Noo-deh:⧾ 2
2
:Ka Gban 'i :ne :Zulu no-a 'de yi-a'
1:Yee' :yeh gor an 'da-dih-a 'Pehnti'kor, or-a' 'we-eh nyni-a 'o, :yee' :Yusu'-a'a: dhih 'jeh-' :po-nyor⧾-a' klehkpeh 'kpa :dha :due'. 2:Yeh an pobo-a 'o, :yee' an 'worn :dhlumeh' :eh 'wluh 'de Nyorsoa 'bli yai', :eh gweh-a :ka :pobor' :dhulu'-a yi-a 'de, 'de eh gweh 'de 'gbu-a' klehkpeh on :dhe-a 'di dih 'dlu. 3:Yee' on 'ye deh⧾ :en gweh-a neh-a' :meo, me-: :gble-eh, :en :dhe 'o an-a' :due' :due' 'dlu dih. 4:Yee' an-a' klehkpeh :on :ne-a 'o, on 'yi-dih: Gban 'i :ne :Zulu-: dih, 'de on 'kpa 'o wlu⧾ 'doror: 'dor :po 'da, :ka Gban 'i :ne :Zulu no-a an-a' 'kpih 'nyi-eh on 'ye-a' :wlu-a' no.
5:Yee' 'do ti :dao' 'di, :Jueh'-nyor:⧾ :noo', :on no-a Nyorsoa-nyor:⧾ 'jeh, mo-: 'wluh 'bluhba⧾-a' klehkpeh :en :ne-a dha yao 'zorn ken dih, 'de :on 'ti :Julu'slehn. 6:Yeh on 'worn-a :dhlumeh' :daa, :yee' an-a' klehkpeh, on 'kpa :dha :due'. :Yee' eh 'ma-dih: 'de on 'di-: dih. Deh no-eh, :yor :or :korn-a or 'bli-wlu, :yee' or 'worn-uh' 'de :Yusu'-a'a: dhih 'jeh-' :po-nyor⧾ 'worn, 'do 'we-eh: :dao' 'di. 7:Yeh eh no :ao', :yee' an-a' :porluh⧾ 'ma-', 'de eh :florn-dih-uh worn, an 'chihleh-eh 'i, on 'da, Nyor⧾-a' klehkpeh :daa :an wlu-a, on :se :Galali'i-nyor:⧾ ke :e? 8:Yee' :kaa eh no, 'de :yor :or :korn-a or 'bli-wlu, 'de or 'worn-uh, 'de on 'worn :eh? 9:A-a' nyor⧾ :noo' 'wluh :Patia'-: :noo' 'wluh Midia'-: :noo' 'wluh 'Ilor-: :noo' 'wluh 'Mehsopata'mior-: :noo' 'wluh :Judi'a-: :noo' 'wluh 'Kapado'sia-: :noo' 'wluh 'Pantor-: 'dekorn: 'Esea-:. 10'De :noo' 'wluh 'Fleya-: :noo' 'wluh :Panfi'la-: :noo' 'wluh 'Iye-: 'dekorn: 'Lebia-bluhba-a' 'for :or 'koan'-dih:-a :Sali'na dih-:. 'De 'duhba:⧾ :noo' 'wluh 'Wloon :ke, 11:yuh :on no-a :Jueh'-nyor⧾-: 'dekorn: :yuh :on 'kpa-a :Jueh'-nyor⧾-a' Nyorsoa-deh-:. Nyor⧾ :noo', mo-: 'wluh 'Klii-: 'dekorn: :Ale'bia-:. Jorwor: :a-a' klehkpeh, :a 'worn :Yusu'-a' dhih 'jeh-' :po-nyor:⧾ :daa, an-a' wlu-: dih. :A 'bli-wlu:⧾, me-: an po, 'de an za deh⧾ :klaba'⧾ Nyorsoa no-a, en-' dhih-'. 12:Yee' an-a' klehkpeh, an-a' :porluh⧾ 'ma-', 'de on se eh-a' bo dih zela-eh 'beh-dih:. 'De :noo'-a dhele on 'bei' dih, Deh 'i-deh: deh :daa, eh 'dhu-eh:-' :eh?
13Jorwor: an-a' :noo'-a wla-dih-uh', on 'da, Nomor on 'na-a, or-: 'o, :or no-uh.
