Hechos 2

Espíritu Santo juii ngain chujni

1Are juii kiai diꞌin Pentecostés, kainxin chujni bagithikaon Jesús tate na̱ ngain nakua nchia. 2Ko tuinxon anto suji bathe ngajni, inchin are anto suji tja chrintho. Ko nguixin ngaxiꞌin nchia kuiꞌin na̱ thi bathe. 3Kuthimejan bikon na̱ tsjé thi xraa neje xruꞌi, ko chjeeya xruꞌi jiꞌi ngataꞌa nanaa na̱. 4Ko bayée na̱ juachaxin thi bajon Espíritu Santo ngain na̱. Ko jeꞌe na̱ kuexiꞌin na̱ nichja na̱ ujejee ngigua inchin Espíritu Santo banchenichja na̱.

5Ko nchaꞌon mee nthi̱ꞌa̱ Jerusalén binthe tsjé chujni judío, ko ni teꞌi juixin na̱ jejee rajna ngain nguixin nunthe. Ko chujni mee anto bagithikaon na̱ ley Israel. 6Ko are kuiꞌin na̱ thi anto suji bathe, anto tsjé chujni xrathe na̱ ngain nchia beꞌe ni theyoo, ko ni kuiꞌin ibenueꞌa na̱ keꞌe ruxraxaon na̱ ixin kain na̱ kuiꞌin na̱ ngigueꞌe na̱ tenichja chujni bagithikaon Jesús. 7Ko xratao tabinthetsjeꞌe choo na̱ ixin kuinxin na̱ thi nichja chujnii Jesús. Ko ndache choo na̱:

—¿Aro keꞌe tenichja chujni teꞌi? ¿Ni teꞌi, ajeꞌa Galilea na na̱? 8¿Kexreen? Ixin jaꞌan ná tethiꞌin ná thi tenichja na̱ jejee ngiguaꞌa ná. 9Nthiꞌi ngayaa ná te chujni juixin Partia, Media, Elam, Mesopotamia, Judea, Capadocia, Ponto, ko ngain nunthe Asia, 10Frigia, Panfilia, Egipto, ko kai ngayaa ná te chujni juixin Africa thi rajna jii icha ndaꞌa de Cirene. Kai tsjé chujni romano te nthiꞌi. Ko thuꞌa na̱ ndudee na̱ judío na̱, ko ikanxion na̱ kjan na̱ judío ixin bithikaon na̱ ley judío. 11Kai beꞌe chujni juixin Creta, ko Arabia. Aro kain ná tethiꞌin ná tenichja na̱ ngiguaꞌa ná ko nichja na̱ kain thi chrjuin bincheꞌe Ndo Dio.

12Ko xratao tabinthe na̱ ko inueꞌa na̱ keꞌe ruxraxaon na̱ ko banchiangiꞌi choo na̱:

—¿Keꞌe ruchro kain jiꞌi?

13Aro ikanxion na̱ kjuanua na̱ na̱ ko ndachro na̱:

—Ni teꞌi dinthekuan na̱, mexinxin jañaa nichja na̱.

Thi nichja Pedro ngain chujni

14Kuthimejan Pedro kunixin ithejngo chujni kuinchieꞌe Jesucristo bingathjen na̱ ko Pedro nichja seen ko ndachro:

—Chujni Judea ko kainxin chujni te ngain rajna Jerusalén, tunuꞌa ra ko thiꞌin ra jian thi rundathjo ra. 15Xii teꞌi dikuanꞌa xa inchin jaꞌa ra xraxaon ra, ixin xra dakao, nandaa las nueve. 16Thi jaꞌa ra bikon ra jaxon, jiꞌi thi ndachro profeta Joel are ndachro:

17Ndo Dio ndachro, ngain nchaꞌon are uchiaon tsjexin nunthe,

ruruaꞌan Espirituna ngain kainxin chujni.

