Makụ 6

Aajịka Jisọsu lẹ Názaretu

(Mát. 13:53-58; Luk. 4:16-30)

1Jisọsu shi l'ẹka ono tụgbua lashia mkpụkpu iya yẹle ndu l'etso ụzo iya. 2O rwua mbọku ọtuta-ume ọ bahụ l'ụlo-ndzuko ndu Ju, je ezhilahaa iwhe. Ụlo ono l'ozhi okfu Chileke ono bẹ aha l'igweligwe dọru. O zhia iwhe ono nke ọwhu ẹhu jishihuru ndu ono dọru l'ẹka ono oyi. Whẹ tụko kfulahaa sụ: “?O zhia awe-e bẹ nwoke-e je je anwụtakota ẹgube iwhe ọwa?” Whẹ sụkwawho: “?O zhia onye zhiru iya ẹgube mmamagụ ọwa? ?Ndẹhunu g'o meru emekaa ẹgube iwhe-awhụrulenya l'adụa onye whụjeru akọ-ẹtu iya? 3M'ọ tọ nụ iya-a bụ nwoke kapịnta-a, mbụ nwa Méri-a? ?Tọ dụ iya bụ nwune Jémusu mẹe Jósẹsu mẹe Júdasu mẹe Sáyịmonu? ?Tọo tọ dụ unwune iya nke nwanyị whẹ bẹ anyi lẹ whẹ tụkoru buru l'ẹka-a ẹgube-ẹ?” Iwhe ono kpọshia whẹ okweta iwhe l'ookfu. 4Jisọsu sụ whẹ: “Onye nkfuchiru Chileke bẹ l'aanọje akwabẹ ugvu l'ẹka lile ọdo, ta agụfulekwa iya whọ lẹ mkpụkpu ọ nọdu vuta mẹe l'ikfu iya mẹe l'ibe nkiya.” 5Ọ bụru iya meru tọ dụhewaro iwhe dụ biribiri ọdo Jisọsu mebaaru l'ẹka ono, ta agụfulewho l'o byiru ụmadzu olemole ẹhu l'eme ẹka, whẹ mehukota. 6Ọ dụ iya biribiri lẹ whẹ te ekwetadu nkiya.

Ọo ya bụ, ọ tụgbua tsoru mkpụkpu lẹ mkpụkpu ọdo zhilahaa okfu Chileke.

Jisọsu l'ezhi ndụ-ishi-ozhi iya tẹ whẹ jee ozhi

(Mát. 10:5-15; Luk. 9:1-6)

7Jisọsu bya ekua ụmadzu iri l'ẹbo ono, l'oozhije ozhi gbaa whẹ ẹbo-ẹbo zhifu whẹ tẹ whẹ jee, ọ gbee whẹ ike tẹ whẹ chịshije ọgvu. 8Ọ sụ whẹ: “Tọ bọ dụkwa iwhe unu l'e-gude eje, t'a gbahaa oshi-o-gude-l'ẹka. Unu be egudekwa nri, unu te egude ẹkpa, unu te eye okpoga l'ẹkpa uwe” 9Sụ whẹ: “Unu yekwaaro akpọkpa, ọle t'unu be eyekwa nkwere nkwere uwe.” 10Sụ: “Nteke unu bahụjeru lẹ mkpụkpu, uwhu ọwhu unu bahụru, a -nata unu, unu nọdupyabelekwawho l'uwhu ọbu jeye nteke unu l'a-fụta l'ibe iya ọwhu ọbu. 11Ẹka unu jeru ndu ọbu jịka unu, whẹ jịkafua lẹ whẹ ta angabẹdu nchị l'okfu Chileke unu l'ekfu, unu lụfudekwa l'ẹka ono, unu jịshikwaa udzu-ẹja, dụ unu l'ọbochi-ọkpa gude goshi whẹ l'ẹka unu lụfuakwaru iya.” 12Ọo ya bụ whẹ jeshia je ekfukashiaru ndiwhe tẹ whẹ daa onwowhe ụta haa ome iwhe-dụ-ẹji lwakfuta Chileke. 13Whẹ chịshia ọgvu ha l'igweligwe, bugee madzụ l'ẹhu, tẹmenu whẹ l'anyịkwawho iwhe bụ ndu ẹhu l'eme mmanụ, whẹ mehukota kpamụ kpamụ.