:Piteh' po Nyorsoa-a' tubo-wlu:⧾ 'de :gwlor-nyor:⧾ :dhulu' :dao' bo
14:Yeh on :za-a deh :dao', :yee' :Piteh'-: 'dekorn: :Yusu'-a'a: dboo-nyor⧾-a' :bhue: 'yor-eh :due' :dao', on :nyna dih, 'de :Piteh' 'wor, or :wlu 'de nyor⧾ :dhulu' :dao' bo, or 'dae:, A :mor :or 'dhu-a :a 'bli :Jueh'-nyor⧾-: 'dekorn: nyor⧾-a' klehkpeh :on :ne-a dha :Julu'slehn-: a :to 'on :dou'⧾ bo 'dhuan, 'de 'on 'ye deh :daa ken dih zela: 'de a bo. 15Nyor⧾-kpalu:⧾ :daa, nomor :se-uh' no. :Ka a no-a eh-a' 'ye-a', eh se :ao' :ne. Zorn zen-a :naa, eh 'see 'o gwle. 16Jorwor: deh Nyorsoa-a' wele-eh: :po-nyor: 'Joeh :za-a-' :dee' see, eh-: 'o, a 'ye :naa, or no-a,
17Nyorsoa 'dae:, 'An mu 'an :Zulu 'do nyor⧾-a' klehkpeh ken :po, 'do :de 'bor-dih-we 'di.
A-a'a: nyor⧾-kpalu⧾-nynuu-: 'dekorn: 'nynor⧾-kpao'⧾-nynuu-: an mu 'an wele-eh :po.
A-a'a: nyor⧾-kpalu⧾-nynuu: :gbolo'⧾-a' 'yli-eh mu deh 'i 'kpa-:.
'De mor :mor a-a'a: nyor⧾ :bholuh⧾ 'kpa 'nyinor-', an-a' 'dlu⧾-a mu deh⧾ 'ye-:.
18'De mor 'an-a: 'bhoi-nynuu: :sloror', nyor⧾-kpalu⧾-: 'dekorn: 'nynor⧾-kpao'⧾-:
'an mu 'an :Zulu 'do on ken :po, 'do ti :dao' 'di,
'de on 'ye 'an wele-eh po.
19'An mu nyor⧾ 'di dih 'ma-dih-deh⧾ :no 'de yai',
'de 'on 'ye nyor⧾ 'i :to-dih-deh⧾ no dha 'bluhba ken.
Nyomor-: neh-: 'dekorn: :daluh' :dhulu'-: me-: nyor⧾-a mu 'ye-:.
20:Yee' 'yluh :se-' :fan i deh 'jeh,
'de 'chuh 'yli 'de 'ye 'zoo :ne, :eh gweh-a nyomor 'i,
'de jorwor: :Gwlor :baa'-a' dhih-a' 'i 'beh-we-eh: 'kawehn:, or mu-a 'de :ya, 'de eh 'ye 'o nyni.
21'De mor nyor⧾-a' klehkpeh :on 'da-a :Gwlor :baa'-a' 'nyne, or 'ye-a' 'puh-dih:, or mu-uh 'puh-dih:.
22:Yee' :Piteh'-a kpa or-a' wlu 'dlu bo :chio'lo:, or 'dae:, A :mor 'on 'bli 'Ezlea-nyor:⧾. A :to 'on :dou'⧾ bo. Deh⧾ :kolu'⧾-: nyor⧾ 'di dih 'ma-dih-deh⧾-: 'dekorn: nyor⧾ 'i :to-dih-deh⧾-: Nyorsoa no-a 'de a 'klu-', :en :yi-dih:-a :Yusu' :or 'wluh-a 'Nazla-gwlor 'di, me-: :to-dih: a 'i :ka :Yusu' 'wluh-a 'de Nyorsoa bo. A-a' 'jeh 'yor-eh yubo-eh'. 23Nyorsoa-a' 'jeh 'yor-eh 'worn-dih-eh ken dih :dee' see, 'de a mu :Yusu' :kpon. 'De a no-eh, 'de 'kulu-nyor⧾ :kor-dih-or 'o tu 'i, on 'dba-or. 24Jorwor: :yeh a no :ao', :yee' Nyorsoa za-or 'de nma-dih-deh 'di 'weh, or zelie-or' 'do 'meh-a' 'kpih 'zorn. Deh no-eh, 'meh-a' se or-a' wlu 'ken :korn-eh 'beh-dih:. 25:Yee' :Debe' :za :Yusu'-a' dhih-' 'weh see, or 'dae:,
'An 'ye :Gwlor :baa' 'weh, dha 'on 'bhun, 'do ti-a' klehkpeh bo.
