Luka 3

Ubulumbilili ubwa Yohani Uwalozyo

(Mat. 3.1-12; Mlko. 1.1-8; Yoh. 1.19-28)

1Ghukaba mwaka uwa 15, bo u Kesale u Tibeliyasi akulaghila; u Pontiyo Pilati akaba mulaghili uwa chigaba icha Yudeya; u Helodi akaba mulaghili uwa chigaba icha Galileya, sona uwamwabo u Filipu akaba mulaghili uwa chigaba icha Ituliya nu Tilakoniti; u Lusaniya akaba mulaghili uwa chigaba icha Abileni, 2sona u Anasi nu Kayafa bakaba Baputi Abasongo nkani. Pakabalilo kalakala u Chala akanena amazyu kwa Yohani umwana uwa Zekaliya munkolongo. 3Po u Yohani akenda muchigaba chosi icha lusoko ulwa Yolodani nukulumbilila pakasi pa bantu ukuti, “Pinduka nukuzileka imbibi zyinyu nukoziwa, po u Chala akwiza pakubahobokela imbibi zyinyu.” 4#Yes. 40.3-5Pakuti zisimbiwe mwibuku ilya mulaghuzi u Yesaya ukuti,

“Izyu ilya muntu yumo likukolomoka munkolongo likuti,

‘Yannya umusebo uwa Mwene,

gholosya izila ukuti endemo!

5Amakombe ghosi ghafukiliwe,

ighamba lyosi na kaghamba kosi vitenganiziwe.

Izila zyosi inyongane zigholosiwe,

sona utuzila utwa tubanka tutenganiziwe.

6Abantu bosi bakwiza pakwennya ubupoki ubwa Chala!’ ”

7 # Mat. 12.34, 23.33 Ichilundilo icha bantu chikiza kukwache ukuti choziwe. Po akababuzya akati, “Amwe mwe bana aba njoka! Nkimba we wenu abasokite pakuluchimbila ulufundo ulwa Chala lulo lukwiza? 8#Yoh. 8.33Bombagha imbombo izyakulanjizya ukuti naloli mwapinduka nukuzileka imbibi zyinyu. Mutakinenaye mwebene ukuti, ‘U Abulahamu we munyenya witu.’ Inkubabuzya ukuti u Chala angaghapela amabwe agha pakuba baluko aba Abulahamu. 9#Mat. 7.19Intemo yiyaniziwe kale pakudumula amakwi pasi pamagululuzi. Ikwi lyosi lilyo litakwela ivikomwa inyiza likwiza pakudumuliwa nukusumbiwa pamoto.”

10Po ichilundilo icha bantu chikamulalusya chikati, “Nkimba tubombaye ichoni?”

11U Yohani akamula akati, “Umuntu wesi yuyo ali na menda mabili amupeko ghoka uwamwabo yuyo ate nagho, sona umuntu wesi yuyo ali ni chakulya amugabileko uwamwabo.”

12 # Luk. 7.29 Bope abasonkezya sonko bakiza pakoziwa nukulalusya ukuti, “Mumanyisi, nkimba tubombaye ichoni?”

13U Yohani akabamula akati, “Mutakasonkezyanje umusonko ukuchila mumo mukalamuliliwa.”

14Abasikali abankondo bope bakiza bakalalusya bakati, “Po nkimba aswe, tubombaye ichoni?”

Akati, “Mutakabafyulaye indalama abantu pamo ukumutamantila umuntu na yumo-yumo. Mwikutaye na malipilo ghinyu.”

15Ulusubilo ulwa bantu lukanda pakukula, sona bakanda pakuswigha ukuti pamo u Yohani angaba we Kilisitu. 16Po u Yohani akababuzya abantu bosi akati, “Ane inkubozya na mizi, loli pisinda papane pakwiza yumo uwamaka ukunchila. Ane ntabaghiye napo panandi pakwinama nukusatula utupinyilo utwa nkwato zyache. Akwiza pakubozya nu Muzimu Umuzelu, sona nu moto. 17Ali nu luselo munyobe zyache ulwakupetela ingano. Po akwiza pakubika ingano muntamba, loli ilyelelo likwiza pakochiwa nu moto, ghugho ghutakuzimapo nalumolumo.”

