San Marcos 2

Jesús binchexrueꞌen naa thi chroꞌa bakingi

(Mt. 9:1-8; Lc. 5:17-26)

1Batho kanxion nchaꞌon kuthimejan Jesús kjan rajna Capernaum. Ko chujni tuin kunuꞌe na̱ ixin ubeꞌe ngain nchia. 2Ko anto daka xrathe tsjé chujni ngain Jesús ko bithjaꞌa nchia bixiꞌin na̱ ko nguii thi dixinxin na̱ ibithjaꞌa ko nthi̱ꞌa̱ Jesús kjuague na̱ juajnee Ndo Dio. 3Kuthimejan noo thi xii tetsengi naa thi chroꞌa bakingi. 4Aro chroꞌa batho na̱ thi jii Jesús, ixin anto tsjé chujni te ngandangii nchia mee. Mexinxin kjuaaso na̱ ngataꞌa nchia ko no thi jii Jesús binthjian na̱ rioꞌo techue nchia ko nthi̱ꞌa̱ binchexinkajinxin na̱ sauen thi chroꞌa bakingi. 5Are Jesús bikon xii teꞌi ixin chunthia xa ixin Jesús runchexingameꞌe thi niꞌi, Jesús ndachro ngain thi niꞌi:

—Kain thi jianꞌa jaꞌa bincheꞌe, jaꞌan ubinthatjañaꞌa.

6Ko nthi̱ꞌa̱ tate kanxion xi tjaago ley, ko texraxaon xa: 7“¿Unda jañaa nichja xii jiꞌi?, ixin nchaoꞌa jinichja xa ixin Ndo Dio. Xruꞌin chujni nchao sinchetjañeꞌe inaa chujni thi jianꞌa ncheꞌe na̱, jeꞌo Ndo Dio thi nchao sincheꞌe mee.” 8Aro Jesús ubenuꞌe thi texraxaon xa ko ndachro ngain xa:

—¿Unda xraxaon ra jañaa? 9¿Keꞌe icha tangiꞌa rundathjan thi niꞌi: “Kain thi jianꞌa bincheꞌe ubinthatjañaꞌa”, o rundathjan: “Dingathjen, tsiin sauan ko thjixin ruthea”? 10Jaꞌan tsjaago ngajin ra ixin jaꞌan, thi Xii juixin ngajni, chunda juachaxin nthiꞌi ngataꞌa nunthe ixin nthatjañaa chujni thi jianꞌa ncheꞌe na̱.

Kuthejan Jesús kjan ngain thi niꞌi mee ko ndachro:

11—Jaꞌan rindathjo jaꞌa, dingathjen, tsiin sauan ko sathji nchiandui.

12Ko tuinxion bingathjen thi chroꞌa bakji mee, tsiin sauen ko ngathexin kon kain na̱ bachrjexin nthi̱ꞌa̱. Ko kain chujni xratao tabinthenchexruan na̱ ko binchesayeꞌe na̱ Ndo Dio, ko ndachro na̱:

—Xruꞌin nchaꞌon bukon ná thi anto chrjuin kuꞌen jai.

Jesús baye̱e Leví

(Mt. 9:9-13; Lc. 5:27-32)

13Kuthimejan Jesús kjan ngandeꞌe nda Galilea, ko tsjé chujni bakunchieꞌen ngain jeꞌe, ko jeꞌe banchekueꞌen na̱ juajnee Ndo Dio. 14Ko are Jesús sajithji, batho ngandangii naa thi bagatsexin na̱ tumii César, ko Jesús bikon nthi̱ꞌa̱ naa thi xii diꞌin Leví ko ndudee diꞌin Alfeo. Ko Jesús ndachro ngain Leví:

—Xrakui ruena.

Ko Leví bingathjen ko ruee Jesús.

