Maliko 7

Ichimanyisyo icha banyenya

(Mat. 15.1-9)

1Aba Falisayi bamo poka na bamanyisi aba Ndaghilo, babo bakiza ukufuma mu Yelusalemu, bakamubunganila u Yesu. 2Bakazyaghannya ukuti abamanyili bamo aba Yesu bakalyanga bo batasukusuye akiza munyobe, ukuyana na mumo aba Falisayi bakalondelagha ukuti vibombiwanje.

3Pakuti aba Falisayi naba Yuda bosi batangalya bo batasukusuye akiza munyobe. Bakubomba zinizi kokuti basungilile inyiho izya banyenya babo. 4Sona batangalya chimo ichakufuma ku munalo pene papo bachisuka tasi.#7.4 chimo…bachisuka tasi: Pamo chimo bo bafuma ku munalo pene papo basukusula tasi munyobe. Bakukonka inyiho inyinji izinji izya banyenya babo, ngati kasukile akiza aka mbako, isonta, imbale ni vitala.#7.4 vitala: Amasimbo ghamo aghakale ghate ni vitala.

5Po aba Falisayi na bamanyisi aba Ndaghilo bala bakamulalusya u Yesu bakati, “Nkimba choni chicho abamanyili bako batakukonka ichimanyisyo chicho bakatulekela abanyenya, loli bakulya bo batasukusuye akiza munyobe?”

6 # Yes. 29.13 U Yesu akabamula akati, “Mwe bazimbuli mwee! Naloli u Yesaya akanena ubwanaloli ukuyana na mumo akasimbila ukuti,

‘Abantu banaba bakunchindika nu mulomo wene,

loli amoyo ghabo ghali kubutali nkani nane.

7Naloli bakunyiputa,

loli ukwiputa kwabo kwabulo.

Pakuti bakumanyizya indaghilo izya bantu

ngati po zikufuma kwa Chala!’ ”

8“Mukukana amalamulo agha Chala nukukonka inyiho izya bantu.”

9U Yesu akendelela pakunena ukuti, “Muli ni zila inchevu nkani izyakukanila Indaghilo izya Chala ukuti mwendelele pakusungilila inyiho zyinyu. 10#Ukf. 20.12, 21.17; Lev. 20.9; Ukk. 5.16Pakuti u Mozesi akalamula akati, ‘Chindika ughuso nu nyoko,’ sona ‘Umuntu wesi yuyo akumughuna uwise nu nyina aghoghiwanje.’ 11Loli mukumanyizya ukuti, ‘Nanti umuntu akumubuzya uwise pamo unyina ukuti, “Uyu we kolobani,” (kokuti ichabupi chicho chapeghiwa kwa Chala), 12po umuntu yula mutakumwitikizya ukuti amwavwe uwise pamo unyina.’ 13Po mukughakana amazyu agha Chala ni nyiho zizyo mukulekelana nukubomba ivintu ivyinji ivinji ivi.”

Ivintu vivyo vingamunyazya umuntu

(Mat. 15.10-20)

14Po u Yesu akabitizya sona abantu bala nukubabuzya ukuti, “Ivwa kuno, amwe mwebosi nukwivwisya akiza. 15Nachimochimo chicho chikwinjila mu muntu ukufuma kuzi kwa mubili chicho chikumunyazya, loli chicho chikufuma mu muntu yula cho chicho chikumunyazya.”#7.15 Amasimbo ghamo aghakale ghonjelezya ivesi ilya 16: Yuyo ali na makutu aghakwivwila, ivwe! (Ennya mwa 4.23).

17Bo u Yesu achileka ichilundilo nukwinjila munyumba, abamanyili bache bakamulaba ukuti abalingannye ichili chila. 18U Yesu akanena nabo akati, “Nkimba imitu yinyu yichili mikafu? Nkimba mutakwivwisya? Nachimo chicho chikwinjila mu muntu ukufuma kuzi kwa mubili chicho chikumunyazya, 19pakuti chitakwinjila mumoyo wache, loli mulwanda nukufuma kuzi.” (Pakunena zinizi u Yesu akang'anamula ukuti ivyakulya vyosi vyiza bulo pakulya.)

20Akendelela pakunena akati, “Chosi chicho chikufuma mu muntu cho chicho chikumunyazya.” 21Pakuti mumoyo uwa muntu, momumo mukufuma inyinong'ono imbibi, zizyo zikumulongolezya ukuti abombe ubwamalaya, nu bwiba, nu bughoghi, 22nu bulowe, nu bupafu, nu kwinong'onelana ivibibi, nu bumyasi, na madinko, ni chinyonywa, ni yebo, na mituvyo nu bupunganu. 23Vyosi ivibibi ivi vikufuma mukasi mu muntu nukumunyazya.

Ulwitiko ulwa mukolo

(Mat. 15.21-28)

24U Yesu akepapo pabuzilo bula nukubuka muchigaba chicho chikaba papipi na kaya akakulu nkani aka Tile. Akinjila munyumba, atakalondagha nayumo umuntu amanye ukuti akaba mulamula, loli atakavwama. 25Umukolo yumo yuyo akaba nu mwana umulindu uwa muzimu umubibi, akivwa nizya Yesu. Panapo na panapo akiza nukwisumba munyayo izya Yesu. 26Umukolo yula atakaba mu Yuda, akapapiwa muchigaba icha Silofonike. Akamulaba u Yesu ukuti efyemo umuzimu umubibi mu mwana wache. 27Loli u Yesu akamula akati, “Leka tubalisye tasi abana. Chite chiza pakusenda ichakulya icha bana nukuzisumbila imbwa.”

28Umukolo akamula akati, “Momumo Mwene, loli nimbwa zyope kusi ku tebulo zikulya utubululusya tuto abana bakulaghazya!”

29Po u Yesu akamula akati, “Chifukwa icha zizyo wamula, nyokela kukaya kako, umuzimu umubibi wepitemo mu mwana wako!”

30Umukolo yula akabuka nukumwagha umwana wache alambalaye pachitala, sona umuzimu umubibi wepitemo mumwache.

U Yesu akumupozya umuntu uwa mapuli ni chinunu

31Po u Yesu akepamo muchigaba icha Tile nukudumusannya mu Sidoni ukwikila kunyanja iya Galileya nukubuka sona kuchigaba chosi icha Twaya Teni. 32Abantu bamo bakiza nu muntu uwa mapuli ni chinunu nukumulaba u Yesu ukuti abike inyobe zyache pa muntu yula. 33Po u Yesu akamwefyapo pachilundilo pala nukubuka nawe palubazu. Akinjizya utufingwi mumakutu agha umuntu yula. Akafwina amati nukupalamasya ululimi lwache. 34U Yesu akennya kumwanya, akakoloma nukumubuzya umuntu yula ukuti, “Efata!” Chicho chikung'anamula ukuti, “Ighuka!”

35Panapo na panapo amakutu agha umuntu yula ghakighuka, ululimi lwache lukasatuka nukwanda pakugholosya pakunena. 36U Yesu akabalamula abantu bala akati, “Mutakamubuzyepo yumo.” Napapo akabasoka nkani, pope bakendelela pakufumusya nkani. 37Bosi babo bakivwa bakaswigha nkani nukuti, “Ivintu vyosi abomba akiza nkani! Abamapuli bakwivwa, abachinunu bakunena!”

Currently Selected:

Maliko 7: LMBNT2016

Highlight

Copy