Hechos 4

Pedro ko Juan ngathexin kon ni thetuꞌan

1Pedro ko Juan xra tenichja ngain chujni are binthekii xi daana kunixin ni baketuꞌen ni bagenda niꞌngo kunixin ni saduceo. 2Ko ni teꞌi teduñao na̱ ixin Pedro ko Juan tetjaago ngain chujni ixin ni ndadigeꞌen nchao xechon na̱, jañaa inchin bikon na̱ Jesús xechon. 3Ko tse na̱ ko takuinthuꞌe na̱ nduꞌa xiiso ixin utsukjin, ko nduexin runcheꞌe na̱ jie̱. 4Aro tsjé chujni kuiꞌin na̱ thi ndachro Pedro ko Juan, ko bithikaon na̱ Jesús. Ko bikin jeꞌo ni xii ko xethja inchin naꞌo no̱ na̱.

5Ko nduexion nthi̱ꞌa̱ Jerusalén, xrathe xi baketuꞌan ngain chujni judío, ko ni baketuꞌan ngain niꞌngo kunixin xi tjaago ley Israel. 6Ko nthi̱ꞌa̱ beꞌe Anás, xi daana icha renthe. Ko kai beꞌe Caifás, Juan, Alejandro, ko kaxon beꞌe icha chujnii xi daana baketuꞌan ngain niꞌngo. 7Kuthejan kuetuꞌan na̱ rukiauꞌe na̱ Pedro ko Juan ko bakeꞌe na̱ ngusine ko kuexiꞌin na̱ banchiangiꞌi na̱:

—¿Keꞌe juachaxin chunda ra, ni kensen nichjayeꞌe ra ixin binchexingameꞌe ra thi xii chroꞌa bagakji?

8Ko Pedro, kunixin tsjé juachaxiin Espíritu Santo, batheꞌe ko ndachro:

—Jaꞌa ra xro thetuꞌan ra rajna ko jaꞌa ra xro thetuꞌan ra ngain niꞌngo icha renthe, 9jaꞌa ra danchiangina ni ra ixin thi jian binthaꞌa ná ngain thi beniꞌi jiꞌi, ixin tsunuꞌa ra kexreen kuxrueꞌen. 10Jaꞌan ná ndachrjan ná ngathexin kon ra ko ngathexin kon kain chujni Israel ixin thi xii jiꞌi kuxrueꞌen kunixin juachaxiin Jesús thi Nazaret, jiꞌi thi Mesías thi jaꞌa ra kuetuꞌan ra ixin ruguen na̱ nganito ntha cruz. Aro Ndo Dio binchexechon. 11Aro jaꞌa ra xro nchechjian ra nchia bithikaonꞌa ra xro, thi xro icha suji keꞌe nchia, ko jañaa kuꞌen Jesús inchin xro jiꞌi 12ixin ixruꞌin inaa thi sinthatjañaa ná nthiꞌi ngataꞌa nunthe inchin Jesús ixin ixruꞌin inaa thi ruaꞌan Ndo Dio ngataꞌa nunthe ixin sinthakjan ná inaa chujni narua.

13Are ni baketuꞌan kuiꞌin na̱ ixin Pedro ko Juan suji nichja ná ko xraonꞌa ná, ni baketuꞌan kuiseꞌen na̱ ixin ni teꞌi benueꞌa na̱ xroon. Kuthejan batsuan na̱ ixin ni teꞌi bagakao Jesús. 14Ko chroꞌa kjuangiꞌi na̱ ixin xruꞌin thi nduaꞌa bithjeꞌe na̱ ixin nthi̱ꞌa̱ jindaxiꞌin na̱ thi kuxrueꞌen. 15Kuthejan kuetuꞌen na̱ Pedro ko Juan rugachrjeyexin na̱ nthi̱ꞌa̱ ixin ni thetuꞌan kjuao na̱ kexreen sincheꞌe na̱. 16Ko ndachro na̱:

—¿Keꞌe sinthoꞌo ná ngain kayui xii teꞌi? Kainxin chujni Jerusalén nuꞌe na̱ kexreen binchexingameꞌe xii jiꞌi. Ko jaꞌan ná chroꞌa tjangiꞌi ná xa ixin jeꞌa ndua thi bincheꞌe xa. 17Aro jai sinthuxraon ná xa, ko jañaa itsenkinꞌa xa icha ixin juachaxiin Jesús ngain icha chujni.

18Ko baye̱e na̱ Pedro ko Juan ixin kuetuꞌen na̱ ixin irukjagoꞌa na̱ ko irunichjaꞌa na̱ kunixin juachaxiin Jesús. 19Aro Pedro ko Juan ndachro ngain na̱:

—¿Ndachjejinxin ni ra ajian jii ngathexin kon Ndo Dio sithikaꞌon ná jaꞌa ra ani sithikaꞌon ná thi ndachro jeꞌe ndo? 20Ko jaꞌan ná chroꞌa rutenkua ná ixin kain thi kuian ná ko bikon ná.