Ko xaꞌan ra xan xii ko xan nchrii runichja xan thi sikuꞌen,

ko jaꞌan anto tsjé sinthagikon xan ixin thi sikuꞌen,

ko kai ni joon are tsuxinxin na̱, tsjé sinthagikon na̱ ixin thi sikuꞌen.

18Ko kai ngain nchaꞌon mee sinthaganiataꞌa Espirituna ngataꞌa kain xi nchexrana ko nchri nchexrana

ko runichja na̱ thi sikuꞌen.

19Ko ngajni tsjaago tsjé thi bagikonꞌa chujni are saꞌo.

Ko ngataꞌa nunthe tsjaago tsjé thi sikuꞌen kai.

Tsjaago jni, xruꞌi ko thjui dikunchjianxin juxon nchi̱n.

20Are mee nchaꞌon tasanga nchaon,

ko kunithjao ndarukjan ba xraa jni.

Kain yaa tsuꞌen saꞌo, kuthimejan tsii Nchaa ná are sincheꞌe jie̱ ngain kain chujni,

ko jeꞌe tsjague na̱ thi juachaxin jichunda.

21Ko kainxin chujni runichjayee Nchaa ná Jesús rukjan na̱ inaa chujni naruaxin.

22Kai Pedro ndachro:

—Jaꞌa ra xro Israel ra, thiꞌin ra thi rundathjo ra: Jaꞌan nichja ixin Jesús thi juixin rajna Nazaret. Ndo Dio kjuaguꞌa ra ixin jeꞌe ndo kuinchieꞌe ndo Jesús are chjee ndo jié juachaxin ixin bincheꞌe tsjé thi jian, binchexingameꞌe ko binchexechon tsjé chujni, inchin jaꞌa ra unuꞌa ra. 23Ko Ndo Dio ubenuꞌe ndo ixin Jesús anto tangi rugathuꞌe. Ko jaꞌa ra tse ra ko kuia ra Jesús ko binchechieꞌen ra ngaa raa chujni jianꞌa. Ko jeꞌe na̱ kuenganito na̱ ntha cruz inchin jaꞌa ra banchia ra. 24Aro Ndo Dio binchexechon Jesús ixin thi ndadeꞌen ni jikininxinꞌa tsethuꞌan ngain jeꞌe. 25Ko nichja rey David ixin Jesús ko ndachro:

Jaꞌan kainxin nchaꞌon bagikon Nchana ngathexin kon.

Ko ixin Nchana jii ngain rajianxin na, xruꞌin kensen sinchetjajin na.

26Mexinxin ansenna anto chee, ko neje na tsjethee Nchana.

Ko kain nchaꞌon sarichon ko maski ndaseꞌen na xruꞌin ruxraguan.

27Ixin Suixin tsintueꞌa thi richunxin ngain thi xrabaa chujni,

ko sajonꞌa juachaxin ixin ruxanthe nthauꞌe xi nchexraa ngadoꞌo nche.

28Suixin kjuaguꞌna nthiꞌá kexreen sinthaꞌa nthiꞌi ngataꞌa nunthe,

ko jañaa anto ruchaꞌna are jaꞌan sariꞌi ngathexin kon.

29Ko Pedro xra ndache chujni:

—Tsjexinxin jaꞌa ra xro Israel ra, runichja ná ixin ndo dachri xrachrjen David ixin beꞌen ko xrabaa ko chinthiꞌi xrajii ngajin ná jai. 30Aro David kjui naa profetee Ndo Dio ko mexinxin ndache ndo ixin naa chujnii rugachrjeninxin jeꞌe, thi rugeꞌe rey ngain Israel. 31Ko David ubenuꞌe ixin Cristo ruxechon, mexinxin ndachro ixin jeꞌe rugithueꞌa ngadoꞌo jinche ko nthauꞌe ruxantheꞌa nthao. 32Ko jaꞌan ná ndua bukon ná ixin Ndo Dio binchexechon ndo Jesús. 33Ko are ndo Dio binchegayee ndo kain juachjaxin ko bakeꞌe ndo ngain rajianxin ndo, ko chjee ndo Espíritu Santo inchin ndathjo ná Jesús ko jai jeꞌe bincheganiataꞌa ná Espíritu Santo jaꞌan ná ko mee thi dikon ra ko thiꞌin ra. 34Ixin David xrakjuiꞌa ngajni are mee. Aro jeꞌe ndachro:

Ndo Dio ndachro ngain Nchana:

“Dariꞌi ngain rajianxinna,

35ko jaꞌan sinthagacha jaꞌa ngain kainxin thi ningakuꞌan, ko sariꞌi ngain thi sinthasayaꞌa na̱.”

