Maliko 3

U Yesu akumupozya umuntu uwa nyobe indemazu

(Mat. 12.9-14; Luk. 6.6-11)

1U Yesu akinjila sona munyumba iyakwiputilamo. Mulamula mukabamo umuntu uwa nyobe indemazu. 2Abantu bamo palapala bakalondagha pakumwagha u Yesu ni chifukwa ichakumupelela inongwa, po bakamwenelezya nkani ukuti bennye nanti angamupozya umuntu yula Pisiku Ilyakutuzya. 3U Yesu akamubuzya umuntu uwa nyobe indemazu yula akati, “Imilila, zagha kuntazi kuno.” 4Po akabalalusya abantu bala akati, “Nkimba Indaghilo zyitu zikutwitikizya pakubomba ichoni Pisiku Ilyakutuzya? Nkimba pakubomba ichintu ichiza pamo ichibibi? Nkimba pakubupoka ubumi pamo pakubunangannya?”

Loli abantu bala batakanenapo nachimochimo. 5U Yesu akabenelezya abantu nu bukalale, loli akaba ni chitima pakuti bakaba na moyo amapalapala. Panapo akamubuzya umuntu yula akati, “Gholosya inyobe yako!” Akayigholosya, inyobe yache, po yikaba sona akiza. 6Po aba Falisayi bakepamo nukubuka kuzi pakukomana umwalubilolubilo na bantu aba kabukatila aka Helodi pakwivwana namumo bangamughoghela u Yesu.

Ichilundilo chikumukonka u Yesu

7U Yesu na bamanyili bache bakabuka kunyanja iya Galileya, po ichilundilo icha bantu aba mu Galileya, sona naba mu Yudeya chikamukonka. 8Abantu banaba bakaba aba muchigaba icha Galileya, bamo aba muchigaba icha Yudeya, abanji aba mukaya aka Yelusalemu, bamo aba muchigaba icha Idumeya, abanji aba kwisila kwa Ulusoko ulwa Yolodani, bamo aba muchigaba ichakupalamana nu twaya utwa Tile nu Sidoni. Abantu bosi banaba bakiza kwa Yesu pachifukwa chakuti bakivwa zizyo akabombagha. 9#Mlko. 4.1; Luk. 5.1-3Ichilundilo chikaba chikulu nkani, umwakuti u Yesu akababuzya abamanyili bache ukuti bize nu bwato papipi ukuti abantu batakamufyenye. 10Pakuti akapozya abinji, abantu bosi ababine bakasunkilizannyanga kupipi nawe ukuti bamupalamasye. 11Posi papo abantu babo bakaba ni mizimu imibibi bamwennya, bakawa pasi papipi nawe nukukolomoka ukuti, “Awe we Mwana uwa Chala!”

12Loli u Yesu akayisoka nkani imizimu imibibi yila ukuti yitakamuvumbulaye.

U Yesu akubasala abatumiwa 12

(Mat. 10.1-4; Luk. 6.12-16)

13U Yesu akakwela pighamba nukubitizya abanavuli babo akalondagha. Bakiza kukwache, 14nukusalapo 12 nukubita ukuti batumiwa. Akababuzya akati, “Nabasala ukuti mubanje nane. Inkwiza pakubatuma pakulumbilila, 15mukwiza pakuba nu bulaghili ubwakwefezezya imizimu imibibi.”

16Abanavuli 12 babo akabasala bo aba: U Simoni (yuyo u Yesu akamwita ukuti we Pitala), 17nu Yakobo, nu wamwabo, nu Yohani, abana aba Zebediya (u Yesu akabita ukuti Bowanegesi, chicho chikung'anamula ukuti, “Bakali ngati kupaya kwa vula”), 18nu Andeleya, nu Filipu, nu Batolomeyo, nu Matayi, nu Tomasi, nu Yakobo umwana uwa Alufeyo, nu Tadayi, nu Simoni uwa akabukatila, kako kakalondagha ukuti mu Izilayeli mubanje ubwabuke, 19nu Yudasi Sikaliyoti, yuyo pisinda pache akamubika u Yesu munyobe izya balwani.

U Yesu nu Belezebuli

(Mat. 12.22-32; Luk. 11.14-23, 12.10)

20Po u Yesu akinjila munyumba. Abantu abinji bakabungana sona, umwakuti u Yesu na bamanyili bache batakaba na kabalilo akakulyela. 21Bo abakamu bache bivwa zinizi, bakabuka pakumulema pakuti abantu bakanenagha ukuti, “U Yesu apena.”

22 # Mat. 9.34, 10.25 Abamanyisi bamo aba Ndaghilo babo bakafuma mu Yelusalemu bakati, “Ali nu Belezebuli, usongo uwa mizimu imibibi, yuyo akumupa amaka aghakwefezezya imizimu imibibi.”

23Po u Yesu akabitizya abantu bala nukunena nabo muvyili ukuti, “Nkimba u Satana angamwefya buli-buli u Satana? 24Nanti ubumwene bwasambukilana bwene-bwene, ubumwene bula butangendelela, 25nanti abantu aba munyumba yoka basambukilana, inyumba yila yitangendelela. 26Po nanti ubumwene ubwa Satana bwasambukilana nukugabinkana, ubumwene bula butangendelela, bunubu bukwiza pakuba bumalilo bwache.

27“Nayumo umuntu yuyo angapankula inyumba iya muntu uwamaka nukusenda ivintu vyache vyosi, pene papo amupinya tasi umuntu uwamaka yula, po angasenda vyosi vivyo akulonda.

28“Naloli inkubabuzya ukuti abantu bangahobokeliwa imbibi zyabo zyosi na vyosi vivyo bangamusamula u Chala.#3.28 bangamusamula u Chala: Pamo ivintu ivibibi vivyo banganena. 29#Luk. 12.10Loli umuntu wesi yuyo akumusamula u Muzimu Umuzelu, atakwiza pakuhobokeliwa nalumolumo, pakuti ananga imbibi iya bwila na bwila.” 30(U Yesu akanena zinizi pakuti abantu bamo bakatinji, “Ali nu muzimu umubibi.”)

Unyina na bawamwabo aba Yesu

(Mat. 12.46-50; Luk. 8.19-21)

31Unyina uwa Yesu na bawamwabo bakafika kunyumba kula nukwimilila kuzi, po akumutuma umuntu pakumwitizya. 32Ichilundilo chikikala umwakumuzyungulila u Yesu nukumubuzya ukuti, “Unyoko na bawamwinyu bali kuzi, bakukulonda.”

33U Yesu akamula akati, “Nkimba umayi wane we wenu? Nkimba abawamwitu bo bawenu?” 34Akennya abantu babo bakikala umwakumuzyungulila nukuti, “Umayi wane na bawamwitu bo aba! 35Pakuti umuntu wesi yuyo akubomba zizyo u Chala akulonda, we wamwitu, we muyemba wane, sona we mayi wane.”

Currently Selected:

Maliko 3: LMBNT2016

Highlight

Copy