Maliko 10
10
Nizya soka
(Mat. 19.1-12; Luk. 16.18)
1U Yesu akepamo mu Kapelinahumu nukubuka kuchigaba icha Yudeya nukuloboka ulusoko ulwa Yolodani. Ichilundilo chikiza sona kukwache, po akabamanyizya ukuyana na mumo akabamanyizizyanga bwila.
2Aba Falisayi bamo bakiza kukwache nukuyezya pakumutegha mukanenele. Bakamulalusya bakati, “Tubuzye, nkimba Indaghilo zyitu zikwitikizya ukuti umwanavuli amusosye umuchi wache?”
3U Yesu akamula akati, “Nkimba lulaghilo loni lulo u Mozesi akabapa amwe?”
4 #
Ukk. 24.1-4; Mat. 5.31 Bakamula bakati, “U Mozesi akitikizya ukuti umwanavuli asimbe ukalata uwakusosya, po angamusosya umuchi wache.”
5U Yesu akabamula akati, “U Mozesi akabasimbila ululaghilo ulu pachifukwa chakuti amoyo ghinyu makafu nkani. 6#Ubw. 1.27, 5.2Loli ukwandila kubwandilo, bo u Chala apela ivintu vyosi ukuyana na Masimbo aghakuti u Chala akapela umwanavuli nu mukolo. 7#Ubw. 2.24Pachifukwa ichi, umwanavuli akwiza pakumuleka uwise nu nyina nukumamatilana poka nu muchi wache.#10.7 nukumamatilana poka nu muchi wache: Amasimbo ghamo aghakale ghate nu nukumamatilana nu muchi wache. 8Po babili banaba bakwiza pakuba mubili ghoka. Po bate bantu babili sona, loli mubili ghoka. 9Po chicho u Chala amamatizya poka patakabepo umuntu uwakuchimamatula.”
10Bo banyokela sona munyumba, abamanyili bakamulalusya u Yesu izya fundo yiyo akanena. 11#Mat. 5.32; 1 Kol. 7.10-11U Yesu akababuzya akati, “Nanti umwanavuli akumusosya umuchi nukusenda uyunji, kokuti akumunangila umuchi wache. 12Umwakuyana bulo, nanti umukolo nanti akusoka nukusendiwa nu mwanavuli uyunji, kokuti akumunangila umulume wache.”
U Yesu akubasaya abana
(Mat. 19.13-15; Luk. 18.15-17)
13Abantu bamo bakiza na bana kwa Yesu ukuti abasaye pakubika inyobe zyache, loli abamanyili bache bakabachemela. 14Bo u Yesu azyaghannya, akakalala nkani nukubabuzya abamanyili bache ukuti, “Baleke abana bize kukwane, mutakabakanizye pakuti Ubumwene ubwa Chala ubwa bantu babo bali ngati bo aba. 15#Mat. 18.3Naloli inkubabuzya ukuti umuntu wesi yuyo atakupokela Ubumwene ubwa Chala ngati we mwana, ate akinjilemo nalumo.” 16Po akabafukatila abana bala, nukubasaya pakubika inyobe zyache.
Nizya muntu umukabi
(Mat. 19.16-30; Luk. 18.18-30)
17Bo u Yesu akwendelela nu bulendo bwache, umuntu yumo akamuchimbilila, akumufughamilila nukumulalusya ukuti, “Wee Mumanyisi umwiza, nkimba imbombe ichoni ukuti impokele ubumi ubwa bwila na bwila?”
18U Yesu akamulalusya akati, “Nkimba choni chicho ukuti ne mwiza? Nayumo umuntu yuyo mwiza, loli u Chala mwene. 19#Ukf. 20.12-16; Ukk. 5.16-20Ughamenye amalamulo aghakuti, ‘Utakaghoghaye, utakalowaye, utakibaye, utakabanje we kaboni umumyasi, utakazimbulaye, sona chindika ughuso nu nyoko.’ ”
20Umuntu yula akati, “Wee Mumanyisi, ukwandila kubwana bwane nakonka amalamulo ghosi ghanagha.”
21U Yesu akamwenelezya nu lughano nukumubuzya ukuti, “Ukusobelwa ichintu choka bulo: Kaghulizye vyosi vivyo uli navyo nukubapa abapina indalama, po ukwiza pakuba nu bukabi kumwanya, po wize nukunkonka.” 22Bo umuntu ivwa zinizi, icheni chache chikasiluka, akabuka ni chitima pachifukwa chakuti akaba mukabi nkani.
23U Yesu akatalankannya nukubabuzya abamanyili bache ukuti, “Chipala nkani ukuti abantu abakabi binjile mu Bumwene ubwa Chala!”
24Amazyu agha ghakabaswighizya nkani abamanyili, loli u Yesu akanena sona akati, “Naloli bana bane, chipala nkani pakwinjila mu Bumwene ubwa Chala! 25Chipala nkani ukuti umuntu umukabi injile mu Bumwene ubwa Chala, ukuchila ukuti ingamila yinjile mu kabwazi aka sindano.”
26Abamanyili bakaswigha nkani nukulaluzannya ukuti, “Po nkimba we wenu angapokiwa?”
27U Yesu akabenelezya nukubamula ukuti, “Zinizi zitangabombiwa nu muntu, loli nu Chala. Pakuti nu Chala ichintu chosi chipepe bulo.”
28U Pitala akati, “Ennya, twavileka vyosi nukukukonka.”
