Luka 5

U Yesu akwitizya abamanyili abakwanda

(Mat. 4.18-22; Mlko. 1.16-20)

1 # Mat. 13.1-2; Mlko. 3.9-10, 4.1 Isiku limo, u Yesu akimilila mulubazu ulwa nyanja iya Genesaleti, bo abantu bakumufyenya ukuti bateghelezye amazyu agha Chala. 2Akennya amabwato mabili mulubazu ulwa nyanja; abalobaswi bakepamo nukusuka ivilepa vyabo. 3U Yesu akakwela mubwato bumo, bubo bukaba ubwa Simoni nukumubuzya ukuti asunkile panandi ukufuma pisila. U Yesu akikala mubwato nukubamanyizya abantu.

4Bo amala pakunena, akamubuzya u Simoni ukuti, “Sunkila ubwato pabuzilo bubo bwibilite, awe na bamwinyu musumbile ivilepa vyinyu mumizi ukuti mulobe iswi.”

5 # Yoh. 21.3 U Simoni akamula akati, “Mwene tubombite busiku bosi, loli tutalemitepo nachimochimo. Loli pakuti wewe wanena bunubu, inkwiza pakusumbila ivilepa.” 6#Yoh. 21.6Bakasumbila nukuloba iswi inyinji, umwakuti ivilepa vikaba papipi pakuzepuka. 7Po bakabakopezya abamwabo babo bakaba mubwato ubunji ukuti babavwe. Bakiza nukwizuzya iswi mu mabwato ghosi mabili, umwakuti amabwato ghalaghala ghakanda pakudwiba. 8Bo u Simoni Pitala ennya vivyo vikabombiwa, akafughama pamaso pa Yesu nukuti, “Wee Mwene, epako kukwane! Ane ne muntu wambibi!”

9U Pitala poka na bamwabo babo bakaba nawe bakaswigha nkani nu bwinji ubwa iswi zizyo bakaloba. 10U Yakobo nu Yohani abana aba Zebediya, abamwabo aba Simoni bope bakaswigha nkani, po u Yesu akamubuzya u Simoni akati, “Utakanyilaye; ukwandila pakabalilo aka ukwiza pakuba we muloba bantu.”

11Bakawesela ubwato pisila panyanja, po bakavileka vyosi nukumukonka u Yesu.

U Yesu akumupozya umuntu

(Mat. 8.1-4; Mlko. 1.40-45)

12Bo u Yesu ali mukaya akakulu kukiza umuntu yumo, yuyo akatamiwanga nu bubine ubwa mambombo. Bo amwennya u Yesu akisumba mwene pasi nukumulaba ukuti, “Mwene, nanti ukulonda unganswefya.”#5.12 unganswefya: Amambombo bukaba bubine bubo bukamukanizyanga umuntu ukuti atakamwiputaye u Chala pakuti abantu bakamwinong'onelagha ukuti akaba munyazu pamaso pa Chala.

13U Yesu akagholosya inyobe yache, akamulema, nukwamula ukuti, “Nkulonda swepa!” Panapo na panapo amambombo ghala ghakamuleka umuntu yula. 14#Lev. 14.1-32U Yesu akamulamula akati, “Utakamubuzyepo nayumo umuntu. Loli bukagha wilanjizye ku muputi ukuti akupime; ukuti abantu bosi bamanye ukuti wapola, ubike ichabupi chicho u Mozesi akalamula.”

15Loli ipangwi ilya Yesu likasata posi na posi, sona ichilundilo icha bantu chikiza pakumuteghelezya nukuti bapole ububine bwabo. 16Loli akabuka kubuzilo kuko kutakabako abantu nukwiputa.

U Yesu akumupozya umuntu umulemazu

(Mat. 9.1-8; Mlko. 2.1-12)

17Isiku limo bo u Yesu akumanyizya, aba Falisayi na bamanyisi aba Ndaghilo bamo bakikala palapala babo bakafuma muvigaba vyosi ivya Galileya nu Yudeya nukufuma sona mu Yelusalemu. Amaka agha Mwene ghakaba nu Yesu ukuti apozye ababine. 18Abanavuli bamo bakiza banyamuye umuntu umulemazu pachibonde, bakayezya pakumwinjizya munyumba nukumubika pamaso pa Yesu. 19Loli bakati bapotwa apakwinjililapo nawe pachifukwa icha chilundilo icha bantu, bakakwela nawe pachisonje icha nyumba yila. Po bakapela ubwazi nukumwinjizya, bo alambalaye pachibonde pakasi pa bantu nukumwisizya pamaso pa Yesu. 20Bo u Yesu ennya ulwitiko lwabo, akamubuzya umuntu yula akati, “Wee mumanyani, imbibi zyako zyahobokeliwa.”

