Hechos 6

Thi ni yaato rukjengijna ni theyoo kuinchieꞌe Jesús

1Ko are mee chujni bagithikaon Jesús icha bakutsjé na̱, ko ni banichja ngigua griego kuexiꞌin na̱ kuñao na̱ ngain ni banichja ngigua hebreo ko kuexiꞌin na̱ ndachro na̱ ixin kain nchri gaꞌan banichja griego itsjéꞌa bagayee na̱ ixin bane na̱. 2Kuthejan ni theyoo baye̱e na̱ kain ni bagithikaon Jesús, ko ndachro na̱:

—Nchaoꞌa jii ixin jaꞌan ná tetunchjeeya ná tumi ko thi jine ni ko tethintua ná thi xra kuinchienanxin ná Jesús ixin tsjaago ná juajnee. 3Mexinxin thinchieꞌe ra yaato xii ngayaꞌa ra, xi nchao ruchunthiaxin xa ko jian juaxraxaon ruchunda xa ko ruchunda xa juachaxiin Espíritu Santo. Ko jaꞌan ná tsetuan ná xa tsunchjeeya xa thi sine chujni. 4Ko jaꞌan ná rukjan ná runichjayaa ná Ndo Dio ko tsjaago ná juajnee ndo.

5Ko kain na̱ bithikaon na̱ thi ndachro ni teꞌi, ko kuinchieꞌe na̱ Esteban, naa xii bagithikaon Ndo Dio ko bechunda juachaxiin Espíritu Santo, ko jañaa kai Felipe, Prócoro, Nicanor, Timón, Parmenas, ko naa xi Antioquía biꞌin Nicolás, ko xii jiꞌi jeꞌa judío, aro bagithikaon xa ko bancheꞌe xa xraa ni judío. 6Kuthejan bikao na̱ ni yaato teꞌi ngain ni theyoo kuinchieꞌe Jesús. Ko nichjayee na̱ Ndo Dio ko kuentaꞌa raa na̱ ngataꞌa ni yaato runcheꞌe xra.

7Ko nguii rajna Jerusalén chjekee juajnee Ndo Dio, ko ni bagithikaon icha bakutsjé na̱. Ko kai tsjé xi daana bagithikaon xa Jesucristo.

Tse na̱ Esteban

8Esteban bechunda anto tsjé juachaxiin Espíritu Santo ko Ndo Dio anto banchenchaon ndo. Ko Esteban bancheꞌe tsjé thi jian ko banchexingameꞌe chujni. 9Kuthimejan juii kanxion chujni bakji ngain niꞌngo biꞌin Esclavos Libres. Ko kai ikanxion chujni juixin rajna Cirene, ko rajna Alejandría, ko nunthe Cilicia, ko kai ni juixin nunthe Asia. Kain ni teꞌi kuexiꞌin na̱ kuetukaꞌo na̱ Esteban. 10Aro xruꞌin ni banchetenkua Esteban ixin banichja kunixin juachjaxiin Espíritu Santo. 11Kuthejan ni kuetukaꞌo Esteban kjuengeꞌe na̱ ꞌna ikanxion na̱ ixin rundachro na̱ ixin Esteban jianꞌa nichja ixin Moisés ko ixin Ndo Dio. 12Ko jaꞌin juincheñauxin na̱ ni rajna ko ni judío baketuꞌan ko ni bakjaago ley. Ni teꞌi tse na̱ Esteban ko bikao na̱ ngain kainxion ni thetuꞌan niꞌngo judío. 13Ko kjuee na̱ icha chujni nichja thi nduaꞌa ko ndachro na̱:

—Jaan, ndua, xii yaa anto nichja xa jianꞌa ixin niꞌngo icha renthe ko ixin ley ba̱jon Moisés. 14Ko kuian ná ndachro xii jiꞌi ixin Jesús juixin Nazaret tsunxanthe niꞌngo icha renthe ko sasengixin thi binthakuan ná Moisés.

15Kuthejan kain ni thetuꞌan ko kain chujni te nthi̱ꞌa̱ tsjeꞌe na̱ Esteban. Ko bikon na̱ ngakon Esteban xraa ngakon naa ángel.

Currently Selected:

Hechos 6: plsNT

Highlight

Copy