36’Mexinxin jaꞌa ra ko kainxin chujni Israel, tunuꞌa ra jian ixin Jesús, thi jaꞌa ra kuenganito ra ntha cruz, Ndo Dio ndachro ixin Jesús kjan Nchaa ná, ko mee Cristo ixin Ndo Dio chjee ndo kain juachaxin ko tsetuꞌan ngain kainxin chujni tetaꞌa nunthe.

37Ko kain ni kuiꞌin thi ndachro Pedro, anto tabinthechiin na̱ ko kuaa na̱ juachjaon ko banchiangiꞌi na̱ Pedro ko thi ni thejngo, ni nchexree Jesús ko ndachro na̱:

—Jaꞌa ra xro choo ná, ¿keꞌe sinthaꞌa ná?

38Kuthejan Pedro ndachro ngain na̱:

—Nchetseꞌen ra ñao Ndo Dio sinthatjañaꞌa ra kain thi jianꞌa bincheꞌe ra, ko jaꞌan ná sinthagithe ra kunixin juachaxiin Jesús ko Ndo Dio ruchjaa ra Espíritu Santo 39ixin Ndo Dio ndachro ixin ruchjaa ra Espíritu Santo kunixin xaꞌan ra, ko kain ni tsiakunueꞌe Ndo Dio nguii ngataꞌa nunthe ko sinchetjañeꞌe ndo kain thi jianꞌa ncheꞌe na̱.

40Ko xra tsjé nichja Pedro ixin binchekinxin na̱ ko ndache na̱:

—Dachrjendeꞌe ra kain chujni jianꞌa ko sitjanꞌa ra ngathe xruꞌi.

41Ko tsjé chujni bagithikaon juajna nichja Pedro. Ko nchaꞌon mee inchin nii no̱ chujni bithikaon Jesús, ko bigithe na̱. 42Ko kain chujni bithikaon thi kjuaago thi theyoo chujni kuinchieꞌe Jesús. Ko jian bagakao choo na̱, ko bakunchjenga na̱ niuthja, ko bajinekaꞌo choo na̱ inchin Jesús kjuaago, ko banichjayee na̱ Ndo Dio.

Thi bancheꞌe ni bagithikaon Jesucristo

43Ko kuiseꞌen kain chujni ixin thi anto tsjé thi jian bancheꞌe thi theyoo chujni kuinchieꞌe Jesús. 44Ko kain ni bagithikaon baxraxaon na̱ xraa nakua chujni ko bakjengijna choo na̱ ixin bagajon na̱ thi bechunda na̱. 45Ko banchekji na̱ thi binthechunda na̱ ko bakunchjeeya na̱ tumi ngain chujni inchin bagundeꞌe na̱. 46Nchaꞌon ko nchaꞌon baxrathe na̱ ngain niꞌngo icha renthe, ko bakunchjenga na̱ niuthja inchin kjuaago Jesús ko kaxon ngain nchia bancheꞌe na̱ jiꞌi ko banekaꞌo choo na̱, ko anto bachee na̱ ko bancheniꞌa na̱ thi bagajon na̱. 47Ko banchesayeꞌe na̱ Ndo Dio, ko ni rajna anto bajinao na̱ na̱. Ko kain nchaꞌon Nchaa ná Jesús banchetsjé chujni ngain niꞌngo, thi ni bakjan inaa chujni narua.

Currently Selected:

Hechos 2: plsNT

Highlight

Copy