Makụ 7

Omelalị ndụ-ichee ndu Ju

(Mát. 15:1-9)

1Ọo ya bụ, o nweru ndu Fárisii dọru l'ẹka ono mẹkwawho ndu o-zhi-iwu, harụ nọdu iya. Whẹ tụkoru shi Jerúsalẹmu bya adọkobe l'ẹka ono dọ-whee Jisọsu mgburumgburu. 2Whẹ whụa l'o nweru ndu l'emebyi omelalị l'ime ndu ono l'etso ụzo Jisọsu. Ọ bụru lẹ whẹ gude ẹka e merwushiru emerwushi eri nri, nke l'ọo lẹ whẹ ta akwọdu ẹka gẹ nsọ alị ndu Ju sụru t'a kwọjee ya. 3O noo lẹ ndu Fárisii mẹe iwhe lile bụkota ndu Ju ọdo mgburumgburu te erijedu nri mẹ whẹ akwọo ẹka lẹge nsọ alị whẹ sụru t'a kwọjee ya. Iwhe ono bụkwanuru nsọ shi whẹ lẹ ndụ-ichee. 4Tẹmenu l'ọobuje whẹ shi aswa lwa, whẹ te eridu nri mẹ whẹ tẹke egudee mini mefu nsọ whẹ. O nokwawho gẹ whẹ l'anọje eme ụnwu nsọ nsọ ọdo shi whẹ l'ichee dụ g'ọo ọosa omogo mẹe ite mẹe iwhe e gudegee ope mee mẹe oshi anọdu. 5Ndu Fárisii ono mẹe ndu o-zhi-iwu ono bya ajị iya sụ iya: “?Ọo gụnu meru iwhe ndu l'etso ụzo ghu l'ete eme iwhe omelalị ndụ-ichee anyi whẹ sụru t'e mejee? Mbụ whẹ gbee gude ẹka e merwushiru emerwushi eri nri?” 6Jisọsu sụ whẹ: “Ayizáya bụ onye nkfuchiru Chileke kfulekwaruwho okfu ẹhu unu gẹ unu dụ, unubẹ iwe-l'obu-ọchi-l'ọnu-eze whẹ-e nteke ono o kfuchiru Chileke sụ:

“ ‘Ndu-a mu bụlekwaa eli ọnu bẹ whẹ gude aja mu,

obu whẹ tekwaru ẹnya l'ẹka mu nọ.

7Whẹ l'abarụ mu ẹja nggonggo,

Ọ bụru iwu, madzụ tụru bẹ whẹ l'ezhi gẹ-woo

l'ọo iwu nke mụbe Chileke.’

8Unu l'ahajẹ iwu Chileke gbee melahaa omelalị madzụ doberu.” 9Jisọsu sụkwa whẹ whọ: “Ọ nụwho l'unu manụkaru iwhe meru g'o gude unu gbechia kpacha iwu, Chileke sụru t'e mejee je emelahaa omelalị madzụ doberu. 10Mósisu sụkwaru: ‘Yejeru ne ghu lẹ nna ghu ugvu’ sụkwawho: ‘Onye whuru ne iya m'ọ bụ nna iya iwhu, t'e gbua onye ono egbu.’ 11Ọle unubẹdua bya l'ekfu ekfu unu sụ: ‘Ọ -bụru lẹ madzụ bẹ sụru nna iya, ọbu l'ọo ne iya l'iwhe mu gege egude kwọo whẹ bẹ bụakwa kọbanu, bụ iya bụ iwhe a nụru Chileke’ 12bẹ unu gụfuakwaru onye ono t'o bo yeheru ne lẹ nna nwụru iya ẹka, unu eje ekwehe ekwekwe owhu t'o yeru whẹ ẹka. 13Unu shi nno gude l'unu l'eme iwhe omelalị unu l'ezhi, mee okfu Chileke: ọ bụru iwhe mmaanụ mẹwaro iwhe ọdo dụkota nno unu l'emekaa.”

Iwhe l'emerwuje madzụ

(Mát. 15:10-20)

