Rom 6

Mauringe Peꞌie A Kraes Ko Haꞌamangoa Neꞌisaenga Aaela Aana Oorahaꞌaa

1?Oto nga taa nge kie kei unue? ?Uri kie ke talei oora-oorahaꞌaala mola hunie saeꞌaasinge na manata-diananga a God ke talei pei-peine mola? 2!Haꞌike oto ooꞌoo! !Mau-meuringe ikie i laona oorahaꞌaanga e mae oto! Kie mae oto uri hunie kie ke toliꞌaasie tolaha ni oorahaꞌaanga ngeena. ?Oto kie ke si lae loꞌu peꞌi iiꞌo i laona oorahaꞌaa uri taa eena? 3Nou saie uri omu sai diana aana taane mola uri maholo kie loto maaꞌi e haataꞌinie uri kie lado oto peꞌie a Jisas Kraes, na hule aana e urihana kie mae oto noꞌone peꞌie maholo e mae. 4Maholo kie ko loto maaꞌi, e urihana oto uri sapeka na ahutana mo saehanalinge ni sape e mae tararuru oto peꞌie a Kraes. Na urine e urihana haitolingeꞌinilaka ko lae oto noꞌone peꞌie hunie a Mamaꞌa ke taꞌelaꞌinikie oto noꞌone hunie mauringe haalu, mala e taꞌelaꞌinie kaꞌu noꞌone a Kraes aana nanamanga paine mwaanie maenga.

5Oto mala kie mae tararuru kaꞌu peꞌie, nge kie sai taꞌelaꞌi tararuru oto noꞌone peꞌie. 6Aana kie saie oto uri tolahai iinoni aaela ikie oto i naꞌo, kire ui lakomaꞌinie oto peꞌie a Kraes i lengine poꞌu-poꞌu, uri hunie a God ke taꞌaasie oto nanamanga aana oorahaꞌaa nge e oꞌoꞌo haahie maurihaꞌaka. Urine nge oorahaꞌaa e saꞌa paine ike loꞌu haahie sapeka, 7aena aana maholo iinoni ko mae oto, e iiꞌo luhetaꞌi oto mwaanie nanamanga aana oorahaꞌaa.

8Na i sulie kie mae oto peꞌie a Kraes, kie hiiwalaimoli uri kie kei meuri oto noꞌone peꞌie. 9Kie saie oto uri a Kraes e taꞌelaꞌi oto mwaanie maenga na e saꞌa heꞌi mae loꞌu. Maenga e saꞌa sakaahie loꞌu. 10A Kraes e mae hautaꞌai mola huni haꞌamangoa oorahaꞌaa, na e mauri oto loꞌu huni haꞌapainaꞌaa a God. 11Oto iꞌomu loꞌu, omu ke loꞌo-loꞌongaꞌiniꞌomu maraamiu noꞌone urine, aena omu lado mone oto peꞌie a Jisas Kraes, oto oorahaꞌaa e saꞌa sakaahiꞌomu ike loꞌu, na omu ko meuri oto huni haꞌapainaꞌaa a God.

12Mwaanie omu toitoliꞌaasie oorahaꞌaa e aalaha loꞌu haahiꞌomu, uri hunie omu ke lae loꞌu mola i sulie mo loꞌongaꞌinge aaela ni sape, aana sape mei ola nge e sai mae mola. 13Na mwaanie omu toitoliꞌaasie nga leu aana sapemiu e asuie loꞌu nga mei ola aaela wa ke neꞌie loꞌu mei sape huni euꞌesuie oorahaꞌaa. Taꞌe omu ke toliꞌaasiꞌomu oto taꞌingelu mola hunie a God mala mwala e mae kaꞌu mwaanie tolahai ola aaela na kire heꞌi meuri loꞌu huni esu nana. Oto omu ke niie ahutana mo aapa aana sapemiu hunie a God ke asuie walu ola diana aani. 14Maholo omu iiꞌo i mamalutana mo Haꞌatolanga i naꞌo, e aasa hunie omu kei mamalo mwaanie oorahaꞌaa, aana omu kaꞌa sai tola i sulie ahutana mo Haꞌatolanga ngeena. Taꞌe siꞌiri hahuꞌana manata-diananga a God e luhesiꞌomu oto mwaanie oorahaꞌaa e aalaha loꞌu haahiꞌomu.

