Hechos 3

Pedro ko Juan juinchexingameꞌe naa thi chroꞌa bakji

1Naa nchaꞌon utsukjin inchin las tres, Pedro ko Juan kjui na̱ niꞌngo icha renthe ixin hora mee banchesayeꞌe na̱ Ndo Dio. 2Ko nthi̱ꞌa̱ beꞌe naa thi xii chroꞌa bakji ixin jañaa guan. Ko kain nchaꞌon bagikaan na̱ ngandangii thi dixinxin ni niꞌngo, thi banchegiꞌin na̱ Anto Chrjuin Jii ixin baganchiagaꞌa. 3Ko are thi chroꞌa bakji bikon Pedro ko Juan tatedixiꞌin niꞌngo, jeꞌe banchiageꞌe na̱ tumi. 4Ko Pedro ko Juan jian tabinthetsjeꞌe thi chroꞌa bakji, ko Pedro ndachro:

—Tsjena ni ra jian.

5Ko thi chroꞌa bakji tsjeꞌe jian ngain na̱ ixin xraxaon achrujan ruchjee na̱. 6Aro Pedro ndachro ngain:

—Jaꞌan chundaꞌa tumi ruchjaꞌa, aro thi jaꞌan chunda ruchjaꞌa: Kunixin juachaxiin Nchaa ná Jesucristo, dingathjen ko thjixin ruthea.

7Kuthejan Pedro tseꞌe rajian ko binchengathjen, ko tuenxon kusuji kayui ruthee. 8Ko thi chroꞌa bakji nakua chrinka ko bingathjenxin ruthee, ko thinga jichrinka ko anto jichee bikao Pedro ko Juan ngaxiꞌin niꞌngo. Ko binchesayeꞌe Ndo Dio. 9Ko nguii rajna bikon jitjixin ruthee ko jinchesayeꞌe Ndo Dio. 10Ko kain chujni anto kuiseꞌen na̱ ko xraon na̱ ixin kexreen xingameꞌe ixin kain na̱ bechunxin na̱ thi chroꞌa bakji, ixin bagikon na̱ ngandangii niꞌngo baganchiagaꞌa tumi, nthi̱ꞌa̱ thi diꞌin Anto Chrjuin Jii.

Pedro nichja ngandangii niꞌngo

11Ko thi chroꞌa bagakji ninchin bachrjendeꞌa Pedro ko Juan, ko kain chujni kuiseꞌen kuinga na̱ ngain inaa thi dixinxin ni niꞌngo, thi nchegiꞌin na̱ Salomón, ixin bitsjeꞌe na̱ kanio ni teꞌi. 12Are bikon Pedro kain chujni teꞌi, ndachro ngain na̱:

—Jaꞌa ra chujni Israel ra, ¿unda xratao tabinthetsje na ni ra? ¿Unda nchexruan ni ra?, ¿atunao ra ixin jaꞌan ná bindaxingamaa ná xii jiꞌi? 13Naꞌi, ixin Ndo Dio thi kjui Ndo Dioe ni xrachrjeꞌan ná Abraham, Isaac, ko Jacob, Ndo Dio mee bajon juachaxin thi icha jié juasaaya ngain Xeꞌen ndo, xan diꞌin Jesús. Ko Jesús mee thi jaꞌa ra bayeꞌa ra ko bajon ra ngain ni ncheꞌe jie̱, ko are Pilato uxraxaon rukanchrjanda, jaꞌa ra juinaoꞌa ra. 14Ko jaꞌa ra ndachro ra ixin rukajandaꞌa na̱ Jesús, ko banchia ra kuajanda na̱ naa thi duen chujni. 15Ko jañaa guꞌen ra Jesús thi ndakjan ná inaa chujni naruaxin. Aro Ndo Dio juinchexechon ndo, ko mee jaꞌan ná bikon ná. 16Ixin dithikaꞌon ná juachaxin chjana ná Jesús, ko juachaxin jiꞌi thi najuinchexingamenxon thi xii tedikon ra ko chunxin ra.

17’Jaꞌa ra xro chujni Israel ra, jaꞌan nuna ixin jaꞌa ra kunixin kain xi thetuꞌan ra guꞌen ra Jesús, ko kain jiꞌi bincheꞌe ra ixin xruꞌin benuaꞌa ra. 18Aro jaꞌin bikuꞌen thi ubajin Ndo Dio ngain ni banichjee ndo, ixin jañaa rugeꞌen thi rukii, thi banchegiꞌin na̱ Mesías. 19Mexinxin thinthuꞌe ra kain thi jianꞌa ncheꞌe ra, ko kjan ra dithikaon ra Ndo Dio, ko jeꞌe ndo sinthatjañaꞌa ra ndo thi jianꞌa ncheꞌe ra ko jañaa tsii nchaꞌon sinthasuji ra ndo. 20Ko Ndo Dio ruruaꞌan ra Jesús, thi Cristo ixin are xra xruꞌin beꞌe, jeꞌe ndo ukuinchieꞌe ndo rukii ngajin ra. 21Ko jai Jesucristo jii ngajni, sithjaja nchaꞌon are Ndo Dio ndakua sakeꞌe ndo kain thi dukon ná ngataꞌa nunthe, inchin ndachro ndo ngain ni bagayee juajnee ndo are icha saꞌo. 22Ko Moisés ndachro ngain ni chujnia ra bechon are saꞌo: “Ndo Dio santsjegee ngayaꞌa ra naa thi runichjee ndo xraa jaꞌan, ko dithikaon ra kain thi rundathjo ra. 23Ko kainxin chujni sithikaonꞌa thi tsii jiꞌi ichroꞌa siꞌin na̱ chujni rajnee Ndo Dio.”

24’Ko kain ni banichjee Ndo Dio kuexinxin Samuel ko icha ni banichjee Ndo Dio, nichja na̱ thi jituꞌen nchaꞌon teꞌi. 25Ko jaꞌa ra xeꞌen ni banichjee Ndo Dio, jaꞌa ra thi juinthakininxin ra ndo ixin rugayeꞌe ra thi ndachro ndo ngain Abraham: “Ko chujni sachrjeninxin ra sinchenchaon kain chujni ngataꞌa nunthe.” 26Ko are Ndo Dio juinchexechon ndo Xeꞌen ndo, saꞌo ruaꞌan ndo xan ngajin ra. Ko jañaa jeꞌe ndo juinthanchaon ra ndo ixin tsintuꞌe ra kain thi jianꞌa ncheꞌe ra.

Currently Selected:

Hechos 3: plsNT

Highlight

Copy