San Mateo 27

Bikao na̱ Jesús ngain Pilato

(Mr. 15:1; Lc. 23:1-2; Jn. 18:28-32)

1Are ubingasaan kain xi daana baketuꞌan ngain icha xi daana ko kain xi thetuꞌan ngain rajna kjuathexin na̱ kexreen sincheꞌe na̱ ixin nasuenxon na̱ Jesús. 2Kuthimejan kuia na̱ Jesús ko bikao na̱ ngain Poncio Pilato, thi baketuꞌan nunthe Judea.

Ndabeꞌen Judas

3Ko are Judas, thi kjuaago ixin tse na̱ Jesús, kunuꞌe ixin nasuenxon na̱ Jesús, jeꞌe chrjuinꞌa kunuꞌe ixin thi jianꞌa bincheꞌe, ko binchekjan thi tumi dikunchjianxin chia plata ngain xi daana thetuꞌan ngain icha xi daana ko ngain xi thetuꞌan rajna, 4ko ndachro ngain xa:

—Jaꞌan jianꞌa binthaꞌa ixin bindathjo ra kexreen tse ra naa xii thi nasuenxon ra ko xruꞌin jika.

Aro jeꞌe xa binthendachro xa ngain Judas:

—Mee, ¿jaꞌan ná keꞌe ndusenna ná? ¡Yaa jaꞌa nuꞌa!

5Kuthimejan Judas kjua tumi ngaxiꞌin niꞌngo, ko sakjui bikethedungiꞌi thusin naa jino ko beriaꞌnda ko ndabeꞌen.

6Ko kain xi daana baketuꞌan ngain icha xi daana, batse xa tumi ko ndachro xa:

—Chroꞌa sakeꞌe ná tumi jiꞌi ngain thi tumi dajon chujni ngain niꞌngo, ixin tumi jiꞌi xengaxin ꞌna jni.

7Kuthimejan kjuathexin choo xa ixin tumi mee kuenanxin xa naa nunthe diꞌin nuntheꞌe thi nchechjian chi, ixin nthi̱ꞌa̱ tsjabaa na̱ chujni jeꞌa rajnee na̱. 8Mexinxin jngi mee, jai xradiꞌin, Jngiꞌi Jni. 9Jañaa bikuenxin thi dindachro Jeremías, thi bagayee juajnee Ndo Dio: “Kuaa na̱ kan ko the tumi dikunchjianxin chia plata, ko tumi mee kjuenga ꞌna chujni Israel ixin jeꞌe. 10Ko tumi mee kuenanxin na̱ jngi diꞌin, jngiꞌi thi nchechjian chi, jañaa inchin kuetunna Nchana.”

Jesús ngathexin kon Pilato

(Mr. 15:2-5; Lc. 23:3-5; Jn. 18:33-38)

11Ko are Jesús beꞌe ngathexin kon xi gobernador, xi biꞌin Pilato, ko jeꞌe xa banchiangiꞌi xa Jesús ko ndachro xa:

—¿Ajaꞌa thi Rey ixin chujni judío?

Jesús ndachro ngain xa:

—Jaan, inchin jaꞌa rindachro.

12Ko are kain xi daana baketuꞌan ngain icha xi daana, ko kain xi thetuꞌan ngain rajna tenichja xa thi nduaꞌa ngathexin kon Jesús, jeꞌe xruꞌin ndachro. 13Kuthimejan Pilato ndachro ngain Jesús:

—¿Athinꞌa kekaa thi jitjangiaxin na̱?

14Aro Jesús xruꞌin batheꞌe, ko Pilato anto kuiseꞌen ko ibenueꞌa keꞌe runcheꞌe.

