Maliko 6

U Yesu bakumukana mu Nazaleti

(Mat. 13.53-58; Luk. 4.16-30)

1U Yesu na bamanyili bache bakepapo pabuzilo bula nukunyokela kukaya kache, po abamanyili bache bakamukonka.

2Pisiku Ilyakutuzya akanda pakumanyizya munyumba iyakwiputilamo. Abantu abinji babo bakamwivwa u Yesu bakaswigha nukulalusya ukuti, “Nkimba akavyagha kwiyi vyosi vinivi? Nkimba amahala ghoni ghagho umuntu yunuyu ali nagho? Nkimba amaka ghagho ali nagho aghakupelela ivyika vinivi? 3Nkimba yunuyu ate we mupalamatabwa, umwana uwa Maliya, nu wamwabo uwa Yakobo, nu Yosefu, nu Yudasi, sona nu Simoni? Nkimba abayemba bache batakwikala naswe muno?” Po bakamukana.

4 # Yoh. 4.44 Po u Yesu akababuzya akati, “Umulaghuzi akuchindikiwa kosi na kosi, loli kwene kukaya kache na bakamu bache, sona bantu aba munyumba yache.”

5Atakapela navimo ivyika, loli kwene pakubika inyobe pa babine abanandi bulo nukubapozya. 6Chikamuswighizya nkani pachifukwa chakuti abantu bala batakamusubila.

U Yesu akubatuma abamanyili bache 12

(Mat. 10.5-15; Luk. 9.1-6)

Po u Yesu akabuka mutwaya tuto tukaba papipi nu buyo bula pakubamanyizya abantu. 7Akabitizya abamanyili 12 bala poka nukubatuma babili-babili. Akabapa ubulaghili ubwakwefezezya imizimu imibibi mu bantu, 8#Luk. 10.4-11nukubalamula ukuti, “Mutakasende nachimochimo pa bulendo bwinyu, loli yene indisa iyakwendela. Mutakasende impayo awe, inyambi iya pa bulendo awe, pamo indalama munyambi zyinyu. 9Vwala inkwato, loli mutakasende ilaya ilya palubazu.” 10Akababuzya sona akati, “Nanti abantu babapokela akiza munyumba, ikala mumo mupaka mwepemo mukaya kala. 11#Imbo. 13.51Nanti mwafika mukaya kako abantu batakubapokela pamo ukubateghelezya, po mwepemo nukukung'unta ulufumbi munyayo zyinyu pakuba chimanyilo ichakubasoka.”

12Po abamanyili bala bakabuka nukwanda pakulumbilila pakasi pa bantu ukuti bapinduke nukuzileka imbibi zyabo. 13#Yak. 5.14Bakefya imizimu imibibi imyinji nukubapakazya amafuta gha syunguti ababine abinji nukubapozya.

Nizya bufwe ubwa Yohani Uwalozyo

(Mat. 14.1-12; Luk. 9.7-9)

14 # Mat. 16.14; Mlko. 8.28; Luk. 9.19 U Mwene u Helodi #6.14 U mwene u Helodi: U Helodi Antipasi, umulaghili uwa muchigaba icha Galileya. akivwa zyosi zinizi pakuti ipangwi ilya Yesu likasata kosi na kosi. Abantu bamo bakatinji, “U Yohani Uwalozyo yula azyuka kubufwe! Ichi cho chifukwa ali na maka aghakupelela ivyika.”

15Abanji bakati, “Awe, we Eliya.”

Abamwabo sona bakati, “We mulaghuzi, yuyo ayanite bulo na balaghuzi abavula intazi.”

16Bo u Helodi ivwa ichi akati, “We Yohani Uwalozyo, yuyo nkalamula ukuti umutu wache ghudumuliwe, loli azyuka kubufwe!” 17#Luk. 3.19-20U Helodi akalamula ukuti bamuleme u Yohani nukumupinya nukumwighalila mujele. U Helodi akabomba zinizi, pachifukwa chakuti akasemya u Helodiya umuchi uwa wamwabo u Filipu. 18U Yohani akendelela pakumubuzya u Helodi ukuti, “Indaghilo zyitu zitakwitikizya ukuti usemye umuchi uwa wamwinyu!”