Kie Ke Neꞌi Koni-konihe Aana Oodotaꞌinge

15?Oto kie kei ue eena, aana hahuꞌana manata-diananga a God e luhesikie oto mwaanie kie iiꞌo loꞌu i mamalutana mo Haꞌatolanga? ?Oto uri e diana mola hunie kie ke dau loꞌu mola mala saeka? !Haꞌike! !E kaꞌa urine ike! 16Omu saie kaꞌu oto uri maholo omu ko toliꞌaasiꞌomu maraamiu huni iiꞌo i mamalutana nga iini na huni lulu i sulie, iinoni ngeena oto kei aalaha haahiꞌomu na omu saꞌa dau ike loꞌu mala saemiu. Oto, iꞌomu mola maraamiu eena. Omu sai iiꞌo mola i memelutana oorahaꞌaa hunie ke horo maesiꞌomu, wa omu sai iiꞌo i memelutana a God hunie ke haꞌa-oodohiꞌomu peꞌie maraana. 17Holaꞌinaꞌo, iꞌomu mo koni-konihe a oorahaꞌaa ni ngeena. Taꞌe ienini omu ko tohungei lulu i suli diana aana oto walaimolinge nge haꞌa-uusulilemiu e lae aana, na aena leune kie ko tohungei paalahea God. 18A God e haꞌa-uuriꞌomu oto mwaanie nanamanga aana oorahaꞌaa, na e da oto omu ke neꞌi iinoni euꞌesu ingeie huni esuie nga taa e oodotaꞌi.

19No ko unu haꞌamalaa aana mo koni-konihe na mo poro paine urine, aena aana omu meni saie oto tolahada na e mwadaꞌu mola hunie omu kei rongo saie neꞌisaenga nge no ko haꞌa-uusuliꞌomu aana. Holaꞌinaꞌo, omu toliꞌaasie mola mo aapa aana sapemiu huni deu esunge mala koni-konihe nana oorahaꞌaa na tataꞌalanga, hunie aaelanga ke paine loꞌu liutaa. Taꞌe maholo ienini ke suꞌuri urine loꞌu. Omu ke toliꞌaasie oto mo aapa aana sapemiu mola huni deu esunge mala koni-konihe nana God huni esuie mo ola e oodo, hunie omu ke iiꞌo maaꞌi.

20Holaꞌinaꞌo, maholo omu neꞌi iinoni euꞌesu ue nana oorahaꞌaa, omu kaꞌa sare aapwasu ike aana oodotaꞌinge a God. 21?Taꞌe nga mei diananga uri taa omu hele aana i tehulaꞌana mo oorahaꞌaa nge omu deu-deuꞌi ngeena? !Nga mei ola haꞌike! Na hule aana siꞌiri omu ko si masa mola haahiꞌi. Tolahai ola urine, tolahai ola mola hunie maenga ni ngeena. 22Taꞌe ienini, a God e haꞌa-uuriꞌomu oto mwaanie nanamanga aana oorahaꞌaa, na e da oto omu ke neꞌi iinoni euꞌesu nana. Na hue-huana leune oto maurihaꞌamiu ko neꞌi ola maaꞌi oto, na omu ko helesie oto maurihe huu. 23Aana maholo iinoni e iiꞌo ue peꞌie oorahaꞌaa, waaitana oto maenga. Taꞌe a God e sai nii mwaakule mola aana maurihe huu hunie ahutaka mo iini kie lado oto peꞌie a Jisas Kraes, Aalaha ikie.

Currently Selected:

Rom 6: apbNT

Highlight

Copy