21Kuthejan ni thetuꞌan binchexraon na̱ Pedro ko Juan inaa, ko kuanchrjanda na̱ sabinthekji ixin xruꞌin thi jianꞌa bikuꞌen na̱ ko ixruꞌin banchekao na̱, ixin kain chujni tenchesayeꞌe Ndo Dio ixin bikon na̱ thi jian bincheꞌe kayui ni teꞌi. 22Ko thi xii xingameꞌe kunixin juachaxiin Ndo Dio bechunda icha yakan nano.

Chujni kuinchieꞌe Jesús nichjayee na̱ Ndo Dio

23Are Pedro ko Juan ukuanchrjanda na̱, jeꞌe sabinthekji ngain ni kuinchieꞌe Jesús ko kuekiin na̱ kain thi ndachro xi thetuꞌan xi daana ko xi thetuꞌan chujni judío. 24Ko are ni kuinchieꞌe Jesús kuiꞌin na̱ thi nichja Pedro ko Juan, kuexiꞌin na̱ nichjayee na̱ Ndo Dio ko ndachro na̱:

—Suixin Ndudana ná, thi binchechjian ngajni, nunthe ko ndachaon, ko kainxin thi jii ngajni, ngataꞌa nunthe ko chringi ndachaon. 25Ko Suixin thi nichjaxin ixin Espíritu Santo ngain ndudana ná David, xi nchexraa:

¿Unda tuxrunga kain nunthe ko unda kain rajna

tjauthexin ná thi xruꞌin xree?

26Ko kain thi thetuꞌan ngataꞌa nunthe kuato choo na̱

ko tjauthexin na̱ kexreen sincheꞌe na̱ thi jianꞌa

ngain Ndo Dio ko ngain Xeꞌen ndo, thi Cristo.

27’Ko nduaxin ngain rajna jiꞌi Herodes, Poncio Pilato ko chujni jeꞌa judío ko chujni Israel kuato choo na̱ ixin guen na̱ Jesús, thi Xaꞌan Suixin ruaꞌan ixin thjengijna ná. 28Aro jeꞌe na̱ bincheꞌe na̱ jeꞌo thi Suixin ndachro thi rukuꞌen are icha saꞌo. 29Jai tsjeꞌe Suixin kexreen nchexraon ná na̱, ko thjengijna ni ra ixin xruꞌin juaxraon ruchunda ná, are runichja ná ixin Suixin ngain kexeꞌo chujni. 30Ko tjaago juachaxiin Jesús ruxingamenxin icha chujni ko tsuꞌen tsjé thi jian ko jañaa sikunxin tsjé chujni thi jié juachaxin binchegayeꞌe xi nchexraa Jesús.

31Ko are juexin nichjayee na̱ Ndo Dio, kuingi nunthe thi binthe na̱, ko baye̱e na̱ juachaxiin Espíritu Santo, ko kain na̱ banichja na̱ juajnee Ndo Dio ko ixruꞌin juaxraon beꞌe ngain na̱.

Kain thi bechunda na̱ bakunchjeyeꞌe choo na̱

32Ko kain ni bithikaon xrajeꞌo bakunuꞌe na̱ ko xrajeꞌo juaxraxaon bechunda na̱. Ko kain thi bechunda na̱ bakunchjeyeꞌe choo na̱ ko xruꞌin kensen bandachro, ixin jeꞌo na̱ baketuꞌan na̱ thi bechunda na̱. 33Ko ni kuinchieꞌe Jesús banichja na̱ kunixin icha jié juachaxin ko bandachro na̱ ixin Jesús xechon ko Ndo Dio banchenchaon na̱ icha. 34Ko xruꞌin bagitjeꞌen chujni ngayee ni bagithikaon ixin thi ni bechunda nuntheꞌe ko nchianduꞌe banchekji na̱, ko tumi bagajon na̱ 35ngain ni theyoo chujni kuinchieꞌe Jesús. Ixin jeꞌe na̱ bakunchjeeya na̱ tumi ngain chujni bagitjeꞌen. 36Ko jañaa bincheꞌe naa xii juixin ngain naa nunthe ngusine ndachaon diꞌin Chipre. Xii mee bachrjeninxin ni Leví ko biꞌin José aro ni theyoo kuinchieꞌe Jesús banchegiꞌin na̱ Bernabé, ko jiꞌi ruchro naa Thi Thjengijna Chujni. 37Ko xii jiꞌi bechunda naa nunthe ko binchekji xa nunthe ko bajon xa tumi ngain ni theyoo kuinchieꞌe Jesús.

Currently Selected:

Hechos 4: plsNT

Highlight

Copy