Luka 11

U Yesu akumanyizya nizya kwiputa

(Mat. 6.9-13, 7.7-11)

1Isiku limo u Yesu akiputagha pabuzilo bumo. Bo amala, umumanyili yumo akamubuzya akati, “Mwene, utumanyizye pakwiputa ukuyana na mumo u Yohani akamanyizizya abamanyili bache.”

2U Yesu akababuzya akati, “Bo mukwiputa mutinji,

‘Tata,

itabwa lyako lichindikiwanje,

Ubumwene bwako bwizaghe,

3utupe ichakulya icha isiku ni siku.#11.3 ichakulya icha isiku ni siku: Pamo ichakulya chitu icha indabi.

4Utuhobokele imbibi zyitu,

ukuyana na mumo naswe bulo

tukubahobokela abantu babo bakutunangila.

Utakitikizyanje ukuti tuwile munjelo.’ ”

5U Yesu akababuzya abamanyili bache akati, “Buli nanti weka mumwinyu abuka kunyumba iya mumanyani wache pakasi pabusiku nukumubuzya ukuti, ‘Wee mumanyani, unkopeleko ivibama vitatu. 6Umumanyani wane afika kunyumba yane, po inte ni chakuti angalya.’ 7Loli nanti uwa munyumba yula amula ukuti, ‘Utakantamyanje! Nighaliye kale pamulyango, sona ane na bana bane tughonite. Po intanganyamuka ukuti inkupe ivibama vila.’ 8Momumo, inkubabuzya ukuti napapo atakwiza pakunyamuka nukumupa ichibama pachifukwa chakuti we mumanyani wache, loli akwiza pakunyamuka nukumupa chosi chicho akulonda pachifukwa icha lweke lwache ulwa kulaba.

9“Po inkubabuzya ukuti, Mulabaye, po mukwiza pakupokela. Mulondaye, po mukwiza pakuvyagha, sona mukong'osyanje, po ulwiyi lukwiza pakubighukila. 10Pakuti umuntu wesi yuyo akulaba akwiza pakupokela, sona umuntu wesi yuyo akulonda akwiza pakuvyagha, sona umuntu wesi yuyo akukong'osya, ulwiyi lukwiza pakumwighukila. 11Nkimba alipo umuntu yuyo, nanti umwana wache akumulaba iswi, akumupa injoka? 12Pamo akumulaba ifumbi, akumupa unkonya? 13Nanti mwe bantu mwe babibi mumenye pakubapa ivintu ivyiza abana binyu, zili buli-buli nu Ghuso uwa kumwanya? Nkimba angapotwa pakubapa u Muzimu Umuzelu abantu babo bakumulaba?”

U Yesu nu Belezebuli

(Mat. 12.22-30; Mlko. 3.20-27)

14Isiku limo u Yesu akefyanga imizimu imibibi yiyo yikamupelagha umuntu pakuba we chinunu. Bo imizimu imibibi yila yepamo, umuntu yula akanda pakunena. Po abantu bosi bala bakaswigha nkani, 15#Mat. 9.34, 10.25loli abantu bamo bakati, “We Belezebuli, usongo uwa mizimu imibibi, yuyo akumupa amaka aghakwefezezya imizimu imibibi.” 16#Mat. 12.38, 16.1; Mlko. 8.11Abanji bakalondagha pakumutegha u Yesu mukanenele, po bakamulaba ukuti ababombele ichiswigho ichakulanjizya ukuti akaba na maka agha Chala. 17Loli u Yesu akazimanya inyinong'ono zyabo, po akababuzya akati, “Nanti ubumwene bwasambukilana bwene-bwene, ubumwene bula butangendelela, sona nanti abantu aba munyumba yoka basambukilana, inyumba yila yitangendelela. 18Nanti ubumwene ubwa Satana bwasambukilana nukugabinkana, ubumwene bula butangendelela. Pakuti mukunena ukuti inkwefya imizimu imibibi na maka agha Belezebuli. 19Nanti ane inkwefya imizimu imibibi na maka agha Belezebuli, po nkimba we wenu akubapa abamanyili binyu amaka aghakwefezezya nagho imizimu imibibi? Polelo imbombo izya bamanyili binyu zyo zikulanjizya pabuzelu ukuti amwe mwananga. 20Loli nanti ane inkwefya imizimu imibibi na maka agha Chala, kokuti chikulanjizya ukuti u Chala ikazizye kale Ubumwene bwache pakasi papinyu.

