Jọnu 19

1Ọo ya bụ, Páyileti bya akpụta Jisọsu sụ t'e chia ya iwhe. E chia ye ya, chigoo ya echigo. 2Ndu ojọgu bya egude ogvu kpaa okpu-eze bya ekpube iya l'ishi, bya achịta uwe mkpẹelanu, l'eke uswe uswe yee ya. 3Whẹ byakfuta iya bya asụje iya: “Anyi ekele ghu-o, Eze ndu Ju!” Whẹ l'echikwa iya whọ ẹka.

4Páyileti bya ejekfu ndu Ju ono ọdo je asụ whẹ: “Unu lekwa lẹ mu l'akpụfutaakwaru unu nwoke-e nke ọwhu unu l'a-ma l'ọ tọ dụdu ejo-iwhe mu whụru, o meru.” 5Ọo ya bụ, Jisọsu futashia kpuru okpu-eze ono, e gude ogvu kpaa, yekwaawho uwe mkpẹelanu ono, l'eke uswe uswe. Páyileti sụ whẹ: “Unu lee nwoke ọbu.”

6Ọ bya ebe nteke onye ishi ndu l'agbajẹ ẹja nụ Chileke mẹe ndu nche whụru iya, whẹ tụko chishia sụ: “Kpọpyabe iya l'oswebe! Kpọpyabe iya l'oswebe!”

Páyileti sụ whẹ: “Unubẹdua l'onwunu kputa iya je akpọpyabe iya l'oswebe ọbu, o noo l'ọ tọ dụdu ejo-iwhe mu whụru, o meru.”

7Ndu Ju sụ iya: “Eshi-ọwhu o gudezhiwaa ọnu iya sụ l'ọo ya bụ Nwa Chileke ọbu b'a kfugbujekwa iya, o noo g'iwu anyi sụru t'e mejee onye kfuru nno.” 8Páyileti nụlewho iwhe ono, ọ kabaanụ ọotsu egvu. 9Ọ bya abahụ-whu azụ l'ụlo ono je ajị Jisọsu sụ iya: “?Ọ nụ-a awee b'i shi?”

Jisọsu gbagbua ya lẹ nkụchi. 10Ọo ya bụ, Páyileti sụ iya: “?T'i yeduru mu ọnu? ?Ọ dụ gẹ tị madụ l'ọo mu b'ọ tụkoru dụ l'ẹka? Mu -sụ t'a haa ghu, a haa ghu; nteke mu -sụru t'a kfugbua ghu l'oswebe, a kfugbua ghu.”

11Jisọsu sụ iya: “Ị tị ge enwekwa ẹgube ike ọwhu dụ nno l'ẹka mu nọ, nggẹ l'ọ tọ bụ Chileke, bu l'igwe nụru ghu iya. Ọo ya bụ, l'iwhe-dụ-ẹji, o meru mbụ onye ono, meru e gude mu bya akpụru nụ ghu bẹ ka nke ghu shii.”

12Páyileti nụlewho iwhe ono, ọ chọkashilahaa ụzo, ya l'e-shi haa Jisọsu. Ọle ndu Ju chishiaru mkpu sụ: “I -hazhiwaa nwoke-e t'ọ la, anyi amarụ l'ị tị tụduru ike yeru ishi ọ-chị-ọha, bụ Siza. Iwhe bụ onye gude ike nke ẹka iya mebe onwiya eze bụakwaa ọhogu Siza.”

13Páyileti nụlewho iwhe lile ono, whẹ kfuru, o dufuta Jisọsu etezhi, yẹbedua bya anọdu anọdu lẹ nggada ọbu, onye l'ekpeje ikpe l'aanọduje ekpe ikpe, dụ l'ẹka ọbu, l'eekuje: Ẹka, e gude ẹwhuru nmalia anmali. Iwhe l'eekuje iya l'okfu Arámayiku bụru Gabata. 14Ọ bya ebedelewho l'ẹnyanwu-ọlwa-l'ishi lẹ mbọku ono, bụ chi sahụ, ya abụru mbọku l'aawata ori-oge O-je-ghata ono, Páyileti sụ ndu Ju: “Unu lee eze unu.”

15Whẹ chishia sụ: “Kfugbua ya! Kfugbua ya! Kpọpyabe iya l'oswebe!”

Páyileti jị whẹ sụ whẹ: “?Unu l'ekfu tẹ mu kpọpyabe eze unu l'oswebe?”

Ndu ishi ndu l'agbajẹ ẹja nụ Chileke ono sụ: “Anyi te enwehekwa eze ọdo t'a gbahaa ishi ọ-chị-ọha, bụ Siza.”

16Tọ dụ iya bụ, Páyileti kpụru iya nụ ndu ojọgu tẹ whẹ je akpọpyabe iya l'oswebe.

