San Marcos 1

Juan thi nchegithe chujni tjaago ngain jna xruꞌin jii

(Mt. 3:1-12; Lc. 3:1-9, 15-17; Jn. 1:19-28)

1Ko jaꞌin kuexinxin xrague chujni juajnee Jesucristo, thi Xeꞌen Ndo Dio.

2Kuꞌen inchin jitaxin thi dikji̱n Isaías, thi bagayée juajnee Ndo Dio:

Jaꞌan ruaꞌan naa thi sitauꞌan nthiꞌá, naa thi dikao juajnana,

ixin jeꞌe thi sinchechjian nthiaa.

3Naa thee chujni tuyao ngain nunthe xruꞌin jii ko ndachro:

“Nchechjian ra nthiee Nchaa ná;

ko nao danthjeꞌe ra nthiꞌá.”

4Ko jaꞌin kunuxinxin Juan, thi nchegithe chujni ngain jna thi xruꞌin jii, ko bakjague na̱ ixin rugunda ruigithe na̱, ko jañaa rukjaguxin na̱ ixin ukuinthuꞌe na̱ ko ubitjañeꞌe na̱ thi jianꞌa bancheꞌe na̱. 5Ko kainxin chujni binthe nuntheꞌe Judea ko ni binthe rajna Jerusalén bakii na̱ ngain Juan. Ko are jeꞌe na̱ bakendueꞌen ñao na̱ ixin kain thi jianꞌa bancheꞌe na̱, Juan banchegithe na̱ ngain nda Jordán.

6Ko lunthue Juan dikunchjian kunixin xreꞌe kucamello, ko jithedunga naa rua, ko bane kuxuali ko tsjeen kurmeena. 7Are Juan bakjaago jaꞌin bandachro:

—Thi jiruena utuin tsii ko chunda icha tsjé juachaxin ke jaꞌan. ¡Ko jikininxinꞌa na tsunxindangaa kathee! 8Jaꞌan nthagithe ra kunixin jinda; aro jeꞌe sinthagithe ra kunixin Espíritu Santo.

Bigithe Jesús

(Mt. 3:13-17; Lc. 3:21-22)

9Ko are Juan banchegithe chujni, Jesús bachrjexin rajna Nazaret jii nuntheꞌe Galilea ko sakjui ngain Juan, ixin bigithe ngain nda Jordán. 10Ko are Jesús bachrjengixin jinda, jeꞌe bikon xiree ngajni, ko Espíritu Santo xinkajin ngataꞌa jeꞌe xraa naa kunthuanajni. 11Ko ngajni kuinxin ni naa tha ndachro:

—Jaꞌa thi Xanꞌna anto thjuaa ko jaꞌan anto chaꞌna ixin jaꞌa.

Nchiijin binao runcheyeꞌe Jesús

(Mt. 4:1-11; Lc. 4:1-13)

12Ko tuinxion Espíritu Santo sabikao Jesús ngagaꞌa jna thi xruꞌin jii. 13Ko nthi̱ꞌa̱ nchiijin kjuexin runcheyeꞌe Jesús nguii yoo kan nchaꞌon, ko beꞌe thi binthe tsjé kuxiigo chrintho, ko angeel Ndo Dio bakuꞌen Jesús.

Jesús kuexiꞌin xree

(Mt. 4:12-17; Lc. 4:14-15)

14Kuthimejan are kuiaxiꞌin na̱ Juan ngain nduꞌa xiiso, Jesús sakjui nuntheꞌe Galilea ko kjuaago juajnee Ndo Dio. 15Ko ndachro:

—Ujuii nchaꞌon, ko thi thetuꞌan Ndo Dio ujitunchiaon. Thinthuꞌe ra kain thi jianꞌa tencheꞌe ra ko dithikaon ra thi jian juajnee ndo.

Jesús baye̱e noo xii banthetse kuchee

(Mt. 4:18-22; Lc. 5:1-11)

16Naa nchaꞌon are Jesús jithji ngandeꞌe nda Galilea, bikon yoo xii choo xa, naa biꞌin Simón, ko inaa biꞌin Andrés. Ko kayui tetjangi nunchaꞌa ngain nda ixin runthetse kuchee. 17Ko Jesús ndachro ngain xa:

—Ruena ra, ixin jaꞌan tsjaguꞌa ra kexreen satse ra chujni ixin sithikaon na̱ Ndo Dio.

18Ko binthekinthuꞌe nunchee ko bintheruee Jesús.

19Ko xra kjínꞌa tethji na̱ are Jesús bikon iyoo xii choo xa, yui xii teꞌi xeꞌen Zebedeo, naa biꞌin Jacobo ko inaa Juan. Kayui xii jiꞌi kunixin ndudee tate na̱ ngaa ntha barko, ixin tetheyeꞌe na̱ nunchaꞌa. 20Ko Jesús baye̱e kayui xii teꞌi, ko jeꞌe xa kuinthuꞌe xa ndudee xa, ndo diꞌin Zebedeo ngain ntha barko, jeꞌe ndo ko icha nincheꞌe xra, ko kayui xa ruee xa Jesús.

