Hechos 1

Jesús ndachro ixin tsii Espíritu Santo

1Ngain thi xroon kji̱n na saꞌo, ko ruꞌan xron ngajin jaꞌa Teófilo, kuentaxin kain thi bincheꞌe ko kjuaago Jesús are nakuexinxin xree 2ko are sakjui ngajni. Ko are ubinkee nchaꞌon sarukji ngajni, Jesús ndache kunixin juachaxiin Espíritu Santo ngain ni kuinchieꞌe ixin kexreen runcheꞌe na̱ xra. 3Are Jesús tangi bathuꞌe ko beꞌen, jeꞌe kjan xechon ko yoo thi kan nchaꞌon xraago ngain kain chujnii. Ko Jesús anto tsjé thi bincheꞌe ixin nunxinxin jeꞌe jichon, ko bakjaago kexreen thetuꞌan Ndo Dio.

4Ko Jesús, are xra beꞌe ngain na̱, kuetuꞌen na̱ ixin ruchuꞌen na̱ ngain rajna Jerusalén ko ndachro:

—Chuꞌen ra tsuenja thi ndachro Ndudana, thi jaꞌan ndathjo ra kai, 5ixin ndua Juan banchegithe chujni kunixin jinda, aro nthiꞌi kanxion nchaꞌon jaꞌa ra sigithe ra kunixin Espíritu Santo.

Jesús sakuajiin ngajni

6Ko ni tate ngain Jesús banchiangiꞌi na̱ ko ndachro na̱:

—Suixin, ¿ajai ruchjeꞌe chujni Israel juachaxin rukjan na̱ tsetuꞌan na̱ nuntheꞌe na̱?

7Ko Jesús ndachro ngain na̱:

—Jaꞌa ra xruꞌin juachaxin chunda ra ixin tsunuꞌa ra kesa ko keꞌe nchaꞌon tsuꞌen kain jiꞌi ixin jeꞌo Ndo Dio chunda ndo juachaxin rundachro ndo keꞌe nchaꞌon sikuꞌen. 8Ko are tsii Espíritu Santo ngajin ra, jaꞌa ra sayéꞌe ra juachaxin ko runichja ra ixin jaꞌan. Tsexinxin ra nguii Jerusalén, kuthimejan satsji ra nuntheꞌe Judea, ko nuntheꞌe Samaria, ko nguii sasendajni.

9Ko are Jesús juexin ndachro kain yaa, kain ni bagakao tatetsjeꞌe na̱ kexreen sakuajiin Jesús ngajni. Ko are unui biji, naa thjui kjuamataon ko ibikonꞌa na̱. 10Xra tatetsjeꞌe na̱ ngajni ixin thi sakuajiin Jesús, are kununxin ngaka na̱ yoo thi xii tengaa luntho rua 11ko ndachro kayui xii mee ngain na̱:

—Jaꞌa ra chujni Galilea, ¿unda tatetsjeꞌe ra ngajni? Thi Jesús tedikon ra sakjui ngajni, jañaa sikon ra tsii inaa.

Matías bithuꞌe ixin Judas

12Kuthimejan kain ni kuinchieꞌe Jesús kjanxin na̱ jnanchjan diꞌin Jnee Ntha Olivo. Ko jna jiꞌi chiaon jikee Jerusalén ixin ley Israel tajandaꞌa chujni sathji na̱ icha kjín ngain nchaꞌon nchejugaꞌa ni. 13Ko are biji na̱ ngain rajna kuani na̱ nchia tetaꞌa choo, thi binthe na̱ kanxion nchaꞌon. Ko nthi̱ꞌa̱ bagithuꞌe Pedro, Jacobo, Juan, Andrés, Felipe, Tomás, Bartolomé, Mateo, inaa Jacobo xeꞌen Alfeo, Simón thi baketukaꞌo ni romano, ko Judas xan choo Jacobo. 14Kain chujni mee baxrathe na̱ ixin banichjayee na̱ Ndo Dio, kunixin xan choo Jesús, ko María janee Jesús ko ikanxion ni nchrii.

15Ko nchaꞌon mee binthe inchin naa inkjaon kan chujni, ko Pedro bingathjen ngayee na̱ ko ndachro ngain na̱:

16—Thiꞌin ra xro dithikaon ra, ixin kain ná nua ná ixin Jesús tse na̱ ixin Judas kjuaago Jesús ngain chujni baningakuꞌen, ko kain jiꞌi ndachro Espíritu Santo ixin David, thi kji̱n ngain thi jitaxin Xruen Ndo Dio ko jañaa kuꞌen. 17Ko nua ná jian ixin Judas bakji ngajin ná ixin xrajeꞌo xra banthoꞌo ná. 18Aro kunixin thi tumi kjuengeꞌe na̱ ꞌna ixin thi jianꞌa bincheꞌe ngain Jesús, kueꞌna naa nunthe. Ko Judas kjui nthi̱ꞌa̱ ko kjuixin jaa ko chrintaon nthauꞌe ko bachrje kain thi jiringa. 19Ko kain chujni binthe ngain rajna Jerusalén kunuꞌe na̱ ixin thi kuꞌen, ko jeꞌe na̱ binchegiꞌin na̱ nunthe mee Acéldama ko jiꞌi ngigueꞌe hebreo ko ruchro Jngiꞌi Jni. 20Ko jiꞌi jitaxin ngain xruen Salmos thi ndachro:

Nchianduꞌa jeꞌo nchia sithuꞌe nchia,

ko xruꞌin chujni sinthe ngaxiꞌin nchia.

Ko kai ndachro:

Inaa chujni ruchunda thi xra bechunda.

21’Ko nthiꞌi ngayaa ná te xii bakjiꞌo ná kainxin nchaꞌon are Jesús beꞌe nthiꞌi ngajin ná 22kuexinxin are Juan binchegithe Jesús ko bithjaja nchaꞌon are Jesús sakuajiin ngajni. Mexinxin rugunda ixin naa xii mee seꞌe ngajin ná ixin rundache icha chujni ixin jeꞌe bikon ixin Jesús nduaxin xechon.

23Kuthimejan kuinchieꞌe na̱ yoo ni bagakao na̱ kain nchaꞌon mee. Naa biꞌin José, thi banchegiꞌin na̱ Justo ko Barsabás. Ko thi yuxin biꞌin Matías. 24Ko are juexin kuinchieꞌe na̱ yui ni teꞌi, nichjee na̱ Ndo Dio ko ndachro na̱:

—Suixin chunxin anseen kainxin chujni, tjaguꞌna ni ra kexeꞌe yui xii teꞌi Suixin ukuinchieꞌe, 25ixin sincheꞌe xraa Suixin, thi xra bancheꞌe Judas. Aro jeꞌe binchetjaan xra mee ixin bincheꞌe thi jianꞌa ko jai ujii thi jikininxin.

26Kuthimejan tsuntaon na̱ ixin jañaa kuinchieꞌe choo na̱ ko thi bithutaon Matías. Ko ubikin ngakjan ni kuinchieꞌe Jesús.

Currently Selected:

Hechos 1: plsNT

Highlight

Copy