Chujni banchia ixin Jesús seꞌen

(Mr. 15:6-20; Lc. 23:13-25; Jn. 18:38—19:16)

15Ko ngain kain kiai Pascua xi gobernador bakanchrjanda xa naa thi teaxiꞌin ko ni rajna bakinchieꞌe kexeꞌe thi bakanchrjanda xa. 16Ko ngain nchaꞌon mee beꞌe ngaxiꞌin nduꞌa xiiso naa xi biꞌin Barrabás, ko tsjé chujni bechunxin. 17Ko are xrathe tsjé chujni, Pilato banchiangi ngain chujni ko ndachro:

—¿Kensen rinao ra tsanchrjanda satsji: a Barrabás o Jesús, thi diꞌin Cristo?

18Ko Pilato ubenuꞌe ixin juachjueꞌe bechunda kain xi daana, mexinxin bajunxin xa Jesús ngain jeꞌe.

19Ko are Pilato tajitaꞌa ntha xintauen thi banchexin jie̱, chriꞌi rueꞌen nchra naa juajna thi dindachro nchra: “Dixintheꞌa ngain xii jian yaa, ko ixin jeꞌe xa jaꞌan anto chrjuinꞌa kuxinanxin jai.”

20Aro kain xi daana baketuꞌan ngain icha xi daana ko xi thetuꞌan ngain rajna ndache xa chujni ixin rundachro na̱ ixin Barrabás thi sachrjexin nduꞌa xiiso ko Jesús thi rugeꞌen. 21Ko Pilato banchiangi ngain na̱ inaa ko ndachro:

—¿Kexeꞌe thi rinao ra tsanchrjanda satsji?

Ko kain na̱ ndachro na̱:

—Barrabás.

22Pilato banchiangi ngain na̱ inaa ko ndachro:

—¿Keꞌe sinthaꞌa ngain Jesús, thi diꞌin Cristo?

Kain na̱ ndachro na̱:

—¡Thenganito xa ntha cruz!

23Kuthimejan Pilato ndachro ngain na̱:

—Aro, ¿keꞌe jianꞌa bincheꞌe?

Ko jeꞌe na̱ kjan na̱ ndachro na̱ seen inaa:

—¡Thenganito xa ntha cruz!

24Are Pilato bikon ixin chroꞌa na̱ ixin Jesús sarukji, ko bikon ixin kain na̱ anto teduñao na̱, Pilato kuetuꞌan juii jinda ko kunthi raa ngathexin kon kainxin chujni te nthi̱ꞌa̱ ko ndachro:

—Jaꞌan ixruꞌin chunda keꞌe sikon ixin seꞌen xii jiꞌi, ixin jeꞌe xa xruꞌin jianꞌa bincheꞌe xa. Yaa jaꞌa ra nuꞌa ra.

25Ko kainxin chujni ndachro na̱:

—¡Jaꞌan ná kunixin xanꞌna ná, setsingataꞌa ná ixin seꞌen xii yaa!

26Kuthimejan Pilato bantsje Barrabás ko kuanchrjanda sakjui, ko kuetuꞌan bintja na̱ Jesús, kuthimejan Pilato bajon Jesús ixin kuenganito na̱ ntha cruz.

27Kuthimejan xi soldadue Pilato bikao xa Jesús ngain nchia dinthe xi soldado, ko xrathe kainxin xi soldado ngandajin Jesús. 28Kuthimejan bantsjeꞌe xa lunthue Jesús ko binchetsaa xa naa luntho jatse. 29Ko binchekjinga xa Jesús naa nthanchaꞌa dika̱a̱ xa, ko binchetse xa naa nthaa ngain rajianxin. Kuthimejan binthethuxin xa ngathexin kon Jesús, ko kjuanua xa ko ndachro xa:

—¡Thjengijna ni ra, jaꞌa thi thetuꞌen ni judío!

30Kai kjuanito xa ndathee xa ko kuaa xa nthaa binchetse xa, ko nthaa yaa xrangixin xa jaa Jesús. 31Ko are juexin kjuanua xa, bantsjeꞌe xa luntho jatse binchetsaa xa ko binchengaa xa lunthue. Kuthimejan sabikao xa ixin kuenganito xa ntha cruz.

