Luka 2

Ukupapiwa kwa Yesu

(Mat. 1.18-25)

1Mumasiku ghalaghala u Kesale u Ogasitini akalamula ukuti abantu bosi babelengiwe muvyisu vyache vyosi. 2Ukubelenga kunuku kukaba kwakwanda pakubombiwa, bo u Kwiliniya mulaghili uwa chisu icha Siliya. 3Po abantu bosi bakabuka pakwisimbisya bene, umuntu wesi kukaya kache.

4U Yosefu akafuma mukaya aka Nazaleti muchigaba icha Galileya nukubuka kukaya aka Betelehemu muchigaba icha Yudeya, kubuzilo bubo u Mwene u Devedi akapapiliwako, u Yosefu akabuka kulakula pakuti akaba waluko ulwa Devedi. 5Akabuka poka nu Maliya pakusimbisya, yuyo akamuzingilila ukuti amusende. Akamela ulwanda, 6sona bo bali mu Betelehemu, akabalilo kache akakusayiwa kakwana. 7Akapapa umwana wache umulumendo ukatote, akamuvwinka na menda nukumughoneka muchakulyelamo ing'ombe, pakuti batakabwaghamo ubuzilo munyumba iya bayeni.

Abadimi na bantumi aba kumwanya

8Kulubazu lulalula ulwa chisu, kukabako abadimi bamo babo bakalindililagha ing'ozi zyabo muzi pabusiku. 9Uwantumi uwa Mwene akababonekela, sona ubuchindamu ubwa Mwene bukabalamila. Po bakanyila nkani, 10loli uwantumi yula akababuzya akati, “Mutakanyilaye! Niza na mazyu amiza kukwinyu, ghagho ghakwiza pakubahobosya nkani abantu bosi. 11Pakuti ubusiku ubu mukaya aka Devedi mupapiwemo Umupoki winyu, yuyo we Kilisitu u Mwene! 12Ichi cho chimanyilo: Mukwiza pakumwagha ubonda bamuvwinkite na menda nukumughoneka muchakulyelamo ing'ombe.”

13Umwalubilolubilo akabukatila akakulu aka bantumi aba kumwanya poka nu wantumi yula kakaboneka kakwimba nukumupala u Chala ukuti,

14“Ubuchindamu kwa Chala uwa kumwanya nkani,

umutende pachisu ichapasi

pakasi pa bantu babo u Chala akuhoboka nkani nabo!”

15Bo abantumi banyokela kumwanya, abadimi bala bakanenezannya benebene ukuti, “Twende ku Betelehemu nukwennya ivintu vivyo vyabombiwa, vivyo u Mwene atubuzya aswe.”

16Po bakabuka umwalubilolubilo nukumwagha u Maliya nu Yosefu, sona bakamwennya ubonda aghonite muchakulyelamo ing'ombe. 17Bo abadimi bamwennya, bakababuzya zizyo uwantumi akanena nizya mwana yula. 18Bosi babo bakivwa zizyo abadimi bakanena, bakaswigha. 19U Maliya akasunga mumoyo wache ivintu vyosi vinivi nukuvyinong'ona nkani. 20Abadimi bala bakanyokela, bo bakwimba inyimbo izyakumupala u Chala pavyosi vivyo bakivwa nu kwennya. Vikayana bulo na mumo uwantumi uwa kumwanya akanenela.

Bakumwita u Yesu itabwa

21 # Lev. 12.3; Luk. 1.31 Bo pachilapo usabata weka, bo akabalilo aka kusilimulila umwana kakwana, bakamwita u Yesu itabwa, lilyo uwantumi uwa kumwanya akamupa, bo nu lwanda lutamelite.

U Yesu akupaghuliliwa kwa Mwene mu Nyumba iya Chala

22 # Lev. 12.6-8 Akabalilo kakakwana akakuti u Yosefu nu Maliya babombe ulwiho ulwa kwiswefezya ukuyana ni Ndaghilo izya Mozesi. Po bakasenda umwana nukubuka nawe mu Yelusalemu pakupaghuliliwa kwa Mwene. 23#Ukf. 13.3, 12Pakuti zisimbiwe mu Ndaghilo izya Mwene ukuti, “Umwana wesi ukatote umulumendo apaghuliliwanje kwa Mwene.” 24Bakabuka sona pakubika ivyabupi ukuyana ni Ndaghilo izya Mwene ukuti, “Babikaye intozi zibili pamo utwana tubili utwa nkunda pakuba ichakwiyipa.”