18U Yohani akalumbilila Amazyu Amiza muzila inyinji izyakulekanalekana pakasi pa bantu nukubasoka nkani. 19#Mat. 14.3-4; Mlko. 6.17-18Loli u Yohani akamunena nkani umwene u Helodi umulaghili, pachifukwa chakuti akamusenda umuchi uwa wamwabo u Helodiya, sona akabomba ivintu ivyinji ivibibi. 20Pisinda pache u Helodi akabomba ichintu ichibibi nkani ukuchilapo pakumubika u Yohani mujele.

Ukoziwa kwa Yesu

(Mat. 3.13-17; Mlko. 1.9-11)

21Bo abantu bosi boziwa, u Yesu wepe akoziwa. Bo akwiputa, kumwanya kukighuka, 22#Ubw. 22.2; Mas. 2.7; Yes. 42.1; Mat. 3.17; Mlko. 1.11; Luk. 9.35sona u Muzimu Umuzelu akamwikila ngati yo nkunda. Po izyu likivwika kumwanya likati, “Awe we Mwana wane umughaniwa. Ihobokite nkani nawe.”

Abanyenya aba Yesu

(Mat. 1.1-17)

23Bo u Yesu anda imbombo yache akaba na maka 30. Abantu bakinong'onagha ukuti akaba mwana uwa Yosefu, yuyo akaba mwana uwa Heli, 24nu mwana uwa Matati, nu mwana uwa Levi, nu mwana uwa Meliki, nu mwana uwa Yanayi, nu mwana uwa Yosefu, 25Umwana uwa Matatiya, nu mwana uwa Amosi, nu mwana uwa Nahumi, nu mwana uwa Esili, nu mwana uwa Nagayi, 26nu mwana uwa Mati, nu mwana uwa Matatiya, nu mwana uwa Semeni, nu mwana uwa Yozeki, nu mwana uwa Yoda, 27nu mwana uwa Yohanani, nu mwana uwa Lesa, nu mwana uwa Zelubabelo, nu mwana uwa Shelatiyele, nu mwana uwa Neli, 28nu mwana uwa Meliki, nu mwana uwa Adi, nu mwana uwa Kosamu, nu mwana uwa Elimadamu, nu mwana uwa Elo, 29nu mwana uwa Yoshwa, nu mwana uwa Eliyezeli, nu mwana uwa Yolimu, nu mwana uwa Matati, nu mwana uwa Levi, 30nu mwana uwa Simiyoni, nu mwana uwa Yuda, nu mwana uwa Yosefu, nu mwana uwa Yona mu, nu mwana uwa Eliyakimu, 31nu mwana uwa Meleya, nu mwana uwa Mena, nu mwana uwa Matata, nu mwana uwa Natani, nu mwana uwa Devedi, 32nu mwana uwa Yese, nu mwana uwa Obedi, nu mwana uwa Bowazi, nu mwana uwa Salimoni, nu mwana uwa Nashoni, 33nu mwana uwa Aminadabu, nu mwana uwa Adimini, nu mwana uwa Alini, nu mwana uwa Heziloni, nu mwana uwa Pelezi, nu mwana uwa Yuda, 34nu mwana uwa Yakobo, nu mwana uwa Yisaki, nu mwana uwa Abulahamu, nu mwana uwa Tela, nu mwana uwa Naholi, 35nu mwana uwa Seluki, nu mwana uwa Lebu, nu mwana uwa Pele, nu mwana uwa Ebelo, nu mwana uwa Shela, 36nu mwana uwa Kayinani, nu mwana uwa Alifakisadi, nu mwana uwa Shemu, nu mwana uwa Nowa, nu mwana uwa Lameki, 37nu mwana uwa Metusela, nu mwana uwa Enoki, nu mwana uwa Yaledi, nu mwana uwa Mahalalele, nu mwana uwa Kayinani, 38nu mwana uwa Enoshi, nu mwana uwa Seti, nu mwana uwa Adamu, nu mwana uwa Chala.

Currently Selected:

Luka 3: LMBNT2016

Highlight

Copy