14O kukoo igwe-ọha ono ọdo tẹ whẹ byakụbe iya ntse. Ọ sụ whẹ: “Unu ngabẹkwa nchị l'iwhe mu bya l'e-kfu nggẹ o doo unu ẹnya. 15Ọ tọ bụkwa iwhe madzụ wotaru lẹ mgboko-o eri l'ọnu l'emerwuje onye ono, ọ kwa iwhe shi madzụ l'ime fụta bụ iwhe l'emerwuje iya. 16Onye ụzo-nchị dụ t'ọ nụa ya.” 17Ọ ghalẹwho ndu ono l'ẹka ono bahụ l'ụlo, ndu l'etso ụzo iya jịlahaa ya iwhe okfu ono o kfuru whẹ ono bụ. 18Ọ sụ whẹ: “?Unubẹdua dụfua g'ọo ndu l'ẹte adụa iwhe l'edoje whẹ ẹnya? ?Unu ta akabẹfudua marụ l'ọ tọ dụ iwhe madzụ wotaru lẹ mgboko-o eri l'ọnu bụ iya l'emerwuje onye ọbu? 19O noo l'iwhe ono ta abahụdu iya l'obu, ọo l'ẹwho bẹ l'ọobahuje, ya eshi ẹka ono a nyịfu iya?” Jisọsu kfua nno gude goshi l'iwhe bụkota iwhe lile l'eeri eri te emerwujedu madzụ. 20Ọ sụ whẹ: “Ọo iwhe shi madzụ l'ime obu bụ iwhe l'emerwuje iya-o. 21O noo l'ọo l'ime obu madzụ bẹ l'ooshikotaje mbụ iwhe bụ-zhia ejo ọriri gẹ ejo ọriri ha mẹe ọkpa lẹ nwanyị; o shi iya mbụ ozhi oshi mẹe ogbu madzụ, 22mẹe oori ogori mẹe oke-ẹnya mẹe iwhe bụ-zhia ejo iwhe mẹe ụgho mẹe ụrwu-alị mẹe ọkponyiberu iwhe madzụ ẹnya mẹe okfurwushi madzụ mẹe etsetse mẹe ome eswe. 23Ejo iwhe lile ono g'ọ ha shikota madzụ l'ime obu tẹmenu ọ bụru iya bụ iwhe l'emerwuje madzụ.”

Nwanyị l'ẹte abụa onye Ju woru onwiya ye Jisọsu l'ẹka

(Mát. 15:21-28)

24Jisọsu gbalihu l'ẹka ono tụgbua jeshia alị dụ-wheru Taya yele Sáyịdonu mgburumgburu. O rwua ẹka ono ọ bahụ l'uwhu lanụ je anọdu. Ọ dụle iya whọ ọ dụ g'e shi t'o nwe onye marụ nụ, obenu l'o to domikotadu onwiya. 25Ọo ya bụ, nwanyị lanụ ọbu ọgvu bu nwata ụlo iya nke nwanyị l'ẹhu nụa nke Jisọsu. Ọ tụgbulekwaruwho bya adaa l'alị lẹ mgboro ọkpa iya. 26Nwanyị ono bụ onye Girísu. Ẹka a nwụru iya anwụ bụ l'alị Finíshiya Sáyira. Ọ bya aryọlahaa Jisọsu t'ọ chịfu ọgvu ono, bu nwata ụlo iya ono l'ẹhu. 27Jisọsu sụ iya: “Ngabẹkwawho t'a nụjifuada ụnwegirima ẹwho tẹmenu, nke l'ọ tọ dụdu ree t'e wota nri ụnwegirima nụ ụnwu-nkụta.” 28Nwanyị ono sụ iya: “Ee! L'o noo dụa nno Onye-Nwe-Ọha, ọle ọbu mẹe ụnwu-nkụta, nọ lẹ mkpula oshi, a tukoberu nri eri l'akabẹjekwaa tụtua ụnwu onu nri shi lẹ nri ụnwegirima dashịa.” 29Jisọsu sụ iya: “Eshi-ọwhu ị kfuru nno, lashia, l'ogvu ono hawarụ nwa ghu.” 30Ọ larwua ụlo iya, ọgvu-a hawaa nwata-a. Ọ zẹ-zhiawho nwagbọrii l'eli iwhe-azẹe whẹ.

Jisọsu l'eme t'onye l'ada nkụchi nụlahaa iwhe

31Jisọsu bya alụfuta l'alị ono dụkube Taya bya aghajaa l'alị Sáyịdonu jeshia l'eze-ẹnyimu Gálili, ọ bya erwua Obodo-Iri. 32O nweru ndu dutaru iya onye l'ada nkụchi, l'atsụkwawho ntsụ, whẹ ryọlahaa ya t'o byia ya ẹka. 33O shi l'ẹka ono igweligwe ndu ono dọru duru iya iche bya eye iya mkpụshi-ẹka lẹ nchị iya whẹ ẹbo, gbụta ọnu-mini kpaa ya l'ire, 34ọ palia ẹnya imeli tsụa ude sụ iya: Efata, bụ iya bụ: Kosahu!

35Ime nchị iya whẹ ẹbo kosahukota, ire iya ono tọshihu, o kfulahaa okfu gbororo. 36Jisọsu nmaarụ whẹ ọkwa sụ whẹ t'ọ bọ dụkwa onye whẹ l'ekfuru iya. Ọle ọobuje nteke o kfuru nno, whẹ egbeenu ka iya aryakashị. 37Ọ tụfu ndu lile nụru iya nụ ẹhu nke ẹtu, whẹ sụ: “?Ọ kwa l'i whụru gẹ l'oomekotaje iwhe lile ree, megee mee t'onye l'ada nkụchi nụje iwhe lẹ nchị, mee ndu l'ete ekfu okfu, whẹ kfulahaa ya.”

Currently Selected:

Makụ 7: Ezaa

Highlight

Copy