25Pakabalilo kalakala kukabako umuntu yumo yuyo akaba we Simiyoni, yuyo akikalagha mu Yelusalemu. Akaba mugholosu, sona umuntu uwakumunyila u Chala. Akalindililagha akabalilo kako u Chala akwiza pakubapoka aba Izilayeli, sona u Muzimu Umuzelu akaba nawe. 26U Muzimu Umuzelu akamusimikizizya ukuti atakafwanje bo atamwenizye u Kilisitu uwa Mwene. 27U Muzimu Umuzelu akamulongozya u Simiyoni ukuti abuke mu Nyumba iya Chala. Abapapi aba Yesu bope bakinjila nu bonda munyumba mula pakubomba inyiho ukuyana ni Ndaghilo izya Mozesi. 28U Simiyoni akamusenda ubonda munyobe zyache nukumupalizya u Chala ukuti:

29“Mwene, ilelo umwitikizye umubombi wako

ukuti abukaye mumutende,

pakuti wasungilila ilayizyo lyako.

30Na maso aghane na ghane nabwennya ubupoki bwako,

31bubo wabayanizizya abantu bosi ukuti babwennye.

32 # Yes. 42.6, 49.6, 52.10 Wavumbula ulukozyo

ukuti lubalamile abantu babo bate ba Yuda

nukwiza pakuba buchindamu kuba Izilayeli.”

33Uwise nu nyina uwa mwana bakaswigha nkani na zizyo u Simiyoni akanena nizya mwana yula. 34U Simiyoni akabasaya nukunena kwa nyina, u Maliya ukuti, “Umwana uyu asaliwe nu Chala ukuti abanje chakubawisya, sona ni chakupoka abantu abinji aba Izilayeli. Akwiza pakuba chimanyilo ichakufuma kwa Chala, chicho abantu abinji bakwiza pakususannya nacho, 35umwakuti akwiza pakuvumbula pabuzelu inyinong'ono zyabo izya kubusyefu. Sona kukwako mayi, ichitima chikwiza pakulasa umoyo wako ngati yo mpalala.”

36Kukabako umukolo yumo umulaghuzi umughosi nkani yuyo akaba we Ana, umwana uwa Fanuwelo uwaluko ulwa Asheli. Akaba pasendwa amaka seveni ghene bulo 37po pisinda pache akaba mufwilwe amaka 84.#2.37 akaba mufwilwe amaka 84: Pamo akaba na maka 84. Akalindagha mu Nyumba iya Chala, akamwiputagha u Chala umusanya nu busiku nukutuzya pakulya. 38Pakabalilo kalakala akiza nukumupalizya u Chala nukunena nizya Mwana yula ku bosi babo bakalindililagha akabalilo akakuti u Chala amusatule u Yelusalemu.

Ukunyokela ku Nazaleti

39 # Mat. 2.23 Bo u Yosefu nu Maliya bamala pakubomba vyosi ukuyana ni Ndaghilo izya Mwene, bakanyokela ku Nazaleti muchigaba icha Galileya kukaya kabo. 40Umwana akakula, sona akaba na maka. Akizula na mahala nkani, sona nu lusayo ulwa Chala lukaba papache.

Umulumendo u Yesu mu Nyumba iya Chala

41 # Ukf. 12.1-27; Ukk. 16.1-8 Umwaka nu mwaka abapapi aba Yesu bakabukagha ku Yelusalemu ku Lusekelo ulwa Pasa. 42Bo u Yesu ali na maka 12, bakabuka ku Lusekelo ulwa Pasa ukuyana na mumo bakizubilila. 43Bo ulusekelo lwamala, bakanda pakunyokela kunyumba, loli umulumendo u Yesu akasyalikila mu Yelusalemu. Abapapi bache batakazimanya zinizi. 44Bakinong'onagha ukuti akaba muchilundilo icha bantu, po bakenda isiku lyosi nukwanda pakumulonda pakasi pa bakamu na pa bamanyani babo. 45Bo bapotwa pakumwagha, bakapyanila ku Yelusalemu pakumulonda. 46Pisiku ilya butatu bakamwagha mu Nyumba iya Chala ikaye na bamanyisi aba Ndaghilo, pakubateghelezya nukubalalusya amalaluzyo. 47Abantu bosi babo bakamwivwa bakaswigha nukwamula kwache ukwa mahala. 48Bo abapapi bache bamwennya, bakaswigha nkani, po unyina akamubuzya akati, “Wee mwana wee, nkimba choni chicho watutamya bunubu? Ane nu ghuso twatamiwa nkani pakukulonda.”

49U Yesu akabamula akati, “Nkimba choni chicho mwandondagha? Mutazimenye ukuti imbaghiye pakuba munyumba iya Tata wane?” 50Loli batakalyivwisya ilyamulo lyache.

51Po u Yesu akanyokela nabo ku Nazaleti kuko akabivwilagha ngati bo bapapi bache. Unyina akavisunga vyosi vinivi mumoyo wache. 52#1 Sam. 2.26; Ivy. 3.4U Yesu akakula umubili na mumahala, sona u Chala na bantu bulo bakahoboka nkani nawe.

Currently Selected:

Luka 2: LMBNT2016

Highlight

Copy