Hechos 5

Thi jianꞌa bincheꞌe Ananías ko Safira

1Aro beꞌe inaa xii biꞌin Ananías, ko chriꞌi xa biꞌin Safira. Ko kayui ni teꞌi binchekji na̱ naa nuntheꞌe na̱ kai. 2Aro xii jiꞌi kjuauthexin chriꞌi xa ko bithuꞌe na̱ thuꞌa tumi ko thi tumi xeꞌe na̱ bajon na̱ tumi ngain ni theyoo kuinchieꞌe Jesús, ko ndachro na̱ ixin yaa kain tumi bayée na̱. 3Ko Pedro ndachro:

—Ananías, ¿unda bithuaxin binthayaꞌa nchiijin ko binao rujincheyeꞌe Espíritu Santo, ko bithuꞌa thuꞌa tumi chjaa na̱ ixin nunthe? 4Icha nchao runchekjiꞌa nuntheꞌa, ko are runchekji tarugithuꞌa kain tumia. Aro, ¿unda bincheeya ixin rugajon kain tumi ko ibajonꞌa tumi? ¿Unda bincheꞌe jiꞌi? Jaꞌa bincheyeꞌa chujni, jaꞌa binao runcheyeꞌe Ndo Dio.

5Are Ananías kuiꞌin jiꞌi, betsinga ko ndabeꞌen. Ko kain chujni kunuꞌe thi kuꞌen anto xraon na̱. 6Kuthejan juii kanxion xa xii kuensia xan Ananías ko bikjabaa xan.

7Batho inchin nii hora, kuthejan biji chriꞌi Ananías. Ko benueꞌa keꞌe kuꞌen xixiꞌi nchra. 8Ko Pedro banchiangiꞌi nchra ko ndachro:

—Ndachjejinxin na, ¿ajeꞌin binchekjixin ra nunthe?

Ko jeꞌe nchra bateꞌe nchra:

—Jaan, jañaa binthakjixin ná nunthe.

9Kuthejan Pedro ndachro ngain nchra:

—¿Unda kjuauthexin choo ra ixin runcheyeꞌe ra Espiritue Nchaa ná? Nthimee juii xan kjui bikjabaa xixiꞌa. Ko jai tsjiꞌo xan jaꞌa kai.

10Ko are juexin nichja Pedro, tabenbeꞌo nchra chrika ruthee. Ko are bixiꞌin xan xii teꞌi, bithja xan Safira ndadigeꞌen, ko sabikao xan, bikjabaa xan ngandaxiꞌin xixiꞌi. 11Kain ni niꞌngo ko kain ni rajna kunuꞌe jiꞌi anto xraon na̱.

Tsjé thi jian ncheꞌe Ndo Dio

12Ko ixin ni theyoo kuinchieꞌe Jesús, Ndo Dio bancheꞌe tsjé thi jian ngayee chujni ko banchexingameꞌe ni niꞌi. Ko kain ni bithikaon Jesús baxrathe na̱ ngandangii naa thi dixinxin ni niꞌngo, ko ngandangii mee nchegiꞌin na̱ Salomón. 13Ko ni bagithikaonꞌa bakunchienꞌa na̱ ngain ni theyoo, aro banichja na̱ jian ixin jeꞌe na̱. 14Ko kain nchaꞌon bagithikaon icha xii ko nchrii ngain Jesús. 15Ko tsjé chujni bagantsje na̱ ni niꞌi ngataꞌa nthatuꞌen na̱ ngandeꞌe nthiꞌá, ixin rugatho Pedro ngandaxiꞌin na̱, ko kara sauen rugathutaon ni niꞌi ko ruxingameꞌe na̱. 16Kaxon kain rajna tendajin Jerusalén bakiaꞌo na̱ ni niꞌi na̱ kunixin chujni tedoꞌo espíritu jianꞌa ko kain na̱ bakuxrueꞌen na̱.

Ni thetuꞌan dingakuꞌen na̱ Pedro ko Juan

17Kuthejan xi baketuꞌen xi daana kunixin xi saduceo anto bakunchjueꞌe xa ixin thi bancheꞌe Pedro ko Juan, 18mexinxin kuetuꞌan xa biaxiꞌin kayui ni teꞌi ngaxiꞌin nduꞌa xiiso. 19Aro naa angeel Ndo Dio kunxiree nduꞌa xiiso ngain thie mee ko bachrje na̱, ko ángel ndachro:

20—Thji ra ngain niꞌngo icha renthe ko thekin ra kexreen rukjan na̱ naa chujni naruaxin ixin Jesucristo.

21Ko nduexin nduuyo bixiꞌin na̱ ngain niꞌngo ko kuexiꞌin na̱ kjuaago na̱.

Kuthejan xi baketuꞌen xi daana ko ni binthe ngain xa kuetuꞌan xa ruxrathe kain ni baketuꞌen chujni judío. Kuthejan ruaꞌan na̱ bixrakua Pedro ko Juan. 22Aro ni biruee kayui ni teꞌi, are biji na̱ nduꞌa xiiso ibiraꞌa na̱ na̱ ko sakjan na̱ ngain xi daana, 23ko binthendachro na̱:

—Bithja na̱ jian jijee nduꞌa xiiso ko xi tenda tatendangii xa thi dixinxin ni, aro jaꞌan ná kunxiraa ná thi dixinxin ni ko xruꞌin kensen bithja ná ngaxiꞌin.

