Luka 10

U Yesu akubatuma abamanyili 72

1Pisinda pache u Mwene akasala abantu abanji 72#10.1 72: Amasimbo ghamo aghakale ghasimbite ukuti 70. nukubatuma babili-babili ukuti balongolele kukaya kosi, sona na kubuzilo bosi bubo umwene akalondagha pakubukako. 2#Mat. 9.37-38Akati, “Inyinulo nkulu, loli abakwinula banandi. Mumulabe umwenecho uwa nyinulo ukuti atume abambombo pakwinula. 3#Mat. 10.16Bukagha! Inkubatuma ngati bo bana aba ng'ozi pakasi pa mpumpi. 4#Mat. 10.7-14; Mlko. 6.8-11; Luk. 9.3-5Mutakasende ichikwama pamo inyambi iya pa bulendo pamo inkwato, sona mutakimaye muzila pakulamuka abantu. 5Munyumba yosi yiyo mukwinjilamo munenaye tasi ukuti, ‘Umutende ghubanje munyumba iyi.’ 6Nanti munyumba yila muli umuntu yuyo akulonda umutende, umutende ghugho mwaghunena ghukwiza pakuba papache. Loli nanti atalimo umuntu yuyo atakughulonda umutende, umutende ghugho mwaghunena ghukwiza pakunyokela kukwinyu. 7#1 Kol. 9.14; 1 Tim. 5.18Ikala munyumba yilayila. Mulyanje nu kung'wela vyosi vivyo bakubapa, pakuti uwambombo abaghiye pakupokela amalipilo ghache. Mutakenda-kendaye inyumba ni nyumba. 8Nanti mukwinjila mukaya nukupokeliwa, mulyanje vivyo babapa. 9Mubapozye ababine mukaya kalakala, sona mubabuzye abantu ukuti, ‘Ubumwene ubwa Chala bwapalamila.’ 10#Imbo. 13.51Loli nanti abantu batakubapokela mukaya kako mukwinjilamo, bukagha mu misebo nukuti, 11‘Nu lufumbi bulo ulwa mukaya kinyu, lulo lukakatiye kunyayo zyitu tukubakung'untila mwebenecho. Loli mukumbukaye ukuti Ubumwene ubwa Chala bwapalamila.’ 12#Ubw. 19.24-28; Mat. 11.24Naloli inkubabuzya ukuti pisiku lilyo u Chala akwiza pakubalonga abantu, akwiza pakubapelela ichisa nkani abantu aba mu Sodomu ukuchila abantu aba mukaya kala.

Nizya twaya tuto tughuniwe

(Mat. 11.20-24)

13 # Yes. 23.1-18; Ezk. 26.1—28.26; Yow. 3.4-8; Amo. 1.9-10; Zek. 9.2-4 “Chighune kukwako Kolazini! Chighune kukwako Betisayida! Nanti ivyika vivyo vibombiwe mumwinyu, vyabombiwe mutwaya utwa Tile nu Sidoni, ngali abantu mulamula bavwalite kale amasaka nukwikupulila itoyi mumubili ukulanjizya ukuti naloli bapinduka nukuzileka imbibi zyabo! 14Loli pisiku lilyo u Chala akwiza pakubalonga abantu akwiza pakubapelela ichisa nkani abantu aba mu Tile nu Sidoni ukuchila amwe. 15#Yes. 14.13-15Po nawe Kapelinahumu! Nkimba ukwinong'ona ukuti ukwiza pakukweziwa mupaka kumwanya? Awe, loli ukwiza pakusumbiwa kubuzilo ubwa bantu abafwe.”

16 # Mat. 10.40; Mlko. 9.37; Luk. 9.48; Yoh. 13.20 U Yesu akababuzya abamanyili bache akati, “Umuntu wesi yuyo akubateghelezya, akunteghelezya nane bulo. Umuntu wesi yuyo akubakana, akunkana nane bulo. Umuntu wesi yuyo akunkana, akumukana wepe yuyo akantuma.”

Nizya kunyokela kwa bamanyili 72

17Abantu 72#10.17 72: Amasimbo ghamo aghakale ghasimbite ukuti 70. bala bakanyokako nu buhobosu ubukulu. Bakanena bakati, “Mwene ni mizimu imibibi yope yikatwivwila bo twayilamula mwitabwa lyako!”

18U Yesu akabamula akati, “Nkennya u Satana akuwa ngati ko kamesya ukufuma kumwanya. 19#Mas. 91.13Teghelezya, nabapa ubulaghili ubwakuti mungakanya injoka na bankonya nukupota amaka agha mulwani yula, po nachimochimo chicho chikwiza pakubavulazya. 20Loli mutakahobokaye pachifukwa chakuti imizimu imibibi yikabivwila, loli muhobokaye nkani ukuti amatabwa ghinyu ghasimbiwe kumwanya.”

