San Juan 21

Jesús xraago ngain yaato chujni bakao

1Kuthimejan Jesús kjan xraago inaa ngain chujni bakao nthi̱ꞌa̱ ngandeꞌe nda diꞌin Tiberias. Ko jaꞌin kuꞌen: 2Ko dikato choo, Simón Pedro, Tomás thi banchegiꞌin na̱ xan Kuata, Natanael thi juixin rajna Caná nuntheꞌe Galilea, ko kayui xi tsiꞌi Zebedeo ko iyoo chujni bakao Jesús. 3Ko Simón Pedro ndachro ngain na̱:

—Jaꞌan sitse kuchee.

Ko jeꞌe na̱ ndachro na̱ ngain:

—Kai jaꞌan ná tsji ná ngajin.

Ko kuani na̱ ntha barko ko sabinthekji na̱, aro thie mee xruꞌin kuchee tse na̱. 4Ko are ukuexiꞌin bingasaan, bikon na̱ Jesús tajingathjen ngandeꞌe jinda, aro kain chujni bagakao batsuanꞌa na̱. 5Kuthimejan Jesús ndachro ngain na̱:

—Jaꞌa ra xanꞌna ra, ¿achrujan kuchee tse ra ixin sine ni?

Ko jeꞌe na̱ batheꞌe na̱:

—Naꞌi.

6Kuthimejan Jesús ndachro ngain na̱:

—Dankaꞌngi ra nunchaꞌa no rajianxin sajithji ntha barko ko rutse ra kuchee.

Ko jamee bincheꞌe na̱, kuthimejan ichroꞌa dantsjengixin na̱ nunchaꞌa ngain jinda ixin anto tsjé kuchee bingachjian nunchaꞌa. 7Kuthimejan thi bakao Jesús ko anto bathjueꞌe, ndachro ngain Pedro:

—¡Jiꞌi Nchaa ná!

Ko are kuiꞌin Simón Pedro ixin jeꞌe Jesús, Pedro jaikua bengaa lunthue ixin digantsje luntho dedathexin, ko chrinka ixin kuatauꞌen jinda. 8Ko ni icha ruexin na̱ ntha barko ko jithingajin na̱ nunchaꞌa jikauntja kuchee, ixin xra kjínxin bithuꞌe na̱ ngatauꞌen nda, inchin cien metro bitjaan rugijixin na̱ ngandeꞌe nda. 9Ko are ujuii na̱ ngandeꞌe nda thi ujii jinche, bithja na̱ xruithja ko ngataꞌa xruithja jitaꞌa naa kuchee ko naa niuthja. 10Jesús ndachro ngain na̱:

—Sikoo ra kanxion kuchee nandaa tse ra.

11Ko Simón Pedro kuani ntha barko inaa ko bantsjengixin jinda nunchaꞌa jiringa tsjé kuchee yeye ko kuingajin nunchaꞌa ngataꞌa jinche. Ko ditse na̱ naa renkia ko yoo kan ko thenii kuchee, ko maski anto tsjé ba, bichjeꞌa nunchaꞌa. 12Kuthimejan Jesús ndachro ngain na̱:

—Xrakui ra jinthe ra.

Ko xruꞌin ni banchiangiꞌi Jesús ixin kensen jeꞌe, ixin benuꞌe na̱ ixin jaan, jeꞌe Jesús. 13Kuthimejan Jesús kunchieꞌen, ko jeꞌe kuaa niuthja ko kuchee ko bajon ngain na̱.

14Jiꞌi ninxin nthiꞌa xraago Jesús ngain chujni bagakao are uxechon.

Jesús nichja ngain Pedro

15Are juexin juine na̱, Jesús banchiangiꞌi Simón Pedro ko ndachro:

—Simón, xi tsiꞌi Jonás, ¿athjueꞌna icha ke ni teꞌi?

Pedro ndachro:

—Jaan, Suixin nuꞌa ixin, jaan, rinaꞌo.

Jesús ndachro:

—Mexinxin jaꞌa dayakuꞌen kulekuna.

16Ko uyuxin nthiꞌa Jesús banchiangiꞌi inaa ko ndachro:

—Simón, xi tsiꞌi Jonás, ¿athjueꞌe na jaꞌan?

Pedro ndachro ngain:

—Jaan, Suixin nuꞌa ixin, jaan, rinaꞌo.

Ko Jesús ndachro:

—Jaꞌa dayakuꞌen kulekuna.

17Ko ninxin nthiꞌa banchiangi Jesús ko ndachro:

—Simón, xi tsiꞌi Jonás, ¿athjueꞌna?

Ko Pedro tabechiin ixin uninxin nthiꞌa Jesús banchiangiꞌi ixin athjueꞌe jeꞌe, ko Pedro ndachro ngain Jesús:

—Suixin nuꞌa kainxin. Suixin nuꞌa ixin jaꞌan, jaan, rinaꞌo.

Jesús ndachro ngain:

—Dayakuꞌen kulekuna. 18Jaꞌan ndua rindathjo ixin jaꞌa are xra xan xii, jaꞌo bagituxiꞌan ko sabakji thi jaꞌa bajinao, ko are utsunthaxii, jaꞌa tsinxe raa ko ujee ni sinthangaa lunthua ko tsjiꞌo na̱ thi jaꞌa sinaoꞌa tsji.

19Jesús ndachro jiꞌi, ixin binao runchekinxin Pedro kexreen rugeꞌen jeꞌe ko runchesayeꞌe Ndo Dio. Ko are Jesús juexin ndachro jiꞌi, ndachro ngain Pedro:

—¡Rueꞌna!

Thi bagakao Jesús ko anto bathjueꞌe

20Are Pedro ngaria, jeꞌe bikon ixin jiruee thi anto bathjueꞌe Jesús, thi tabeꞌe ngaka Jesús are juine na̱ ngain kiai pascua, thi kai banchiangi ngain Jesús ko ndachro: “Nchana, ¿kensen thi sajon ngain chujni ningakuꞌan?” 21Ko are Pedro bikon xii mee, jeꞌe banchiangiꞌi Jesús ko ndachro:

—Xii jiꞌi, ¿keꞌe tsuꞌen xa?

22Jesús ndachro ngain Pedro:

—Ja̱ rinaꞌo ixin xii yaa sechon xa rukjanja na siꞌi inaa, ¿jaꞌa keꞌe ndusaan? Jaꞌa rueꞌna.

23Mexinxin kuinga chijni ngayee chujni bakao Jesús ixin xii mee rugenꞌa. Aro Jesús ndachroꞌa ngain Pedro ixin xii mee rugenꞌa, jeꞌo ndachro: “Ja̱ rinaꞌo ixin xii yaa sechon xa rukjanja na siꞌi inaa, ¿jaꞌa keꞌe ndusaan?”

24Ko jeꞌe thi anto bathjueꞌe Jesús, mee jaꞌan thi nichja kain jiꞌi, ko kji̱n kain jiꞌi. Ko nua ná ixin thi nichja jaꞌan, jaan ndua.

25Ko Jesús bincheꞌe icha tsjé, ko ja̱ rugetaxin naa ko naa thi bincheꞌe, jaꞌan xraxaꞌon ixin rugithjaꞌa nguixin nunthe rugingachjian kain xroon rugetaxin ixin thi bincheꞌe. Jañaa tsuꞌen.

Currently Selected:

San Juan 21: plsNT

Highlight

Copy