21“Bo umuntu wamaka akulindilila inyumba yache ni vilwilo, ukatundu wache akusungiwa akiza. 22Loli nanti umuntu uwamaka ukumuchila iza nukumupota, akusenda ivilwilo vyosi vivyo umwenecho avisubilagha nukuvigaba vivyo akiba.

23 # Mlko. 9.40 “Umuntu wesi yuyo akudalinkana nane, kokuti mulwani wane, sona umuntu wesi yuyo atakunyavwa pakubungannya, kokuti akunyampannya.

Nizya kunyokela kwa muzimu umubibi

(Mat. 12.43-45)

24“Bo umuzimu umubibi ghukwepamo mu muntu, ghukwenda-kwenda muchisu ichumizu pakulonda ubuzilo ubwakutuzyapo. Nanti ghutakubwagha bumo, ghukunena ukuti, ‘Inkunyokela sona kunyumba yane.’ 25Po ghukunyokela nukuyagha inyumba yila yite nako kamo mukasi, sona yiswepite nukuyaniziwa akiza. 26Po ghukubuka kuzi nukusenda iyinji seveni yiyo mibibi nkani ukughuchila uwene, po yikwiza nukwikala mulamula. Pabumalilo akabele aka muntu yula kakuba kabibi ukuchila mumo akabela pakwanda.”

Ubuhobosu ubwenecho

27Bo u Yesu akunena zinizi, umukolo yumo akanena muchilundilo icha bantu akati, “Musayiwa umukolo, yuyo akakupapa nukukonkezya!”

28Loli u Yesu akamula akati, “Awe, basayiwa babo bakwivwa amazyu agha Chala nukughivwila.”

Bakumulaba u Yesu ukuti abombe ichika

(Mat. 12.38-42)

29 # Mat. 16.4; Mlko. 8.12 Bo abantu bakubalila-balila, u Yesu akati, “Abantu abankulilo iyi bambibi, bakulonda ichiswigho. Awe, loli ichiswigho chene chicho bakwiza pakuchennya, cho chiswigho icha mulaghuzi u Yona. 30#Yon. 3.5Pakuti u Yona akaba chimanyilo icha bantu aba mu Ninive, umwakuyana bulo, wepe u Mwana uwa Muntu akwiza pakuba chimanyilo icha bantu abankulilo iyi. 31#1 Abm. 10.1-10; 2 Imb. 9.1-12Pisiku lilyo u Chala akwiza pakubalonga abantu abankulilo iyi, u mwene umukolo uwa muchisu icha Sheba akwiza pakuzyuka kubufwe nukubasusya amwe, pakuti akenda ukufuma muchisu icha kukwabo pakwivwa ubumanyisi ubwa mahala ubwa Mwene u Solomoni. Ilelo inkubabuzya ukuti pano pali ichintu chimo ichikulu ukuchila u Solomoni. 32#Yon. 3.5Pisiku lilyo u Chala akwiza pakubalonga abantu abankulilo iyi, abantu aba mu Ninive bakwiza pakuzyuka kubufwe nukubasusya amwe, pachifukwa chakuti bakapinduka nukuzileka imbibi zyabo, bo bivwa u Yona akulumbilila. Ilelo inkubabuzya ukuti pano pali ichintu chimo ichikulu ukuchila u Yona.

Ulukozyo ulwa mubili

(Mat. 5.15, 6.22-23)

33 # Mat. 5.15; Mlko. 4.21; Luk. 8.16 “Nayumo umuntu yuyo akukozya inyale nukuyikupikila ni sonta; #11.33 Amasimbo ghamo aghakale ghate na mazyu aghakuti pamo nukuyikupikila ni sonta. Loli akuyibika pabuzelu, umwakuti yibalamilaye abantu bosi munyumba mula. 34Amaso ghako yo nyale iya mubili wako. Nanti amaso ghako miza, kokuti nu mubili wako ghope ghukwiza pakuba mulukozyo. Loli nanti amaso ghako mabibi, kokuti nu mubili wako ghope ghukuba muchisi. 35Polelo muchebaye ukuti ulukozyo lulo luli mumwinyu lutakipelaye pakuba chisi. 36Nanti umubili wako ghosi wizuye nu lukozyo ukusita pakuba ni chigaba chimo muchisi, ghukwiza pakuba buzelu bwene posi na posi ukuyana na mumo inyale yikulamila papinyu nu buzelu bwache.”

