Maliko 8

U Yesu akubalyesya abantu 4,000

(Mat. 15.32-39)

1Panapo na panapo ichilundilo ichinji chikabungana. Bo abantu bate ni chakulya, u Yesu akabitizya abamanyili bache nukubabuzya ukuti, 2“Indi ni chitima na bantu banaba pakuti babanga nane amasiku matatu, po ilelo bate ni chakulya. 3Nanti nkubabwezya kukwabo ni zala bakwiza pakuzilika muzila, pakuti bamo bafumite kubutali.”

4Abamanyili bache bakamulalusya bakati, “Nkimba yumo angachagha kwiyi ichakulya munkolongo muno ichakulyesya ichilundilo chosi icha bantu ichi?”

5U Yesu akabalalusya akati, “Nkimba muli ni vibama vilinga?”

Bakamwamula bakati, “Seveni.”

6U Yesu akalamula ichilundilo icha bantu chila ukuti chikale pasi. Po akasenda ivibama seveni vila nukumupalizya u Chala. Akamenyannya nukubapa abamanyili bache ukuti bachigabile ichilundilo chila. Abamanyili bala bakabomba vivyo akababuzya. 7Bakaba sona nu tuswi utunandi tuto tutakaba utukulu, u Yesu akamupalizya u Chala pachifukwa icha tuswi tula nukubabuzya abamanyili ukuti babagabile abantu. 8Abantu bakalya nukwikuta. Pisinda pache abamanyili bakanyamula ividudunga seveni vivyo vikizula nu tubululusya utwakusyala. 9Kukabako abantu papipi 4,000. Bo u Yesu ababwezya abantu, 10panapo na panapo u Yesu na bamanyili bache bakakwela mubwato nukubuka muchigaba icha Dalimanuta.

Aba Falisayi bakumulaba u Yesu ukuti abombe ichika

(Mat. 12.38-42, 16.1-4)

11 # Mat. 12.38; Luk. 11.16 Aba Falisayi bamo bakiza kwa Yesu nukwanda pakudalinkana nawe. Bakalonda pakumutegha mukanenele, po bakamulaba ukuti ababombele ichiswigho ichakulanjizya ukuti akaba na maka agha Chala. 12#Mat. 12.39; Luk. 11.29Loli u Yesu akakoloma nukuti, “Nkimba choni chicho abantu abankulilo iyi bakulonda ichiswigho? Awe, naloli inkubabuzya ukuti abantu abankulilo iyi batakwiza pakwennya ichiswigho chicho bakuchilonda!”

13U Yesu akabaleka nukukwela sona mubwato nukulobokela kwisila ilinji ilya nyanja.

Ichilungo icha ba Falisayi nu Helodi

(Mat. 16.5-12)

14Abamanyili bache bakaluvya pakusenda ivibama, sona bakaba ni chibama choka bulo mubwato mula. 15#Luk. 12.1U Yesu akabasoka akati, “Mubanje maso nukucheba ni chilungo#8.15 chilungo: Kokuti ichimanyisyo ichabumyasi. icha ba Falisayi nicha Helodi.”

16Abamanyili bakanda pakunenezannya benebene ukuti, “U Yesu akunena zinizi pakuti ennya ukuti tute ni vibama.”

17U Yesu akazimanya zizyo bakanenagha, po akabalalusya akati, “Nkimba choni chicho mukunenezannya mwebene ukuti mute navyo ivibama? Nkimba mutakumanya pamo ukwivwisya? Nkimba imitu yinyu mikafu? 18#Yel. 5.21; Ezk. 12.2; Mlko. 4.12Muli na maso, nkimba mutangennya? Muli na makutu, nkimba mutangivwa? Nkimba mutakukumbuka 19akabalilo kako inkamenyannya ivibama fayivi pakubalyesya abantu 5,000? Nkimba ividudunga vivyo vikizula ni vyakulya ivyakusyala vikaba vilinga?”

Abamanyili bakamula bakati, “12.”

20U Yesu akalalusya akati, “Bo namenyannya ivibama seveni pakubalyesya abantu 4,000, nkimba mukanyamula ividudunga vilinga vivyo vikizula ni vyakusyala?”

