Rom 7

Nanamanga Aana Mo Haꞌatolanga E Mango Aana Maholo Iinoni E Mae

1Maeni eesiku maaꞌi, saꞌa mola omu meni saie mola nga taa no ko sare ere i sulie ie, sulie omu saie oto uri maholo iinoni ko meu-meuri ue ni mola haꞌatolanga e toꞌo aana nanamanga haahie. 2Haꞌamalalana aana keni e toꞌo poro, e haataꞌinie uri hoꞌosilana e lae peꞌie poro ingeie maholo kirerue ko meni meu-meuri ue. Taꞌe mala uri poro ingeie e mae oto, a huꞌe ngeena e iiꞌo luhetaꞌi oto loꞌu mwaanie haꞌatolanga aana haꞌarurunge eena. 3Taꞌe mala uri a huꞌe ngeena kei lai iiꞌo peꞌie nga mwane aaopa maholo poro ingeie e mauri ue, a huꞌe ngeena ko deu huꞌisie oto haꞌatolanga aana haꞌarurunge eena, na haꞌatolanga e unue oto uri a keni ngeena ko mesi. Taꞌe mala uri poro ingeie e mae oto, haꞌalaa a huꞌe ngeena e iiꞌo luhetaꞌi oto mwaanie haꞌatolanga aana haꞌarurunge, na e sai toꞌo aana loꞌu nga poro aaopa.

4Oto maeni eesiku maaꞌi, iꞌomu na e urine noꞌone. Aana mauringe lalahuꞌe iꞌomu e mae tararuru oto noꞌone peꞌie a Kraes, nge omu iiꞌo luhetaꞌi oto mwaanie mo Haꞌatolanga a Mosis eena, na kire kaꞌa toꞌo aana loꞌu nanamanga haahiꞌomu. Oto a Kraes nge e taꞌelaꞌi loꞌu mwaanie maenga, ingeie ni e toꞌo aamiu ienini uri hunie omu ke aahu aana mo hue-huei ola diana a God. 5Maholo kie oꞌoꞌo ue i sulie tolahaka maraaka, oorahaꞌaa e paine mola haahie sapeka hunie kie ke saetoꞌo aana walu ola e aapu nge mo Haꞌatolanga e uure honosiꞌi. Oto kie lae peꞌi esuie mola mo ola aaela nge hule aana kire ko horo maesikie mola. 6Taꞌe aana kie mae mone oto peꞌie a Kraes, kie iiꞌo luhetaꞌi oto mwaanie mo Haꞌatolanga nge kire hele roroꞌikie i naꞌo. Oto ienini kie sai esu oto aana tolaha haalu aani lulu i sulilana mola Liꞌoa Maaꞌi, na e kaꞌa ike loꞌu aani lulu i sulilana mo ola lalahuꞌe kire uusuꞌi i laona mo Haꞌatolanga.

Haꞌatolanga A God E Haataꞌinie Oorahaꞌaanga Ikie

7?Oto nga taa nge kolu kei unue? ?Uri mo Haꞌatolanga kire aaela? !Haꞌike oto ooꞌoo! Mo Haꞌatolanga mone ko si da kie ko saie uri kie oorahaꞌaala. Mala uri mo Haꞌatolanga ke suꞌuri unue uuri, Mwaanie o sae-saehanali, Eksodas 20:17 haꞌalaa nou kaꞌa saie ike leune e aapu eena. 8Taꞌe oorahaꞌaa e toolea mo wala aana Haꞌatolanga ngeena, na e da mola uri ne ke saehanalie walu ola e aapu ngeena, na uri ne ke sare liu holosie loꞌu ahutana mo Haꞌatolanga. Taꞌe mala uri nga mo Haꞌatolanga ke suꞌuri iiꞌo loꞌu, haꞌalaa oorahaꞌaa e neꞌie mola mei ola mwaakule. 9Oto wau i naꞌo maholo nou kaꞌa saie ike ue mo Haꞌatolanga, nou hii mala nou iiꞌo diana mola. Taꞌe maholo no ko aehota saie oto mo Haꞌatolanga a God, nge nou si lio saie loꞌu uri nou oorahaꞌaala ni ngeena, na ne kei mae oto haahie. 10Oto mo Haꞌatolanga diana nge a God e niiꞌi mei uri hunie kire ke haꞌa-uurieu, nge kire ko si horoꞌieu mola aana kire haataꞌinie uri leileku kei lae. 11Iau, oorahaꞌaa e toolea mo wala aana mo Haꞌatolanga na e eeroau huni deu huꞌisiꞌi, hunie ne ke roroꞌa aani, na ne ke mae haahiꞌi. 12Taꞌe maꞌalana e urine, ahutana mo Haꞌatolanga aana walana a God kire mani maaꞌi, na kire oodo, na kire diana.