Or :ne 'noror 'an :dila-son bo 'weh. :Yee' :fano: :se-' 'on :no i.
26:Yee' 'do eh-a' dha, 'an :porluh 'pehn-: dih.
:Mor 'on :taa wlu, :yee' 'mona 'yi-dih: 'on-: dih.
:Yee' 'an 'kmo :ne-eh
mu deh :gwlii' :dhe-eh 'ble-:.
27Deh no-eh, :mor :or 'dhu-a Nyorsoa-', :on :se-' 'worn-: i, 'on :se 'de :gwlebo :sie: i.
:On :se-' 'worn-: i, :an-a' Gban 'i :ne-nyor :se 'de nma-dih-deh 'di 'zorn-dih: i.
28:On :torne: 'on 'kmo :ne-eh-a' :gwie⧾ 'weh.
:Yee' :an mu-eh :no, 'on 'ye 'mona-' dih 'yi-dih:, :mor 'on yi 'o :on ybei'.
29:Yee' :Piteh'-a kpa or-a' wlu 'dlu bo, or 'dae:, 'An 'de-di'-boi'-a:. 'Nyi 'on zela: a :gwluhuh' deh 'jeh, 'do :a :bai'-a' :baa' 'Keen :Debe'-a' dhih bo. Or 'meh-', 'de or nma-dih-eh: dih. Or-a' nma-dih-deh :ne :daa :a bo 'weh :naa, 'de eh :yeh-dih: 'we-eh: :daa ken. 30'De mor or no Nyorsoa-a' wele-eh: :po-nyor:. Or yubo: deh :korn-a wlu Nyorsoa po-a :dhama'-' 'weh. Nyorsoa za-eh' 'weh deh 'jeh, or 'da or mu :Debe' 'di-a' 'yu :due' 'keen-' :no, :ka or no-a :Debe'-a' dhih :ke. 31:Debe' sie ti de, or 'ye deh Nyorsoa-a mu-a :no 'noror ybei'. Eh-: :korn dhih or :za Nyorsoa-a' 'taan'-yu-a' nma-dih-deh 'di 'wluh-dhih-'. Or 'da,
Nyorsoa :se-' 'worn-: i, or :se 'de :gwlebo :sie: i.
'De mor, Nyorsoa :se-' 'worn-: i, or-a' 'ku :se 'de nma-dih-deh 'di 'zorn-dih: i.
32Nyorsoa :za 'de :Yusu' :daa 'de nma-dih-deh 'di 'weh, 'de :a-a' klehkpeh, :a 'ye deh :daa ken dih 'weh. 33:Yee' Nyorsoa 'duo-or ya-', 'de or dhe-or dih 'de or-a' :dila-son bo. :Yee' 'do :wor or :Baa' Nyorsoa 'nyi-dih-or or-a' Gban 'i :ne :Zulu, :on :korn-a wlu or po-a :dhama'-'. 'De :Yusu' dbo Gban 'i :ne :Zulu-a' 'jeh :dao' 'noror :a bo. Mo-: 'o :on :korn dhih a 'worn, 'de a-a' 'yli 'ye :naa. 34:Debe'-a' 'jeh 'yor-eh :se 'de Nyorsoa 'bli yai' mu. :Yee' eh-a' dhih, eh :se or-a' 'jeh 'yor-eh-a' dhih, or :se-' :za, :mor or 'da,
:Gwlor :baa' :wlu-' 'de 'an-a: :Gwlor :baa' bo, or 'da,
:Dhe 'o 'an :dila-son bo dih :chio'lo:,
35'de 'on 'ye nyor⧾ :on 'nyeh-a :on-' ya :ya, 'de :on 'ye-uh' buh⧾ ken dih tba.
36:Yee' eh-a' dhih, a :mor 'Ezlea-nyor⧾-a' klehkpeh, a :korn a 'ye-eh' yubo: deh 'jeh, :Yusu' :daa, a :kor-dih:-a 'o tu 'i, or-: 'o Nyorsoa 'tan, 'de or :no-or :Gwlor :baa'-'.
