Maliko 9

1U Yesu akendelela pakunena ukuti, “Naloli inkubabuzya ukuti balipo abantu bamo pano, babo bate bakafwe mupaka babwennye Ubumwene ubwa Chala bukwiza na maka.”

U Yesu akwanduka pighamba

(Mat. 17.1-13; Luk. 9.28-36)

2 # 2 Pit. 1.17-18 Bo ghachilapo amasiku sikisi u Yesu akasenda u Pitala, nu Yakobo nu Yohani nukukwela nabo pighamba itali nkani, kuko bakaba bene. Bo bakumwennya, akabonekele aka Yesu kakanduka, 3sona amenda ghache ghakanyezimilagha, ghakaswepa nkani ukuchila namumo umuntu wesi muchisu ichapasi angachapila. 4Po abamanyili batatu bala bakamwennya u Eliya nu Mozesi bakunenezannya nu Yesu. 5U Pitala akamubuzya u Yesu akati, “Wee Mumanyisi, chizapo ukuti aswe tuli pano! Tukwiza pakuzenga ivisakasa vitatu, choka chako, ichinji icha Mozesi, sona nicha Eliya.” 6Bakachenuka nkani, umwakuti u Pitala atakamanya izya kunena.

7 # Mat. 3.17; Mlko. 1.11; Luk. 3.22 Ibingu likaboneka nukubakupikila, po izyu likivwika mwibingu likati, “Uyu Mwana wane umughaniwa. Mumwivwilaye!” 8Umwalubilolubilo abamanyili bakatalankannya nukumwennya u Yesu mwene ali nabo, patakabapo nayumo umuntu uyunji.

9Bo bakwika pighamba, u Yesu akabasoka ukuti atakamubuzyepo nayumo umuntu ni vintu vivyo bakavyennya mupaka u Mwana uwa Muntu azyuke kubufwe.

10Abamanyili bakivwila vivyo akabasoka, loli benebene bakanda pakulaluzannya ukuti, “Nkimba ukuzyuka kubufwe chikung'anamula ichoni?” 11#Mal. 4.5; Mat. 11.14Bakamulalusya u Yesu bakati, “Nkimba choni chicho abamanyisi aba Ndaghilo bakunena ukuti u Eliya abaghiye ize tasi?”

12U Yesu akamula akati, “Naloli u Eliya abaghiye ize tasi ukuti ayanizye zila vyosi. Loli nkimba choni chicho Amasimbo ghakuti u Mwana uwa Muntu akwiza pakuyimba nkani nukukaniwa? 13Loli inkubabuzya ukuti u Eliya izite kale, po abantu bakamubombela na mumo bakalondelagha ukuyana na Amasimbo aghakunena nizya yuyo.”

U Yesu akumupozya umulumendo uwa muzimu umubibi

(Mat. 17.14-20; Luk. 9.37-43a)

14Bo u Yesu na bamanyili batatu bala bongana na bamanyili abamwabo, bakagha ichilundilo ichikulu chibazyunguliye. Abamanyisi bamo aba Ndaghilo bakadalinkana nabo. 15Bo abantu bamwennya u Yesu, bakaswigha nkani nukumuchimbilila pakumulamuka. 16U Yesu akabalalusya abamanyili bache akati, “Nkimba mukudalinkana nabo choni?”

17Umuntu yumo muchilundilo akamula akati, “Wee Mumanyisi, niza nu mwana wane kukwako pakuti ali nu muzimu umubibi sona akupotwa pakunena. 18Posi papo umuzimu umubibi wamulema, ghukumusumbila pasi, akafumagha itatafulu ku mulomo. Akusyeketula amino ghache, sona umubili wache ghosi ghukuma. Nkabalaba abamanyili bako ukuti bawefye umuzimu umubibi, loli bakapotwa.”

19U Yesu akababuzya akati, “Mwe bantu abankulilo iyi mwe basita lwitiko! Nkimba nikale namwe mupaka liyi? Fwandi nkibe namwe mupaka liyi? Zagha nawe umulumendo kuno.” 20Bakiza nawe kukwache. Bo umuzimu umubibi wamwennya u Yesu, ghukamuyingannya umulumendo yula. Akawa pasi nukwanda pakukunkuna, po itatafulu likafumagha ku mulomo. 21U Yesu akamulalusya uwise akati, “Umulumendo uyu andite liyi pakuba bunubu?”

Uwise akamula akati, “Ukufuma kubwana bwache. 22Akabalilo akinji umuzimu umubibi wamusumbilagha pamoto na mumizi ukuyezya pakumughogha. Tupelele ichisa, sona utwavwe, nanti ungachibomba!”

23U Yesu akati, “Choni chicho mukunena ukuti, ‘Nanti ungachibomba?’ Vyosi vipepe bulo nu muntu yuyo ali nu lwitiko”

24Panapo na panapo uwise uwa mulumendo akalila akati, “Indi nu lwitiko, loli unyavwe ukuti imbanje nalo lwamaka!”

25Bo u Yesu ennya ukuti ichilundilo chanda pakupalamila kukwabo, akaghulamula umuzimu umubibi akati, “We muzimu uwamapuli nuwachinunu, nkukulamula epamo mu mulumendo uyu, utakinjile sona!”

26Umuzimu ghukakolomoka, ghukamuneng'ennya nkani nukwepamo. Umulumendo yula akaboneka ngati po afuye, po abantu bosi bakati, “Mwee! Umulumendo atuleka.” 27Loli u Yesu akamulema inyobe nukumunyamusya, po umulumendo yula akimilila.