24Are xi baketuꞌan xi bagenda niꞌngo ko xi baketuꞌen xi daana kuiꞌin na̱ jiꞌi ko ibenueꞌa na̱ keꞌe runcheꞌe na̱, ko banchangiꞌi choo na̱ kexreen rukjexin kain jiꞌi. 25Ko are mee bijibeꞌo naa thi ndachro ngain na̱:

—Thi ni kuiaxiꞌin ra utatenangii na̱ niꞌngo ko tetjague na̱ ni rajna.

26Kuthejan xi baketuꞌan ko ni baginthenda kjui na̱ biruee na̱ ni tetjaago, aro bintjaꞌa na̱ ixin xraon na̱ ixin ni rajna rukaxin na̱ na̱ xro. 27Ko are ubijikao na̱ ngathexin kon ni thetuꞌan, xi daana icha renthe ndachro:

28—Undathjo ra ixin irukjaguꞌa ra thi bincheꞌe thi xii diꞌin Jesús. Aro jaꞌa ra bithikaonꞌa ra, ko jaꞌa ra banchekueꞌen ra nguixin rajna Jerusalén ixin thi kjuaago Jesús, ko xra tjangina ni ra ixin jaꞌan ná guꞌen ná Jesús.

29Kuthejan Pedro ko ni kuinchieꞌe Jesús batheꞌe na̱:

—Jaꞌan ná saꞌo jikininxin sithikaꞌon ná Ndo Dio kuthimejan chujni. 30Ko jaꞌa ra guꞌen ra Jesús nganito ntha cruz. Aro Ndo Dioe ni xrachrjeꞌan ná juinchexechon Jesús. 31Ko Ndo Dio binchesayeꞌe Jesús ko bakeꞌe ndo ngain rajianxin ndo, ko binchekjan ndo naa thi Thetuꞌan ko thi Tsjengijna chujni Israel, ko jañaa rukjan na̱ ngain Ndo Dio ko sayée na̱ juaditjaaña ixin thi jianꞌa ncheꞌe na̱. 32Ko jaꞌan ná kuian ná ko bikon ná kain thi kuꞌen, ko kai Espíritu Santo nuꞌe jiꞌi, ko Espíritu jiꞌi dajon Ndo Dio ngain kain chujni dithikaon Jesús.

33Ko are kuiꞌin kain ni thetuꞌan Israel kain jiꞌi, anto kuñao na̱ ko juinao na̱ naruguenxon na̱ ni theyoo kuinchieꞌe Jesús. 34Aro ngayee ni teꞌi beꞌe naa xii biꞌin Gamaliel, naa xii bakjaago ley ko ni rajna anto banchesayeꞌe na̱ xa, ko jeꞌe xa bingathjen xa ko kuetuꞌan xa nchion rugachrje ni theyoo kuinchieꞌe Jesús. 35Ko xii jiꞌi ndache kain ni thetuꞌan:

—Jaꞌa ra xro thetuꞌan ra rajna Israel, xraxaon ra jian thi sincheꞌe ra ngain xii teꞌi. 36Xraxaon ra ixin are ikainxin nchaꞌon batho, bingathjen naa xii biꞌin Teudas ko ndachro xa ixin jeꞌe xa naa xii anto renthe. Ko ruee inchin noo renkia xii bithikaon ngain. Aro jngujngujni na̱ guen Teudas, ko ni baruee chjekee na̱, ko jañaa juexinxin kain. 37Ko batho ikanxion nchaꞌon are binthetaxin chujni rajna, bingathjen naa xii rajna Galilea biꞌin Judas. Ko kai ruee kanxion chujni, aro kai guen na̱ ko chujni baruee, chjekee na̱ kai. 38Mexinxin jaꞌan ndathjo ra, tanchrjanda ra xii teꞌi ko dixintheꞌa ra ngain xa. Ixin thi tencheꞌe xa ja̱ jeꞌa Ndo Dio jithetuꞌan, taruchjekee na̱ kai. 39Mexinxin tsjeꞌe ra jian rujixinthe ra ko ruketukoꞌo ra Ndo Dio ixin ja̱ tencheꞌe xa thi kuetuꞌan Ndo Dio, xruꞌin kensen rukayakuen xa.

40Ko kain na̱ bithikaon na̱ thi ndachro Gamaliel. Kuthejan baye̱e na̱ ni theyoo kuinchieꞌe Jesús ko kuetuꞌan na̱ ixin bintja na̱ ko ndache na̱ ixin irunichjaꞌa na̱ ixin Jesús, kuthejan kuanchrjanda na̱ na̱. 41Ko are ni theyoo teꞌi sakjuixin na̱ ngathexin kon ni thetuꞌan, anto chee na̱ ixin Ndo Dio bajon juachaxin bikaon na̱ ixin dithikaon na̱ Jesús. 42Ko kain nchaꞌon banichja na̱ ko bakjague na̱ chujni thi juajna juiaꞌo Jesús, thi banchegiꞌin na̱ Mesías, ko jiꞌi bancheꞌe na̱ ngain niꞌngo ko ngain nchia.

Currently Selected:

Hechos 5: plsNT

Highlight

Copy