Rom 8

Liꞌoa Maaꞌi Ko Aalaha Haahie Mo Iinoni A Kraes

1Oto ie a God e saꞌa lei mae aaka ike, aena aana kie lado oto peꞌie a Jisas Kraes. 2Na aena aana kie lado mone oto peꞌie a Kraes, nge nanamanga aana Liꞌoa Maaꞌi e niie mauringe oto hunikie, na e da kie iiꞌo luhetaꞌi oto mwaanie nanamanga aana oorahaꞌaa nge e sai horoꞌikie. 3Mo Haꞌatolanga a Mosis e kaꞌa toꞌo aana ike nga nanamanga huni taꞌaasie mo oorahaꞌaanga ikie urine, aena aana ikie mo iinoni kie kaꞌa sai tola i sulie ike mo Haꞌatolanga ngeena. Taꞌe a God e asuie leune hunikie maholo e uusungeꞌinie mai a Kalena hunie ke neꞌi iinoni oto mala ikie mo iinoni oorahaꞌaala, taꞌe mola aana ingeie e kaꞌa oorahaꞌaa ike. Oto aana a Kraes mone e kaꞌa oorahaꞌaa ike, nge leune e haataꞌinie uri e tohungei melisine oto a God ke lei maesikie mo iinoni oorahaꞌaala. Oto maꞌalana e urine, a God e kaꞌa lei maesikie ike, taꞌe e toliꞌaasie mola a Kraes hunie ke mae mala nga uunu-olanga huni taꞌaasie mo oorahaꞌaanga ikie. 4Urine a God e da uri mo Haꞌatolanga ingeie e oa oto hunikie, aana Haꞌatolanga ingeie e unue uri ahutana mo iini kire oorahaꞌaa ke mae. Oto aana a Kraes e mae oto mala nga uunu-olanga honosikie urine, nge kie kaꞌa iiꞌo ike loꞌu i sulie tolahai iinoni aaela ni welumalau, taꞌe kie toꞌo aana oto oodotaꞌinge a Kraes, na kie ko lulu i sulie oto tala aana Liꞌoa Maaꞌi.

5Mwala nge kire iiꞌo i sulie tolahai ola aaela aana walumalau, kire neꞌisae paine haahie walu ola aaela aana walumalau. Taꞌe mwala nge kire iiꞌo i sulie tolahana Liꞌoa Maaꞌi, neꞌisaenga ikire e iiꞌo susu mola aana nga taa Liꞌoa Maaꞌi e saetoꞌo aana. 6Mala nga iini ko neꞌisae paine mola haahie tolahai iinoni aaela, nge kei maesie. Taꞌe mala uri neꞌisaenga iinoni ko iiꞌo susu mola aana Liꞌoa Maaꞌi, nge kei helesie maurihe na hanuelamanga i tehulaꞌana. 7Mo iini kire ko neꞌisae paine haahie tolahai iinoni aaela, nge kire neꞌi maelonga oto hunie a God eena. Kire kaꞌa sai lulu i sulie oto mo Haꞌatolanga a God aana e tohungei aasa hunie kire kei lulu i suliꞌi. 8Mwala nge kire iiꞌo ue aana mo tolahai iinoni aaela urine, e tohungei aasa hunie kire ke asuie nga mei ola ke toꞌohie saena God.

9Taꞌe iꞌomu, omu kaꞌa iiꞌo ike loꞌu aana mo tolahai iinoni aaela urine. !Haꞌike oto! Omu iiꞌo oto i sulie tolahana a Liꞌoa Maaꞌi, aana Liꞌoa Maaꞌi a God e iiꞌo oto i lalo aamiu. Na mala uri nga iinoni e kaꞌa toꞌo aana ike Liꞌoa a Kraes i lalo aana, ingeie nga iinoni a Kraes haꞌike oto eena. 10Oto aena aana a Kraes oto i lalo aamiu, maꞌalana sapemiu kei mae aena aana mo oorahaꞌaanga iꞌomu, taꞌe omu toꞌo aana maurihe oto aana omu iiꞌo oodotaꞌi oto i maana God. 11Liꞌoa Maaꞌi a God nge e taꞌe aalihoꞌi aana Jisas Kraes loꞌu mwaanie maenga, na ingeie oto e iiꞌo i lalo aamiu. Na mala a God e taꞌelaꞌinie sapena Kraes, nge kei taꞌelaꞌinie loꞌu sapemiu nge e mamaelaꞌa, aana Liꞌoa Maaꞌi nge e iiꞌo i lalo aamiu.