28Bo u Yesu injila munyumba, abamanyili bache bakamulalusya kulubazu bakati, “Nkimba choni chicho aswe tukapotwa pakwefya umuzimu ghula?”

29U Yesu akamula akati, “Nachimo chicho chingefya umuzimu ghunughu, loli inyiputo zyene.”

U Yesu akunenela zila sona nizya bufwe nu kuzyuka kwache

(Mat. 17.22-23; Luk. 9.43b-45)

30U Yesu na bamanyili bache bakanyamuka nukudumusannya muchigaba icha Galileya. U Yesu atakalonda ukuti nayumo umuntu amanye kuko akaba, 31pakuti akabamanyizya abamanyili bache. Akababuzya akati, “U Mwana uwa Muntu akwiza pakubikiwa munyobe izya balwani, babo bakwiza pakumughogha. Loli bo ghachilapo amasiku matatu akwiza pakuzyuka kubufwe.”

32Loli abamanyili bala batakivwisya zizyo akanenagha, po bakanyila pakumulalusya.

We wenu yuyo we songo nkani?

(Mat. 18.1-5; Luk. 9.46-48)

33U Yesu na bamanyili bache bakafika mu Kapelinahumu. Bo binjila munyumba u Yesu akabalalusya akati, “Choni chicho mukadalinkanagha muzila?”

34 # Luk. 22.24 Loli batakamwamula pakuti muzila bakadalinkanagha benebene ukuti we wenu we songo nkani pakasi papabo. 35#Mat. 20.26-27, 23.11; Mlko. 10.43-44; Luk. 22.26U Yesu akikala pasi, akabitizya abamanyili 12 bala nukubabuzya ukuti, “Umuntu wesi yuyo akulonda pakuba wakwanda, ibike mwene wabumalilo pa bosi nukuba mubombi uwa bosi.” 36Po akamusenda umwana nukumwimika pakasi papabo. Akamufukatila nukubabuzya ukuti, 37#Mat. 10.40; Luk. 10.16; Yoh. 13.20“Umuntu wesi yuyo akumupokela weka u uwa bana aba pachifukwa icha nene, kokuti akumpokela nene. Umuntu wesi yuyo akumpokela akiza, kokuti atakumpokela nemwene, loli akumupokela na wepe bulo yuyo akantuma.”

Yuyo atakudalinkana naswe, witu

(Luk. 9.49-50)

38U Yohani akamubuzya akati, “Mumanyisi, tukamwennya umuntu yumo akwefya imizimu imibibi mwitabwa lyako, po tukamukanizya pakuti atakaba uwa kabukatila kitu.” 39U Yesu akababuzya abamanyili bache akati, “Awe mutakamukanizyanje pakuti nayumo umuntu yuyo akubomba ichika mwitabwa lyane, akabalilo kanako nukunsamula. 40#Mat. 12.30; Luk. 11.23Pakuti umuntu wesi yuyo atakudalinkana naswe, witu. 41#Mat. 10.42Naloli inkubabuzya ukuti umuntu wesi yuyo akubapa amizi aghakung'wela pachifukwa chakuti mwe ba Kilisitu, naloli inkubabuzya ukuti akwiza pakupokela umuvwalo wache.”

Injelo izyakubapuvya abantu

(Mat. 18.6-9; Luk. 17.1-2)

42“Nanti umuntu yumo akupuvya weka uwa bana abanandi aba ukuleka pakunsubila, chingaba chizapo ukuti umuntu yula bamupinyilile ulwala ulukulu musingo nukumusumbila munyanja. 43#Mat. 5.30Po nanti inyobe yako yikukupuvya, yidumule! Pakuti chizapo pakwinjila mubumi ubwa bwila na bwila umusita nyobe ukuchila pakwinjila ni nyobe zyosi zibili nukusumbiwa mu Gehena pamoto ghugho ghutakuzima nalumo.#9.43 Amasimbo ghamo aghakale ghonjelezya ivesi ilya 44: Kuko “Isomi zizyo zikubalya zitakufwapo nalumolumo nu moto ghugho ghukubocha ghutakuzima nalumo” (ennya ivesi ilya 48). 45Nanti ulwayo lwako lukukupuvya, ludumule! Pakuti chizapo pakwinjila mubumi ubwa bwila na bwila umusita lwayo ukuchila pakwinjila ni nyayo zyosi zibili nukusumbiwa mu Gehena.#9.45 Amasimbo ghamo aghakale ghonjelezya ivesi ilya 46: Kuko “Isomi zizyo zikubalya zitakufwapo nalumolumo nu moto ghugho ghukubocha ghutakuzima nalumo” (ennya ivesi ilya 48). 47#Mat. 5.29Sona nanti ilyiso lyako likukupuvya, likolompolelyo! Pakuti chizapo pakwinjila mu Bumwene ubwa Chala ni lyiso lyoka ukuchila pakwinjila na maso ghosi mabili nukusumbiwa mu Gehena, pamoto ghugho ghutakuzima nalumo. 48#Yes. 66.24Kuko ‘isomi zizyo zikubalya zitakufwapo nalumolumo nu moto ghugho ghukubocha ghutakuzimapo nalumolumo.’

49“Umuntu wesi akwiza pakuswefiwa nu moto ukuyana na mumo ichakwiyipa chikuswefiwa ni mbeya. 50#Mat. 5.13; Luk. 14.34-35Imbeya nyiza, loli nanti imbeya yasupa, nkimba mungayipela buli-buli pakuba sona mbeya? Mubanje nacho chimo ngati yo mbeya, chicho chikubasuka mumoyo ghinyu nukwikala mumutende mukasi mumwinyu.”

Currently Selected:

Maliko 9: LMBNT2016

Highlight

Copy