Luka 4

Ukuyeliwa kwa Yesu

(Mat. 4.1-11; Mlko. 1.12-13)

1U Yesu akanyokako kulusoko ulwa Yolodani, bo izuye nu Muzimu Umuzelu. U Muzimu Umuzelu yula akamusendela munkolongo, 2mumo akayeliwa nu Satana amasiku 40. Pakabalilo kosi kalakala atakalyapo nachimochimo, umwakuti pabumalilo ubwa masiku ghala, izala yikamulema.

3U Satana akamubuzya akati, “Nanti awe we Mwana uwa Chala, lamula ibwe ili ukuti lyanduke pakuba chibama.”

4 # Ukk. 8.3 Loli u Yesu akamula akati, “Amasimbo ghakuti, ‘Umuntu atangikala nubumi ni chakulya chene.’ ”

5Pisinda pache u Satana akamusendela u Yesu pa bukwela nukumulanjizya pakabalilo akanandi nkani ubumwene bosi ubwa muchisu ichapasi.

6Po u Satana akamubuzya akati, “Nkwiza pakukupa amaka nu bukabi bosi ubu pakuti ivintu vyosi vinivi vipeghiwe kukwane, sona ningamupa umuntu wesi yuyo nalonda. 7Ivintu vyosi vinivi vikwiza pakuba vyako, nanti ukunchindika.” 8#Ukk. 6.13Panapa u Yesu akamwamula akati, “Amasimbo ghakuti, ‘Umuchindikaye u Mwene u Chala wako, sona umubombelaye yuyo mwene!’ ”

9Po u Satana akamusendela u Yesu mu Yelusalemu nukumukwezya pachisonje icha Nyumba iya Chala nukumubuzya ukuti, “Nanti awe we Mwana uwa Chala isumba wemwene pasi. 10#Mas. 91.11Pakuti Amasimbo ghakuti, ‘U Chala akwiza pakubalamula abantumi bache pakukusungilila awe.’ 11#Mas. 91.12Sona ghakuti, ‘Bakwiza pakukwankila ni nyobe zyabo, umwakuti ni nyayo zyako bulo zitakivulazye pa mabwe.’ ”

12 # Ukk. 6.16 Loli u Yesu akati, “Amasimbo ghakuti, ‘Utakamuyelaye u Mwene u Chala wako.’ ”

13Bo u Satana amala pakumuyela u Yesu bunubu, akamuleka nukulindilila akabalilo akanji.

U Yesu anda imbombo yache mu Galileya

(Mat. 4.12-17; Mlko. 1.14-15)

14Po u Yesu akanyokela ku Galileya na maka agha Muzimu Umuzelu. Ipangwi lyache likasata muchigaba chosi chila. 15Akamanyizya munyumba izyakwiputilamo nukupaliwa na bantu bosi.

U Yesu bakumukana mu Nazaleti

(Mat. 13.53-58; Mlko. 6.1-6)

16Po u Yesu akabuka ku Nazaleti, kuko akakulila, sona Pisiku Ilyakutuzya akinjila munyumba iyakwiputilamo ukuyana na mumo akizubilila. Akimilila ukuti abelenge Amasimbo, 17po bakamupa ibuku ilya mulaghuzi u Yesaya. Akazungulula ibuku innyenge lila nukwagha pabuzilo bubo busimbiwepo ukuti,

18 # Yes. 61.1-2 “U Muzimu uwa Mwene ali papane

pachifukwa chakuti ampakazya ukuti indumbilile amazyu amiza

pakasi pa bantu abapina.

Antuma ukuti imfumuzye ubusatuke ubwa babo bali mujele

nukuti abafwamaso bennyanje sona

nukubapa ubusatuke babo bakukanyililiwa.

19Antuma imfumuzye ukuti akabalilo kakwana

kako u Mwene akwiza pakubapoka abantu bache.”

20U Yesu akighalila ibuku nukumunyosezya uwambombo yula nukwikala pasi. Abantu bosi munyumba iyakwiputilamo yila bakamwenelezya nkani. 21Akababuzya akati, “Amasimbo ghagho mwivwa ghakubelengiwa ilelo ghakwanilisiwa.”

22Bosi bakamupala nukuswigha nkani na mazyu aghakulema umoyo ghagho akanena. Bakanena bakati, “Nkimba yunuyu ate mwana uwa Yosefu?”

23Akababuzya akati, “Naloli mukwiza pakunena ichili ukuti, ‘Mughanga ipozya wemwene.’ Mukwiza pakumbuzya sona ukuti, ‘Zizyo twivwa ukuzibomba mukaya aka Kapelinahumu, zyo zizyo uzibombe sona na muno bulo.’ ” 24#Yoh. 4.44U Yesu akonjelezya pakunena akati, “Naloli inkubabuzya ukuti umulaghuzi atakupokeleliwapo nalumolumo mukaya kache.

