1 Pedro 1

Xrankíxixín nixja Pedro

1Janhan Pedro, mé kjueyá Jesucristo kixin si̱tꞌaha̱ chꞌan ixra̱, mé ikjian ti xroon i, chrꞌahánra jahara sátsíkjira ókjé chjasin, tjejora Ponto, Galacia, Capadocia, Asia la ko Bitinia. 2Itꞌéni Díos tsíkjeyá ti jahara ndesi ósé, tsꞌónara chjasén chꞌan kixin xi̱kaha tsíkjenka̱yáxin chꞌan. Kjuachaxíen Ncha̱kuén Díos kuitekáonra chꞌan la ko kótjuáxinra ti ijni̱é Jesucristo.

Díos sincheñao ti jahara kixin kjuaxróxin tsꞌejora.

Ti nkehe tjejóchóheni

3Chrokjuikosáyeheni Díos, Itꞌé Ìnchéni Jesucristo, kixin kui̱konoéhe̱ chꞌan ti jeheni kixin tsꞌónani chojni ni̱xin kixin xechón Ìnchéni. Mé xi̱kaha tjejóchóheni kixin tsokjan chꞌan, 4la ko tsꞌáyéhe̱ni ti nkehe jína tsjajon Díos, chónta chꞌan nkaya nka̱jní, mé tíha la ijnko nkehe xitjahya tsꞌitjáña, xitjahya tso̱kji̱ta̱ la ko xitjahya tsoxámá. 5Jahara tinkachónkira Díos, méxra̱ jehe chꞌan tꞌayakuenxín chꞌan ti jahara ti kjuachaxin kuènté chꞌan, kixin ndá jína tsaára, éxi tsíkjenka̱yáxin Díos tso̱hen ti ña̱o tsjixixín.

6Méxra̱ imá chrókócháhara, kjónté ichrén nkehe náxrjónhña chrókꞌuatsínkara ijie. 7Ti tinkachónkira Ìnchéni la éxi ti oro ticháxi̱n tsꞌatsínkaxín xrohi kixin tso̱noxín á chaxín oro jína. Kjánchó a̱ntsí sínkí ti tinkachónkira Ìnchéni ke ti oro, Méxra̱ ticháxi̱n tsꞌatsínkaxínra ichrén nkehe náxrjónhña kixin tsondáchro Díos kixin jína kjuachara, ndá tsꞌayéhéra kjuachaxin la ko kjuasàya ti ña̱o itsi Ìnchéni Jesucristo.

8Jahara tjue̱héra Ìnchéni Jesucristo kjónté na̱xa̱ kꞌuíkonhñara chꞌan. Ijie la tinkachónkira chꞌan kjónté tꞌíkonhñara chꞌan, la xi̱kaha chontara ijnko kjuachéhe̱ imá ijié, la kohya nkehe sincheyóe̱xini kixin a̱ntsí náxrjón tíha. 9Méxra̱ cháhara kixin kꞌuitjára nkexrín tsaáxinra, mé xi̱kaha tinkachónkira chꞌan.

10Ti sin profeta kꞌuejó ósé la tjinkaon sin a̱ntsí chrókónohe sin kuènté ti kjuachón í, la kꞌuéchronka sin nkexrín ti kjuachaxin kjuajon Díos chrókꞌuáyéhe̱ sin kixin imá tjue̱he chꞌan ti jehe sin. 11Ti na̱xa̱ kuihya Cristo, la Ncha̱kuén chꞌan kjuínchenohe ti sin kꞌuéchronka itén Díos ósé kixin tsjasóte chꞌan, ndá chrꞌéxi̱n tsꞌáyéhe̱ chꞌan ti kjuachaxin ijié. A̱ndá ti sin kꞌuéchronka tíhi mé tjinkaon sin chrókónohe sin nkexro tíha la ko nkesá chrókóhen kaín tíhi éxi chronka ti Ncha̱kuén Díos. 12Kjánchó Díos kjuínchenohe ti jehe sin kixin ti nkehe chrónka sin, la jehya tsoxiteyá ti ña̱o kꞌuejó sin. Náhí. Hasta ijie mé xiteyá tíha. Ti nkehe chrónka sin la mé ti itan tsaáxini chrónkaxín ti sin kjua̱ko̱hara, kixin ti kjuachaxin kuènté Ncha̱kuén Díos kui̱xi̱n nka̱jní kjuínki̱tsa ti jehe sin. Kja̱xin ti sin ángel tjinkaon sin chrókꞌuikon sin tíha.