13?Oto e ue? ?Uri mo Haꞌatolanga diana ngeena ni kire ko horo maesieu? !Haꞌike! Taꞌe oorahaꞌaa ni ko horo maesieu, maꞌalana e asuie leune aana mo ola diana. Oto urine kie sai lio saie oto uri oorahaꞌaa mei ola uri taa, aana mo Haꞌatolanga ko haataꞌinie uri oorahaꞌaa mei ola e tohungei aaela ni ngeena.

Mo Haꞌatolanga E Kaꞌa Aꞌailaꞌa Ike Huni Ooho Honosie Oorahaꞌaa

14Kie saie taane uri mo Haꞌatolanga mo ola diana a God ni ngeena, taꞌe ineu, iinoni ni welumalau mola na nou iiꞌo oto mola mala koni-konihe nana oorahaꞌaa. 15Oto no ko teipuꞌo-puꞌo mola i sulie nga taa ko reu i lalo aana mauringe ineu ngeena. Aana nou kaꞌa sai esuie ike nga taa no ko sare asuie, taꞌe oto tarau no ko esuie mola nga taa nou kaꞌa sare asuie. 16Maholo no ko sereꞌinie mo ola aaela taꞌe no ko esuiꞌi mola, nge no ko haataꞌinie uri nou hiiwalaimoli uri mo Haꞌatolanga e oodo taane. 17Oto ineu maraaku haꞌike ni no ko esuie mei olana, taꞌe tolaha ni oorahaꞌaanga e iiꞌo i lalo aaku ni ko deu urine. 18Nou saie taane uri aana aapa ineu mala iinoni ni welumalau mola, nga mei ola diana haꞌike i lalo aaku. Aena aana maꞌalana nou toꞌo aana taane nga mo loꞌongaꞌinge huni esuie nga mo ola diana, taꞌe nou kaꞌa sai esuiꞌi ike tohuku. 19Mo ola diana nge no ko loꞌongaꞌi ni esuiꞌi, nou kaꞌa sai esuiꞌi ike. Na mo ola aaela nou lelediꞌi, nge mo ola no ko esuiꞌi tarau eena. 20Na aena aana no ko esuie mola mei ola aaela nge nou kaꞌa sare asuie, e lio mala uri ineu haꞌike ni no ko esuiena, taꞌe tolaha ni oorahaꞌaa nge i lalo aaku ni ko esuie.

21No ko si lio saie uri tolahai ola aaela ni oto ko peine haahieu. Kaꞌu, maꞌalana nga mo maholo no ko sare asuie nga mei ola diana, taꞌe mo ola aaela mola no ko esuiꞌi. 22I laona tohungana neꞌisaenga ineu, nou ilenimwaꞌe mola haahie mo Haꞌatolanga a God. 23-25Na aana ineu maraaku, loꞌongaꞌinge ineu uri ineu koni-konihe oto aana mo Haꞌatolanga a God ni ie. Taꞌe aapa aana uri ineu iinoni ni welumalau mola, nou neꞌi koni-konihe taane oto nana oorahaꞌaa. Aana nou lio saie uri tolahai ola aaela ngeena ni ko lae peꞌi esu i laona ahutana mo aapa aana sapeku, na tolahai ola aaela ngeena ko heiseuni peꞌie neꞌisaenga diana ineu, hule aana no ko hii mala nou iiꞌo ni hoꞌo mala koni-konihe nana oorahaꞌaa. !Aama-aamasileku, aana no ko siꞌohaꞌa oto toꞌohuu! ?A tei kei da kaꞌu hunie ne ke iiꞌo luhetaꞌi mwaanie nanamanga aana oorahaꞌaa nge ko hane haahieu ienini na ko tooleau hunie maenga huu? !Taꞌe paalahea God! Kie ke paalahea God aana ingeie oto kei esuie leune aana asunge a Jisas Kraes Aalaha ikie.

Currently Selected:

Rom 7: apbNT

Highlight

Copy