19Po u Helodiya akamubenga u Yohani, sona akalondagha pakumughogha, loli akapotwa pachifukwa icha Helodi. 20U Helodi akamunyilagha u Yohani pakuti akazimanya ukuti u Yohani akaba muntu umwiza nu muzelu, po akamusunga akiza. Po nanti u Helodi ivwa amazyu agha Yohani atakabanga nu mutende mumoyo wache; loli pope bulo akighana pakumuteghelezya.

21Pabumalilo pache u Helodiya akalwaghilapo ulusako. Pisiku ilya kusekela ukupapiwa kwa Helodi, akayannya ulusekelo nukwitizya bosi abasongo aba Boma, abasongo aba basilikali abankondo na bantu abamanyikwe mu Galileya. 22Umwana umulindu uwa Helodiya#6.22 Umwana umulindu uwa Helodiya: Amasimbo ghamo aghakale ghasimbite ukuti Umwana wache umulindu u Helodiya. akinjila mukasi nukwimba, umwakuti u Helodi na bayeni bache bakahoboka nkani. Po u mwene akamulalusya umulindu yula akati, “Nkimba ukulonda ichoni? Mbuzya, inkwiza pakukupacho.” 23Akamulayizya nkani pakulapa ukuti, “Nkulapa ukuti inkwiza pakukupa chosi chicho ukulaba, napapo tungagabana ubumwene bwane pakasi na pakasi!”

24Umulindu akafuma kuzi nukumulalusya unyina ukuti, “Nkimba indabe ichoni?”

Unyina akamula akati, “Umutu uwa Yohani Uwalozyo.” 25Panapo na panapo umulindu akanyokela kwa Helodi nukuti, “Losi ulu nkulonda umpe umutu uwa Yohani Uwalozyo mumbale!” 26Po u mwene u Helodi ichitima chikamulema nkani, loli atakamukanila pachifukwa icha chilapo chache pamaso pa bayeni bache bosi. 27Umwalubilolubilo u Helodi akamutuma umulindilili uwa bakayidi nukumulamula ukuti asende umutu uwa Yohani. Umulindilili yula akabuka kujele nukudumula umutu uwa Yohani. 28Akiza nagho mumbale nukumupa umulindu, po umulindu yula akamupa unyina. 29Bo abamanyili aba Yohani bivwa zinizi, bakiza nukusenda umuvimba uwa Yohani nukughubika mwipumpa.

U Yesu akuchilyesya ichilundilo ichikulu

(Mat. 14.13-21; Luk. 9.10-17; Yoh. 6.1-14)

30Abatumiwa bakanyokela nukumubuzya u Yesu vyosi vivyo bakabomba na vivyo bakamanyizya. 31Pakaba abantu abinji nkani abakwiza nukubuka, umwakuti u Yesu na bamanyili bache batakaba na kabalilo akakulyela. Po u Yesu akababuzya akati, “Twende kubuzilo kuko tungaba twebene ukuti mutuzye panandi.” 32Po bakakwela mubwato nukubuka bene, kubuzilo kuko kutakabako abantu.

33Loli abantu abinji bakabennya bakunyamuka nukubamanya umwalubilolubilo, po abantu bala bakafuma muvyisu vyosi nukufika kubuzilo bula bo u Yesu na bamanyili bache batafikite. 34#Ukb. 27.17; 1 Abm. 22.17; 2 Imb. 18.16; Ezk. 34.5; Mat. 9.36Bo u Yesu ika mubwato akennya ichilundilo icha bantu. Akaba ni chililizi na bantu bala, pakuti bakayana bulo ni ng'ozi zizyo zite nu mudimi. Po akanda pakubamanyizya ivintu ivyinji. 35Pachamabwila abamanyili bache bakiza pakumubuzya ukuti, “Kwila kale, muno mo munkolongo. 36Ubabwezye abantu ukuti babukaye mumaghunda na mutwaya tuto tuli papipi pakwilondela bene ivyakulya.”

