn-a 'de bo 'kmo :sie: :febeh' 'wluh-a, on 'dba-or. Jorwor: Nyorsoa za-or 'de nma-dih-deh 'di 'weh. :A-a' 'yor-eh 'ye deh :daa ken dih 'weh. 16:Kloror-yu: :daa a 'ye-a, 'de a yubo:-a, :Yusu'-a' 'nyne-a' dhih 'jeh-' :po-eh: 'o, eh-: 'nyi-or 'kpih. :Yusu'-a' dhih 'jeh-' :po-eh:, eh-: no-eh, 'de or 'puh klehkpeh klehkpeh, 'do a-a' klehkpeh ybei'.

17:Yee' 'an 'de-di'-boi'-a:, 'on yubo-eh', a mor-: 'dekorn: a-a'a: nyor⧾ :na-dih-nyor⧾-: deh a no-a, a se-eh 'i yubo:. 18Jorwor: deh Nyorsoa :za-a-' :dee' see, :eh :yi-dih:-a or-a' wele-eh: :po-nyor⧾-a' klehkpeh-', eh-: 'o :eh 'kpa dhih 'jeh-' :naa, :eh no-a, Or-a' 'taan'-yu :korn or 'ye 'kle 'ye. 19:Yee' 'do eh-a' dha, a 'tali: a-a' deh⧾-zon⧾ dih, 'de a 'ye 'de Nyorsoa bo 'bili:, 'de :Gwlor :baa' 'ye a-a' deh⧾-zon⧾-a' dhih bo 'ma-dih:. 20:Yee' ti-a mu 'o :nyni :Gwlor :baa'-a mu a 'kpih :dele' 'nyi-:, 'de or 'ye :Yusu' :or 'dhu-a or-a' 'taan'-yu-', or gan-a :dee' see 'do a bo, or 'ye-or 'de a bo dbo. 21:Yusu' :korn or 'ye 'de Nyorsoa 'bli yai' dih :dhe :chio'lo:, 'de ti Nyorsoa-a mu-a deh⧾-a' klehkpeh :dele' :po, 'de en 'ye 'o nyni, :ka or no-a eh-a' wlu-a' :dhama'-' :po-eh :dee' see, :eh :yi-dih:-a or-a' wele-eh: :po-nyor⧾-' :on :dhe-dih-eh 'for 'i 'do or bo. 22:Mose'-a' 'jeh :ke, or 'dae:, A-a' :Gwlor :baa' Nyorsoa-a mu a-a' nyor⧾-a' nyor :due' dih :nyna-dih:, or 'ye wele-eh: :po-nyor no 'do a bo, :or mu-a 'on :gweh. :Yee' a :to deh⧾-a' klehkpeh or mu-a-' :za, 'de a bo :dou'⧾ bo. 23:Yee' nyor-beh-nyor-beh: :or se-a Nyorsoa-a' wele-eh: :po-nyor: :dao' :dou'⧾ bo :to, :yee' or mu 'de Nyorsoa-a' nyor⧾ 'klu-' :za-eh:, 'de or 'ye gbe :zie:. 24Keen' 'jeh ka, Nyorsoa-a' wele-eh: :po-nyor⧾-a' klehkpeh :eh 'wluh-a 'o Sameo'-a' ti bo an-a' klehkpeh sie ti de, 'de on :za deh⧾ :daa :en mu-a 'dlu bo :naa dha ti :daa 'i, en-' dhih-'. 25Wlu Nyorsoa po-a :dhama'-', :on :yi-dih:-a or-a' wele-eh: :po-nyor⧾-', on :korn 'de a bo. 'De mor a 'ble 'for 'de kuo Nyorsoa :ne a :bai'-a' :bai' po-a 'di, ti or 'ye-a' :wlu 'de 'Eble'hehn bo, or 'ye :ao', :An-a'a: 'nynuu-a' 'nynuu: mo-: 'an mu-' :yi-dih:, 'de 'on 'ye nyor⧾-a' klehkpeh :on :ne-a dha 'bluhba ken, :bhorlie' bo po. 26:Yee' :yeh Nyorsoa :nyna-dih:-a or-a'a: 'bhoi-yu: :Yusu' dih, :yee' or dbo-or' 'de a bo :zai', or 'ye a :bhorlie' bo po. :Bhorlie' or mu-a a bo :po, eh-: 'dhu or 'ye-eh' no, 'de a 'ye a-a' deh⧾-zon⧾ 'kpuh ya :to.

Currently Selected:

Noo-deh:⧾ 3: TCHKR

Highlight

Copy