Anwụhu Jọnu baputizimu

(Mát. 14:1-12; Luk. 9:7-9)

14Eze, bụ Hẹ́rodu nụa iwhe Jisọsu l'eme nkele ẹwha Jisọsu ngakọtawaru ẹka lile. Ndu harụ sụ l'ọo bụkwa Jọnu onye shi emeje baputizimu bẹ tetaru nọdu ndzụ ọdo, o nokwa iwhe meru l'ọoduje ike eme iwhe lile ono, l'oomegbabe. 15Ndu ọdo sụ l'ọo Eláyija. Ndu ọwhu sụ l'ọo kwawhọ onye nkfuchiru Chileke dụ g'ọo onye lanụ lẹ ndu nke ndụ-ichee. 16Hẹ́rodu nụle iya whọ ọ sụ: “M'ọ kwa Jọnu-a mu zhiru eje egbutaru mu ishi iya bẹ tetaru nọdu ndzụ ọdo.” 17Iwhe meru bụkwanuru lẹ Hẹ́rodu l'onwiya bẹ zhijeru e je egude Jọnu, kee ya ẹgbu, ye iya l'ụlo mkpọro. Ọ buru l'okfu ẹka Heródiyasu b'o shi. Heródiyasu ono bụ nyee Fílipu. Gụbe Fílipu-a, l'eekfuru bụru nwune Hẹ́rodu. Hẹ́rodu gbalihu je je anata nyee nwune iya ono lụlahaa. 18Jọnu l'anọje ekfuru Hẹ́rodu sụ: “Ọ tọ dụkwawho ree, a makwarụ mẹ t'i jeshi je anata nwune ghu nyee ya lụlahaa.” 19Ẹhu ghulahaa Heródiyasu eghu. Ọ chọ-gezhia ụzo l'oo-shi gbua Jọnu, t'ọ whụhu nụ iya. 20O noo lẹ Hẹ́rodu l'onwiya l'atsụ Jọnu egvu. Ọ marụ lẹ Jọnu bụ onye dụ chịriri, bụru onye dụ nsọ l'iwhu Chileke. Ọ bụru iwhe ono meru Hẹ́rodu dobe iya t'ọ bọ dụ iwhe l'e-me iya nụ. L'ọobuje nteke ọ nụru iwhe Jọnu l'ekfu, ya awhụ iya ụwhu l'obu, ya egudelee ẹhu-ụtso ngabẹ iya nchị. 21Tọ dụ iya bụ l'ọ byanụ erwua ujiku lanụ, ọ dabarụ nwanyị ono nkele mbọku ono bụ mbọku Hẹ́rodu l'erije iwhe gude anyata mbọku, a nwụru iya. O kukota ndu ishi alị ẹka ono mẹe ndu ishi ndu ojọgu mẹe ndu ishi alị Gálili tẹ whẹ bya l'ori iwhe ono. 22Ndu ono dzulewho l'ẹka ono, nwa Heródiyasu nke nwanyị bata bya etee egvu l'echi ẹka ono. Ẹhu tsọo Hẹ́rodu mẹe ndu ẹbyii ono byarụ nụ ụtso. Eze, bụ Hẹ́rodu sụ nwata nwamgbọko ono: “Kfuzhiawho iwhe dụle ghu whọ ree, mu l'a-nụ ghu; mu l'a-nụ ghu iya.” 23O rigee riaru nwata ono nte sụ: “Iwhe ị sụleruwho tẹ mu nụ ghu bẹ mu l'a-nụ ghu, e -bekwaru ọ bụru m'ọo alị-eze mu b'ị sụru tẹ mu kekahu ẹbo nụ ghu nnanụ.” 24Nwata nwamgbọko ono gbafụ je ajị ne iya sụ: “?Ọo gụnu bẹ mu l'a-sụ t'a nụ mu?” Ne iya sụ iya t'o je asụ iya t'ọ nụ iya ishi Jọnu baputizimu. 25Ọ gbawhu azụ, jekfu eze je asụ iya: “Gburu ishi Jọnu baputizimu ye l'ọkwa pẹe mu ntaa ntaa, l'o noo iwhe dụ mu ree ndono.” 26Ẹhu rwụrwuhulekwawho eze ono nkele iwhe ono rwuru iya l'ẹhu, ọle eshi-ọwhu o ribuwaru nte l'iwhu ndu ẹbyii ya ono bẹ l'ọoto gbanwehedu iwhe o kfuru. 27O zhilekwawho onye ojọgu lanụ l'ime ndu ojọgu l'eche iya nteke onowho t'o je je egbuta Jọnu ishi pata bya. Nwoke ono tụgbua je egbuta ishi Jọnu l'ụlo mkpọro, 28ye l'ọkwa wotaru nwata nwamgbọko ono. Nwata pata iya je anụ ne iya. 29Nteke ndu l'etso ụzo Jọnu nụru iya, whẹ je apata ogweze iya je elia.

