1 Pedro 2
2
1Méxra̱ ti̱to̱héra kaín ti nkehe jínahña, la ko kaín kjuachꞌia, la ko ti nkehe nduáhya tjénka̱yáxinra, ti kjuachji̱no̱xíhin, la ko ti chꞌénara kjuachꞌia. 2Chrokꞌuejora éxi ijnko ixjan na̱ntá tsíkokjíhi, tjinkaon chrókꞌui itsjen ó, mé xi̱kaha chrókóxakohanra chrókuihínra ti itén Díos, la tíha chrókꞌuánkíxin ti kjuaxrexinkaon kuèntára la chrókuaára, 3#Sal. 34:8.*ti chaxín kjuankíxin kꞌuitjára kixin Ìnchéni la jína.
Cristo mé ti ixro̱ tjechón
4Méxra̱ chrókóchjinehéra Ìnchéni, kixin jehe chꞌan mé ti ixro̱ tjechón. Ti chojni la kóxríe̱nhña sin ti ixro̱ a; a̱ndá Díos la kjueyá ti ixro̱ kixin imá tjete sínkí. 5Mé xi̱kaha Díos kjuíchꞌéna ti jahara éxi ixro̱ tjechón, mé tsꞌónara ijnko ni̱nko kuènté chꞌan. La jahara ti ncha̱tꞌá tsíkjinchetjóá Díos kjuachaxíen Ìnchéni Jesucristo, chróchje̱héra chꞌan kjuasáya kaín a̱sánra, kixin xi̱kaha tóxríhi̱n chꞌan. 6#Is. 28:16.*Méxra̱ ti xroon itén Díos ndáchro:
Janhan tsjaké ti chjasin Jerusalén ijnko ixro̱ kjuéyá janhan imá tjetoan, la ko tjete sínkí,
la ti nkexro tsitekaon mé tso̱suèhya.
7 #
Sal. 118:22. *A̱ndá ti jahara titekáonra Ìnchéni, la jehe chꞌan mé ti ixro̱ imá tjete sínkí. A̱ndá ti sin kuítekakonhña, la ó xiteyá éxi ndáchro ti xroon itén Díos:
Ti ixro̱ kóxríe̱nhña ti sin chꞌéna tja̱tꞌo̱,
mé kꞌóna ti ixro̱ imá tjetoan.
8 #
Is. 8:14, 15. *La kja̱xin xiteyá ti nkehe ndáchro xroon itén Díos:
Ti ixro̱ mé tsóténki̱xin chojni la ko ti ixro̱ tsꞌitsínkaxín sin.
Jehe sin tótenki̱xín sin ti ixro̱ a kixin titekakonhña sin ti itén Díos, kixin tsíki̱xién sin tsjasóte sin.
Ti sin tinkáchónki Díos
9 #
Ex. 19:5, 6; Is. 43:20;
Ex. 19:5; Dt. 4:20; 7:6; 14:2; Tit. 2:14;
Is. 43:21;
Is. 9:2. *A̱ndá jahara la Díos kjueyá ti jahara la kꞌónara ncha̱tꞌá si̱chꞌehé ixra̱ ti Rey, la kꞌónara ijnko chjasin tjóá la ko chojni kuènté Díos kixin tsochro̱nkaxínra ti ixra̱ náxrjón kjuíchꞌe chꞌan. Díos kjueyá ti jahara kixin tsꞌaxrjéxi̱nra ti sítie, ndá tsꞌixe̱hénra ti tꞌinkaséña náxrjón. 10#Os. 2:23.*Ti ósé la jahara na̱xa̱ jehya ijnko chjasin, a̱ndá ijie la ó kꞌónara ti chjasin kuènté Díos. Ósé la ninkexró kꞌuéki̱konóe̱hña ti jahara, a̱ndá ijie Díos ti̱konoéhe̱ chꞌan ti jahara.