12Oto maeni eesiku maaꞌi, kie toꞌo aana oto mei esunge huni esuie nana God ni ngeena. Oto e kaꞌa malisine ike lulu i sulilana loꞌu mo tolahai iinoni ni welumalau. !Haꞌike loꞌu! 13Mala uri omu kei iiꞌo oto i sulie mo tolahai ola aaela urine, nge omu kei mae mola. Taꞌe mala uri omu kei iiꞌo oto i sulie tolahana Liꞌoa Maaꞌi na uri omu kei toliꞌaasie oto toꞌohuu mo tolahai ola aaela iꞌomu, nge omu ke si helesie maurihe huu. 14Mwala nge Liꞌoa Maaꞌi a God ko naꞌoda, ikire oto mo kalena God. 15Aana Liꞌoa Maaꞌi nge a God e niie oto huniꞌomu ngeena, e kaꞌa asuie ike hunie omu ke maꞌu-meꞌu oto tarau mala koni-konihe nge e dau aaela. !Haꞌike! Taꞌe a Liꞌoa Maaꞌi ko si da mola omu ke neꞌi kalena God, na aana omu saie uri a God ko manata diana huniꞌomu urine, nge omu sai soie aana, “!Mamaꞌa! !Mamaꞌa!” 16Liꞌoa Maaꞌi ko unu haꞌa-oaie tararuru peꞌie neꞌisaenga ikie uri ikie oto mo kalena God. 17Na aena aana ikie oto maeni kalena, kie kei helesie oto ahutana toꞌo-toꞌolana a God nge e loohaꞌiniꞌi nana a Kalena, a Kraes, na e loohaꞌiniꞌi noꞌone naka mo eesine a Kraes, aana ikie noꞌone mo kalena God. Kie kei helesie oto noꞌone manikuluꞌanga taꞌau i Lengi nge a Kraes e hele aana oto, aena aana ikie, kie ko sapesalu noꞌone mala a Kraes e sapesalu keꞌu.

Sapesalunge Ko Toolekie Siꞌirini E Kaꞌa Hiꞌe Ike Mala Manikuluꞌanga Kie Kei Toꞌo Aana

18Nou sai diana aana uri walu ola nge kie ko sapesalu eeni aana maholo ienini, walu ola mwaakule mola ni ngeena, aana kie ko loꞌongaꞌinie tohungei mei menikuluꞌanga nge a God e loohaꞌinie naka. 19Taꞌe-taꞌena nga ola a God e haꞌaholaa ko maa-maaꞌoohi peꞌi toꞌue luada huni leesie haataꞌinilana manikuluhaꞌana mo tohungei kalena God. 20Aana maꞌalana walu ola aana haꞌaholanga e sereꞌinie ke aaela mala siꞌiri, taꞌe kire mani lae aaela oto wau i naꞌo, aana ikire noꞌone kire iiꞌo i hahana haꞌaloinge a God e asuie aana Adam na Iv. Taꞌe maholo a God e asuie leune, e niie noꞌone mei neꞌisaenga diana uri aana nga maholo kei lae mai, 21walu ola e haꞌaholaꞌi kei diana aalihoꞌi loꞌu na kei iiꞌo luhetaꞌi taane mwaanie aaelanga na mwaanie maenga nge ko da kire ko iiꞌo ni hoꞌo hule mai siꞌiri. Na leune kei oa hunie walu olana maholo ikie mo kalena God kie kei holaꞌi iiꞌo luhetaꞌi oto taꞌingelu mwaanie aaelanga, na kie kei iiꞌo oto aana manikuluhaꞌana a God.

22Aana kie saie uri hule mai siꞌiri, ahutana walu ola aana haꞌaholanga ko ngara-ngara ue peꞌi sapesalunge, mala huꞌe ko sapesalu hunie toꞌo-mwelanga. 23Na taꞌe mo olana haꞌike ni ko ngara-ngara urine, taꞌe ikie noꞌone kie ko ngara-ngara mola i manataka. Aana a God e niie Liꞌoa Maaꞌi hunikie mala nga naꞌohai niinge ingeie, na kie ko maaꞌoohi susutoꞌo hunie a God ke haꞌa-ahue konilaka hunie kie ke neꞌie mo tohungei kalena. Na leune kei reu aana maholo a God kei oolisie sapeka peꞌie mei sapei ola haalu. 24A God e haꞌa-uurikie oto, na aani hiiwalaimolinge aana walana, kie ko si maa-maaꞌoohie mola mo ola e unue kei niiꞌi naka. Nga iini saꞌa talei maa-maaꞌoohie ike mei ola e rau mango oto, taꞌe kei maaꞌoohie mola mei ola e kaꞌa rau ue. Na ikie, kie kaꞌa leesie ue nga taa kie ko maa-maaꞌoohie ngeena, taꞌe kie ko maa-maaꞌoohi susutoꞌo mola. 25Taꞌe aena aana kie hiiwalaimoli uri kie kei haro toꞌo aana taane mo ola nge kie kaꞌa leesiꞌi ue, nge mone kie ko haro maa-maaꞌoohi susutoꞌo mola ue.