25 # 1 Abm. 17.1 “Naloli inkubabuzya ukuti bakabamo abakolo abafwilwe abinji nkani mu Izilayeli pakabalilo aka mulaghuzi u Eliya, ivula yitakatima amaka matatu na mezi sikisi, umwakuti izala inkulu nkani yikawa pachisu chosi. 26#1 Abm. 17.8-16Loli u Eliya atakatumiwa ku weka uwa balabala mu Izilayeli, loli umukolo umufwilwe mwene, yuyo akikalagha mu Zalefati muchigaba icha Sidoni. 27#2 Abm. 5.1-14Mukabamo abantu abinji nkani mu Izilayeli, babo bakayimbagha na mambombo pakabalilo aka mulaghuzi u Elisha. Loli atakabapo nayumo umuntu yuyo akapola, loli mwene u Naamani uwa muchisu icha Siliya.”

28Bo abantu munyumba iyakwiputilamo bivwa zinizi, bakakalala nkani. 29Bakanyamuka nukumusunkilizya u Yesu kuzi ukuti epemo mukaya kabo nukubuka nawe pamwanya pighamba, papo pakazengiwapo akaya kala. Bakalondagha ukuti bamusumbile pasi, 30loli akadumusannya bulo muchilundilo icha bantu nukubuka.

U Yesu akwefya umuzimu umubibi mu muntu

(Mlko. 1.21-28)

31Po u Yesu akabuka ku Kapelinahumu, akaya kamo aka muchigaba icha Galileya pakumanyizya abantu Pisiku Ilyakutuzya. 32#Mat. 7.28-29Abantu bosi bakaswigha nkani na vivyo akamanyizyanga, pachifukwa chakuti akanenagha ngati we mwenecho uwa bulaghili. 33Munyumba iyakwiputilamo mulamula mukabamo umuntu yuyo akaba nu muzimu umubibi. Akakolomoka nkani, 34akati, “Wee! Yesu uwa mu Nazaleti, ukulonda ichoni naswe. Nkimba wiza pakutunangannya? Inkumenye! Awe we ntumi izelu iya Chala!”

35U Yesu akaghulamula umuzimu umubibi ghula akati, “Banga myee, sona epamo mu muntu uyu!” U Satana akamusumbila pasi umuntu yula pamaso papabo nukwepamo mumwache ukusita ukumuvulazya.

36Abantu bosi bakaswigha nkani nukunenezannya benebene ukuti, “Nkimba mazyu ghoni ghanagha? Nu bulaghili, sona na maka umuntu uyu akulamula imizimu imibibi, sona yikufuma!” 37Ipangwi ilya Yesu likasata posi na posi muchigaba chosi chila.

U Yesu akubapozya abantu abinji

(Mat. 8.14-17; Mlko. 1.29-34)

38U Yesu akepamo munyumba iyakwiputilamo nukubuka kunyumba iya Simoni. Unyinavyala uwa Simoni akabinagha izegema, po abantu bakamulaba u Yesu ukuti amwavwe. 39U Yesu akabuka, akinamila papache nukuyilamula izegema yila ukuti yimuleke, po izegema yikamuleka. Umwalubilolubilo umukolo yula akanyamuka nukwanda pakubabombela.

40Bo izuba lyinjila, bosi babo bakaba na bamanyani babo, babo bakaba nu bubine ubwakulekanalekana bakiza nabo kwa Yesu. Akabika inyobe zyache papabo paweka na weka nukubapozya bosi. 41Imizimu imibibi yope yikepamo mu bantu abinji pakukolomoka ukuti, “Awe we Mwana uwa Chala!”

U Yesu akayilamula imizimu imibibi yila ukuleka pakunena pakuti yikamumanya ukuti akaba we Kilisitu.

U Yesu akulumbilila munyumba iyakwiputilamo

(Mlko. 1.35-39)

42Bo kwacha, u Yesu akepamo mu Kapelinahumu nukubuka kubuzilo kuko kutakabako abantu. Abantu bakanda pakumulonda, bo bamwagha bakayezya pakumukanizya ukwepako. 43Loli u Yesu akababuzya akati, “Imbaghiye pakulumbilila Amazyu Amiza agha Bumwene ubwa Chala na mutwaya utunji bulo pakuti cho chicho u Chala akantuma pakubomba!”

44Po akalumbililagha munyumba izyakwiputilamo muchigaba icha Yudeya.

Currently Selected:

Luka 4: LMBNT2016

Highlight

Copy