Jisọsu l'anụ ụnu madzụ iri l'ẹbo l'ụmadzu ụkporo iri nri

(Mát. 14:13-21; Luk. 9:10-17; Jọn. 6:1-14)

30Ndụ-ishi-ozhi bya ejegee lwawhu azụ bya akọkotaru Jisọsu iwhe lile whẹ mekotaru g'ọ ha mẹe iwhe whẹ zhikotaru g'ọ ha. 31A ha l'igweligwe awụ abya, madzụ l'awụlewho abya, ndu eje, ndu alwa, nke ọwhu ụzo l'ẹte adụaru Jisọsu yẹle ndu l'etso ụzo iya, mbụnu m'ọo nke ria nri. Ọ sụ ndu l'etso ụzo iya: “Unu fụta t'anyi je l'ẹka madzụ l'ebua ebu je anọdu nwẹka anyi, kabẹ tuta ume nwanshị.” 32Whẹ kwee bahụ l'ụgbo tụgbua jeshia ẹka whẹ l'a-nọdu. 33Igweligwe madzụ whụa whẹ nteke whẹ l'atụgburu, a hụbekota whẹ ama. Ndu ono shigee mkpụkpu gẹ mkpụkpu ha gudekota ọkpa gbarụ jeshia, vuru whẹ ụzo rwua ẹka ono whẹ l'eje. 34O shi l'ụgbo ono fụta, ọ bya awhụa igweligwe madzụ gẹ whẹ dọru l'ẹka ono. Imiko whẹ dụ iya shii nkele whẹ dụlewhoo g'ọo igwe atụru l'ete enwee onye nche l'eleta whẹ ẹnya. O zhilahaa whẹ iwhe ha l'igweligwe. 35O rwudelewho l'urwẹnyashi, ndu l'etso ụzo iya byakfuta iya bya asụ iya: “Mẹ ẹka-a kwa echi-ẹgu, tẹhenu ọochi l'abyawaa ẹgube-ẹ, 36sụkwawho ndu-a tẹ whẹ bahụ-gee lẹ mkpụkpu lẹ mkpụkpu mẹe l'uwhu l'uwhu ndu-a duwheru anyi mgburumgburu je akpata nri, whẹ l'e-ri.” 37Jisọsu sụ whẹ: “Unubẹdua l'onwunu nụ whẹ nri tẹ whẹ ria.”

Whẹ sụ iya: “?Anyi l'e-je azụta buredi owhu pọngu bya anụ whẹ tẹ whẹ ria?”

38Ọ sụ whẹ: “?Ọo ishi buredi ole bẹ unu gude? Unu je amaadaru g'ọ ha.”

Whẹ je agbadzua ya bya asụ iya: “Ọ dụ ishi buredi ise ọwa ẹma labọ.”

