Maliko 4

Ichili icha mupesambeyu

(Mat. 13.1-9; Luk. 8.4-8)

1 # Luk. 5.1-3 U Yesu akanda sona pakumanyizya mulubazu ulwa Nyanja iya Galileya. Abantu babo bakamuzyungulila bakaba binji nkani, umwakuti u Yesu akinjila mubwato nukwikala mulamula, bo abantu bimiliye mulubazu ulwa Nyanja. 2Akabamanyizya ivintu ivyinji muvyili akati, 3“Ivwa kuno! Kukabako umuntu yuyo akabuka pakupesa imbeyu mumughunda wache. 4Bo ali pakupesa, imbeyu zimo zikawila muzila, po iviyuni vikiza nukuzizompola. 5Zimo zikawila pilyalabwe pakuti pakaba itope linandi. Umwalubilolubilo imbeyu zila zikamela pakuti patakabapo itope ilyinji. 6Loli bo izuba lyakwela, imbeyu zila zikababuka pakuti amagululuzi ghakaba ghachili ghatayiye nkani pasi, sona imbeyu zila zikuma. 7Imbeyu zimo zikawila pakasi pamivwa, ghagho ghakakula nukufyululusya imbeyu zila, po imbeyu zitakela ivikomwa. 8Loli imbeyu zimo zikawila pitope ilyiza, zikamela nukukula, po nukwela ivikomwa; zimo zikela ivikomwa 30, zimo 60, izinji 100.”

9U Yesu akati, “Yuyo ali na makutu aghakwivwila, ivwe!”

Ifundo iya vyili

(Mat. 13.10-17; Luk. 8.9-10)

10Bo u Yesu ali mwene, bamo babo bakamwivwa bakiza poka na bamanyili 12 nukumulalusya ukuti abalingannye ivyili. 11U Yesu akamula akati, “U Chala abavumbulila vivyo vifisiwe ivya Bumwene bwache. Loli abantu babo bali kuzi bakwivwa vyosi muvyili, 12#Yes. 6.9-10ukuti,

‘Bangennya nukwennya,

loli bate bavyennyanje.

Bangivwa nukwivwa,

loli batangivwisya.

Nanti bangamanya, bangapinduka nukuzileka imbibi zyabo,

po u Chala angabahobokela imbibi zyabo.’ ”

U Yesu akulingannya ichili icha mupesambeyu

(Mat. 13.18-23; Luk. 8.11-15)

13Po u Yesu akabalalusya akati, “Nkimba mutakwivwisya ichili ichi? Po mukwiza pakwivwisya buli-buli ivyili ivinji? 14Umupesambeyu yula akupesa amazyu agha Chala. 15Abantu bamo bayanite bulo ni mbeyu zizyo zikuwa muzila. Panapo nanti bivwa amazyu agha Chala, umwalubilolubilo u Satana akwiza nukwefyamo amazyu ghagho ghapesiwa mumwabo. 16Abantu bamo bayanite bulo ni mbeyu zizyo zyawa pilyalabwe. Nanti abene bivwa bulo amazyu agha Chala, bakughapokela nu buhobosu. 17Loli pakuti amazyu ghatakwinjila mukasi mumoyo ghabo, ghatakwikala akabalilo akatali. Po nanti intamyo pamo ukuvwimiwa kwafika pachifukwa icha mazyu, bakuwa umwalubilolubilo. 18Abantu bamo bayanite bulo ni mbeyu zizyo zikuwa pakasi pamivwa. Aba bo bantu babo bakwivwa amazyu agha Chala. 19Loli ukwikolezannya nivya muchisu ichapasi pano, ukuchighana ichuma, sona ni vinyonywa vyosi ivyakulekanalekana vikwinjila nukufyululusya amazyu ghala ukuti batakape ivikomwa. 20Loli abantu bamo bayanite bulo ni mbeyu zizyo zyapesiwa pitope ilyiza. Bakughivwa amazyu nukughitikizya nukupa ivikomwa, bamo 30, abanji 60, sona bamo 100.”

