San Mateo 28

Xechon Jesús

(Mr. 16:1-8; Lc. 24:1-12; Jn. 20:1-10)

1Are batho nchaꞌon nchejugaꞌa ni, ko kuexiꞌin bingasaan thi nchaꞌon thexinxin semana, María Magdalena ko thi inaa María kjui na̱ bitsjeꞌe na̱ thi xrabaa Jesús. 2Ko are tate na̱ nthi̱ꞌa̱ kuingi nunthe anto suji. Ko naa angeel Ndo Dio xinkanjinxin ngajni ko juii ngain thi jixrabaa Jesús. Jeꞌe binthjia xro jiree ngain chinthi ko tabeꞌe ngataꞌa xro. 3Ko ángel mee anto jitungixima inchin xruꞌi xinkanjinxin ngajni, ko lunthue anto rua luntho inchin chrintha. 4Ko xi soldado tenda nthi̱ꞌa̱ are binthegikon xa ángel, anto xranga xa ixin juaxraon ko tabinthegenda xa ko betsinga xa xraa ni ndadigeꞌen. 5Kuthimejan ángel ndachro ngain thi yoo nchrii binthekji:

—Xraonꞌa ra. Jaꞌan nuna ixin tethjee ra Jesús, thi kuenganito na̱ ntha cruz. 6Jeꞌe koꞌa nthiꞌi, jeꞌe uxechon inchin jeꞌe ndachro. Xrakui ra sitsjeꞌe ra thi bakeꞌe na̱ Nchaa ná. 7Jaikua thji ra ko dindache ra chujni bakao: “Jeꞌe beꞌen aro jai jeꞌe uxechon ko jeꞌe jitaꞌon ra nthiꞌá ixin tsji Galilea ko nthi̱ꞌa̱ sikunxin ra.” Jeꞌo yaa thi jaꞌan bindathjo ra.

8Kuthimejan kayui nchrii mee jaikua sabinthekjixin nchra ngain chinthi. Ko kayui nchra binthexraon nchra aro kai anto binthechee nchra, ko kuinga nchra binchenuꞌe nchra chujni bakao Jesús. 9Ko are jeꞌe nchra tethinga nchra, Jesús kununxiꞌin nchra ko ndachro: ¡Chaꞌa ra Ndo Dio jii ngajin ra! Ko jeꞌe nchra binthekunchieꞌen nchra ngain Jesús ko kjuua nchra ruthee ko binchesayeꞌe nchra. 10Ko jeꞌe ndachro ngain nchra:

—Xraonꞌa ra ko thji ra dindache ra kain ni bagakjiꞌan ixin tsji na̱ Galilea ko nthi̱ꞌa̱ sikunxin na na̱ jaꞌan.

Thi nduaꞌa ndachro xi soldado binthenda chinthi

11Are kayui nchrii teꞌi satethji nchra ixin tedikao nchra juajna, kanxion xi soldado binthenda thi xrabaa Jesús binthekji xa bindache xa xi daana baketuꞌan ngain icha xi daana kain thi kuꞌen. 12Ko are xi daana teꞌi binthekji ngain xi thetuꞌan rajna ko are ujuexin binthekjauthexin xa, binthegajon xa anto tsjé tumi ngain xi soldado binthenda thi xrabaa Jesús, 13ko binthendachro xa ngain xi soldado teꞌi:

—Jaꞌa ra ndachro ra ixin are jaꞌa ra tatechrin ra thie, kjui chujni bakao Jesús ko kuee na̱ Jesús. 14Ko ja̱ xi gobernador tsunuꞌe xa jiꞌi, jaꞌan ná sikjao ná xa ko jaꞌa ra xruꞌin tsuꞌan ra.

15Kuthimejan kain xi soldado bithuexin xa binthegayee xa tumi ko bincheꞌe xa inchin bituꞌen xa. Ko jiꞌi thi xranichja ni judío ngain nchaꞌon teꞌi.

Thi kuetuꞌan Jesús ixin runcheꞌe chujnii

(Mr. 16:14-18; Lc. 24:36-49; Jn. 20:19-23)

16Ko thi thejngo chujni bakao Jesús sabinthekji na̱ Galilea ngain jna kuetuꞌen na̱ Jesús. 17Ko are binthegikon na̱ Jesús, jeꞌe na̱ binchesayeꞌe na̱, aro thuꞌa na̱ xraa bithikaonꞌa na̱ ixin jeꞌe Jesús. 18Kuthimejan Jesús kunchieꞌen ngain na̱ ko ndachro:

—Jaꞌan ubayaa kainxin juachaxin nthi̱ꞌa̱ ngajni ko nthiꞌi ngataꞌa nunthe. 19Mexinxin thji ra ko nchekueꞌen ra kainxin chujni ngain kainxin nunthe ko ndache ra na̱ sithikaon na̱ juajnana, ko nchegithe ra na̱ kunixin juachaxiin Ndudana, juachaxinna ko juachaxiin Espíritu Santo. 20Ko nchekueꞌen ra na̱ sincheꞌe na̱ kain thi jaꞌan kuetuꞌan. Ko jaꞌan sariꞌi kainxin nchaꞌon ngajin ra tsjexinja nunthe. Jañaa tsuꞌen.

Currently Selected:

San Mateo 28: plsNT

Highlight

Copy