Aakpọpyabe Jisọsu l'oswebe

(Mát. 27:32-44; Mak. 15:21-32; Luk. 23:26-43)

17Ọo ya bụ, whẹ kpụta Jisọsu whẹ l'iya lịru tụgbushia, ọ bụru iya vu oswebe iya ono jeye whẹ rwua ẹka ọbu, l'eekuje “Ọkpokoro ishi.” Iwhe l'eekuje ẹka ono l'okfu Arámayiku bụ Gọlugóta. 18Ọ bụru l'ẹka ono bẹ whẹ kpọpyaberu iya l'oswebe. Whẹ kpọpyabekwawho unwoke labọ ọdo l'ẹka ono, kpọpya-begee whẹ iche iche; onye lanụ l'ẹka iya ọwaa, onye ọwhu l'ẹka iya ọwhu. Jisọsu nọdu whẹ l'echi. 19Páyileti bya edekwawho iwhe edede kfube l'eli oswebe ono. Iwhe ọbu, o deru bụ: JISỌSU, ONYE NÁZARETU, EZE NDU JU. 20Igweligwe ndu Ju gụa iwhe ono, o deru ono nkele ẹka ọbu, a kpọpyaberu Jisọsu ọbu dụkube mkpụkpu ono ntse. Okfu, e gude dee ya bụru Arámayiku mẹe Látinu mẹe Giríku. 21Ọo ya bụ, ndu ishi ndu l'agbajẹ ẹja nụ Chileke mẹe ndu Ju bya asụ Páyileti: “Be edeshi lẹ nwoke-e bụ Eze ndu Ju. Iwhe l'ii-dechia bụ lẹ: Nwoke-e sụru l'ọo yẹbedua bụ Eze ndu Ju.”

22Páyileti sụ: “Iwhe mu deru bẹ mu dewaru.”

23Ọo ya bụ, ndu ojọgu ono kpọpya-begelewho Jisọsu l'eli oswebe ono, whẹ bya achịta uwe iya l'ooyeje l'ẹhu kee ụzo ẹno; onye ọwhu nọnu lẹ ndu ojọgu ono, ya ahata ụzo lanụ. Whẹ bya achịtakwawho eze uwe ime ẹhu iya. Ọwhube ono bụ uwe mkpẹelanu, l'ẹte adụa ẹka a gbagbabẹru iya agbagbabẹ m'ọo l'ẹka lanụ; e shizhiawho l'imeli kwee uwe mkpẹelanu ono byeye l'ụzo alị.

24Ọo ya bụ, ndu ojọgu ono sụ onwowhe: “T'anyi ba alakakwa uwe-e alaka, t'anyi tụa ido marụ onye l'achịta iya nụ.” Iwhe ono tụkoru mekota, e shi nno iwhe e deru l'ẹkwo Okfu Chileke vụkota, bu iwhe e deru sụ:

“Whe kekashiru uwe mu l'ime onwowhe,

O be l'ọwhube uwe ọwhu mu l'eyeje l'ime ẹhu,

whẹ tụa ido tẹ whẹ marụ onye l'a-chịta iya nụ.”

O noo iwhe ndu ojọgu ono meru ndono.

25Ndu kfụru lẹ mgboro oswebe Jisọsu ono nteke ono bụ ne iya mẹe nwune ne iya nke nwanyị mẹe Méri nyee Kulọ́pasu mẹe Méri Mágudala. 26Jisọsu whụlewho ne iya mẹe onye ono, l'etso ụzo iya, o yeru obu gẹ whẹ kfụkube ẹka ono, ọ sụ ne iya: “Nwanyị, lekwa nwa ghu nwoke.” 27Ọ sụkwawho onye ono, l'etso ụzo iya: “Lekwa ne ghu.” Shitalekwawho mbọku ono, onye ono, l'etso ụzo Jisọsu ono duta Méri lashia ibe iya yẹle iya je eburu.

Anwụhu Jisọsu

(Mát. 27:45-56; Mak. 15:33-41; Luk. 23:44-49)

28E megelewho, Jisọsu marụ l'iwhe lile gvụkotawaru ntaa. Ọo ya bụ ọ sụ: “Ẹgu mini l'agụkwa mu.” Iwhe ono b'o kfuru nggẹ iwhe e deru l'ẹkwo Okfu Chileke a-vụkota g'e deru iya. 29O nweruwho nwa ite sụru l'ẹka ono mmẹe vayịnu, shihuru ụka jiru eji. Ọo ya bụ, whẹ bya ewota sapo tsẹe lẹ mmẹe oshihu-ụka ono, ọ ngụgole iya whọ; whẹ bya etsebe iya l'ẹkali oshi ịsopu mabẹ iya t'o rwua ya l'ọnu. 30Nteke Jisọsu ngụtaleruwho mmẹe oshihu-ụka ono; ọ sụ: “Ọ gvụwaru.”