37Loli u Yesu akamula akati, “Amwe mwebene mubapanje ivyakulya.”

Bakalalusya bakati, “Nkimba ukulonda tubukaye pakughula ivibama ni ndalama isalabazya izyakukwana 200 ukuti tulyesye abantu bosi banaba?”

38Po u Yesu akabalalusya akati, “Nkimba muli ni vibama vilinga? Bukagha kennye.” Bo bennya, bakamubuzya u Yesu bakati, “Vilipo ivibama fayivi ni swi zibili.”

39U Yesu akababuzya abamanyili bache ukuti babikazye abantu pisote iteta mutubukatila. 40Po abantu bakikala pasi mutubukatila utwa bantu 100 nu twa bantu 50. 41Pisinda pache u Yesu akasenda ivibama fayivi ni swi zibili zila, akennya kumwanya nukupalizya kwa Chala. Akamenyannya ivibama vila nukubapa abamanyili bache ukuti babagabile abantu. U Yesu akabagabila sona abantu bosi iswi zibili zila. 42Abantu bosi bala bakalya nukwikuta. 43Po abamanyili bakanyamula ividudunga 12 vivyo vikizula ni vibama, sona ni swi ivyakusyala. 44Pakasi pa bantu babo bakalya, abanavuli bene bakabapo 5,000.

U Yesu akwenda pamizi

(Mat. 14.22-33; Yoh. 6.15-21)

45Panapo na panapo u Yesu akababuzya abamanyili bache ukuti bakwele mubwato nukulongolela ku Betisayida, kwisila ilinji ilya nyanja, bo akubabwezya abantu. 46Bo alaghana na bantu, akanyamuka nukukwela pighamba pakwiputa. 47Bo ubusiku bukwanda, ubwato bukaba pakasi panyanja, bo u Yesu ali mwene pisila. 48U Yesu akabennya abamanyili bache bakutamiwa pakuvigha ubwato pakuti bakalumbilanagha ni mpepo, po na kabalilo aka kubuche akiza kukwabo akwenda pamizi. Bo ali papipi pakubachila,#6.48 pakubachila: Pamo ukwenda poka nabo. 49abamanyili bala bakamwennya, bo akwenda pamizi nukwinong'ona ukuti akaba chizyuka. Po bakanda pakukolomoka. 50Bo bamwennya, bosi ubogha bukabalema nkani. Panapo na panapo u Yesu akababuzya akati, “Mutakatetemaye! Nene. Mutakanyilaye!” 51Po akakwela mubwato mula, impepo yila yikaleka pakukuka. Ichi chikabamala nkani amahala abamanyili, 52pakuti batakivwisya ukuti ukulyesya kwa bantu 5,000 bala chikung'anamula ichoni; imitu yabo yikaba mikafu nkani.

U Yesu akumupozya umubine mu Genesaleti

(Mat. 14.34-36)

53Bakaloboka inyanja yila nukufika mukaya aka Genesaleti, kuko bakapinyilila ubwato. 54Bo bika mubwato mula, panapo na panapo abantu bakamumanya ukuti akaba we Yesu. 55Po bakachimbilila mutwaya utupalamani nukubasenda ababine bosi pachibonde nukwiza nabo kubuzilo bubo u Yesu akabako. 56Sona kosi kuko u Yesu akabukagha, mutwaya, muminalo pamo mumaghunda, abantu bakabasendagha ababine, bakabukagha nabo ku minalo nukumulaba ukuti abitikizye ababine pakupalamasya bulo mulubazu ulwa mwenda wache. Po abantu bosi babo bakaghupalamasya bakapolagha.

Currently Selected:

Maliko 6: LMBNT2016

Highlight

Copy