U Yesu akubasoka abantu nizya bamanyisi aba Ndaghilo naba Falisayi

(Mat. 23.1-36; Mlko. 12.38-40)

37Bo u Yesu amala pakunena, umu Falisayi yumo akamwitizya pakulya kunyumba, po akinjila nukwikala pasi nukwanda pakulya. 38Umu Falisayi akaswigha, bo amwennya u Yesu akulya pakusita ukusukusula munyobe. 39Po u Mwene akamubuzya akati, “Amwe mwe ba Falisayi pakuti mukusuka kuzi kwa lubako ni mbale zyinyu, loli mukasi mwizuye nu bupavu nu buvyondongo. 40Mwe bapunganu mwee! U Chala akapela kuzi, nkimba ate we yuyo akapela na mukasi bulo? 41Loli mubapanje abapina vivyo vili mukasi mumbako ni mbale, po vyosi vikwiza pakubaswepela.

42 # Lev. 27.30 “Chighune nkani kukwinyu, amwe mwe ba Falisayi pakuti mukubika kwa Chala ichigaba choka pa vigaba 10 ivya vilungo vyinyu ngati zyo mpilipili, nu kale, sona nu muzimwa, loli mukukana ukwivwila ichimanyisyo ichapamwanya nkani icha Ndaghilo, ngati bo bwanaloli, ni chisa, sona nu busubiliwa. Ivi vyo vintu vivyo mubaghiye mubombaye ukusita ukulekapo vimo.

43“Chighune nkani kukwinyu, mwe ba Falisayi pakuti muvighanite ivitengo ivyapamwanya munyumba izyakwiputilamo, sona nukuti abantu babalamukaye nu muchizi muminalo. 44Chighune nkani kukwinyu, amwe mwe ba Falisayi pakuti muyanite bulo na mapumpa ghagho ghatakuboneka, sona abantu bakwenda pamwanya ukusita ukughamanya.”

45Umumanyisi uwa Ndaghilo yumo akati, “Mumanyisi, bo ukunena zinizi, ukututuka naswe bulo.”

46U Yesu akamula akati, “Chighune kukwinyu, mwe bamanyisi aba Ndaghilo pakuti mukubanyamulisya abantu ukatundu umung'wamu, loli mutakulonda pakubombezya akafingwi ukubavwa pakunyamula ukatundu yula. 47Chighune nkani kukwinyu pakuti mukuzenga amapumpa amiza agha balaghuzi babo abanyenya binyu bakabaghogha. 48Amwe mwebene mukwitika, sona mukusimikizya zizyo abanyenya binyu bakabomba. Abene bakaghogha abalaghuzi, po amwe mukazenga amapumpa. 49Pachifukwa ichi amahala agha Chala ghakanena ukuti, ‘Nkwiza pakubatumila abalaghuzi na batumiwa, loli bakwiza pakubaghogha bamo, sona abanji bakwiza pakubavwima.’ 50Po abantu abankulilo iyi bakwiza pakufundiwa, pachifukwa icha kughoghiwa kwa balaghuzi bosi, babo bakaghoghiwa ukwandila pakabalilo kako ichisu chapasi chikapeliwa, 51#Ubw. 4.8; 2 Imb. 24.20-21ukwandila pakughoghiwa kwa Abeli mupaka pakughoghiwa kwa Zekaliya, yuyo akaghoghiwa pakasi pachighemo mubuzilo ubuzelu. Momumo, inkubabuzya ukuti abantu aba masiku agha bakwiza pakufundiwa bosi pachifukwa icha kughoghiwa kwa bantu bala.

52“Chighune nkani kukwinyu, amwe mwe bamanyisi aba Ndaghilo pakuti mwafyula inyighulilo yiyo yikwighula kunyumba uwa mulyango iya mahala, yiyo amwe mute mukinjilemo, sona mukubakanizya babo bakuyezya pakwinjilamo.”

53Bo u Yesu epapo pabuzilo bula, abamanyisi aba Ndaghilo naba Falisayi bakanda pakumususya umwakoghofya nkani nukumulalusya amalaluzyo aminji, 54ukuyezya pakumutegha mukanenele.

Currently Selected:

Luka 11: LMBNT2016

Highlight

Copy