39Ọo ya bụ, ọ sụ whẹ tẹ whẹ kekashia igwe-ọha ono l'itsutsu l'itsutsu tẹ whẹ nọdukota anọdu l'alị l'eli ụnwu irwu ẹwu ono. 40Whẹ bya anọshia, keshia onwowhe l'itsutsu l'itsutsu. O nweru ndu ọwhu dụ ụkporo ise ise, ndu dụ ụkporo labọ l'iri iri. 41Ọ bya achịta ishi buredi ise ono mẹe ẹma labọ ono, bya apalia ẹnya imeli kele Chileke ekele nri ono. Ọ bya anyawashịa ya nụ ndu l'etso ụzo iya tẹ whẹ dobe iya l'iwhu igwe ndu ono. O kedzuru ndu ono gẹ whẹ ha ẹma labọ ono. 42Whẹ tụko gẹ whẹ ha rijishikota ẹwho. 43Whẹ bya atụtua ibiribe iya ọwhu e riwhodoru o ji nkata-ivu iri l'ẹbo. 44Unwoke lị lẹ ndu ono riru nri ono dụ ụnu madzụ iri l'ẹbo l'ụmadzu ụkporo ugbo iri.

Jisọsu l'eje ije l'eli mini

(Mát. 14:22-33; Jọn. 6:15-21)

45Jisọsu sụ ndu l'etso ụzo iya tẹ whẹ bahụ l'ụgbo nteke onowho vuru iya ụzo dafụ azụ iya ọwhu jeshia Bẹtusáyida, tẹ yẹbedua nọdu kfuadaru igweligwe ndu ono tẹ whẹ lashia. 46Ọ sụ-gelewho ndu ono tẹ whẹ lashia, o jeshia l'ugvu tẹ ya je ekfuru nụ Chileke. 47O be l'urwẹnyashi, ụgbo ono gbee nọduwaa l'echi eze-ẹnyimu ono, yẹbedua nwẹkiya nọdu l'eli-mgboko l'agụga mini ono. 48Ọ whụa l'ọnga ụgbo ono kwatarụ atsụ whẹ l'ẹhu shii nkele whẹrewhere l'ewhe iwhewhu, Jisọsu jeru ije l'eli mini jekfushia whẹ. Nteke ono bụwaru okọku ọha-ẹnu. O melahaa tẹ ya ghata whẹ lẹ mini ono. 49Whẹ whụle iya whọ gẹ l'ooje ije l'eli mini ono, whẹ nọdu nụ g'ọo maa. Whẹ chishia mkpu. 50Whẹ tụko gẹ whẹ ha whụkota iya, ẹhu nmalahaa whẹ anma.

Nteke onowho Jisọsu kfuru yeru whẹ sụ whẹ: “Obu shihu unu ike, l'ọo mu-a. Unu ba atsụshi egvu.” 51Ọ bakfu whẹ l'ime ụgbo ono, whẹrewhere ono whebua. Ọnu kpụ-geeru whẹ okfu. 52O noo l'iwhe Jisọsu meru nteke ọ washịru buredi ono te edodu whẹ ẹnya, o noo nkele whẹ ta arịtahedu ọriri rị-vu iya.

Ndu ẹhu l'emekaa lẹ Gẹnésaretu

(Mát. 14:34-36)

53Tọ dụ iya bụ lẹ whẹ adaghalẹwho mini ono, bya afụta lẹ Gẹnésaretu, bya elibe ụgbo whẹ l'ẹka ono. 54Afụta whẹ l'afụta l'ụgbo ono, ndu ẹka ono hụbekotawaa Jisọsu ama. 55Whẹ gbabagee l'obutobu l'ẹka ono je apashịlahaa ndu ẹhu l'adụa mma l'eli iwhe-azẹe whẹ; apa eje iwhe bụ ẹka whẹ nụru l'o noo ẹka ọ nọ. 56Iwhe bụ ẹka o shizhiaru, mbụ uwhu-mba, mbụ mkpụkpu mẹe obodo, whẹ apashịkaa ndibe whẹ ẹhu l'eme bya edoo l'ọma-aswa, aryọje iya t'o kwe-e t'ẹka whẹ rwua ya l'ẹhu, e beru ọ -bụru-a m'ọo ọnu uwe iya. Iwhe bụ ndu meru iya ẹka bẹ l'emehuje l'iwhe l'eme whẹ nu.

Currently Selected:

Makụ 6: Ezaa

Highlight

Copy