Maliko 5

U Yesu akupozya umuntu uwa mizimu imibibi

(Mat. 8.28-34; Luk. 8.26-39)

1U Yesu na bamanyili bache bakafika kwisila ilinji ilya Nyanja iya Galileya, muchigaba icha Gelasani. 2Bo u Yesu ika bulo mubwato, akakomana nu muntu uwa muzimu umubibi, yuyo akafumila ku mapumpa. Umuntu yunuyu 3akalindagha mumapumpa, umwakuti atakabapo nayumo umuntu uwakuti angamupinya ni mpingu. 4Utubalilo utwinji ivinama ni nyobe vikaba vipinyilile. Loli akabalilo kosi akadumulannyanga nukusumba impingu izya munyobe na muvinama. Atakabapo yumo uwakumupota pakuti akaba na maka nkani. 5Umusanya nu busiku akazyungulilagha bulo mumapumpa nu tughamba, akakolomokagha nkani nukwibolannya-bolannya na mabwe.

6Bo amwennya u Yesu pabutalipo, akamuchimbilila nukumufughamilila, 7akakolomoka nkani akati, “Wee Yesu Mwana uwa Chala Wapamwanya Nkani! Nkimba ukulonda ichoni nane? Inkukulaba mwitabwa ilya Chala, utakanfunde!” 8Akanena bunubu pachifukwa chakuti u Yesu akati, “Epamo mu muntu uyu, we muzimu umubibi!”

9U Yesu akamulalusya akati, “Itabwa lyako we wenu?”

Umuntu yula akamula akati, “Ne ‘Chilundilo,’ pakuti twe binji.” 10Po akamulaba u Yesu umwakulambilizya nkani ukuti atakefyemo imizimu imibibi muchigaba chila.

11Ingulube inyinji zikalyanga papipi na kaghamba. 12Imizimu imibibi yikamulaba u Yesu ukuti, “Tutume mu ngulube zila nukutwitikizya ukuti twinjilemo.” 13Akayitikizya pakubuka, imizimu imibibi yikepamo mu muntu yula nukwinjila mu ngulube. Umudimo ghosi uwa ngulube zila, zizyo zikaba papipi 2,000 zikika nukuchimbila, po zikinjila munyanja nukudwiba.

14Abadimi aba ngulube zila bakachimbila nukubabuzya abantu mutwaya na mumaghunda. Po abantu bakabuka pakwennya vivyo vikabombiwa. 15Bo biza kwa Yesu bakamwennya umuntu yuyo akaba ni chilundilo icha mizimu imibibi. Akikalagha palapala, akavwala amenda, inyinong'ono zyache zikanyokelamo sona bosi bakanyila nkani. 16Babo bakavyennya bakababuzya abantu vivyo vikabombiwa ku muntu yuyo akaba ni mizimu imibibi, sona na ku ngulube bulo.

17Po bakamulaba u Yesu ukuti epemo muchigaba chabo chila.

18Bo u Yesu akukwela mubwato, umuntu yuyo akaba ni mizimu imibibi akamulaba ukuti abuke nawe. 19U Yesu atakamwitikizya, loli akamubuzya akati, “Nyokela kunyumba iya bakamu bako nukubabuzya ivintu ivikulu vivyo u Mwene akubombela, sona na mumo abeleye ni chisa nawe.”

20Po umuntu yula akabuka muchigaba chosi icha Twaya Teni nukwanda pakubabuzya abantu vivyo u Yesu akamubombela. Bosi babo bakivwa bakaswigha nkani.

U Yesu akumupozya umwana umulindu nu mukolo yumo

(Mat. 9.18-26; Luk. 8.40-56)

21U Yesu akaloboka sona inyanja. Bo afika kwisila, ichilundilo ichikulu chikabungana umwakumuzyungulila mulubazu ulwa nyanja yila. 22Po u Yayili, usongo yumo uwa kunyumba iyakwiputilamo wepe akiza palapala. Bo amwennya u Yesu, akisumba munyayo izya Yesu 23nukwanda pakumulambilizya ukuti, “Umwana wane umulindu mubine nkani! Nalema ivinama vyako, twende ubike inyobe zyako papache ukuti apole nukuba mumi!”

24U Yesu akanyamuka nukubuka nawe. Abantu abinji bakamukonkagha umwakufyenyana nawe.

25Kukabako umukolo yumo, yuyo akayimba nkani nu bubine ubwa chakumwezi amaka 12. 26Akabuka mu baghanga abinji nukutagha ivyuma vyache vyosi vivyo akaba navyo ukuti lumo angapola, loli ububine bukendelela pakumuyivya. 27Bo umukolo yula ivwa nizya Yesu, akiza muchilundilo icha bantu kwisinda kwa Yesu, 28kuno akunena mwene akuti, “Nanti napalamasya bulo amenda ghache, inkwiza pakupola.”

29Akapalamasya amenda agha Yesu, panapo na panapo ibanda likaleka pakutonya. Po akiyaghannya mumubili wache ukuti intamyo zyache zyamala. 30Panapo na panapo u Yesu akazimanya ukuti amaka ghamo ghakepamo mumwache, po akaghalabukila ku bantu nukulalusya ukuti, “We wenu yuyo apalamasya amenda ghane?”

31Abamanyili bache bakamula bakati, “Ukwennya bulo namumo abantu bakubunganiye; choni chicho uchili pakulalusya ukuti, ‘We wenu yuyo ampalamasya?’ ”

32Loli u Yesu akendelela pakutalankannya ukuti angamwennya umuntu yuyo abombite zinizi. 33Umukolo yula akazyaghannya zizyo zikabombiwa kukwache, po akiza bo akutetema nukunyila, akisumba munyayo izya Yesu nukumubuzya ubwanaloli bosi. 34U Yesu akamubuzya umukolo yula akati, “Wee mwana wane, ulwitiko lwako lwakupozya. Wende akiza, intamyo zyako zyamala.”

35Bo u Yesu akunena zinizi, abantu bamo bakafuma kunyumba iya Yayili nukumubuzya ukuti, “Umwana wako atuleka. Choni chicho ukumutamya umumanyisi?”

36U Yesu akazisulannya#5.36 akazisulannya: Pamo akivwa. zizyo bakanenagha, loli akamubuzya u Yayili akati, “Utakanyilaye, unsubile bulo.” 37U Yesu atakamwitikizya nayumo umuntu ukuti abuke nawe, loli akasenda bulo u Pitala, u Yakobo nu wamwabo u Yohani. 38Bakafika panyumba iya Yayili, kuko u Yesu akennya ukuvulungana nukwivwa ichongo ichakulila kwa bantu. 39Akinjila nukubalalusya ukuti, “Nkimba choni chicho muvulunganite? Nkimba choni chicho mukulila? Umwana atafuye, loli aghonite bulo utulo!”

40Abantu bakamuseka, po akabafumya bosi kuzi, akasenda uwise uwa mwana nu nyina, poka na bamanyili bache batatu bala nukwinjila nabo muchipinda mumo umwana akalambalalaghamo. 41Akamulema inyobe nukumubuzya ukuti, “Talita kumi!” Chicho chikung'anamula ukuti, “Wee kalindu, inkukubuzya ukuti nyamuka!”

42Panapo na panapo umulindu yula akanyamuka nukwanda pakwenda. Akaba na maka 12. Bo zinizi zyabombiwa, bosi bakaswigha nkani. 43Loli u Yesu akabasoka nkani ukuti batakamubuzyepo nayumo umuntu, po akanena sona akati, “Mumupe chimo ichakulya.”

Currently Selected:

Maliko 5: LMBNT2016

Highlight

Copy