Santiago 5

1Tihínra tíhi, jahara rikóra. Chrotsja̱nkara la ko chrókꞌuíyatonra kixin tsjasótiara. 2#Mt. 6:19.*Ti nkehe ricoxínra la ó tsíkotje la ti ika chontara la ó tsíkꞌin kué. 3Ti oro la ko ti plata chontara la ó tsíkóchji̱sen. Tíha mé tsꞌitjáñaxínra la tíha éxi xrohi tsochexínra. ¿Xá nkehe tso̱hen tjásitonra nchónhña nkehe tjete kixin ó itsi ti ña̱o tsjixixín? 4#Dt. 24:14, 15.*Ti nkehe chrókjuacha ti sin kjuitꞌahara ixra̱ la kjuénkèhyara sin, la jehe sin tjanchia sin ijie̱, tꞌéya sin. A̱ndá Ìnchéni chónta kaín kjuachaxin mé kuíhin kixin ti sin kjuíchꞌe ixra̱ la tjanchia sin ijie̱. 5A̱ndá ntihi chjasintajni la náxrjón tjejora la kaín nkehe tóxríhanra chontara, la éxi íjnko iko imá tsa̱nka̱ tjejora, ndá itsi ijnko ña̱o la itsꞌen va, mé xi̱kaha tso̱hanra. 6Kixin jahara la kjui̱nchekjasótera chojni ninkehó ijie̱ chóntahya, la ko kꞌo̱ñára sin kjónté kohya nkehe kjuitꞌahara sin.

Chrokóxakuenhñani la chrónixje̱he̱ni Díos

7Méxra̱, kíchóni, chrókóxakuanhñara, chróchohénra tsokjan Ìnchéni. Éxi ti nkexro ichꞌe ixra̱ no̱nte̱e la chóhen tsoxrákoajia ti ichrin xránkíxixín la ko ti ichrin tsjixixín, ndá ti ó tsíkꞌónehe ndá tsotjá. 8Mé xi̱kaha chrókóxakuanhñara, chróchohénra, la chrókꞌóxrjéhya a̱sánra, kixin ti ña̱o tsokjan Ìnchéni la ó chjina. 9Kíchóni, chrókꞌuekahyara ijie̱ kichuara kixin Díos chrókjuanchahya ijie̱ ti jahara, kixin Díos, ti Juez la ó chjino itjen. 10Méxra̱ kíchóni, chrókuankihíra ti sin kꞌuéchronka itén Díos kjuachaxíen ihni̱é Ìnchéni. Jehe sin la kjónté kjuasóte sin, la kónínkakonhña sin. 11#Job 1:21, 22; 2:10; Sal. 103:8.*Mé xi̱kaha ndáchroni kixin chéhe̱ ti sin a kixin, kjónté kjuasóte sin, la kjuacha sin. Jahara ó kuihínra nkexrín kóhen Job. Ó nohara kixin Ìnchéni kjuínki̱tsa ti jehe chꞌan ti ó kjuixin kjuasóte chꞌan, kixin Ìnchéni la imá jína la ti̱konoéhe̱ chꞌan ti nkexro tjasóte.

12 # Mt. 5:34-37. *Méxra̱ kíchóni, chrókꞌuakjénxi̱nhñara ihni̱é Díos itjen nkaya nka̱jní la ko chjasintajni la nijnko ihni̱é nkehe chrókꞌuakjénxi̱nhñara. Ti chróndáchrora chaxín, la chaxín ó, a̱ndá ti chróndáchrora náhí, la náhí ó, ndá xi̱kaha chrókjuanchahya Díos ijie̱.

13Ti nkojinra náxrjónhña tjejora, la chrónixjehéra Díos; ndá ti náxrjón tjejora, la chrótsjera chrókjuíkosáyehéra Díos. 14#Mr. 6:13.*A̱ndá ti nkojinra níhara, la chrókꞌueyehéra ti sin tꞌe̱to̱an kuènté ni̱nko kixin chrónixje̱he̱ sin Díos, la chróchjéhe sin aceite ikja ti si̱níhi kjuachaxin ihni̱é Ìnchéni. 15A̱ndá ti kaín a̱sánra nixjehéra Díos la tsito̱he jína ti si̱níhi, la ti ichrén ijie̱ tsíkjasin sin la Díos sinchekꞌitjáña tíha. 16Méxra̱ chróchenkara kichuara ti kjuásinra nkojín ijie̱, la nkojnkora chrónixjehéra Díos kixin tsjinki̱tsa chꞌan ti jahara. Ti chojni chaxín jína la ti tsonixje̱he̱ Díos, la tíha chónta nchónhña kjuachaxin. 17#1Rs. 17:1; 18:1.*Elías, ti nkexro kꞌuéchronka itén Díos, mé ijnko chojni éxi jeheni, la nixje̱he̱ chꞌan Díos kaín a̱sén chꞌan kixin chrókꞌuániáhña ichrin, la chaxín xrákoahya ichrin iní nánó kotꞌo̱. 18#1Rs. 18:42-45.*A̱ndá ti ó kꞌuatsínka ti iní nánó kotꞌo̱, ndá nixje̱he̱ chꞌan Díos kixin chrókꞌuaniá ichrin, ndá kꞌuaniá ichrin la kꞌóna jína.

19Kíchóni, ti nkojinra chrókjuichròera, chrókui̱to̱héra ti itan ndoá, ndá nkojín chojni chrókjuinki̱tsa chrókjanra 20#Pr. 10:12; 1Pe. 4:8.*la chrókónohara kixin ti nkexro tjinki̱tsa ti nkexro chónta ijie̱ tso̱kja̱nxi̱n ti nti̱a jínahña kuékꞌaji, la ó kjuínchekaá ti nkexro a kixin tsꞌenhña, kjónté nchónhña ijie̱ kꞌuéchónta chꞌan.

Currently Selected:

Santiago 5: poeNTplus

Highlight

Copy