U Yesu ahoboka

(Mat. 11.25-27, 13.16-17)

21Pakabalilo kalakala u Yesu akizula nu buhobosu nu Muzimu Umuzelu nukuti, “Wee Tata, Mwene uwa kumwanya na pachisu ichapasi! Inkukupalizya pachifukwa chakuti wabavumbulila abantu babo batamanyiye ivintu vivyo ukabafisa abantu abamahala na bamanyi. Ee, Tata, umu mo mumo ukalondela ukuti chibombiwanje.

22 # Yoh. 3.35, 10.15 “Utata wane ampiye ubulaghili uwa vintu vyosi. Nayumo umuntu yuyo amumenye u Mwana, loli Uwise mwene, sona atalipo umuntu yuyo amumenye Uwise, loli u Mwana mwene, sona na bantu babo u Mwana akubasala ukuti abavumbulile Uwise.”

23Po u Yesu akaghalabukila ku bamanyili nukunena nabo kulubazu ukuti, “Masayiwa amaso ghagho ghakwennya ivintu vivyo mukuvyennya.” 24Naloli inkubabuzya ukuti abalaghuzi na bamwene abinji bakalondagha nkani pakuzyennya zizyo mukwennya, loli batakazyennya. Bakalondagha nkani pakuzyivwa zizyo mukwivwa, loli batakazyivwa.

Ichili icha Musamaliya uwachisa

25 # Mat. 22.35-40; Mlko. 12.28-34 Umumanyisi uwa Ndaghilo yumo akiza kwa Yesu nukuyezya pakumutegha. Akalalusya akati, “Wee Mumanyisi, nkimba imbombe ichoni ukuti impokele ubumi ubwa bwila na bwila?”

26U Yesu akamwamula akati, “Nkimba Amasimbo ghakuti choni? Nkimba ukwivwamo choni?”

27 # Lev. 19.18; Ukk. 6.5 Umuntu yula akamula akati, “Umughanaye u Mwene u Chala wako nu moyo wako ghosi nu muzimu wako ghosi na maka ghako ghosi ni nyinong'ono zyako zyosi. Umughanaye umupalamani wako ukuyana na mumo wiyighaniye wemwenecho.”

28 # Lev. 18.5 U Yesu akamula akati, “Wamula akiza, bomba zinizi, po ukwiza pakuba nubumi.”

29Loli umumanyisi uwa Ndaghilo yula akalondagha pakwinena mwene pakuba mugholosu, po akamulalusya u Yesu akati, “Nkimba umupalamani wane we wenu?”

30U Yesu akamwamula akati, “Kukabako umuntu yumo, yuyo akikilagha ku Yeliko ukufuma mu Yelusalemu. Bo ali muzila, amavyondongo ghakamulema. Ghakamuvula amenda nukumukoma, ghakamuleka ali papipi pakufwa. 31Kulusako, umuputi akendagha kuzila yilayila, loli bo amwennya umuntu yula akamupambata bulo. 32Umwakuyana bulo wepe umu Levi akiza pabuzilo bulabula, akamwennya umuntu yula nukumupambata bulo. 33#2 Imb. 28.15Loli umu Samaliya yumo yuyo akaba pabulendo bwache wepe akafika pabuzilo bulabula, sona bo amwennya, akamupelela ichisa. 34Akiza kukwache, akapungulila amafuta nu vinyo pavilonda vyache nukupinyapo. Po akamukwezya umuntu yula pampunda yache nukubuka nawe kunyumba iya bayeni, kuko akamusungilila akiza. 35Ilyandabi, akamupa isalabazya izya siliva zibili umwenecho uwa nyumba yula. Akamubuzya umwenecho uwa inyumba yula akati, ‘Umusungilile akiza, po nanti watagha izyakuchilapo pa muntu uyu, inkwiza pakukunyosekezya zyosi bo nabwelako.’ ”

36U Yesu akalalusya akati, “Munyinong'ono zyako, nkimba we wenu pa bantu batatu aba yuyo akaba mumanyani uwa muntu yuyo amavyondongo ghakamulema?”

37Umumanyisi uwa Ndaghilo akamula akati, “Yuyo akamupelela ichisa.”

U Yesu akamula akati, “Nawe bulo bukagha, kabombaye bunubu.”

U Yesu akumwendela u Malita nu Maliya

38 # Yoh. 11.1 Bo u Yesu na bamanyili bache bakwenda, bakafika mukaya kako umukolo yumo yuyo itabwa lyache akaba we Malita akamupokela munyumba yache. 39Akaba nu muzuna u Maliya, yuyo akikala pasi papipi nu Mwene nukuteghelezya ivimanyisyo vyache. 40U Malita akilumbusya ni mbombo inkulu yiyo akabombagha. Po akiza kwa Yesu nukuti, “Wee Mwene, nkimba utakumpazikizya ukuti umuzuna wane andekeye nemwene imbombo yosi? Mubuzye ukuti ize pakunyavwa.”

41U Mwene akamwamula akati, “Wee Malita, wee Malita! Wilumbusya nu kutamiwa ni vintu ivyinji, 42loli ichintu choka chikulondiwa. U Maliya asala ichintu ichiza, sona chitakwiza pakufyuliwapo nalumolumo kukwache.”

Currently Selected:

Luka 10: LMBNT2016

Highlight

Copy