Díos kꞌuéye̱he̱ ti jeheni kixin tjóá chrókꞌuejóni

13Méxra̱ chrókjuénka̱yáxinra jína chrókjui̱chꞌera ixra̱ la ko chrókꞌuejora nkojína. Kaín a̱sánra chrókꞌuejochohénra ti kjuachón sintaki̱to̱nhanra Díos ti ó tsokjan Ìnchéni Jesucristo. 14Éxi ti ixjan titekaon, mé xi̱kaha chrókuitekáonra Díos. Chrokjuénka̱yáxinhñara ti nkehe nduáhya éxi kꞌuékjenka̱yáxinra ósé ti na̱xa̱ kꞌuéchonhñara Díos. 15Ícha jína, tjóá chrókꞌuejora kixin ti Díos kꞌuéya̱hára, la tjóá chꞌan. 16#Lv. 11:44, 45; 19:2.*Kixin ndáchro xroon itén Díos: “Jahara chrókꞌuejora tjóá kixin janhan la ijnko nkexro tjóá.”

17Ti ndáchrora kixin Itꞌára mé Díos, la chróxraxinkáonra kixin nkokón sinchekito̱exín chꞌan iji̱é kaín chojni. Méxra̱ jína chrókjuíkosáyehéra chꞌan ti na̱xa̱ tjejora ntihi chjasintajni. 18Díos mé kjuintakaára kixin chrókꞌuejohyara éxi kuékꞌejó ti sin tsíkꞌaxrjeníxinra kꞌuékienxínhña sin. Jahara ó nohara jína kixin ti nkehe kꞌuínáxi̱nra la jehya nkehe chónta tsjeje̱ éxi ti oro o̱ plata. 19Náhí. Ti ijni̱é Ìnchéni Jesucristo imá tjete mé kꞌuínáxi̱nra. Jehe chꞌan mé ikꞌuén chꞌan la kꞌuáyéhe̱ Díos ti jehe chꞌan éxi ijnko kolélo ninkehó ijie̱ chóntahya. 20Díos xráxín tsíkjeyá Cristo ti na̱xa̱ kꞌónahña chjasintajni, kjánchó chrꞌéxi̱n ndá kónoxín chꞌan kixin jína chrókꞌuejoxi̱nra. 21Cristo mé kꞌuényáka̱hanra ndá xi̱kaha kuitekáonra Díos, ti nkexro kjuínchexechón Cristo la ko kjuíkosáyehe chꞌan. Mé xi̱kaha jahara tinkachónkira Díos la ko tjejocho̱hénra sintakaára chꞌan.

22A̱ndá ijie ó kuitekáonra ti itan chaxín ndoá, la tíha mé kótjuáxinra kixin jína tso̱tjue̱héra kichuara. Méxra̱ a̱ntsí chrótjue̱héra kichuara kaín a̱sánra. 23Méxra̱ ijie la jahara kokjíhi ni̱xiénra. Jehya éxi ti kꞌuaxrjeníxinra itꞌára ntihi chjasintajni. La náhí. Kókjíaxínra ti itén Díos itjen nkochríxín. 24#Is. 40:6-8.*Kixin xroon itén Díos ndáchro:

Kaín chojni la éxi ti kayoa,

ti kjuachaxin chónta sin la éxi ti itsjo tꞌóna ti kayoa.

Ti ika la tsoxámá a̱ndá ti itsjo la tsꞌánótjen,

25kjánchó ti itén Ìnchéni la tsjakꞌe nkochríxín.

Ti itan í, mé ti itan tsaáxini tjejotihínra ijie.

Currently Selected:

1 Pedro 1: poeNTplus

Highlight

Copy