37:Yeh nyor⧾ :on :ne-a 'o, on 'worn-a deh⧾ :daa, :yee' eh 'tuh an-a' :porluh⧾-: dih 'gabaa, 'de on dhele: :Piteh'-: 'dekorn: :Yusu'-a'a: dboo-nyor:⧾ :yuh :dao'-: dih, on 'dae:, :A 'bli-nyor⧾-a:. Deh :a 'ye no :naa :eh?
38'De :Piteh' 'da, A-a' klehkpeh, a 'tali: a-a' deh⧾-zon⧾ dih, a 'ye 'de Nyorsoa bo 'bili:, 'de a 'ye 'ni 'dlu :po, 'de :Yusu' 'Klae-a' 'nyne 'di. :Yee' Nyorsoa-a mu a-a' deh⧾-zon⧾-a' dhih bo 'ma-dih:, 'de or 'ye a Gban 'i :ne :Zulu 'nyi. 39:A-a' :Gwlor :baa' Nyorsoa po deh⧾ :daa, en-' wlu :dhama'-' 'weh, 'do nyor⧾-a' klehkpeh or 'da-a :on 'ye-a 'o or klei' zi bo, a mor-: a-a'a: 'nynuu-: 'dekorn: :yuh :on :tehn-a bo-:.
40:Yee' :Piteh' :za-' deh⧾ :dhulu' :nee', :en 'ye-uh'-a 'slen 'dhu, or 'dae:, 'An bale a-uh 'weh, a zelie: a-a' 'jeh 'do Nyorsoa-a' 'chehn-yuba: :or yi-a 'de 'do 'kulu-nyor:⧾ :daa bo 'zorn. 41:Yeh or 'da :ao', :yee' 'do 'we-eh: :dao' 'di, nyor⧾ :on 'beh-dih:-a :on 'ye-a 'wlu taan no, mo-: po Nyorsoa-a' tubo-wlu⧾ :Piteh' po-a dhih 'jeh-', 'de on :po 'ni 'dlu, on 'kpa 'o on 'bei' ken. 42:Yee' nyor⧾ :dao', on 'duo: an-a' ti-a' klehkpeh-', 'de an 'chean' :Yusu'-a'a: dboo-nyor⧾-a' deh⧾, 'de on :ne on 'bei'-a na-dih :dha :due'. An di-dih deh :dha :due', 'de an di-dih :Gwlor :baa'-a' gban 'i :ne-dii-deh :dha :due' :ke, an wlu 'de Nyorsoa bo.
:Ka :Yusu'-a' dhih 'jeh-' :po-nyor⧾ no-a 'kmo :ne-eh
43:Yee' nyor⧾ 'di dih 'ma-dih-deh:⧾ :dhulu'-: 'dekorn: nyor⧾ 'i :to-dih-deh:⧾ :dhulu'-: :Yusu'-a'a: dboo-nyor⧾ no-a, me-: no-eh, 'de :fano 'kpa 'de nyor⧾-a' klehkpeh 'di. 44:Yee' nyor⧾-a' klehkpeh :on po-a :Yusu'-a' dhih dhih 'jeh-', an nena bo, 'de an kpuhba deh⧾ dih. 45'De mor :mor on plo an-a'a: 'bluhba⧾-: 'dekorn: an-a'a: :kororn-deh⧾-: :yee' an po 'wlii: en 'ye-a :dha :due'. :Yee' ti an-a' nyor-a' son :gweh-a, :yee' an 'nyi en-' 'wlii: :nee' or 'weh. 46:Yee' an 'gbon-dih :dha :due' 'do ti-a' klehkpeh bo, 'do Nyorsoa-a' 'sla ybei'. 'De on 'bli 'gbu⧾ 'di dih, 'do :wor an di-dih :Gwlor :baa'-a' gban 'i :ne-dii-deh :dha :due', 'de an kpuhba son⧾ ybei', 'de :porluh⧾-a' 'worn :nmor ka 'di-: 'dekorn: 'de :porluh⧾-a' dih 'pehn ka 'di-:, 47'de an po Nyorsoa-a' 'nyne ya. Nyor⧾-a' klehkpeh :on :ne-a :Julu'slehn, an 'ye-uh' deh. :Yee' zorn 'o zorn nyor⧾ :on 'puh-a, 'ka-: :Gwlor :baa'-a po 'o on ken nyor⧾ :noo'.
Currently Selected:
Noo-deh:⧾ 2: TCHKR
Highlight
Share
Copy
Want to have your highlights saved across all your devices? Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
