Matayi 17

U Yesu akwanduka pighamba

(Mlko. 9.2-13; Luk. 9.28-36)

1 # 2 Pit. 1.17-18 Bo ghachilapo amasiku sikisi, u Yesu akasenda u Pitala, nu Yakobo nu Yohani uwamwabo uwa Yakobo nukukwela nabo pighamba itali nkani, kuko bakaba bene. 2Bo bakumwennya, akabonekele aka Yesu kakanduka. Icheni chache chikanyezimila ngati lyo lizuba, sona amenda ghache ghakaba maswepu nkani! 3Po abamanyili batatu bala bakamwennya u Mozesi nu Eliya bakunenezannya nu Yesu. 4Po u Pitala akamubuzya u Yesu akati, “Wee Mwene, chizapo ukuti aswe tuli pano! Nanti ukulonda, inkwiza pakuzenga ivisakasa vitatu, choka chako, ichinji icha Mozesi, sona nicha Eliya.” 5#Ubw. 22.2; Ukk. 18.15; Mas. 2.7; Yes. 42.1; Mat. 3.17, 12.18; Mlko. 1.11; Luk. 3.22Bo u Pitala achili akunena, ibingu ilyakulama likabakupikila, sona izyu likivwika mwibingu likati, “Uyu Mwana wane umughaniwa, yuyo ihobokite nkani nawe. Mumwivwilaye!”

6Bo abamanyili bala bivwa izyu, bakanyila nkani, umwakuti bakakupamila pasi. 7U Yesu akiza kukwabo nukubapalamasya. Akati, “Nyamuka, mutakanyilaye!” 8Bo bakutalankannya batakamwennyapo nayumo umuntu, loli u Yesu mwene.

9Bo bakwika pighamba, u Yesu akabasoka akati, “Mutakamubuzyepo nayumo umuntu nizya chisetuka chicho mwachennya mupaka u Mwana uwa Muntu azyuke kubufwe.”

10Po abamanyili bala bakalalusya bakati, “Nkimba choni chicho abamanyisi aba Ndaghilo bakunena ukuti u Eliya abaghiye ize tasi?” 11U Yesu akamula akati, “Naloli u Eliya abaghiye ize tasi ukuti ayanizye zila vyosi. 12#Mat. 11.14Loli inkubabuzya ukuti u Eliya izite kale, po abantu batakamumanya, loli bakamubombela vivyo bakalondagha. Momumo bakwiza pakumubombela nu Mwana uwa Muntu bulo.”

13Po abamanyili bakivwisya ukuti akanenagha kukwabo nizya Yohani Uwalozyo.

U Yesu akupozya umulumendo uwa muzimu umubibi

(Mlko. 9.14-29; Luk. 9.37-43a)

14Bo banyokela ku chilundilo, umuntu yumo akiza kwa Yesu, akafughama, 15nukuti, “Wee Mwene, umupelele ichisa umwana wane pakuti wakazilisi. Akutamiwa nkani umwakuti akabalilo akinji akuwila pamoto na mumizi. 16Nkiza nawe ku bamanyili bako, loli bakapotwa pakumupozya.” 17U Yesu akamula akati, “Mwe bantu abankulilo iyi mwe basita lwitiko! Nkimba nikale namwe mupaka liyi? Fwandi nkibe namwe mupaka liyi? Zagha nawe umulumendo kuno!” 18U Yesu akaghulamula umuzimu umubibi ghula ukwepamo, po ghukepamo mu mulumendo yula, pakabalilo kanako akapola.

19Pisinda pa zinizi abamanyili bakiza kwa Yesu kulubazu nukumulalusya ukuti, “Nkimba choni chicho aswe tukapotwa pakwefya umuzimu ghula?”

20 # Mat. 21.21; Mlko. 11.23; 1 Kol. 13.2 U Yesu akamula akati, “Pachifukwa chakuti mwe bantu aba lwitiko ulunandi. Naloli inkubabuzya ukuti nanti mukabanga nu lwitiko napapo lunandi bulo ngati ko kambeyu aka muzimwa, ngali mwalibuzya ighamba ili ukuti, ‘Epapo pano bukagha pala,’ naloli lingabuka. Ngali mwabombite ivintu vyosi!”#17.20 Amasimbo ghamo aghakale ghonjelezya ivesi ilya 21: Loli inyiputo zyene nu kutuzya pakulya vyo vivyo vingefyamo umuzimu umubibi ghunughu; nachimochimo ichinji (ennya mwa Mlko. 9.29).

U Yesu akunenela zila sona nizya bufwe nu kuzyuka kwache

(Mlko. 9.30-32; Luk. 9.43b-45)

22Bo abamanyili bosi babungana poka mu Galileya, u Yesu akababuzya akati, “U Mwana uwa Muntu akwiza pakubikiwa munyobe izya balwani, 23babo bakwiza pakumughogha. Loli bo ghachilapo amasiku matatu akwiza pakuzyuka kubufwe.”

Abamanyili bache bakaba ni chitima nkani.

Nizya kusonka umusonko uwa mu Nyumba iya Chala

24 # Ukf. 30.13, 38.26 Bo u Yesu na bamanyili bache biza mu Kapelinahumu, abasonkezya sonko aba mu Nyumba iya Chala bakiza kwa Pitala nukulalusya ukuti, “Nkimba umumanyisi winyu akusonka umusonko uwa mu Nyumba iya Chala?”

25U Pitala akamula akati, “Ee, akusonka.”

Bo u Pitala injila munyumba mula, u Yesu akanda pakunena tasi ukuti, “Simoni, ukwinong'ona ichoni? We wenu yuyo akusonka umusonko pakasi pa bamwene aba muchisu ichapasi? Abenechisu pamo abayeni?”

26U Pitala akamula akati, “Abayeni.”

U Yesu akamula akati, “Chiza, abenechisu batakasonkaye umusonko. 27Loli tutakulonda pakubakalalizya abantu banaba. Po bukagha kunyanja nukusikula iswi. Iswi yakwanda yiyo walema uyitanule umulomo wache, po ukwiza pakuyagha indalama, yiyo yikuyana pakusonkela umusonko wako nu wane.”

Currently Selected:

Matayi 17: LMBNT2016

Highlight

Copy