26Na mala a Liꞌoa Maaꞌi ko peꞌikie huni maaꞌoohi susutoꞌo urine, nge ko peꞌikie noꞌone aana taꞌena nga ola loꞌu kie ko mamaelaꞌa oto aani. Kie kaꞌa saie ike nga taa kie ke aarengaꞌi hunie, wa uri kie kei aarengaꞌi uri taa. Oto Liꞌoa Maaꞌi maraana e lae peꞌi aarengaꞌi talaka aana mo wala hule aana ikie na kie kaꞌa saiꞌi. 27Taꞌe a God e saie mola neꞌisaenga ikie mo iinoni, na e saie taane loꞌongaꞌinge Liꞌoa Maaꞌi maholo ko aarengaꞌi talaka mo iinoni a God, aana Liꞌoa Maaꞌi ko aarengaꞌi talaka aana tohungana tala nge a God e saetoꞌo aana.

28Na kie saie loꞌu uri a God ko esu i lalo aana ahutana walu ola ko reu-reu hunie ke haꞌadianaꞌakie, mo iini e soikie oto i sulie oalaꞌinge ingeie na kie ko manata diana hunie. 29Aana uure mai naꞌo, a God e manataꞌinie oto mwala ingeie, na e oalaꞌinie hunie kire ke mani urihana a Kalena, hunie a Kalena kei neꞌie naꞌohai mwane aana mo eesine oto hunge. 30Na mwala nge a God e oalaꞌi urine hunire oto uure mai naꞌo, e mani soire oto loꞌu mai i saana. Na e da oto hunie kire ke mani neꞌi iinoni oodotaꞌi i maana, na e niie oto manikuluꞌanga ingeie hunie ahutada mango.

Nga Mei Ola E Kaꞌa Nanama Ike Hunie Ke Oopakie Mwaanie Manata-diananga A God Hunikie

31?Oto nga taa nge kie kei unue aana mo olana? ?Mala uri a God ke iiꞌo peꞌikie, a tei nge kei roroꞌa uure honosikie? 32A God e kaꞌa saenie ike nga mei ola mwaanikie, kaꞌu hule aana e toliꞌaasie a Kalena hunie ke mae huni haꞌa-uurikie. Oto leune ko haataꞌinie uri a God kei tohungei nii mwaakule mola aana ahutana mo ola diana ingeie hunikie. 33?A tei ni kei roroꞌa uusuikie haahie mei oorahaꞌaa? ?Uri a God? !Haꞌike oto ooꞌoo! Ikie mo iini nge a God e lio hilisikie oto, na a God maraana oto e unue uri kie oodotaꞌi mola. 34?Oto a tei loꞌu e toꞌo aana nanamanga hunie ke unue uri kie takalo na kei lei mae aaka? ?Uri a Kraes? !Haꞌike loꞌu! A Kraes haꞌalaa e nanama urine. Taꞌe a Kraes e mae kaꞌu honotaka, na e heꞌi meuri loꞌu hunikie, na ko iiꞌo aana iiꞌo-iiꞌoha paine i pwalo-pwalona God, na hule aana a Kraes ko eiꞌeitanai talaka. 35?Na nga mei taa ni e sai oopakie mwaanie manata-diananga a Kraes? ?Uri a Kraes kei sereꞌinikie maholo kie ko siꞌohaꞌa, wa kie ko lae oodoie aasanga, wa aana mwala ko teungeꞌinikie, wa aana kie ko maesie hiolo, wa kie kaꞌa toꞌo aana ike nga mo sala, wa mwala ko horo maesikie? ?Uri walu ola urine ni kire sai oopakie mwaanie manata-diananga a Kraes? !Haꞌike oto ooꞌoo! 36Mwala kei waelikie taane urine, aana nga iini e ere takoie a God i laona mo Uusu-uusu Maaꞌi uuri, Mwala ko sare horoꞌiꞌemi mola i suli hei dinge i tehulaꞌamu, na kire ko loꞌo-loꞌongaꞌiniꞌemi mola mala mo sipu huni hunu maesiꞌi. Sam 44:22

37Taꞌe maꞌalana walu ola urine ke hite-hite aaka loꞌu, kie ke aꞌailaꞌasie mola taꞌingelu walu olana aena aana a Kraes e manata diana hunikie. 38Iau, nou tohungei hiiwalaimoli aana uri nga taꞌa-taꞌa mei ola e saꞌa oopakie ike mwaanie manata-diananga a God. Manata-diananga a God kei iiꞌo oto huu aaka, maꞌalana uri kie ke mauri wa kie ke mae loꞌu. Na maꞌalana mo ensel wa mo liꞌoa aaela wa mo aakalo wa mo wesi wa mo hiꞌona wa mo ola nanama loꞌu urine, taꞌe e aasa oto hunie kire ke oopakie mwaanie manata-diananga a God hunikie. Maꞌalana nga mei ola ke iiꞌo oto molana wa ke si haro lae mai, 39na maꞌalana nga nanamanga loꞌu uri taa taꞌau i Lengi wa loꞌu mei aano, taꞌe e aasa oto hunie ke oopakie mwaanie manata-diananga a God. Iau, maꞌalana nga mei taa loꞌu aana mo ola a God e haꞌaholaꞌi, na e kaꞌa sai oopakie oto mwaanie manata-diananga a God nge a Jisas Kraes, Aalaha ikie, e haataꞌinie oto hunikie.

Currently Selected:

Rom 8: apbNT

Highlight

Copy