O whozeta ishi, ọ bụru iya ọtu-buhu ume.

Anmafuru Jisọsu mgburẹku

31E megelewho, ndu Ju je aryọo Páyileti tẹ whẹ je akukwoshia ndu ono, a kpọpyaberu l'oswebe ono oshi ọkpa, nke ọwhu l'a-patakọta whẹ pafụ. Ishi iya bụru lẹ mbọku ono bẹ bụwaa chi -sahụ; ya abụru mbọku ọtuta-ume. Whẹ l'emekwa nụ t'odzu ndu ono ba atụko dụ-gee l'eli oswebe ono lẹ mbọku ọtuta-ume ono. Mbọku ọtuta-ume onona bẹ bụ whẹ eriri eriri. 32Ọo ya bụ, ndu ojọgu ono bya akukwoshia ọkpa onye nke mbụ, kukwoshikwaawho ọkpa onye ọwhu, mbụ ndu ono, a tụkoru whẹ lẹ Jisọsu kpọpyabe. 33Whẹ bya erwua ẹka ọwhube Jisọsu nọ, whẹ whụa l'ọ nwụhuhawaruroo, whẹ haa ya, whẹ ta akukwoshihe yẹbedua ọkpa. 34Tọ dụ iya bụ l'onye ojọgu lanụ agbashilekwawho wota arwa iya nma Jisọsu lẹ mgburẹku. E jia ekfu, mmee yẹle mini shi iya l'ẹka ono alwa patapata. 35Ọo onye whụkotaru iwhe lile-e nteke l'ọnwu bẹ tụru ọnu iwhe ọ whụru. Iwhe ono, o kfuru tụkoru bụkotaru ọkpobe-okfu, yẹbedua l'onwiya makwarụwho l'ọo ire-lanụ bẹ ya l'ekfu. Ọo ya bụ, t'unubẹdua l'onwunu kwetakwawho. 36Iwhe lile ono mekotaru nke ọwhu iwhe e deru l'ẹkwo Okfu Chileke l'a-vụkota lẹge e deru iya. Ọ sụru: “Ọ tọ dụkwa ọkpu, dụ iya l'ẹhu ọwhu a bya l'a-kukwo akukwo m'ọo nnanụ.” 37Tẹmenu o nwekwaru ẹka ọdo, e deru l'ẹkwo Okfu Chileke sụ: “Whẹ l'e-gude ẹnya whẹ ele onye ono, whẹ nmarụ arwa.”

Eeli Jisọsu

(Mát. 27:57-61; Mak. 15:42-47; Luk. 23:50-56)

38E megelewho, Jósẹfu, onye Arimatíya jekfu Páyileti je aryọo ya tẹ ya pata odzu Jisọsu. Páyileti kweta t'ọ pata iya. Ọo ya bụ, o bya eje apazeta odzu Jisọsu ono pata pafụ. Jósẹfu ono bụkwawho onye l'etso ụzo Jisọsu, ọle ootso iya l'edomi nke l'ọotsu ndu Ju egvu. 39Nikodímọsu byakwawhọ. Ọo ya bụ onye ono dụ mbụ byakfutajehawa Jisọsu l'ẹnyashi. Ọ byata vuru mmanụ-ehuhu mẹru, a gwọkoberu iwhe l'eekuje alozu. Mmanụ ono l'eshikaa mkpọ mebyi shii. A tukobe mmanụ ono l'igwe, l'aatụje ẹrwa iwhe bẹ ẹrwa iya hakwa g'ọo ẹrwa ẹkpa unu labọ, unu jigeeru eji. 40Whẹ bya apazeta odzu Jisọsu bya egude ẹkwa-odzu, l'acha ụcha yẹle mmanụ ono, nshishi iya l'atsọ ụtso kwaa ya, bụ gẹ whẹbe ndu Ju l'akwajẹ odzu whẹ nke elili. 41O nweruwho mgbabu, dụ l'ẹka ono, a kpọpyaberu Jisọsu l'oswebe. O nwekwaruwho ilu, dụ lẹ mgbabu ono. Ilu ono b'a tụru nke ọwhuu; tọko dụhawaa onye ọdo, e lijeru iya. 42Ọo ya bụ, whẹ pata Jisọsu je elia l'ẹka ono eshi mbọku ono bụwaa mbọku nkwakọ nke mbọku ọtuta-ume ndu Ju, ilu ono bya adụfuaro ntse.

Currently Selected:

Jọnu 19: Ezaa

Highlight

Copy