Kuenganito xa Jesús ngain ntha cruz

(Mr. 15:21-32; Lc. 23:26-43; Jn. 19:17-27)

32Ko are tedachrjekauxin xa Jesús nthi̱ꞌa̱, betan xa naa xii biꞌin Simón, thi dikixin rajna Cirene; ko binchekame xa ntha cruz jidikao Jesús.

33Ko bijikaꞌo xa Jesús kunixin Simón ngain thi diꞌin Gólgota, ko jiꞌi ruchro Thi Jii Nthaluro Jaa Chujni. 34Nthi̱ꞌa̱ binao xa runchegiꞌi xa Jesús nda vinagre jithekjan ndachika anto tsja. Aro Jesús kjuengayaxin ko ichroꞌa biꞌi nda.

35Ko are kuenganito xa Jesús ngain ntha cruz, kain xi soldado tsuntaon xa ixin kensen rugithueꞌe lunthue Jesús. Ko jañaa bikuenxin thi dindachro thi bagayee juajnee Ndo Dio: “Ko tsuntaon na̱ ixin chjeyexin na̱ lunthuna.” 36Kuthimejan tabinthe xa nthi̱ꞌa̱ ixin binthenda xa Jesús. 37Ko ngadathexin jaa Jesús kuiin xa naa thi dikji̱n xa, thi jitaxin unda jinganito ntha cruz, ko ndachro:

“Xii jiꞌi Jesús, thi thetuꞌen chujni judío.”

38Kai yoo xicheꞌe kuenganito na̱ ntha cruz chrikee Jesús, naa xa beꞌe no rajngunxin Jesús ko inaa xa no rajianxin. 39Ko kain ni bagatho nthi̱ꞌa̱ banchengithjen na jaa na̱ ko banichja na̱ jianꞌa ixin Jesús. 40Ko bandachro na̱:

—Jaꞌa, thi ndachro ixin rukunxanthe niꞌngo icha renthe ko ngain nchaꞌon ninxin rukjan runchechjian niꞌngo inaa, danianxin ntha cruz, ja̱ ndua jaꞌa Xeꞌen Ndo Dio.

41Ko kain xi daana baketuꞌan ngain icha xi daana, xi tjaago ley, xi fariseo ko kain xi thetuꞌan rajna kjuanua xa Jesús ko ndachro xa:

42—Jeꞌe nchao kjuengijna icha chujni, aro jeꞌe chroꞌa danianxin ntha cruz. Ja̱ ndua jeꞌe thi thetuan ná, ncho dañianxin ngain ntha cruz ko suthikaon ná jeꞌe. 43Jeꞌe chunthia ngain Ndo Dio; Ndo Dio ncho thjengijna, ja̱ ndua thjueꞌe ndo, ixin jeꞌe ndachro: “Jaꞌan Xeꞌen Ndo Dio na.”

44Kai kayui xi cheꞌe tenganito ntha cruz chrikee Jesús, kai kjuanua xa.

Beꞌen Jesús

(Mr. 15:33-41; Lc. 23:44-49; Jn. 19:28-30)

45Kuthimejan ngusine nchaꞌon kuexiꞌin kunaxin xeꞌe nguixin nunthe ko batho nii hora kuthimejan bingasaan. 46Ko inchin las tres Jesús kuyao suji ko ndachro:

—Elí, Elí ¿lama sabactani? —jiꞌi ruchro: Ndo Diuna, Ndo Diuna, ¿unda ndakuinthuna jaꞌon?

47Ko kanxion xii te nthi̱ꞌa̱ kuiꞌin xa mee ko ndachro xa:

—Xii jiꞌi jidaye̱e xa Elías.

48Ko naa thi xii te nthi̱ꞌa̱ kuinga biruee xa naa thi datse jinda inchin chjon. Ko xrangi xa vinagre ko kuenkjin xa kon naa nthaa. Kuthimejan tsiin xa nui ngain ruꞌa Jesús ixin rugiꞌi. 49Aro xi kanxion ndachro xa:

—Tanchrjanda, sukon ná andua tsii Elías tsjengijna.