21Abamanyisi aba Ndaghilo naba Falisayi bakanda pakwilalusya bene mumoyo ghabo ukuti, “Nkimba we wenu umuntu yunuyu, yuyo akumusamula u Chala? Nkimba ate we Chala mwene yuyo angahobokela imbibi?”

22U Yesu akazimanya inyinong'ono zyabo, po akabalalusya akati, “Nkimba choni chicho mukwinong'ona bunubu mumoyo ghinyu? 23Nkimba chili ko kwiyi chicho chipepe pakumubuzya ukuti, ‘Imbibi zyako zyahobokeliwa’, pamo pakumubuzya ukuti, ‘Nyamuka endagha?’ 24Loli inkwiza pakubasimikizizya ukuti u Mwana uwa Muntu ali nu bulaghili pachisu ichapasi pano ubwakuhobokela imbibi.” Po akamubuzya umuntu umulemazu yula akati, “Inkukubuzya, nyamuka, nyamula ichibonde chako bwelagha.”

25Panapo umubine yula akanyamuka, bo abantu bosi bakumwennya, akanyamula ichibonde chache akalambalalapo nukubwela, bo akumupala u Chala. 26Bosi bakaswigha nkani! Pachifukwa icha bogha, bakamupala u Chala nukuti, “Ilelo twennya ivyakuswighizya nkani!”

U Yesu akumwitizya u Levi

(Mat. 9.9-13; Mlko. 2.13-17)

27Pisinda pache u Yesu akepapo pabuzilo bula nukumwennya umusonkezya sonko, u Levi, bo ikaye munyumba iyakusonkelamo umusonko. Akamubuzya akati, “Nkonka!” 28Po u Levi akanyamuka, sona akavileka vyosi nukumukonka u Yesu.

29Po u Levi akamuyanizizya u Yesu ulusekelo ulukulu munyumba yache. Abasonkezya sonko abinji poka na bantu abanji bakaba nabo palusekelo lulalula. 30#Luk. 15.1-2Aba Falisayi na bamanyisi aba Ndaghilo bamo, babo bakaba ba kabukatila kabo bakilumbusya ku bamanyili aba Yesu ukuti, “Nkimba choni chicho ali pakulya nu kung'wela poka na basonkezya sonko, sona na bantu abambibi?”

31U Yesu akabamula akati, “Abantu abapuma batakumulonda umughanga, loli bene babo babine. 32Ntizite pakwitizya abantu abagholosu ukuti bapinduke, loli nizite pakwitizya abantu abambibi.”

Bakumulalusya u Yesu nizya kutuzya pakulya

(Mat. 9.14-17; Mlko. 2.18-22)

33Abantu bamo bakamubuzya u Yesu bakati, “Abamanyili aba Yohani bakutuzya pakulya kabilikabili nu kwiputa, po abamanyili aba ba Falisayi bope bakubomba bunubu. Loli abamanyili bako bakulya nu kung'wela bulo.”

34U Yesu akamula akati, “Nkimba mukwinong'ona ukuti chingabombiwa ukuti abayeni aba pasendwa batuzye pakulya, bo umwenesendwa ali poka nabo? Awe! 35Loli isiku likwiza, lilyo umwenesendwa bamwefyako kukwabo, po bakwiza ukutuzya pakulya.”

36U Yesu akababuzya sona ichili akati, “Nayumo umuntu yuyo akuzepula ichigamba pamwenda umupya nukuchigambika pamwenda uwakale. Nanti akubomba bunubu, akwiza pakuzepula umwenda umupya ghula, sona ichigamba ichipya chila chitangayana nu mwenda uwakale ghula. 37Nayumo umuntu yuyo angapungulila uvinyo umupya mutunyambi utwa makwela utwakale. Nanti angabomba bunubu, uvinyo angazepula utunyambi tula, po vyosi vibili vinivi, uvinyo nu tunyambi vikwiza pakunanganika. 38Loli uvinyo umupya apunguliliwe mutunyambi utupya. 39Nayumo umuntu yuyo angalonda uvinyo umupya, bo ang'wela uvinyo umukali. Pakuti abantu bakuti, ‘Uvinyo umukali mwizapo.’ ”

Currently Selected:

Luka 5: LMBNT2016

Highlight

Copy