Matayi 18

We wenu yuyo we songo nkani?

(Mlko. 9.33-37; Luk. 9.46-48)

1 # Luk. 22.24 Pakabalilo kalakala abamanyili bakiza kwa Yesu nukumulalusya ukuti, “Nkimba we wenu we songo nkani mu Bumwene ubwa Kumwanya?”

2U Yesu akamwitizya umwana nukumwimika pakasi papabo 3#Mlko. 10.15; Luk. 18.17nukuti, “Naloli inkubabuzya ukuti ukusita pakuba ngati bo bana, mute mukinjilemo nalumolumo mu Bumwene ubwa Kumwanya. 4Usongo mu Bumwene ubwa Kumwanya muntu yuyo akwiyisya mwene pakuba ngati ko kamwana aka. 5Po umuntu wesi yuyo akumupokela weka uwa aba mwitabwa lyane, akumpokela nene.”

Injelo izyakubapuvya abantu

(Mlko. 9.42-48; Luk. 17.1-2)

6“Nanti umuntu yumo akupuvya weka uwa bana abanandi aba ukuleka pakunsubila, chingaba chizapo ukuti umuntu yula bamupinyilile ulwala ulukulu musingo nukumudwibika munyanja inyibizu. 7Chighune nkani kuchisu ichapasi pachifukwa icha vintu vivyo vikubapuvya abantu! Ivintu vinivi vikwiza pakubombiwanga, loli chighune nu muntu yuyo akwiza ni vintu vinivi!

8 # Mat. 5.30 “Nanti inyobe pamo ulwayo lwako lukukupuvya ludumule nukulutagha! Pakuti chizapo pakwinjila mubumi ubwa bwila na bwila umusita nyobe pamo ulwayo ukuchila pakuba ni nyobe ni nyayo zyako zyosi nukusumbiwa pamoto uwa bwila na bwila. 9#Mat. 5.29Sona nanti ilyiso lyako likukupuvya, likolompolelyo nukulisumba! Pakuti chizapo pakwinjila mubumi ubwa bwila na bwila ni lyiso lyoka ukuchila pakuba na maso ghosi mabili nukusumbiwa pamoto uwa mu Gehena.

Ichili icha ng'ozi iyakusobela

(Luk. 15.3-7)

10“Muchebaye ukuti mutakusula weka uwa bana abanandi banaba. Pakuti inkubabuzya ukuti akabalilo kosi abantumi babo aba kumwanya bali pamaso pa Tata wane uwa kumwanya.#18.10 Amasimbo ghamo aghakale ghonjelezya ivesi ilya 11: Pakuti u Mwana uwa Muntu akiza pakubapoka abantu abakusobela (ennya mwa Luk. 19.10).

12“Mukwinong'ona ichoni nanti umuntu ali ni ng'ozi 100, loli yoka yasobela? Nkimba atakuzileka izinji 99 zila zikulya pighamba nukubuka pakulonda yoka yiyo yisobelite? 13Naloli inkubabuzya ukuti nanti ayagha, akuhoboka nkani nayo ukuchila izinji 99 zila zizyo zitakasobela. 14Momumo Ughuso#18.14 Ughuso: Amasimbo ghamo aghakale ghasimbite ukuti Tata wane. uwa kumwanya atakulonda ukuti yumo uwa bana abanandi banaba asobele.

Nanti umukamu akunangila

15 # Luk. 17.3 “Nanti umukamu wako akunangila,#18.15 akunangila: Amasimbo ghamo aghakale ghasimbite ukuti ananga. bukagha kukwache nukumulanjizya chicho ananga. Loli ubombaye izi kubusyefu, pakasi pa mwe babili. Nanti akwivwila, panapo wamunyosya umukamu wako. 16#Ukk. 19.15Loli nanti atakukwivwila, sendelapo umuntu yumo pamo babili, umwakuti inongwa yosi yisimikiziwe na bakaboni babili pamo abinji. 17Sona nanti akana pakubivwila, chibuzye ichipanga inongwa yosi. Pabumalilo, nanti atakwivwila ichipanga, mumusende ngati we muntu uwakuzi pamo umusonkezya sonko.

Nizya ukupinya nu kusatula

18 # Mat. 16.19; Yoh. 20.23 “Polelo naloli inkubabuzya ukuti chosi chicho mwachipinya pasi pano chapinyiwa na kumwanya bulo, sona chosi chicho mwachisatula pasi pano chasatuliwa na kumwanya bulo.

19“Inkubabuzya sona ukuti nanti mwe babili mwivwana pachintu pasi pano pakulaba chimo kwa Tata wane uwa kumwanya, akwiza pakubapa. 20Pakuti nanti babili pamo batatu bakuba poka mwitabwa lyane, indi poka nabo.”

Ichili icha wambombo umusita luhobokelo

21 # Luk. 17.3-4 Po u Pitala akiza kwa Yesu nukulalusya ukuti, “Mwene, nanti umukamu akwendelela pakunangila, nkimba imuhobokelaye kalinga? Ka seveni?”

22 # Ubw. 4.24 U Yesu akamula akati, “Awe, kate ka seveni, loli ka 77.#18.22 77: Pamo 70 ukubalizya nu seveni. 23Pakuti Ubumwene ubwa Kumwanya buyanite bulo nu mwene yuyo akalonda pakubelengela inkongole yiyo abambombo bache bakakopa kukwache. 24Bo akwanda bulo pakubelengela, bakiza nawe umuntu yuyo akakopa inkongole iya ndalama amamilyoni na mamilyoni. 25Pakuti uwambombo yula atakaba nazyo indalama izyakulipa inkongole yila, u mwene akalamula ukuti bamughulizye poka nu muchi wache na bana bache pakuba bazya, sona na vyosi vivyo akaba navyo ukuti alipile inkongole. 26Uwambombo akafughama pamaso pa mwene yula nukumulaba ukuti, ‘Mwene, nalamba undindilile panandi inkwiza pakulipila vyosi!’ 27U mwene wache akamupelela ichisa, po akamuhobokela inkongole nukumuleka ukuti abukaye.

28“Loli bo uwambombo yula afuma kuzi, akakomana nu wambombo uwamwabo yuyo akakopa inkongole iya ndalama inandi. Akamulema kusingo nukumufina. Akati, ‘Undipe inkongole yosi yiyo ukakopa!’ 29Po uwambombo uwamwabo akawa pasi munyayo zyache nukumulaba ukuti, ‘Nalamba undindilile panandi inkwiza pakulipila vyosi!’ 30Loli akakana nukumwighalila mujele mupaka alipile inkongole yiyo akakopa. 31Bo abambombo abamwabo bennya zizyo zikabombiwa, bakaba ni chitima nkani nukubuka pakumubuzya u mwene wabo zyosi zizyo zikabombiwa. 32Po akamwitizya uwambombo yula nukumubuzya ukuti, ‘We wambombo umubibi awe! Inkakuhobokela inkongole yosi yiyo ukakopa pachifukwa chakuti ukandaba. 33Wabaghiye pakuba ni chisa nu wambombo uwamwinyu ukuyana na mumo inkabela ni chisa nawe!’ 34U mwene akakalala nkani nukumwinjizya uwambombo yula mujele ukuti afundiwe mupaka alipile inkongole yosi yiyo akakopa.”

35Po u Yesu akamalizya nukuti, “Momumo Utata wane uwa kumwanya akwiza pakubombela na wesi uwa amwe nanti mutakubahobokela abawamwinyu nu moyo winyu ghosi.”

Currently Selected:

Matayi 18: LMBNT2016

Highlight

Copy