Thi xii bechunda espíritu jianꞌa

(Lc. 4:31-37)

21Kuthimejan Jesús ko ni baye̱e biji na̱ ngain rajna Capernaum ko are binkee nchaꞌon nchejugaꞌa ni judío, Jesús bixiꞌin niꞌngo ko kuexiꞌin kjuaago ngain chujni. 22Ko kain ni bakiꞌin thi bakjaago Jesús bakiseꞌen na̱ ixin jeꞌe banichja inchin naa chujni chunda anto tsjé juachaxin ko jeꞌa inchin tjaago xi tjaago ley. 23Ko tuinxion, nthi̱ꞌa̱ ngain niꞌngo naa xi bechunda naa espíritu jianꞌa kuexiꞌin xa kuyao xa suji ko ndachro xa:

24—¡Jaꞌa Jesús, thi juixin Nazaret! ¿Unda dixinthe ngajin ná? ¿A juiꞌi ixin sinchetjaan ni ra? ¡Jaꞌan nuna kensen jaꞌa, ko jaꞌa Xeꞌen Ndo Dio!

25Aro Jesús binchesatheꞌe espíritu jianꞌa mee ko ndachro:

—¡Tenkua jaꞌa, ko dachrjexin ngain xii yaa!

26Ko espíritu jianꞌa mee suji kuntsjenga xii mee, ko kuyao suji ko bachrjexin ngain xa. 27Ko kainxin chujni te nthi̱ꞌa̱ xraon na̱ ko banchiangiꞌi choo na̱:

—¿Keꞌe jiꞌi? ¿A jiꞌi inaa juajna narua jixragua ná? ¡Xii jiꞌi kunixin jié juachaxin thetuꞌen xa espíritu jianꞌa, ko espíritu jianꞌa dithikaon!

28Ko kainxin rajna te ngain nunthe Galilea anto daka kunuꞌe na̱ thi bancheꞌe Jesús.

Jesús binchexrueꞌen janchee Simón Pedro

(Mt. 8:14-15; Lc. 4:38-39)

29Kuthimejan are bachrjexin na̱ niꞌngo mee, Jesús kunixin Jacobo ko Juan sakjui na̱ nchianduꞌa Simón ko Andrés. 30Ko are Jesús bixiꞌin nchia, kuekiin na̱ ixin janchee Simón Pedro jitsingataꞌa jan sauen jan ixin beniꞌi jan ixin sua. 31Ko Jesús kunchieꞌen ngain jan, ko tseꞌe raa jan ko binchengathjen jan, ko bachrjekjio jan sua. Ko jeꞌe jan kuexiꞌin jan bajon jan thi juine na̱.

Jesús binchexrueꞌen tsjé chujni niꞌi

(Mt. 8:16-17; Lc. 4:40-41)

32Ko are ubiataon nchaꞌon mee, juiauꞌe na̱ Jesús kainxin chujni niꞌi ko kainxin chujni bechunda espíritu jianꞌa. 33Ko kain ni rajna xrathe na̱ ngandangii nchia beꞌe Jesús, 34ko nthi̱ꞌa̱ jeꞌe binchexrueꞌen tsjé chujni bechunda jejee chin, kai chujni bechunda espíritu jianꞌa, jeꞌe bantsjeꞌe na̱ espíritu. Aro bakanchrjandaꞌa espíritu jianꞌa ixin rundachro kensen jeꞌe Jesús.

Jesús kjuague chujni jii ngain nunthe Galilea

(Lc. 4:42-44)

35Ko nduuyo, are xra naxin xeꞌe, Jesús bingathjen ko bachrjexin rajna ixin bikjee naa jngi thi xruꞌin jii ixin nthi̱ꞌa̱ nichjee Ndo Dio. 36Kuthimejan Simón ko ni icha ni bakao bikjee na̱ Jesús. 37Ko are ubithja na̱ ndachro na̱:

—Kainxin chujni tethjee na̱, suixin.

38Ko jeꞌe batheꞌe:

—Ji ná ngain icha rajna te ngandajin ixin kai nthi̱ꞌa̱ tsjaago juajnee Ndo Dio, ixin mee juixin jaꞌan.

39Ko jañaa Jesús kuingaria nguii nuntheꞌe Galilea ixin kjuaago juajnee Ndo Dio ngain kain niꞌngo, ko bagantsjexin ngain chujni espíritu jianꞌa.

Jesús binchexrueꞌen naa xii bechunda chin lepra

(Mt. 8:1-4; Lc. 5:12-16)

40Naa xii bechunda chin lepra kunchieꞌen ngain Jesús, ko bethuxin ko ndachro:

—Ja̱ rinao, nchao sinchexrueꞌen na chinꞌna.

41Ko Jesús kuiakunueꞌe ko kjua raa ixin kathe ko ndachro:

—Jaan, rinaꞌo. Ukuxruaꞌan.

42Ko are Jesús juexin ndachro yaa, chiꞌin xii mee ndabachrjeꞌe chin, ko ixruꞌin chin bechunda. 43Ko Jesús kuetuꞌen xii mee sarukji xa, aro saꞌo ndachro:

44—Xruꞌin chujni ndache ixin ukuxruaꞌan, jeꞌo thji ngain xi daana ixin jeꞌe xa sikon xa ixin jaꞌa ixruꞌin chin chunda ko dajon thi jikininxin dajon chujni ukuxrueꞌen, jañaa inchin kuetuꞌan Moisés, ko kain chujni tsunuꞌe na̱ ixin ukuxruaꞌan.

45Aro thi xii are sakjui xa kuexiꞌin xa kuekin xa kexreen jeꞌe kuxrueꞌen. Mexinxin Jesús ichroꞌa baxraago ngain kexeꞌo rajna, ko tabagithuꞌe ngandeꞌe rajna thi xruꞌin jii. Aro maski jamee, chujni icha rajna bakii na̱ ngain thi beꞌe Jesús.

Currently Selected:

San Marcos 1: plsNT

Highlight

Copy