Inyale yiyo bayikupikiye ni sonta

(Luk. 8.16-18)

21 # Mat. 5.15; Luk. 11.33 U Yesu akabalalusya akati, “Nkimba alipo umuntu yuyo akusenda inyale nukuyikupikila ni sonta pamo ukuyibika kusi kuchitala? Nkimba atakuyibika pabuzelu? 22#Mat. 10.26; Luk. 12.2Ichintu chosi chicho bachifisite chikwiza pakuvumbuliwa, sona ichintu chosi ichakubusyefu chikwiza pakuboneka pabuzelu. 23Yuyo ali na makutu aghakwivwila, ivwe!”

24 # Mat. 7.2; Luk. 6.38 Akababuzya sona akati, “Muchebaye nkani na zizyo mukwivwa! Ichipimilo chicho mukubombezya pa bantu abanji, cho chicho u Chala akwiza pakubombezya papinyu, loli umwakuchilapo. 25#Mat. 13.12, 25.29; Luk. 19.26Umuntu wesi yuyo ali nako kale kamo, akwiza pakumonjelezyapo ivyinji ukuchila. Loli umuntu wesi yuyo ate nako kamo, akwiza pakufyuliwa na kanandi bulo kako ali nako kale.”

Ichili icha kamelele na kakulile aka mbeyu

26U Yesu akababuzya sona akati, “Ubumwene ubwa Chala buyanite bulo nu muntu yuyo akupesa imbeyu mumughunda wache. 27Akughona pabusiku nukulamusya pandabindabi, pakabalilo kosi kanako izyene imbeyu zikumela nukukula, loli atakumanya namumo zikumelela nukukulila. 28Itope ilyene likumezya imbeyu nukwelezya, chikwanda tasi ichipembezannya, pisinda pache akamutu, pabumalilo akankoso kako kakwizula ni seke. 29#Yow. 3.13Po ivikomwa vyaghoma, umuntu yula akasenda isengo nukwanda pakudumula pakuti akabalilo akakwinulila kakwana.”

Ichili icha mbeyu iya muzimwa

(Mat. 13.31-32, 34; Luk. 13.18-19)

30U Yesu akalalusya akati, “Nkimba Ubumwene ubwa Chala buyanite ni choni? Fwandi chili choni chicho tungabombezya pakulingannya Ubumwene ubwa Chala? 31Buyanite bulo nu muntu yuyo akusenda imbeyu iya muzimwa, yiyo kambeyu akanandi nkani pachisu chosi ichapasi nukuyipesa mumughunda. 32Loli bo ayipesa bulo, yikumela nukukula pakuba chibyalwa ichikulu nkani ukuchila imbeyu zyosi. Yikuba ni samba inkulu izyakuti ni viyuni vikulukamo ivivumbo vyabo.”

33U Yesu akalumbililagha amazyu ghache pakasi pa bantu pakubombezya ivyili ivyinji nkani. 34Atakanenaghapo nachimochimo na bantu pakusita ukubombezya ichili. Loli bo ali mwene na bamanyili bache, akabalingannyanga vyosi.

U Yesu akuyipumizya impepo

(Mat. 8.23-27; Luk. 8.22-25)

35Pachamabwila pisiku lilalila, u Yesu akababuzya abamanyili bache akati, “Twende tulobokele kwisila ilinji ilya nyanja.” 36Po bakachileka ichilundilo icha bantu; abamanyili bache bakakwela mubwato mumo u Yesu akaba ikaye kale nukunyamuka poka nawe. Amabwato aghanji ghakabakonka. 37Umwakuchenusya bulo impepo iyakoghofya yikanda pakukuka, po amayigha ghakanda pakunyelela mubwato mula, umwakuti ubwato bukanda pakwizula na mizi. 38Loli u Yesu akaba kwisinda ku bwato kuko akaghona utulo, bo umutu wache ghuli pachinulilo. Abamanyili bakamunyamusya nukuti, “Wee Mumanyisi, nkimba utakupasya ukuti tuli pakudwiba?”

39U Yesu akanyamuka nukuyilamula impepo yila ukuti, “Banga myee!” Akaghabuzya amayigha akati, “Ima!” Impepo yikaleka, umwakuti panyanja pakaba myee nkani. 40U Yesu akabalalusya abamanyili bache akati, “Nkimba choni chicho mukunyila? Nkimba mupaka nilelo bulo muchili mute nu lwitiko?”

41Loli bakanyila nkani nukulaluzannya ukuti, “Nkimba muntu wenu yunuyu, umwakuti impepo na mayigha ghope vikumwivwila!”

Currently Selected:

Maliko 4: LMBNT2016

Highlight

Copy