Chrokꞌuejó éxi chojni chꞌeheni ixra̱ Díos
11Méxra̱ jahara, kíchóni, xrja̱noáhára kixin chrókꞌuejora éxi chojni tsíkji̱xi̱n íjnko chjasin. Chrokjuájonhñara kjuachaxin chrókóxríhanra ti nkehe siín chjasintajni kixin tíha mé ti nkehe tjajo̱nko a̱sánra. 12Jína chrókjuáko̱xinra ti siín ti sin chónhña Díos. Ndá jehe sin, kjónté tꞌándaxíhanra sin éxi chojni jínahña chónta ijie̱, la tsꞌikon sin kixin jína ti ixra̱ ichꞌera, ndá tsochjéhe sin Díos kjuasáya ti ó tsjixraká ti ña̱o tsjanchia chꞌan nkehe ixra̱ kjuíchꞌe kaín chojni chjasintajni.
13Jahara tinkachónkira Díos, chrókjui̱nchexiteyéhéra kaín ti sin tꞌe̱to̱an nkojnko chjasin, la ko ti chꞌin tꞌe̱to̱an ti nación, 14la ko ti gobierno, kixin Díos mé kjueyá ti jehe sin kixin sinchekjasóte sin ti chojni tjasin ijie̱ la ko tsjikosáyehe sin ti nkexro nchexiteyá ti nkehe jína. 15Kixin Díos tjinkaon kixin jína chrókjuáko̱xinra, ndá xi̱kaha ti chojni noehña la ko ti sin lo̱nti̱ mé tsotání sin.
16Chrokꞌuejora éxi chojni chónta kjuachaxin, kjánchó ti kjuachaxin chontara la jehya kixin chrókjuásixínra ijie̱. Náhí. Icha jína chrókjuáko̱xinra kixin chꞌehéra ixra̱ Díos. 17Chrochontehéra kjuasàya kaín chojni. La chrótjue̱héra ti sin kíchóni, la ko chróchontehéra Díos kjuasàya, la ko chrókjuíkosáyehéra ti chojni tꞌe̱to̱an.
Chrokuitekaon ti sin chꞌexón ixra̱
18Jahara chojni chꞌexón ixra̱, chrókuitekákohénra ti lamoara la ko chróchontehéra sin kjuasàya, kjónté á chojni jína la o̱ chojni jie̱he. 19Tíha mé ijnko nkehe jína chrókjuáko̱xinra, kjónté nduáhya chrókjuasótiaxínra, kixin xi̱kaha tjáko̱xinra kixin chaxín nchexiteyéhéra Díos. 20A̱ndá jahara, ti ichrén nkehe jínahña tjejochꞌera, ndá sinchekjasóte sin ti jahara la, ¿xá nkehe chrókjuachara kjónté chrókónínkákonhñara? A̱ndá ti chrókjuasótiaxínra ti nkehe jína tjejochꞌera, la chrókjuachara chrókónínkákonhñara, la tíha mé tóxríhi̱n Díos. 21Mé xi̱kaha kꞌuéya̱hára Díos kixin Cristo kjuasótexín ti iji̱ára. Tíha mé kjua̱ko̱xi̱n chꞌan kixin xi̱kaha jína chrókjuáko̱xinra. 22#Is. 53:9.*Cristo la ninkehó ijie̱ kjuasinhña chꞌan la ko kjuíchꞌiyehya chꞌan ninkexró. 23#Is. 53:7.*Ti ó kꞌuándaxíhi̱n sin chꞌan la ninkehó kjuáte̱hya chꞌan; ti ó kjuínchekjasóte sin chꞌan la kjuanchahya chꞌan kixin chrókjuasóte sin. Náhí. Jehe chꞌan ó nohe chꞌan kixin Díos mé ndoá sinchekito̱exín iji̱é ti sin a. 24#Is. 53:5, 6.*Cristo mé kuamá ti iji̱éni kixin ti cuerpoé chꞌan kjuákꞌenkáni ntacruz kixin í tsochóntahyani ijie̱, a̱ndá ijie la chrókꞌuejóni nkojína kixin Cristo kjuasótexín ti iji̱éni, chrítꞌo̱ nto̱e chꞌan kixin chrókuito̱exíni jína. 25Ósé la jahara kuékꞌájira éxi kolélo tsíkjichròe. A̱ndá ijie la ó ikjanra tinkachónkira Cristo, ti nkexro tsꞌayakohen ti a̱sánra.
Currently Selected:
1 Pedro 2: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