15Kuthimejan are Jesús utajii ngain nthanchaon nthi̱ꞌa̱ nchianduꞌa Leví, kunchieꞌen tsjé xi thjejo tumii César, ko chujni anto bancheꞌe thi jianꞌa, ko binthe na̱ juine na̱ ngain Jesús ko ngain ni bakao ixin utsjé ni baruee. 16Ko are xi tjaago ley ko xi fariseo bikon xa ixin Jesús jinekaꞌo ni thjejo tumii César ko ni anto ncheꞌe jianꞌa, jeꞌe xa banchiangi xa ngain ni bakao Jesús:

—¿Unda xi tjaago jinekaꞌo ko dikaꞌo ni thjejo tumii César ko ni anto ncheꞌe jianꞌa?

17Jesús kuiꞌin xii teꞌi ko ndachro:

—Chujni niꞌa, chujni mee rugundeꞌa xi nchexruan, jeꞌo chujni niꞌi, ni rugundeꞌe xi nchexruan. Mexinxin jaꞌan juiꞌa ixin saya̱a chujni ncheꞌe jian, jaꞌan juiꞌi ixin saya̱a chujni ncheꞌe jianꞌa ixin tsinthuꞌe na̱ thi jianꞌa ncheꞌe na̱.

Jesús tjaago ixin thi nchekjaaño chujni

(Mt. 9:14-17; Lc. 5:33-39)

18Naa nchaꞌon chujni bakao Juan ko ni fariseo tenchekjaaño na̱, ko kanxion na̱ kjui na̱ ngain Jesús ko banchiangiꞌi na̱:

—¿Unda chujni xrakao Juan ko ni fariseo tenchekjaaño na̱ ko chujni chrjiꞌo jaꞌa naꞌi?

19Jesús ndachro:

—¿A chujni thji naa kiee ni thutheꞌe nchao sinchekjaaño na̱ are xra nthi̱ꞌa̱ jii xi thutheꞌe? ¡Naꞌi, jeꞌe na̱ chroꞌa sinchekjaaño na̱ ja̱ xra jii xi tsutheꞌe! 20Aro tsii nchaꞌon are sasikao na̱ xi kutheꞌe, kuthimejan nchue, sinchekjaaño na̱.

21’Xruꞌin chujni theyeꞌe naa luntho nthaxii kunixin rioꞌo manta narua ixin manta narua thinxe luntho nthaxii, ko icha sangi thi digichje luntho. 22Kai vino are jidatsuxiꞌin, chroꞌa sikia ngaa naa ruanxran nthaxii ixin tsunchrintaon rua mee, ko sinthji vino ko ruanxran ichroꞌa sunda. Mexinxin vino jidatsuxiꞌin, rugunda sikia ngain naa ruanxran narua.

Ni bakao Jesús kunchrijin na̱ nua trigo nchaꞌon nchejugaꞌa ni

(Mt. 12:1-8; Lc. 6:1-5)

23Naa nchaꞌon nchejugaꞌa ni, Jesús ko chujni bakao tedatho na̱ chrika jngi diginga trigo ko kunchrinjin na̱ kanxion ninchjan trigo bine na̱. 24Ko kanxion xi fariseo bikon thi tencheꞌe na̱ ko ndachro xa ngain Jesús:

—¿Unda chujni chrjiꞌo ncheꞌe na̱ xra jikininxinꞌa ncheꞌe ni ngain nchaꞌon nchejugaꞌa ni?

25Ko Jesús ndachro:

—¿A xra tsjeꞌa ra thi jitaxin kexreen bincheꞌe David kunixin ni bakao are anto beꞌen na̱ jintha? 26Are mee Abiatar kjui xi daana icha renthe, ko David bixiꞌin nchianduꞌa Ndo Dio ko bine niuthja dikunchaon ko xra chjee nio ni bakao. Ko niuthja teꞌi jeꞌo xi daana jikininxin bane nio.

27Kai ndachro Jesús ngain xa:

—Nchaꞌon nchejugaꞌa ni kunchjian ixin sinchejugaꞌa chujni ko sinchesayeꞌe na̱ Ndo Dio, ko chujni kunchjianꞌa na̱ ixin sinchesayeꞌe na̱ nchaꞌon nchejugaꞌa ni. 28Mexinxin jaꞌan, thi Xii juixin ngajni, chunda juachaxin tsetuꞌan keꞌe tsuꞌen ngain nchaꞌon nchejugaꞌa ni.

Currently Selected:

San Marcos 2: plsNT

Highlight

Copy