Bakamula bakati, “Seveni.”

21U Yesu akabalalusya akati, “Nkimba muchili mutakwivwisya?”

U Yesu akumupozya umufwamaso mu Betisayida

22U Yesu na bamanyili bache bakafika mukaya aka Betisayida, kuko abantu bamo bakiza nu mufwamaso nukumulaba u Yesu ukuti abike inyobe papache. 23U Yesu akamulema umufwamaso nukwepamo nawe mukaya kala. Bo amufwinila amati mumaso, u Yesu akabika inyobe papache nukumulalusya ukuti, “Ukwennya chimo?”

24Umuntu yula akennya nukuti, “Ee, inkwennya abantu bakwenda-kwenda, loli bakuboneka ngati gho makwi.”

25U Yesu akabika sona inyobe zyache pamaso agha muntu yula. Akabalilo aka amaso ghache ghakighuka, ghakaba akiza nukwanda pakwennya vyosi ivintu akiza. 26U Yesu akamubuzya ukuti abuke kunyumba nukumulamula ukuti, “Utakanyokele mukaya aka.”

U Pitala akunena nizya Yesu

(Mat. 16.13-20; Luk. 9.18-21)

27Po u Yesu na bamanyili bache bakabuka mutwaya utwa papipi ni chigaba icha Kesaliya Filipi. Bo bakwenda u Yesu akabalalusya akati, “Nkimba abantu bakuti ane ne wenu?”

28 # Mlko. 6.14-15; Luk. 9.7-8 Bakamula bakati, “Bamo bakuti awe we Yohani Uwalozyo. Abanji bakuti we Eliya, abanji sona bakuti awe we yumo uwa balaghuzi.”

29 # Yoh. 6.68-69 U Yesu akabalalusya akati, “Nkimba amwe mukuti ane ne wenu?”

U Pitala akamula akati, “Awe, we Kilisitu.”

30Po u Yesu akabasoka ukuti batakamubuzyepo nayumo umuntu nizya yuyo.

U Yesu akunenela zila nizya kuyimba nu kufwa kwache

(Mat. 16.21-28; Luk. 9.22-27)

31Po u Yesu akanda pakumanyizya abamanyili bache ukuti, “U Mwana uwa Muntu abaghiye pakuyimba nkani nukukaniwa na balongozi aba Chiyuda, na baputi abasongo, sona na bamanyisi aba Ndaghilo. Akwiza pakughoghiwa, loli nanti ghachilapo amasiku matatu akwiza pakuzyuka kubufwe.” 32Akababuzya zinizi umwakwivwika nkani. Po u Pitala akamusendela palubazu nukwanda pakumuchemela. 33Loli u Yesu akaghalabuka nukubennya abamanyili bache nukumuchemela u Pitala ukuti, “Epapo, we Satana. Inyinong'ono zyako zitakufuma kwa Chala, loli nyinong'ono bulo izya bantu!”

34 # Mat. 10.38; Luk. 14.27 U Yesu akitizya ichilundilo na bamanyili bache nukubabuzya ukuti, “Nanti umuntu yumo akulonda pakunkonka, ikane mwene, sona iyannye pakuyimba mupaka nukufwa bulo, po ankonkaye. 35#Mat. 10.39; Luk. 17.33; Yoh. 12.25Pakuti umuntu wesi yuyo akulonda pakubupoka ubumi bwache, akwiza pakubutagha. Loli umuntu wesi yuyo akulonda pakubutagha ubumi bwache pachifukwa icha nene na Mazyu Amiza, akwiza pakubupoka. 36Nkimba umuntu akukabapo chimo nanti akaba ichisu chosi ichapasi, loli abutaghe ubumi bwache? Awe! 37Chitalipo nachimo chicho angalipa ukuti asende sona ubumi bwache. 38Nanti umuntu ali nane ni soni, sona ni chimanyisyo chane mumasiku amabibi agha, ghagho abantu bakumukana u Chala, po u Mwana uwa Muntu akwiza pakukoziwa isoni nawe, bo akwiza mubuchindamu ubwa Wise poka na bantumi abazelu aba kumwanya.”

Currently Selected:

Maliko 8: LMBNT2016

Highlight

Copy