29U Yesu akababuzya akati, “Naloli inkubabuzya ukuti umuntu wesi yuyo akalekite akaya, pamo abawamwabo, pamo abayemba, pamo uwise, pamo unyina, pamo abana, pamo amaghunda, pachifukwa icha nene, pamo icha Mazyu Amiza, 30pakabalilo aka, akwiza pakupokela ivintu ivyinji ukuchilapo 100 ivya nyumba, na bawamwabo, na bayemba, na banyina, na bana na maghunda poka nu kuvwimiwa bulo. Pakabalilo kako akwiza pakupokela ubumi ubwa bwila na bwila. 31#Mat. 20.16; Luk. 13.30Loli abinji abakwanda bakwiza pakuba babumalilo, sona abinji aba bumalilo bakwiza pakuba bakwanda.”
U Yesu akunenela zila akabutatu nizya bufwe nu kuzyuka kwache
(Mat. 20.17-19; Luk. 18.31-34)
32Akabalilo aka u Yesu na bamanyili bache bakaba pabulendo ubwakubuka kukaya aka Yelusalemu. U Yesu akalongolela, abamanyili bakaba nu bogha. Sona abantu babo bakabakonkagha bakanyilagha. U Yesu akabitizya abamanyili 12 bala palubazu nukubabuzya ivintu vivyo vikwiza pakumuwila. 33Akababuzya akati, “Ivwa kuno, tukubuka mu Yelusalemu, mumo u Mwana uwa Muntu akwiza pakubikiwa munyobe izya baputi abasongo na bamanyisi aba Ndaghilo. Bakwiza pakumulonga ukuti aghoghiwe nukumubika munyobe izya bantu babo bate ba Yuda, 34babo bakwiza pakumobezya, ukumufwinila amati, ukumusyempa nukumughogha; loli bo ghachilapo amasiku matatu akwiza pakuzyuka kubufwe.”
Ukulaba kwa nyina uwa Yakobo nu Yohani
(Mat. 20.20-28)
35Pisinda pache u Yakobo nu Yohani, abana aba Zebediya bakiza kwa Yesu nukuti, “Wee Mumanyisi, chilipo chimo chicho tukulonda ukuti utubombele.”
36U Yesu akabalalusya akati, “Nkimba mukulonda ukuti imbabombele ichoni?”
37Bakamwamula bakati, “Bo wikala pachitengo chako mu Bumwene bwako ubwa buchindamu tukulonda ukuti awe utwitikizye twikale, yumo kunyobe yako indilo, uyunji kumongo.”
38 #
Luk. 12.50
U Yesu akababuzya akati, “Mutakuchimanya chicho mukulaba. Nkimba mungang'wela mulubako ulwa ntamyo lulo imbaghiye pakung'welelamo? Nkimba mungoziwa umwakuyana bulo na mumo imbaghiye pakoziwa?”
39Bakamula bakati, “Ee, tungazibomba.”
U Yesu akabamula akati, “Naloli mungang'wela mulubako lulo imbaghiye pakung'welelamo nukoziwa ukuyana na mumo imbaghiye pakoziwa. 40Loli inte nu bulaghili ubwakusala uwakwikala kunyobe yane indilo ni yamongo. We Chala mwene yuyo akupa ubuzilo abantu babo abayanizizya.”
41Bo abamanyili abanji 10 bala bivwa zinizi, bakamukalalila nkani u Yohani nu Yakobo. 42#Luk. 22.25-26Po u Yesu akabitizya abamanyili bache bosi poka nukubabuzya ukuti, “Muzimenye ukuti babo bakuneniwa ukuti balaghili aba bantu babo bate ba Yuda bali na maka pa bantu babo; sona abalongozi bali nu bulaghili bosi. 43#Mat. 23.11; Mlko. 9.35; Luk. 22.26Loli ichi chite momumo chibeleye pakasi papinyu. Nanti umuntu yumo akulonda pakuba we songo, kokuti abanje mubombi uwa bosi. 44Nanti umuntu yumo akulonda pakuba wakwanda, kokuti abanje muzya uwa bosi. 45Pakuti u Mwana uwa Muntu atakiza ukuti bamubombelaye, loli pakubabombela nukubapa ubumi bwache ukuti abapoke abantu abinji.”
U Yesu akumupozya u Batimeyo umufwamaso
(Mat. 20.29-34; Luk. 18.35-43)
46Bakafika mukaya aka Yeliko, bo u Yesu na bamanyili bache poka ni chilundilo bakepamo mukaya kala, umufwamaso uwakulaba-laba, yuyo akaba we Batimeyo umwana uwa Timeyo akikalagha mulubazu ulwa musebo nukulaba. 47Bo ivwa ukuti we Yesu uwa mu Nazaleti, akanda pakukolomoka ukuti, “Wee Yesu, u Mwana uwa Devedi, umpelele ichisa!”
48Abantu abinji bakamuchemela ukuti abanje myee. Loli akakolomoka nkani ukuti, “Mwana uwa Devedi, umpelele ichisa!”
49U Yesu akima nukubabuzya abantu bala ukuti, “Mwitizye.”
Po bakamwitizya umufwamaso yula nukumubuzya ukuti, “Jimba umoyo! Nyamuka akukwitizya.”
50Po akaghusumba umwenda, akanyela nukubuka kwa Yesu.
51U Yesu akamulalusya akati, “Nkimba ukulonda inkubombele ichoni.”
Umufwamaso akamula akati, “Wee Mumanyisi, nkulonda pakwennya sona.”
52U Yesu akamubuzya akati, “Bukagha, ulwitiko lwako lwakupozya.”
Panapo na panapo umuntu yula akanda pakwennya nukumukonka u Yesu pa bulendo bula.
Currently Selected:
Maliko 10: LMBNT2016
Highlight
Share
Copy
Want to have your highlights saved across all your devices? Sign up or sign in
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Learn More About Ulufingo Ulupya