50Jesús kjan kuyao suji inaa, ko ndabeꞌen. 51Ko are mee thi manta bethua ngaxiꞌin niꞌngo icha renthe, nui kuexinxin bichjenga manta, ko kuingi nunthe ko bichjenga thjao. 52Ko tsjé chinthi thi xrabaa chujni chunthia Ndo Dio, xiree chinthi ko kjan xechon na̱. 53Ko xechunja Jesús, kuthimejan bachrjexin na̱ chinthiꞌi na̱ ko binthekji na̱ ngain rajna Jerusalén. Nthi̱ꞌa̱ anto tsjé chujni bikon na̱ ixin jeꞌe na̱ xechon na̱.

54Ko xi thetuꞌan naa renkia xi soldado ko icha xi tenda Jesús, are binthegikon xa kuingi nunthe ko kain thi jituꞌen, anto binthexraon xa ko binthendachro xa:

—Jaan, ndua xii jiꞌi Xeꞌen Ndo Dio.

55Ko tsjé nchrii baruee Jesús juixin rajna Galilea ixin bakjengijna Jesús, kjínxin tatetsjeꞌe nchra thi jituꞌen. 56Nthi̱ꞌa̱ beꞌe María Magdalena, María, thi janee Jacobo ko José, ko kai beꞌe janee kain xeꞌen Zebedeo.

Kjuabaa na̱ Jesús

(Mr. 15:42-47; Lc. 23:50-56; Jn. 19:38-42)

57Are kuexiꞌin kunaxin xeꞌe, juii naa xii anto tsje tumi bechunda ko biꞌin José, naa xi juixin rajna Arimatea, ko jeꞌe xa kai baruee xa Jesús. 58Ko José kjui bitsjeꞌe Pilato ko banchieꞌe juachaxin ixin sasikao Jesús. Kuthimejan Pilato kuetuꞌan rugajon na̱ Jesús. 59Ko José binchegania Jesús ko kuensia naa manta thjua. 60Ko bikaan ngain naa chinthi narua thi jeꞌe kuetuꞌan kunchjian ngadoꞌo naa thjao. Kuthimejan jeꞌe kuejee chinthi mee kunixin naa xro jié, ko sakjui. 61Ko María Magdalena ko inaa María tabinthe na̱ ngandangii chinthi.

Xi soldado binthenda chinthiꞌi Jesús

62Ko nduexin, sábado, kain xi daana baketuꞌan ngain icha xi daana ko kain xi fariseo binthekji xa bitsjeꞌe xa Pilato, 63ko binthendachro xa:

—Suixin, jaꞌan ná xraxaꞌon ná ixin thi xii banichja thi nduaꞌa, ndachro: “Ngain nchaꞌon ninxin jaꞌan ruxechon na.” 64Mexinxin jaꞌan ná rinaꞌo ná ixin suixin ruaꞌan kanxion xi soldado sinthenda xa thi jeꞌe jixrabaa, ruxethjaja thi nii nchaꞌon, ixin chujnii bakao tsji na̱ thie ko sikee na̱ Jesús. Kuthimejan rundache na̱ icha chujni ixin jeꞌe xechon, ko ja̱ jiꞌi tsuꞌen, jiꞌi icha nduaꞌa ke thi ukuꞌen.

65Pilato ndachro ngain xa:

—Yaa chunda ra kanxion xi soldado. Thji ra ko jian thejeꞌe ra chinthi inchin jaꞌa ra nuꞌa ra.

66Kuthimejan sabinthekji na̱ ko kuejee na̱ jian chinthi kunixin naa xruꞌe ngain xro jiree chinthi. Ko nthi̱ꞌa̱ kuinthuꞌe na̱ xi soldado ixin binthenda xa.

Currently Selected:

San Mateo 27: plsNT

Highlight

Copy